Z wudaća: pjatk, 20 apryla 2018

njedźelu hornjoserbsce

11:00 Łužica tutón tydźeń, mjez druhim wo mobilizowanju serbskeje rěče

11:20 Reportaža: biobur Toni Rebiš w Kanecach

11:45 Wo podawkach we Wostrowcu

12:00 Nabožne wusyłanje

 (Gerat Wornar)

po tym zbožopřeća

delnjoserbsce

12:30 Aktualny magacin, mjez druhim wo serbskim wukubłanju na Choćebuskim OSZ

13:00 Serbske baje

13:40 Nabožne wusyłanje

  (Adelheid Dawmowa)

po tym zbožopřeća

Choćebuz (SN/mwe). Serbja njeswjeća jutry jenož jako křesćanski swjedźeń. Woni pěstuja tež nałožki z prastarych časow, zo njebychu so pozabyłe. Redaktorojo delnjoserbskeho magacina Łužyca běchu z kameru po puću a jutrowne tradicije zapopadnychu. Tak zapala w Braniborskej přeco časćišo jutrowny woheń. Za Serbow je to přiležnosć, swoju rěč a kulturu pěstować. Tak tež při daledawanju technikow jejkadebjenja wot jedneje generacije k druhej. A nic naposledk je jedyn z najwoblubowanišich jutrownych nałožkow tež w Błótach jutrowne spěwanje. Žony podadźa so při schadźenju słónca spěwajo dom wot domu. Wo tym wjace jutře, 21. apryla, w 13.05. hodź., w telewizijnym sćelaku RBB.

Dóstanje diakonsku swjećiznu

Drježdźany. Biskop Heinrich Timmer­evers wudźěli jutře, 21. jutrownika, w 10 hodź. na Božej mši w Drježdźanskej katedrali Pětrej Mrózej z Ku­lowca diakonsku swjećiznu. Wěriwi su na nju přeprošeni a měli so za diakona kaž tež wo duchowny dorost modlić.

Ekspedicija do ćěła

Budyšin. W šěsć wustajenskich wo­błukach je wustajeńca „Fascinacija čłowjek“ w Budyskim Centeru na Žitnych wikach čłowječemu ćěłu wěnowana. Přistup­na je ekspozicija hač do jutřišeho, 21. jutrownika. Zajimcy móža sej pola cen­teroweho managementa tež wosebite wodźenje skazać.

Duchowna hudźba

Budyšin. Lipšćanski gospelowy chór pod nawodom Maika Gisdźinskeho wuhotuje zajutřišim, 22. apryla, wuwzaćnje hižo w 17 hodź., w Budyskej cyrkwi Na­šeje lubeje knjenje „Duchownu hudźbu“. Zaklinča gospele a spirituale. Zastup je darmotny.

Požohnowanje motorskich

Ralbicy. Popołdnjo z požohnjowanjom motorskich zahaji so njedźelu w 14 hodź. z nyšporom w Ralbičanskej cyrkwi. Přizamknje so zhromadny wulět. Po tym, něhdźe w 16.30 hodź., je wjesołe zakónčenje w Nowoslicach předwidźane.

Hraja wo wokrjesne mišterstwo

Jutře, sobotu, wuhraja Sokolnik Wjazońca, ST Marijina hwězda a SC Wojerecy titul wo wokrjesne wolejbulowe mišterstwo. W sportowej hali w Pančicach-Kukowje hraja wot 10 hodź. Pančicy přećiwo Wojerecam, wot 11 hodź. Pančicy přećiwo Wjazońcy a wot 12 hodź. Wojerecy přećiwo Wjazońcy.

Derby w Rakecach

Prěnje blidotenisowe mustwo DJK Konjecy hraje dźensa wječor wot 19 hodź. w Rakecach. Pjaty 1. wokrjesneje ligi stafle­ 1 wočakuje wicemištra. Za wobaj cyłkaj budźe to poslednja hra hrajneje doby 2017/2018.

Start do zeleneje sezony

Jěchanske sportowe towarstwo Kulow startuje njedźelu, 22. jutrownika, z ko­njacym turněrom do sezony 2018. Wot 10 do 17 hodź. změja w Kulowje wjacore wu­bědźowanja: 1. křižne skakanje přez parcours­, 2. małe skakanje z kałanjom, 3. wodźenje konja, 4. srjedźne skakanje z kałanjom a 5. wulke skakanje z kałanjom. Do startoweje lisći­ny zapisali su so tež wjacori Serbja.

Kónctydźenska kopańca

21.04. 14:00  Jednota Kamjenc –

  SG Union Sandersdorf

21.04. 14:00  Rakečanske ST –

  ST Radwor

21.04. 15:00  ST Wulka Dubrawa –     SJ Chrósćicy II

22.04. 13:30  Budissa Budyšin –

  Luckenwalde

22.04. 10:30  ST Ćisk II –

  ST Marijina hwězda

Wodorunje: 3 znajomosće, 5 kóšty za posyłki, 6 z njeho je swěčka, 7 wódne jězdźidło, 10 dołhi, njelepy kadla, 13 alkoholiski napoj, 14 spisar, 15 afriski kraj

Padorunje: 1 je zatusnjeny, 2 stat, 3 oma serbsce, 4 rozrězane drjewo, 8 ze štomami wobdata dróha, 9 horiny w Aziji, 11 druhi grjekski pismik, 12 Narr zeserbšćene

Solidna financna situacija dowola Rakečanskej gmejnje wobšěrne twarske naprawy nastorčić. Z nimi je so gmejnska rada na swojim zašłym posedźenju zaběrała.

Rakecy (JK/SN). Wobšěrne twarske a ponowjenske naprawy steja na lětušim planje Rakečanskeje gmejny. Te maja so derje a dokładnje přihotować. Tuž mějachu gmejnscy radźićeljo na zašłym posedźenju tójšto razow wo tym wothłosować, kotra firma ma kotry planowanski nadawk dóstać a zwoprawdźić. Tak ma Budyski planowanski a inženjerski běrow Exner & Schramm planować, kak najlěpje ponowić Holanski puć w Rakecach, ponowić a wutwarić Jitkowki puć w přemysłowej přestrěni kaž tež wutwarić a ponowić naměsto před něhdyšej Rakečanskej radnicu. Za planowanske a twarske naprawy zasadźuje Rakečanska gmejna přewažnje spěchowanske srědki z najwšelakorišich programow. Sama so wona ze swójskim podźělom wobdźěli. Na­město před něhdyšej radnicu wutwarja z pomocu zalutowanych srědkow při lońšim wobnowjenju torhošća.

Budyšin. Mato Krygar a Sonja Hrjehorjowa přeprošujetaj wšitkich zajimcow na druhe rozmołwne koło wo mobilizowanju serbskeho žiwjenja w Budyskich narańšich kónčinach a w sprjewinym měsće samym jutře, sobotu, wot 10 do 12 hodź. do Röhrscheidtoweje bašty w Budyskim Serbskim ludowym ansamblu. Mjez druhim póndźe wo projekty za swójby a dźěći, wo rejwanske projekty za dorosćenych a wo małe serbske znamjenja w zjawnosći.

Ideje młodostnych pytane

Budyšin. Tež lětsa zaso je młodźina namołwjena, pod hesłom „Přimaj so gratu! Młodźina.akcija.zabawa“ swoje ideje za projekty zapodać. Hač do 30. apryla móža so zajimcy na Domowinje pola kubłanskeje referentki za młodźinu Rejzki Krügeroweje přizjewić. Posedźenje jury, na kotrymž serbska młodźinska přirada wo budgetu 1 000 eurow rozsudźi, wotměje so 5. meje w Serbskim domje. Informacije nadeńdu zajimcy pod www. my.domowina.de.

Iniciatiwa a rada so zetkatej

Jan Bjedrich je wjele lět wobraz Njebjelčanskeje gmejny porjeńšał

Njebjelčicy (AK/SN). Nalěćo je w Njebjelčicach na mnohich městnach widźeć. Tež na powyšenych a z witkami wobdatych hrjadkach při Bjesadźe tójšto kwětkow kćěje. „To je moje najnowše dźěło. W januaru sym z tym započał“, praji Jan Bjedrich hordźe. „Na tymle městnje wo­srjedź wsy ma cyłe lěto kćěć“, měni 68lětny Njebjelčan. 18 lět bě wón w gmejnje čestnohamtsce za pućiki zamołwity. Do toho bě so we wobłuku ABM a jedno­eurowych městnow wo porjeńšenje wjesnych dźělow starał.

Přespěšnje přez wjes

Lěskej. Nimale dwójce tak spěšnje kaž dowolene je zawčerawšim dopołdnja wodźer Forda na zwjazkowej dróze B 156 přez Lěskej smalił. Z tym bě wón najspěšniši wot 1 300 jězdźidłow, kotrež su tam do wobeju směrow kontrolowali. Šofer změje nětko 200 eurow pokuty płaćić, dóstanje dwaj dypkaj w Flensburgu a dyrbi měsac nóžkować. Dohromady 128 šoferow so po předpisanej spěšnosći 50 km/h njeměješe. W 94 padach wostanje při warnowanskim pjenjezu, 34 wodźerjow pak dyrbi pokutu płaćić.

Wopyt pola blidarja-restawratora Mariana Wjenka we Wotrowje

Mašiny z połnej paru běža. Wšitke hromadźe nimale melodisce klinča. Přijomna dźěłowa atmosfera Wotrowsku Wjenkec blidarnju wobdawa. Čuješ, zo je kóždy dźěłacy w modernizowanej dźěłarni z ćěłom a dušu při wěcy, při dźěle. Wóń drjewa přijomnje do nosa stupa. Stejiš kaž zakuzłany wosrjedź mašinow, dźěłacych a meblowych dźělow. Wot lěta 2010 nawjeduje šef blidarnje, diplomowy inženjer za nutřkotwar Marian Wjenk, tradicionalny zawod. Přewzał je jón wot swojeho nana Jana Wjenka. Mjeztym je sej młody Serb natwarił dalšu wulku dźěłarnju-halu. Blidarnja je so pod jeho nawodom specializowała na twar meblow, sakralneho mobiliara, na restawraciju a rekonstrukciju hódnych drjewjanych wudźěłkow. „Sym rady nadawk přiwzał, blidarnju dale wjesć, w kotrejž sym jako hólčec dźědej a nanej při dźěle přihladował. Sym wjesoły, zo je mi nan při přewzaću zawoda pomhał, tak zo móžu nětko z połnej zamołwitosću, tež za swojich sydom přistajenych, skutkować.“