Z wudaća: pjatk, 15 junija 2018

Podstupim (dpa/SN). Braniborske krajne knježerstwo chce njetrjebawše ničenje žiwidłow wobmjezować. Hišće lětsa chcedźa tuž zwjazk přećiwo brojenju žiwi­dłow załožić. To zdźěli minister za škit přetrjebarjow Stefan Ludwig (Lěwica). Wón předstaji nowu přetrjebarskopolitisku strategiju, kotruž bě kabinet spočatk tydźenja wobzamknył.

Kóždy wobydler Němskeje wob lěto přerěznje 82 kilogramow žiwidłow do wotpadkow mjeta, rěka w předpołoženym dokumenće. Mjenowany zwjazk ma po planach knježerstwa producentow, wikowarjow, zapakowansku industriju a transportne předewzaća zapřijeć.

Andrzej Duda planuje wothłosowanje wo změnje pólskeje wustawy

Waršawa. Pólski prezident Andrzej Duda chcył Zakładny zakoń kraja aktualizować a nowym poměram přiměrić. Zwoprawdźić chce swój zaměr z ludowym wothłosowanjom, při kotrymž wobydlerjo wo změnach rozsudźa. Projekt to, kotryž bě Duda minjene lěta stajnje zaso připowědźił. Tola samo w swójskich rjadach so přiběrajcy kritika jewi.

Prezident Duda je cyłkownje 15 prašenjow zestajał, na kotrež měli ludźo we wólbnej kabinje z haj abo ně wotmołwić. Tak dyrbja mjez druhim rozsudźić, hač měła Pólska w Europskej uniji wostać, hač měło pólske narodne prawo nad europskim prawom stać abo hač njedyrbjeli so kompetency prezidenta rozšěrić. Haj samo prašenje, hač dyrbjał kraj potrěbne swójby abo tajke z wjele dźěćimi pjenježnje dale podpěrać, měło so po woli prezidenta we wustawje zakótwić.

Nětko wona zaso knježi: kopańca! Prašenje, kak měli so fanojo a přihladowarjo před wobrazowkami nastupajo politisku debatu kołowokoło swětowych mišterstwow zadźeržeć, je runje tak wažne kaž njetrjebawše. Budźmy sprawni: Politikarjo su hižo přeco sportowe wulkopodawki ­jako swoje jewišćo (znje)wužiwali. Bjez dźiwa – wšako móže sylna identifikacija z načasnymi gladiatorami zhromadnosć šěrić abo njelubozne rozsudy kaž tež přeco zestajanych parlamentow kašěrować, druhdy samo runočasnje. Dołhož je nam wědome, zo njehodźitej so sport a politika (wjace) dźělić, smě sej kóždy woměrje hry wobhladać a so nad wukonom „swojeho“ mustwa wjeselić. Hač damy so wot prominentnych wosobinow wobwliwować, mamy přeco hišće sami w rukach. ­Jenož telko: Pan Putin, towarišć Trump abo eminenca Erdoğan, ale tež maći Merkel na hrajnišću njesteja. Bosćan Nawka

21. swětowe koparske mišterstwa (WM) su so z dobyćom hosćićela zahajili. Ruska přesadźi so w zazběhowej partiji přećiwo Sawdi-Arabskej jasnje z 5:0. Mustwo Sbornaja drje njeje runjewon najlěpši wukon pokazało, za dobyće pak přiwšěm dosahaše, dokelž słuša sawdi-arabska wubranka k najsłabšim wobdźělnikam WM. Hižo w 12. min. widźeše 81 000 ludźi w Moskowskim stadionje Lušniki prěnje wrota. Ruski srjedźopólny hrajer Jurij Gazinskij docpě z hłowu ­1:0. Hižo w 24. min. dyrbješe jedyn z naj­lěpšich hrajerjow Alan Dzagojew zranjenja dla trawnik wopušćić. Tak pósła trenar Stanislaw Čerčesow Denisa Čeryšewa na hrajnišćo, a tón trjechi krótko do połčasa 2:0 (43.). Dokelž přiličeja tež Rusku po swětowej rjadnej lisćinje k słabšim wubrankam, nje­nasta žadyn porjadny dwubój.

Praha (ČŽ/K). Njedźiwajcy fakta, zo čěske hospodarstwo lětsa pomałšo přibywa hač minjene lěta, je bjezdźěłnosć w meji přiwšěm dale woteběrała – z 3,3 procentow na runje tři procenty. Dźěło pytacych ludźi bě kónc róžownika 120 000, štož je najmjenje wot lěta 1997. Generalna direktorka dźěłoweho zarjada Čěskeje republiki Kateřina Sadílková ma za to, zo so ličba bjezdźěłnych tež w přichodnych měsacach hišće trochu pomjeńši. „Sprěnja hospodarstwo kraja dale rosće, ­a zdruha potrjeba sezonalnje dźěłacych hišće přiběra. Předewzaćeljo pytaja nuznje techniske mocy kaž tež montažowych a twarskich dźěłaćerjow, šoferow nakładnych awtow a předewšěm dźěłowe mocy w gastronomiji a strowotni­stwje. Najmjenje bjezdźěłnych je z 1,9 procentami w Plzeňskim a Pardubicskim wobwodźe, najwjace porno tomu ze 4,8 procentami w Morawsko-šleskim regionje. W Praze-wuchod 1,1 procent ludźi dźěło nima, w Karvinje 7,2 procentaj.

Kensuke Ohira je zawčerawšim w tachantskej cyrkwi Budyske pišćelowe lěćo zahajił. Hač do kónca awgusta hraja renoměrowani organisća kóždu srjedu w 19.30 hodź. na wobnowjenym instrumenće twornje Eule. Mjez druhim wustupi 18. julija Tomaš Žur. Wo­se­bity koncert budźe wuwzaćnje přichodnu póndźelu. To zaklinča rědke twórby za dwoje pišćele, kotrež předstajitaj Fiedemann Böhme a Michael Vetter. Zastup je darmotny, zarjadowar Kirchenmusikwerk Bautzen pak prosy wo dary. Foto: SN/Maćij Bulank

Chróšćanska putniska hospoda woswjeći dźesaćlětne wobstaće

Chrósćicy (SN/MWj). Runje wčera před dźesać lětami je Monika Gerdesowa w Chrósćicach swoju putnisku hospodu wotewrěła. Tónle jubilej tam wot 22. do 24. junija z runje tak wobšěrnym kaž naročnym programom woswjeća.

Cyle w znamjenju dźesaćlětneho wobstaća Budyskeho wokrjesa w swojej dźensnišej formje steji klóšterski a swójbny swjedźeń zajutřišim, ­njedźelu, w klóštrje Marijinej hwězdźe.

Pančicy-Kukow (SN/MWj). „Zhromadnosć – žórło žiwjenja“ rěka hesło klóšterskeho a swójbneho swjedźenja njedźelu, 17. junija, w klóštrje Marijinej hwězdźe w Pančicach-Kukowje. Za njón su Miłočanski Křesćansko-socialny kubłanski skutk, Bu­dyski wokrjes a klóšterske sotry pisany program za cyłu swójbu přihotowali. ­Zastup je darmotny.

Budyšin (UM/SN). Twarski projekt železniskeho mosta na Budyskej Zeppelinowej ma po wšěm zdaću hižo nalěto 2019 wotzamknjeny być – a tak sydom měsacow prjedy hač planowane. To rjekny projektowy nawoda Oliver Franke z předewzaća Hentschke Bau zawčerawšim we wobłuku stajneho blida CDU, kotrež wotmě so tónraz na twarnišću na juhu města Budyšina.

Časowy předskok docpěchu z eficientnišej twarskej technologiju. Tak su město planowanych pjeć pomocnych mostow jenož jenički natwarili. „Wosebite wužadanje je, zo dźěłamy při běžnym wobchadźe. Zawrjenske časy za železnisku čaru su hižo tři lěta do toho na minutu postajene. To njesmě so ničo stać“, rozłoži Franke. Chětro napjate bě, jako dyrbjachu lětsa w februaru dźěl mosta při minus 15 stopnjach zasunyć.

Běły Chołmc. Na 90lětne wobstaće swojeje dobrowólneje wohnjoweje wobory zhladuja wot dźensnišeho hač do njedźele w Běłym Chołmcu. We wobłuku dźensnišeje diskoteki dožiwi publikum show młodźinskich wobornikow z wodu a swěcu. Jutře w 14 hodź. slěduje ćah wobornikow po wsy. Na to prezentuja woni swoju techniku. Wječor budu reje. Njedźelu dopołdnja přeproša na rańše piwko z dujerskej hudźbu a na wobjed z praženym swinjećom.

Za rěčny kurs so přizjewić

Pančicy-Kukow. Wot 20. awgusta hač do 10. decembra 2018 wotměje so w Pančicach-Kukowje 2. natwarjacy kurs (3. semester) serbšćiny. Wučba je stajnje póndźelu wot 19 hodź. hač do 20.30 hodź. w Šuli Ćišinskeho. Přizjewjenja přijimuje Rěčny centrum WITAJ pod telefonowym čisłom 03591/ 550 400 abo e-mailnje pod .

Komponist w telewiziji

Podstupim/Budyšin. Přichodne wusyłanje telewizijneho magacina RBB Łužyca jutře w 13.30 hodź. wěnuje so kompo­nistej a nošerjej Myta Ćišinskeho Jurej Mětškej. Dokumentaciju „Jedna gesta, jedyn wodych, jedyn kosmos“ běštej Roman Pernak a Měto Zawadzki w jutrownym času w Budyšinje nawjerćałoj.