Z wudaća: pjatk, 21 septembera 2018

njedźelu hornjoserbsce

11:00 Łužica tutón tydźeń, mjez druhim z powěsćemi tydźenja

11:20 Delnjoserbske tradicije: łapanje kokota a superkokot

11:45 Temowy tydźeń: hinak bydlić

12:00 Nabožne wusyłanje

 (farar Gerat Wornar)

po tym zbožopřeća

delnjoserbsce

12:30 Aktualny magacin, mjez druhim wo zetkanju z Choćebuskim wyšim měšćanostu Holgerom Kelchom

13:00 „Prěni serbski koncert w Delnjej Łužicy“ 

13:40 Nabožne wusyłanje

 (Adelheid Daumowa)

Radworscy wobornicy swjeća

Radwor. Dźensa a jutře swjeći Radworska wohnjowa wobora 40lětne wobstaće swojeje gratownje. Po dźensnišim grilowanskim swjedźenju su zajimcy jutře na přehladku hašenskeje techniki přeprošeni. Zastup je darmotny.

Na dworowy swjedźeń

Brětnja. Brětnjanska rejwanska a drastowa skupina přeprosy hosći jutře, sobotu, na dworowy swjedźeń. W 10 hodź. so tón při Brětnjanskim woby­dlerksim domje zahaji. Po tym zaklinči tam dujerska hudźba, na nawsy móža sej wopytowarjo traktory wobhladać. Dale předstaja wšelake nałožki, a wječor budu na Mjetaškec dworje reje.

Župna kubłanska jězba

Budyšin. Kubłanska jězba župy „Jan Arnošt Smoler“ powjedźe čłonow jutře do Wojerec. Wotjězd je, kaž připowědźeny, we 8.30 hodź. z Bebeloweho naměsta w Budyšinje. Swobodne městna hišće su. Čłonojo Domowinskich skupin a towarstwow župy podadźa so na serbske slědy města. Popołdnju wopytaja swjedźeń wotewrjenych dworow w Brětni.

Wustaja hriby

Přewjedu dalši WORKWUB

Třeći raz přewjedu jutře, sobotu, we Worklecach WORKWUB (Worklečanske wubědźowanje). Wurisanje swójbow je wosebity podawk wulkim kaž małym sportowcam. Młode wjesne swójby a Viktoria Worklecy su znowa wotměnjawy program zestajeli. Wot 14 hodź. smědźa so mali sportowcy w mjetanju bulika, dalokoskoku a sprinće wupruwować. Paralelnje k tomu budźe w sportowej ­hali wolejbulowy turněr „Viki“ z wólnočasnymi mustwami. Wot 15.30 hodź. poskića w stanje na sportnišću kofej a tykanc a program za dźěći. Wot 16.30 hodź. wubědźuja so na parcoursu přez za­dźěwki. Mjez druhim hódnoća tež najlěpši kostim.

Domjaca premjera noweho cyłka

Swój prěni domjacy hrajny dźeń změje nowowutworjene wolejbulowe mustwo žonow Hrajneho zjednoćenstwa Pančicy-Worklecy jutře w Pančičanskej sportowni. Tam nastupja wot 14 hodź. přećiwo JTVG Koblicam a Kupoji-Nowej Łuce.

Dalše wolejbulowe hry muži:

29.09. 14:00  Viktoria Worklecy –

  TSV Niederoderwitz

  Viktoria Worklecy –

  OSSV Kamjenc

20.10. 14:00  TSV Kundraćicy –

  Viktoria Worklecy

Kónctydźenska kopańca

Wodorunje: 3 wysoke twarjenje, 5 dźěl domjaceje nadoby, 6 kraj wosrjedź morja, 7 muske předmjeno, 10 lěsne zwěrjo, 13 hospodarski plan, 14 nahladnosć wosoby, 15 powyšenje w krajinje

Padorunje: 1 něhdyša šwedska šlagrowa skupina, 2 krasnosmykarka NDR (Katarina), 3 přez nje přińdźe swětło do jstwy, 4 funkcija Domowiny, 8 tuchwilu, 9 něhdy přistaw Roma, 11 koparski klub Madrida, 12 kónc modlitwy

Chorownja maltezow swj. Jana bě z Kamjenskej wuchowanskej słužbu wopytowarjow tydźenskich wikow na akciju we wobłuku „tydźenja znowawoži­wjenja“ do Kamjenca přeprosyła.

Kamjenc (SN/mwe). Při najrjeńšim wje­drje bě wčera znowa wjele ludźi wosebje z wokolnych wsow do Kamjenca na tydźenske wiki přijěło. Mjez wopytowarjemi hermanka je kóždy tydźeń tež tójšto Serbow, kotřiž w Lessingowym měsće nakupuja, optikarjej abo do Cyžec črijoweho domu załoža a sej nic naposledk tež z gulašoweje kanony słódnu běrnjacu poliwku słodźeć dadźa. Wčera, štwórtk, pak witachu jich medicinarjo z wosebitym stejnišćom. Pod hesłom „kóždy móže žiwjenje wuchować“ pokazowachu a rozłožichu woni staršim a młódšim zajimcam reanimaciske naprawy. Zdobom dachu jim nawod při zwučowanju tajkich. Mnozy, wosebje ze staršeje generacije, su sej hižo před wjele lětami wědu wo tym přiswojili. Tuž je trjeba, zo žiwjenje wuchowace naprawy w nuzowej situaciji prawidłownje zwučuja.

Při Slěbornym jězoru dyrbja 130 metrow rołow nuznje wobnowić

Łaz (AK/SN). Łazowska gmejnska rada je na swojim zašłym posedźenju jednohłósnje wobzamknyła, zo dyrbja syć pitneje wody při Slěbornym jězoru nuznje ponowić. Za to dósta twarska firma z Niskeje nadawk w hódnoće něhdźe 125 000 eurow. „Na syći při Slěbornym jězoru hižo někotre lěta zwěsćamy, zo su roły rozpukane“, wjesnjanosta Thomas Leberecht (CDU) praji a podšmórny, pitna woda je winowatostny nadawk gmejny. Tomu njemóžemy so wuwinyć. Zo bychmy zastaranje z pitnej wodu tež přichodnje stabilnje zawěsćili, dyrbimy tuchwilnu syć nuznje wobnowić.“

Cyłkownje ma so něhdźe 130 metrow rołow kłasć. Kulowski planowanski běrow Horst Alte je hižo před dlěšim časom wukonowu lisćinu za cyłu naprawu nastajił. Tehdy wočakowane kóšty wučinjachu něhdźe 65 000 eurow. „Nětko je to wo wjele wjace“, Thomas Leberecht na posedźenju gmejnskeje rady zadźiwany zwěsći: „Z tym so wobkrući, zo płaćizny w twarskej branši dale stupaja.“ Jako přičiny widźi wón wyše kóšty za energiju a material a wyše mzdy kaž tež mawt na zwjazkowych dróhach.

Chrósćicy (SN). Zo by rejowanska skupina Serbskeho folklorneho ansambla Wu­dwor dale wobstała, pytaja tež lětsa zaso dorost. Jutře, 22. septembra, přewjedu w Chróšćanskej wjacezaměrowej hali „Jednota“ w 15 hodź. mału dźěłarničku. Wsitcy zajimcy w starobje 5. do 7. lětnika su wutrobnje přeprošeni.

Kaž Lucija Smolic z wjednistwa tradiciskeho kulturneho ćělesa zdźěli, chcedźa zajimcam towarstwo předstajić. Po tym budźe proba ze sćoplenjom a wšelakimi rejemi z choreografom. Přizamknje so zhromadny wječor z małym přikuskom a rozmołwu. Njech sej kóždy sportowu drastu sobu přinjese.

Budyšin (SN). W Budyskej Montessoriskej zakładnej šuli wotměwaja so w běhu lěta wjacore bursy dźěćaceje drasty. Tak tež jutře, 22. septembra, wot 14 do 16 hodź. Na něhdźe 40 stejnišćach poskića tam wikowarjo a druzy trjebanu, derje zdźeržanu dźěćacu kaž tež babyjowu ­drastu, hrajki a dalše artikle.

Hladarjam cyle bliscy być

Wojerecy (SN). Wojerowski zwěrjenc drje mnozy hižo znaja, ale jónu wob lěto, na dnju němskeho zwěrjenca, móža tam wosebje dźěći něšto wosebite dožiwić. To hladarjo rewěra kopytačow, rubježnych zwěrjatow a ptakow kaž tež picowanskeje kuchnje holcy a hólcow za ruku bjeru. Tak móža dźěći picowanje zwěrjatow raz cyle blisko dožiwić. Tež w tropiskim domje njeje přeco móžno, hady a druhe reptilije zbliska wobkedźbować. Zajutřišim, njedźelu, wot 14 hodź. su swójby lubje do zwěrjenca witane.

Bjezskruploweho šofera zadźerželi

Połčnica. Na awtodróze A 4 blisko Połčničanskeje wotbóčki do směra na Drježdźany je wčera připołdnju awtodróhowa policija 32lětneho do wopačneho směra jěduceho wodźerja bruneho Mercedesa zadźeržała. Pólski šofer bě so na A 4 za­wróćił a na lěwej jězdni do směra na Zhorjelc wróćo jěł. Muž ma so nětko ­wohroženja wobchada dla před sudnistwom zamołwić.