Z wudaća: srjeda, 29 apryla 2020

Spěšnosć měrili

Čorny Chołmc. Často zastojnicy wobchad kontrolowaceje słužby tele dny spěšnosć nadróžneho wobchada měrja. Předwčerawšim stejachu woni ze swojej techniku mjez druhim w Małym Wjelkowje, na statnej dróze S 94 při wotbóčce do Žuric, w Gersdorfje, Großharthauwje a Běłych Noslicach (Weißnaußlitz). Na Wjesnej w Čornym Chołmcu přepruwowachu w běhu jedneje hodźiny 27 šoferow. Štyrjo z nich jědźechu spěšnišo hač dowolene 50 kilometrow na hodźinu.

Hodźij (CK/SN). W Hodźijskim wjesnym dźělu Debiškow (Döbschke) chcedźa dodźeržane roły kanalizacije z nowymi wuměnić. To je gmejnska rada na swojim zašłym posedźenju z wjetšinu hłosow schwaliła. Projekt je zhromadna naprawa gmejny Hodźij z Budyskimi wokrjesnymi zawodami, kotrež su za ponowjenje wodowoda zamołwite. Twarske dźěła su hromadźe z wokrjesnymi zawodami wupisali, rozdawać pak móža je samostatnje. Dwanaće firmow bě so wo trěbne podłožki požadało, wosom z nich swój poskitk woteda. To je „porjadne wob­dźělenje“, měnješe nawoda techniskeho zarjada gmejny André Laue.

Kóšty za podźěl Hodźijskeje gmejny bě planowanski běrow na 172 000 eurow trochował. Ze 144 000 eurami bě Zhorjelska firma najlěpši poskitk wotedała, tak zo so radźićeljo tež za nju rozsudźichu. Gmejna so wo 50procentowske spěchowanje prócuje, spěchowanske přizwolenje za 103 000 eurow, w kotrychž su nimo twarskich tež planowanske wudawki zapřijate, pak hišće njepředleži. 50 000 eurow za wodowód je porno tomu naležnosć wokrjesnych zawodow.

Před 75 lětami mandźelskaj Jurij a Marka Cyžec z jatby wuswobodźenaj

Marce dari mi Ludmila Jelinková, dźowka něhdyšeho generalneho sekretara Serbsko-łužiskeje narodneje rady Jurja Cyža, kotruž wopytachmoj z mandźelskej před lětomaj blisko Prahi. Stej to marce, kotrejž měještaj jeje staršej při sebi, jako Čerwjena armeja 27. apryla 1945 jeju a dalšich z přepytowanskeje jatby Volksgerichts­hofa w Podstupimje wuswobodźi. Za hrózbnu a nječłowjesku nacionalsocialistisku justicu běchu jeći jenož čisła, nan Jurij dósta kulojtu metalowu marku ze zastancowanej ličbu 172 a mać Marja (Marka) 194. W poslednim wokomiku, po spěšnym postupowanju sowjetskeje fronty, buštaj wonaj wumóženaj, po tym zo běchu jeju 20. apryla w jednanju w sydarni před 6. senatom Volksgerichtshofa na Kaisera Wilhelmowej 8 w Podstupimje zasudźili: Jurja Cyža k smjerći a Marku Cyžowu k wosom lětam jastwa. Wotprawjeny Jurij Cyž na zbožo njebu, dokelž běchu zasudźenych nacionalsocialistiskeje justicy na druhich městnach wotprawjeli, a fronta steješe před městom.

Jako so 1. sakska krajna wustajeńca „Čas a wěčnosć“ w lěće 1998 w klóštrje Marijinej hwězdźe wotmě, dojědźech sej zhromadnje ze swojimaj kuzinomaj Bärbel a Moniku – wobě stej wyšej studijnej radźićelce z najhłubšeho zapada Němskeje, kubłanej, pobožno-katolskej a wobrotnej – do Pančic. Wuhladawši prěnju dwurěčnu nadróžnu taflu so mje Bärbel wopraša, hač smy hižo w Pólskej. Ně, w Serbach. Aha – Spočatk to kubłanskeje jězby, w kotrejež wobłuku zamóch žonomaj ze zapada jako wuchodny Němc wo skerje njeznatym bliskim kraju rozprawjeć.

Na to so dopomnich, jako wzach tele dny wćipnje „dokumentarisku awtobiografiju“ Benedikta Dyrlicha do ruki. Awtor, hač do lěta 2011 šefredaktor Serbskich Nowin, je mi dołhi čas stajnje pozbudźowacy a w datym padźe tež bojowniski kolega. Jeho nětko wozjewjene dopomnjenki započinaja so 1964 w Nowej Wjesce, hdźež je so 1950 do swójby małoratarja narodźił a hdźež je hač do časa młodosće tež bydlił.

Sportnišća dyrbja nětko kóždy dźeń krjepić. Na trawnikomaj w Nowym Měsće to hižo­ dlěši čas činja, zo njeby tam trawa wuschnyła. Hinak je to w Němsko-Serbskim šulskim kompleksu Slepo, hdźež maja sportnišćo z kumštnym trawnikom. Kopańca pak tuchwilu na woběmaj hrajnišćomaj móžna njeje. Foto: Marcel Rjelka

Poprawom by zrěčenje ze škitarjom Janom­ Kochom 30. junija wuběžało, ale dołho do toho datuma móžeštaj so muž ze škitneho rjećaza a FC Energija Cho­ćebuz na podlěšenje zrěčenja dojednać. Nětko staj sej partneraj hač do lěća 2022 swěru slubiłoj. 24lětny je so w krótkim času na wodźaceho koparja Energije wuwił a je mjeztym wažny stołp tuchwilu třećeho tabulki regionalneje ligi-sewjerowuchod. Koch bě loni w lěću wot Berlinskeho AK do Choćebuza přišoł a bě wot toho časa we wšech dypkowych hrach zasadźeny. Georg Zielonkowski

Blidotenisća słušeja k sportowcam, kotřiž­ móhli so jako prěni zaso k blidam nawróćić, wšako mjez sobu docyła žadyn­ kontakt nimaja. Wěstotne wotstawki su stajnje garantowane, a při­hladowarjow tale sportowa družina tež wjele nima. Nimo toho je sezona nimale zakónčena. Tu štyri tabulki sezony 2019/2020 blidotenisoweho dorosta we wokrjesu ­Budyšin.

Wokrjesna liga – młodźina

MSV Budyšin 04 13 161:21 26:0

ST MB Njeswačidło 13 103:79 17:9

TTSV Korzym/Załom 12 90:78 14:10

MSV Budyšin 04 II 15 104:106 13:17

SZ Wětnica/Hola 12 72:96 7:17

TSV 1859 Wjernarjecy 13 16:166 1:25

wokrjesna klasa, stafla 1 – młodźina

TV GW Bühlau 14 148:48 26:2

SZ Großröhrsdorf 14 142:54 24:4

TTC Połčnica 69 14 129:67 20:8

SG Großröhrsdorf II14 92:104 14:14

SZ Łužnica 14 89:107 11:17

TuS Gersd.-Möhrsdorf 13 73:109 9:17

SG Lückersdorf-Gel.13 67:115 6:20

TuS Gersd.-Möhrsd. II 14 30:166 0:28

wokrjesna klasa, stafla 2 – młodźina

Zeleno-běli Halštrow14 171:25 28:0

TTC Wojerecy 14 138:58 21:7

Viktoria Worklecy 13 101:81 15:11

SZ Wětnica/Hola II14 107:89 15:13

MB Njeswačidło II13 91:91 12:14

Lokomotiwa Kamjenc14 79:117 11:17

TTC Wojerecy II 14 65:131 8:20

Rakečanske ST 14 18:178 0:28

wokrjesna klasa, stafla 3 – młodźina

SZ Huska 14 138:58 24:4

SZ Motor Kumwałd 14 126:70 19:9

SZ Kubšicy 14 125:71 19:9

4TTC Wjazońca14 127:69 18:10

SG Steinigtwolmsdorf 14 105:91 17:11

MSV Budyšin 04 III 15 115:95 15:15

TTSV Korzym/Załom II 14 86:110 10:18

TSV Wósp./Hrodźišćo15 45:165 4:26

ST Šěrachow 14 29:167 2:26

Kilian Hrjehor

Sakski minister za nutřkowne a sport Roland Wöller (CDU) je wčera prěnje wuhlady na móžny sport pod hołym njebjom wot 4. meje dał. W rozhłosu MDR-Radijo Sakska Wöller rjekny, zo wo tym přemysluja, hač směli tež sportowe towarstwa wot póndźele zaso sportowanje poskićeć. Předrasćernje a sanitarne rumnosće pak so wužiwać njehodźa. „Tale powěsć nas jara zwjesela“, měnješe Detlev Günz, šef BSV AOK Lipsk w mjenje 80 000 rehasportowcow. Jurij Bjeńš