Z wudaća: srjeda, 29 apryla 2020

Berlin (dpa/SN). Zwjazkowe knježerstwo je swoje aktualne warnowanje před jězbami do wukraja podlěšiło, powěsćernja dpa rozprawja. Nowinarjo běchu do hižo dźensnišeho posedźenja kabineta dokument dóstali, w kotrymž steji, zo tuchwilne warnowanje dale płaći, „znajmjeńša hač 14. junija“.

Wobzamknjenje je wonkowne minis­terstwo pječa z tamnymi ministerstwami wothłosowało. K wopodstatnjenju rěka, zo njebudu přichodne tydźenje žane jězby do wukraja móžne. Dyrbimy dale z drastiskimi wobmjezowanjemi w mjezynarodnym lětarstwje, ze zawrjenymi mjezami a z drastiskimi karantenowymi rjadowanjemi po wšěm swěće ličić.

Berlin (dpa/SN). Tuchwilna koronapandemija je po přeswědčenju Berlinskeho socialneho wědomostnika prof. Martina Vossa katastrofa. Zo so wo krizy rěči, wón kritisce wobhladuje. „W koronapandemiji pobrachuja wobrazy zničenja, hnydom widźomne wulke ličby woporow, zranjeni ludźo a zničene domy“, rjekny Voss, kiž nawjeduje katastrofowe slědźenišćo Swobodneje uniwersity Berlin, powěsćerni dpa. Tuž so mnohim zdawa, zo wšitko scyła tak zlě njeje.

„We hłowje mamy wobrazy katastrofow po wichorach abo zapławjenjach“, praji wědomostnik. Pandemija pak budźe sej wo wjele wjace woporow žadać hač tsunami lěta 2004 abo zemjerženje na Haitiju 2010. Martin Voss mjenuje koronapandemiju „kompleksnu katastrofu“, dokelž su praktisce wšitke wobłuki potrjechene a sćěhi njewotwidźomne.

Hač je politika prawje na wohroženja pandemije dla reagowała, so hakle dołhodobnje pokaza. „Operujemy na wočinjenej wutrobje towaršnosće, štož pak njejsmy do toho scyła zwučowali.“

Zhorjelski staroměšćanski swjedźeń a dźiwadłowy festiwal wupadnjetej

Zhorjelc/Habrachćicy (AK/SN). W časach koronapandemije dyrbja tradicionalne ludowe swjedźenje, koncerty, festiwale a kulturne dny wupadnyć. Wot toho po­trjechene su tež mjezynarodne a mjezu přesahowace terminy we wuchodnej Łužicy. „Aktualne wobmjezowanja, zadźeržeć pandemiju w Němskej kaž tež w susodnych krajach, nas nuzuja, tež lětuše Zhorjelske jazzowe dny wotprajić“, zdźěla tamniše towarstwo Kulturzuschlag. „Festiwal, kotryž smy składnostnje 25. jubileja z wosebje naročnym programom přihotowali, dyrbimy wo cyłe lěto přestorčić. Koncerty wotměja so tuž hakle wot 2. do 13. junija 2021.“

Pomnik na Fulkec hórce za pólskich wojakow, kotřiž běchu za wuswobodźenje Serbow z kwakle fašizma žiwjenje woprowali, je wuznamna městnosć wopominanja našeho ludu. Surowosć, ból a běda Druheje swětoweje wójny běchu so jeje poslednje dny hišće raz njenaprošnje do Horjan nawróćili. Kóždolětnje wot Domowiny wuhotowane spominanje na kromje Chrósćic nam kaza, na bitwu w „dolinje smjerće“ ženje njezabyć. A runje tak, zo móžachu serbscy prócowarjo zakazaneje Domowiny jenož něšto dnjow pozdźišo, 10. meje 1945, w samsnej wsy narodnu organizaciju znowa załožić. Zwjazanosć z pólskim ludom, kotrehož synojo běchu na serbskej zemi padnyli, zwuraznja so w tym, zo je wobdźělenje pólskich delegacijow kruta tradicija woneho wopominanja. Zo njejsu koronapandemije dla wčera nikoho ze susodneho kraja w Chrósćicach přijeć směli, je škoda. Zabyći pak padnjeni pólscy wojacy njejsu. Přetož w mjeńšim kruhu su jich Serbja počesćili. Axel Arlt

29. apryla 1945 dóńdźe k nowemu wohrožacemu połoženju na fronće w Hornjej Łužicy. 2. pólska armeja a jednotki 52. sowjetskeje armeje wojowachu pře­ćiwo z juha a wuchoda nadběhowacym diwizijam němskeje wójnskeje skupiny Srjedźa pod komandom generalneho pólneho maršala Ferdinanda Schörnera. Jeho jednotki běchu sej Kinspork a Kamjenc wróćo zdobyli. Zakitowanska li­nija lěweho křidła 1. ukrainskeje fronty započa so pola Němskich Pazlic a wjedźeše přez Pěskecy, Nowoslicy, Koslow a Šešow na Kaponicu a wottam přez Łomsk pola Njeswačidła do Minakała. Dokelž běchu so pólscy wojacy tankow a pancerowanych bojowych jězdźidłow dla wot 25. apryla na sewjer wróćo sća­hnyć dyrbjeli, přikaza maršal Konjew 5. gardowu armeju z dalšimi jednotkami zesylnić. Zdobom poda so sowjetski 4. tankowy korps do Delan a do wokoliny Njeswačidła.

Hdyž smě frizerski mišter Tobias Hanuš wot přichodneje póndźele w swojimaj salonomaj w Chrósćicach a Njeswačidle zaso kupcow po­słužować, dyrbi wón wěstotne předpisy dodźeržeć. Tak dyrbja sej ludźo ruce desinfikować, frizer kaž tež wužiwar ­jeho posłužbow dyrbitaj škit za hubu a nós měć, za kóždeho wopytowarja ma frizer nowy wobwěšk (Umhang) wužiwać a nimo toho dyrbi Tobias Hanuš swój grat po kóždym wužiwanju desinfikować. Foto: Feliks Haza

Po sydom tydźenjach wuwzaćneho stawa zhladuje Kamjenska chorownja maltezow na pozitiwnu bilancu a zawjeduje krok po kroku zaso swój normalny poskitk za pacientow.

Kamjenc (SN/MWj). Zo bychu po móžnosći wjele na kowid-19 schorjenych zastarać móhli a runočasnje riziko infekcije za druhich pacientow a sobudźěłaćerjow miniměrowali, dyrbjachu tež w Kamjenskej chorowni maltezow swj. Jana njekritiske operacije a přepytowanja přestorčić. „Dokelž wuwiće ličbow pokazuje, zo su škitne naprawy skutkowali, smy so rozsudźili poněčim paletu našich wukonow zaso poskićeć. Dokelž pak mamy so na dołhi čas pandemije nastajić, budźemy tež přichodnje wotwažować dyrbjeć, hač móžemy wěste přepytowanje přewjesć abo hač je přestorčimy“, rozłožuje jednaćel maltezow Sakskeje a Braniborskeje Sven Heise w nowinskej zdźělence.

Wšědny dźeń w muzeju zmištrować njeje lochko

Budyšin (SN/MWj)). Za wopyt publikuma wostanje Muzej Budyšin najprjedy raz dale zawrjeny. Tež na zarjadowanja a programowe dypki, kotrež su hewak kruty wobstatk muzealneho poskitka, so koronakriza wuskutkuje. Mjeztym je rozsudźene, zo tež woblubowany program za čas lětnich prózdnin wupadnje. „Terminy zarjadowanjow wotprajić abo přestorčić dyrbjeć njeje lochko“, direktor muzeja dr. Jürgen Vollbrecht w nowinskej zdźělence rozłožuje. „Smy pak winowaći, ze strowotu wopytowarjow kaž tež našich sobudźěłaćerjow zamołwiće wobchadźeć.“

Wjacore planowane zarjadowanja dyrbja na pozdźišo přesunyć. Kabinetnu wustajeńcu „Karty hrać – Zběrka historiskich hrajnych kartow Muzeja Budyšin“ njewotewru 22. meje, ale planuja ju za čas wot 3. oktobra 2020 hač do 17. januara 2021. Wosebitu přehladku „Cyły swět na wobzoru – Kopororytwar a nakładnik Johann George Schreiber (1676–1750)“ wo cyłe lěto přepołoža. Wot 16. junija hač do 19. septembra 2021 budu sej ju zajimcy wobhladać móc.

Budyšin. Zo bychu čakanske časy skrótšili a tak strach natyknjenja w čakarnjach jězdźidłowych přizjewjernjow w Budy­šinje, Wojerecach a Kamjencu pomjeńšili, nětko terminy za přizjewjenje jězdźi­dła wot spočatka tydźenja jenož hišće online rozdawaja. Priwatne wosoby móža sej same swobodny termin online ­rezerwować. Knihowanski system sćele jim hnydom wobkrućenje, kotrež dyrbja k terminej sobu přinjesć. Na e-mejlnu wotmołwu wěcywobdźěłarja njetrjebaja čakać. Online-serwis Budyskeho kraj­noradneho zarjada nańdu zajimcy ­pod www.landkreis-bautzen.de/kfz-kennzeichen.php.

Kubłansku wuprawu přesunu

Budyšin. Přihotowanski wuběrk seniorow Serbskeho šulskeho towarstwa je doskónčnje rozsudźił, zo za lětsa w meji planowanu pjećdnjowsku wuprawu „Podłu Romantiskeje dróhi“ koronapandemije dla klětu spočatk meje přewjedu. Zajimcow sčasom wo nowym terminje informuja, kaž předsydka SŠT Ludmila Budarjowa zdźěli.

Hišće hač do kónca přichodneho tydźenja je zwjazkowa dróha B 96 w Rakecach połojčnje zawrjena. Přičina poćežowanja wobchada su dróhotwarske dźěła na něhdźe 500 metrow dołhim wotrězku. Twarscy dźěłaćerjo wotstronjeja tam nabóčne be­tonowe dźěle, kotrež běchu dotal za wotwodźowanje dešćikoweje wody myslene. Wubagrowanu kromu jězdnje potom z asfaltom začinja. Kaž na městnje zamołwity za dźěła Andreas Seibt (naprawo) rozłoži, móže woda po dotwarje lěpje do wuliwow wotběžeć. Wotbóčce na Dwórnišćowu a na Dróhu při kuble stej sčasami dospołnje zawrjenej. Foto: Feliks Haza