Žadyn kónc natyknjenjow
Budyšin. Ličba zwěsćenych koronainfekcijow w Budyskim wokrjesu je wčera wo 13 na 755 rozrostła. Kaž krajnoradny zarjad zdźěli, je nětko 150 ludźi schorjenych (+7), šesćoch dale w chorowni lěkuja. 139 nowych karantenow bu postajenych, 52 wčera zběhnjenych. Šěsć wosobow je so wustrowiło. Minjene sydom dnjow běchu we wokrjesu 31,3 nowoinfekcije na 100 000 wobydlerjow, wot 35 su krućiše škitne naprawy trěbne.
Serbski wječork wotměli
Slepo. Na Serbskim wječorku župy „Jakub Lorenc-Zalěski“ steješe wčera w Slepom prašenje w srjedźišću, kak móhła Domowina tamnišim regionalnym towarstwam, institucijam, pěstowarnjam a šulomaj pomhać serbšćinu wožiwić, a zo bychu tež serbske nałožki zaso lěpje pěstować a wozrodźić móhli. Romołwni partnerojo běchu zastupjerjo Domowiny, serbskeje rady, Załožby za serbski lud a Rěčneho centruma WITAJ.
Přidatne srědki za šule
Tuchwilu je w zjawnosći diskusija wo tym, podlěšić hodowne a zymske prózdniny. Smy so naprašowali, što měnja k tomu ći, kotřiž su ze šulskim a kubłanskim dźěłom zwjazani.
Křesćan Korjeńk, nawoda wyšeje šule „Michał Hórnik“ Worklecy: Nimam diskusiju wo tym, hač dyrbjeli prózdniny podlěšić, tuchwilu za zmysłapołne. By-li rěč wo podlěšenju nazymskich prózdnin było, móhł to rozumić. Wšako ličby koronainficěrowanych runje nětko zaso přiběraja. Nastupajo sposrědkowanje wučbneje maćizny měnju, zo njesměli žane wulke straty nastać. Wšako smy w nalěću z tym, kak jednotliwcam wědu posrědkować, mnohe nazhonjenja zběrali.
Mónika Ošikowa, zamołwita za posrědkowanje kultury a zjawnostne dźěło w Budyskim Serbskim muzeju: Jako mać móhła z kompromisom žiwa być, je-li rjadowane, zo su dźěći přiwšěm zastarane. Přetož wšitcy starši njemóža wot doma dźěłać a so w samsnym času wo dźěći starać. To su nazhonjenja z nalěća pokazali.
Budyšin (SN/CoR). Poprawom strona z přehladom lětušich nazymskich koncertow w organizatoriskej mapje kaž přeco derje pjelnjena wupada – hladajo na rukopisne přispomnjenja na kromje snano tróšku přepjelnjena. „Nimale wšitke koncerty woblubowaneho rjadu su lětsa wotprajene“, pak rěka zrudźaca powěsć wjelelětneje zamołwiteje za organizaciju nazymskich koncertow w nadawku Załožby za serbski lud Marije Swierczekoweje.
Wojerecy (SiR/SN). Młodźi filmowcy Wojerowskeje Kulturneje fabriki móža so wjeselić. Kaž sociokulturny centrum zdźěli, spožči sakske kultusowe ministerstwo jeho projektej „Na slědach“ za film „Bjezrěčni – Wojerowscy Serbja za čas nacionalsocializma“ (SN rozprawjachu) Šulerske myto za domizniske slědźenje. Kulturna fabrika dźakuje so swobodnje skutkowacej filmowči Angeli Šusterowej za wobšěrne a nadrobne dźěło kaž tež za podpěru młodostnych a gratuluje młodym filmowcam a teamej wokoło projektoweje nawodnicy Iny Züchner. Myto je z 500 eurami dotěrowane.
Projekt „Na slědach“, iniciatiwu Sakskeje załožby za młodźinu, přewjeduja mjeztym štwórty króć. Woni wobdźělnikam zmóžnja, so ze samowuzwolenymi towaršnostnymi temami rozestajeć a wuslědki zjawnosći předstajić. Po tym zo měješe Kulturna fabrika w minjenych projektach NDRsku zašłosć, wuwiće šulow we Wojerecach a Serbow w nacistiskim času za hłowne ćežišćo, zaběraja so tam nětko w nowym projekće pod hesłom „Springbrunnenbader“ z temu dźěćatstwo we Wojerecach za čas NDR.
Budyska měšćanska rada je na swojim wčerawšim posedźenju personelnu změnu wobzamknyła. Ta wuskutkuje so tež na zestawu přirady za serbske naležnosće.
Budyšin (CS/SN). Dokelž dotalna Budyska měšćanska radźićelka Annalena Schmidt (Zeleni) hižo w sprjewinym měsće njebydli, wona tež měšćanskemu parlamentej přisłušeć njemóže. Jeje městno zaběra nětko student Jonas Lešawa. Dokelž je Annalena Schmidt tež dźěłowemu kruhej za serbske naležnosće města přisłušała, ju Jonas Lešawa tež w tym gremiju naruna. Tomu su měšćanscy radźićeljo wčera přihłosowali.
Jonas Lešawa bě před lětomaj na Schillerowym gymnaziju maturował a studuje w Drježdźanach politiske wědomosće. Wot lońšeho twori wón w Budyšinje takrjec čoło klimoweho hibanja „Fridays for future“. Wot lońšeho je młody muž tež w Budyskim wokrjesnym sejmiku za Zelenych aktiwny. Na swój nowy nadawk so wón wjeseli, kaž wčera rjekny.
Brüssel (dpa/SN). Škit klimy a přichodny poměr k Wulkej Britaniskej zaběra dźensa wobdźělnikow dwudnjowskeho wjerška EU w Brüsselu. Zwjazkowa kanclerka Angela Merkel (CDU) wuradźuje ze swojimi kolegami wo wikowanskim zrěčenju z Wulkej Britaniskej, kotrež chcedźa hišće lětsa wobzamknyć. Wčera wječor staj šef wjerška Charles Michel a prezidentka komisije EU Ursula von der Leyen hišće z britiskim premierministrom Borisom Johnsonom telefonowałoj, kiž je dlijacych so jednanjow dla chětro přesłapjeny.
Kultusowi ministrojo wuradźuja
Berlin/Mainz (dpa/SN). Kultusowi ministrojo zwjazkowych krajow wěnuja so dźensa a jutře na widejowej konferency połoženju šulskich kubłanišćow w času koronapandemije. Dale zaběraja so z tematiku šulskich wotzamknjenjow. W zašłosći wšak bě stajnje zaso diskusija wo tym, hač je abitura rozdźělnych žadanjow w zwjazkowych krajach dla přirunajomna a jenak hódna. Tež załoženje dołho planowaneje kubłanskeje rady steji na dnjowym porjedźe wuradźowanjow.
Hižo wotranja stawkowali
Britiska rockband The Who je prawidłownje na koncertach swoje gitary wotpohladnje skóncowała. Štóž pak sej mysli, zo su je tak wotbyli, so myli. Swoje instrumenty su po tym přeco zaso hromadźe lěpili, dołhož njebě šija gitary skóncowana, přeradźa mjeztym 75lětny spěwar skupiny Roger Daltrey. Za nowe gitary tehdy žane pjenjezy njemějachu, lěpk bě hižo drohi dosć.
Najebać koronapandemiju kwas swjećić je mnohim wulke wužadanje. Wšako njeje telko hosći dowolenych. Hinduistiski porik we Wulkej Britaniskej je přiwšěm něhdźe 200 hosći přeprosył. W awtokinje móžachu woni w swojich awtach na wulkich wobrazowkach štyrihodźinsku ceremoniju sćěhować. Něhdźe 300 dalšich ludźi po cyłym swěće je swjatočnosć přez widejo tohorunja widźało.