Z wudaća: pjatk, 07 meje 2021

pjatk, 07 meje 2021 14:00

Prěni króć meju stajili


Do noweje Kulowskeje katolskeje pě­stowarnje swj. Marije tež tójšto serb­skich dźěći chodźi. Maja tam dwě skupinje, w kotrymajž dźěći serbsce rěča. Wo nje staratej so Cornelija Korchowa a Mandy Brösanowa. W žłobikowej skupinje maja wosom hólcow a holcow. A potom je tam dalše 15 wjetšich dźěći. Wone wšitke rady swjeća. Lětsa pak běchu chětro zrudne, zo njejsu póstnicy swjećić móhli – korony dla. Tuž bě wjeselo wulke, jako zašły tydźeń stajenje meje přihotowachu. Prěni króć su tónle nałožk w pěstowarni hajili, hačrunjež bě jenož mała horstka w dnjowym přeby­wanišću. Tak su girlandu a wěnc nawili a wšitko za stajenje meje přihotowali. Dźěći běchu sej ekstra rukajcy sobu při­njesli a tak sobu pomhachu, zo bychu ze swojimaj kubłarkomaj pjeć metrow wulku meju stajili. Nětko pisane banćiki w serbskich barbach we wětřiku zmawuja. Hdy budu meju mjetać, to hišće njewědźa. Tekst a foto: Alfons Handrik

wozjewjene w: Předźenak
Foto: Feliks HazaNadawki jěžika Milenka Rječcyna Što je so stało? Hej, jěžiko! Njej’ prawe ći hižo borleško? Je lisćo mokre, abo budźa će šćipate hałzy z drěmanja? Ach ně, ty słyšiš něžne kwětki! Su tebi cunjo zwonili a won na słónčko wabili. Nětk rěka derje kedźbu dać, sej wački, šlinki nazběrać. Huj, spěšnje zwjerć so do kule naš pos, tón honić tebje chce. Na swój nós wón njemysli a nic na twoje kałačiki. Tuž mój luby jěžiko, njebjer jemu za zło to. Měj dale wulke wjeselo!

wozjewjene w: Předźenak
pjatk, 07 meje 2021 14:00

W čitanju so wubědźowali

Tradicije su něšto rjane. Tež lětsa zaso je 3. lětnik Serbskeje zakładneje šule „Michał Hórnik“ we Worklecach čitanske wubědźowanje přewjedł. Najlěpšej čitarjej běštaj tónkróć z rjadownje 3/2 Luiza Mikławškec a Richard Lorenz (srjedźa z pokalom). Pius Korjeńk, Nina Ker­nec a Maksimilian Hoier (wotlěwa) docpěchu tohorunja prima wukon. W paralelnej rjadowni 3/1 dóstachu wopismo za wuběrny čitanski wu­kon Henrijeta Dubawic, Franc Zarjeńk, Filip Lukaš a Hanka Fryčec (wotlěwa). Tekst a foće: Jurij Bjeńš

wozjewjene w: Předźenak
pjatk, 07 meje 2021 14:00

Mejku stajili


Hólcy 4. lět­nika Chró­šćan­skeje zakładneje šule su z knjezom Šmitom meju při­hotowali a stajili. Brězu za wjeršk bě domow­nik wobstarał. Z wotstawkom su dźěći na šulskim dworje zhromadnje z kěrlušom „Nět meja na zeleni“ meju witali. A nětko hotuje so cyły lětnik na mejemjetanje. Holcy chcedźa so narodnu drastu woblec. A potom pokazaja šulerjo krótki program, jeno za sebje samych. Tón ma so wonka pod hołym njebjom a po koronowych před­pisach wotměć. Teskt a foto: Simona Šěnowa

wozjewjene w: Předźenak
pjatk, 07 meje 2021 14:00

Pawoł Jenka

6. meje 1971 zemrě w Budyšinje wjelelětny načolnik Domu za serbske ludowe wuměłstwo (DSLW) Pawoł Jenka. Narodźił bě so wón 16. februara 1907 jako syn chěžkarja a kobjelerja w Mikowje. Wukubławši so na Budyskim Krajnostawskim wučerskim seminarje wučerješe Jenka w Nowej Wsy nad Sprjewju, Hućinje a Malešecach, bu pak 1936 wot nacijow z Łužicy wupokazany. Bě nawoda Serbskeho towarstwa a jeho chóra Zernička w Lichanju, šulskeho chóra w Hućinje a solo­spěwar w Lumirje. Po wójnje bě wučer na Serbskej rěčnej šuli w Chrósće, w Barće, dźesać lět docent na Serbskim wučerskim wustawje a dirigent jeho chóra. Wot 1963 nawjedowaše DSLW a staraše so wo prezentaciju ludoweho wuměłstwa na dźěłaćerskich festiwalach kaž tež na třoch Festiwalach serbskeje kultury. Měješe wulke zasłužby na polu wuwića serbskeje hudźby. Z jeho pjera su spisy „Běda Bartskich roboćanow“, wo šulstwje w Mužakowskej holi, „Wuwiće serbskeho ludoweho wuměłstwa“, serbske wučbnicy, „Hdźež so módrja, zelenja“, „Z młodej mocu“ a jědnaće dalšich serbskich spěwnikow, předewšěm za šulsku wučbu. Manfred Laduš

wozjewjene w: Spomnjeće
pjatk, 07 meje 2021 14:00

Zapósłane (07.05.21)

Helmut Richter z Budyšina piše k rozmyslowanjam dr. Měrćina Wałdy z 5. meje w našim dźeniku:

W nastawku „Kak sej Serbja swoje połoženje rjane barbja“ dr. Wałda twjerdźi, zo sym jemu powědał, zo mějach nadawk „koncept zdźěłać, kelko připosłucharjow Serbski rozhłós w přichodźe scyła hišće změje“. Tu wšak so myli. Njewěm, štó je jemu to napowědał, ja nic. Tajki nadawk ženje njemějach. Wot koho da? A hišće něšto: Dr. Wałda datuje swoje wuprajenje na statistiku z lěta 2007. Sym wšak hižo wot srjedź lěta 2004 rentnar. A štó by dyrbjał rentnarjej tajki spodźiwny nadawk dać? To su tuž jenož, wšako dr. Wałda wuraz w swojim artiklu sam wužiwa, „fake news“.

W samsnej naležnosći wupraja so předsyda Domowiny Dawid Statnik:

wozjewjene w: Zapósłane
Budyska wokrjesna hudźbna šula je w minjenych lětach prawidłownje zjawne koncerty wuhotowała, kaž na přikład we wobłuku staroměšćanskeho swjedźenja na našim foće. Jutře, sobotu, změja zajimcy wot 13 hodź. składnosć, na wirtuelnym dnju wote­wrjenych duri pod so wobšěrnje wo poskitkach kubłanišća wobhonić. Foto: Margitta Luttner

wozjewjene w: Serwis
pjatk, 07 meje 2021 14:00

Křižerskej protyce k dobyću

Jeli dźeće wot wupokazaneho spočatka po liniji dale, wučitaće powójnski spěw.
Wuhódajće delnju „liniju“ a pósćelće wuhódanje hač do wutory, 11. meje, z mejlku na . Podajće nimo wuhódanja prošu tež swoje předmjeno a mjeno kaž tež adresu. Mjez wšitkimi prawymi dopisami wulosujemy dwě nasćěnowej protyce z wobrazami wo lětušich křižerskich procesionach. Zapodaća bjez adresy njewobkedźbujemy. SN

wozjewjene w: Serwis
pjatk, 07 meje 2021 14:00

Krótkopowěsće (07.05.21)

Bórze 2 000 zemrětych

Budyšin. Ličba 1953 w zwisku z koronawirusom dotal zemrětych w Hornjej Łužicy bliži so hódnoće 2 000. Budyski wo­krjes wozjewi hač do wčerawšeho jedyn smjertny pad a 187 dalšich natyknjenjow, Zhorjelski 118 infekcijow a štyrjoch zemrětych z časa wot 21. do 28. apryla. Za wobaj wokrjesaj podawa RKI dźensa zwyšenu tydźensku incidencu, za Budyski 212,2 a za Zhorjelski 191,5.

Žadyn dalši kandidat

Pančicy-Kukow. Za wólby wjesnjanosty gmejny Pančicy-Kukow 11. julija maja jenož jednoho požadarja. Je to dotalny wjesnjanosta Markus Kreuz (CDU). Hač do wčera postajeneho termina njebu dalša kandidatura přizjewjena. Markusa Kreuza bě tamniša wjesna skupina CDU nominowała. Dalšich kandidatow smědźa wolerjo na wólbnym dnju na wólbnym lisćiku napisać.

14 700 žonow prěnje dźěćo měło

Kamjenc. W Sakskej je loni něhdźe 14 700 žonow swoje prěnje dźěćo porodźiło. Maćerje běchu přerěznje 29,7 lět. Tak je so staroba prěni raz porodźacych wot 29,6 předloni snadnje zwyšiła, kaž Kamjenski statistiski krajny zarjad in­formuje. Za 9 680 prěnjonarodźenych bě porod po dnju maćerje, jich maćerje jón tuž lětsa prěni raz swjeća.

wozjewjene w: Krótkopowěsće
pjatk, 07 meje 2021 14:00

Štó stanje soz milionarom?

Cordula Ratajczakowa

Derje, zo so zamołwići Domowiny a Załožby za serbski lud wo to prócuja, zo tež Serbja něšto z hornca strukturneje změny dóstanu. Na to skedźbnił je připódla referent za serbske naležnosće Braniborskeje Měto Nowak na njedawnej zjawnej prezentaciji wuslědkow dźělneho projekta Serbskeho instituta „Hódnoćenje imaterielneho kulturneho namrěwstwa Delnjeje Łužicy w němsko-serbskim konteksće“ (IKN). Na prašenje, kak ma potom po projekće kónc lěta dale hić, wón nadźijepołnje wotmołwi: „Ličimy z tym, zo dóstanjemy přichodne dźesać lět dohromady 19 milionow eurow za šěsć serbskich projektow, a dalewjedźenje IKN je jedyn z nich.“ Po zdaću so tež Serbja w Sakskej podobnje nadźijeja. Jeli woprawdźe miliony eurow na nas čakaja, wostanje jenož prašenje, kak je rozdźělić. Štó stanje so ze serbskim milionarom?

wozjewjene w: Rozmyslowane

nawěšk

SERBSKE NOWINY podpěruja:

Novi Sad – kulturna stolica Europy

nowostki LND