Z wudaća: pjatk, 07 meje 2021

Pjatk 7.5. 19:00 Dźakna Boža mša wohnjowych wobornikow zarjadniskeho zwjazka Při Klóšterskej wodźe w Róžeń­čanskej putniskej cyrkwi

Sobotu 8.5. 10:00 Online-wuradźowanje Serbskeho sejma

  9:00 Spominanje na 76. róčnicu wuswobodźenja přez so­wjetske wójsko; na wjacorych městnach w Kamjencu

  9:30 Hłowna zhromadźizna Serbskeho wosadneho zwjazka w Hodźiju

Njedźelu 9.5. 17:00 Mejski nyšpor z kulturnym wobrubjenjom w Róžeń­čanskej putniskej cyrkwi

Srjedu 12.5. 19:00 Filmowy a diskusijny wječor pod hesłom „Trstenjak­ na płachće“. Dokumentarny film „Tripty­chon“ w Budyskim Serbskim muzeju

Sobotu 15.5. 19:00 Mejski nyšpor dekanatneje młodźiny w Róžeńće

Njedźelu 16.5.   Mjezynarodny dźeń muzejow mjez druhim ze zarja­dowanjemi w Budyskim Serbskim muzeju

  8:30 Kemše z Božim wotkazanjom w Poršicach

  11:00 Serbski ludowy ansambl předstaji interaktiwnu hudźbnu bajku „Překlepana liška“ pod

Jeli dźeće wot wupokazaneho spočatka po liniji dale, wučitaće powójnski spěw.
Wuhódajće delnju „liniju“ a pósćelće wuhódanje hač do wutory, 11. meje, z mejlku na . Podajće nimo wuhódanja prošu tež swoje předmjeno a mjeno kaž tež adresu. Mjez wšitkimi prawymi dopisami wulosujemy dwě nasćěnowej protyce z wobrazami wo lětušich křižerskich procesionach. Zapodaća bjez adresy njewobkedźbujemy. SN

Twarske dźěła na Chróšćanskim Božim domje zaso běža

Chrósćicy (SN/JaW). Něšto dnjow po tym zo je wobswětowy zarjad wokrjesa Budyšin minjeny pjatk twarske dźěła při Chróšćanskej farskej cyrkwi nachwilnje zakazał, tam wot wutory zaso dźěłaja. Dodźeržeć pak maja „wěste wuměnjenja“, kaž krajnoradny zarjad na naprašowanje našeho wječornika zdźěli. „W přichodnymaj tydźenjomaj fachowcy wokoło cyrkwje dale róšty stajeja“, zdźěli na naprašowanje zamołwity architekt Marko Dźisławk. Při tym pak dyrbja wobkedźbować, zo trěbne škitne saki při róštach hač do hornjeje etaže njepójšeja, zo njebychu lětanske čary njetopyrjow mylili. Paralelnje „fachowc za njetopyrje cyłu fasadu, wšitke škałoby w njej a ewentuelnje městna, na kotrychž móhli so njetopyrje chować, kontroluje a zwěsći, hač maja tež w muri Božeho domu swoje kwartěry. Na zakładźe swojich zwěsćenjow wón potom dowoli, zo směmy dale twarić, abo wukaza dalši twarski stop. Nimo toho dyrbi njetopyrjowy fachowc wotnětka cyłe twarske naprawy přewodźeć“, Dźisławk wuswětli.

Mlokowe rampy běchu něhdy woblubowane zetkanišća na wsach. Dźensa wone wo wjesnych stawiznach swědča. Dźakowano mnohim pilnym akteram w Złyčinje nětko zaso rampa na nawsy steji.

Złyčin (AK/SN). Štyri stołpy ze zornowca dyrbja hłuboko do zemje. Gerd Haustein z twarskeho zawoda Łazowskeje gmejny je z traktorom skedźbnje přiwjeze. Kolega Gerald Tronnier jeho podpěruje.

Złyčinjanaj Udo Steglich a Reinhard Melcher staj zornowcowe stołpy zańdźeny pjatk do zemje zbiłoj, při čimž dyrbještaj zas a zaso korigować a pruwować. Na to su je z drjewom a šrubami zawěsćili. Po mnohich lětach w Złyčinje nětko zaso mlokowa rampa steji. Wjesny chronist Reinhard Melcher a wobydler Ulrich Behns měještaj ideju za to. Melcher je někotre kany přidał. „Zachowamy tak kruch stawiznow. Naslědne generacije maja wo tym zhonić. Wone njeměli mlokowu rampu jeničce z muzeja abo wučbnicow znać“, měni Udo Steglich.

Krasna tučel je srjedu Koslow pyšiła. Julia Včelichowa je za domskim jónkrótny wobraz zapopadnyła. Za našu swójbu běše to wosebite dožiwjenje. Wšako smy prěni króć spočatk tučele widźeli. Wokomik traješe jenož někotre minuty, tak zo njejsmy „kotoł złota“ namakali. Foto: Julia Včelichowa

Njebjelčicy. Serbski sejm přeprosy jutře, 8. meje, wot 11 do 18 hodź. na online-wuradźowanje. Zaběrać chcedźa so z deklaraciju Serbow jako indigeny lud a wo lěpšinach při wužiwanju prawow z ratifikowaneje ILO-konwencije 169 za indigene ludy. Rozmołwny partner je Johannes Rohr, projektowy koordinator na Kölnskim Instituće za ekologiju a akcisku etnologiju. Dalša tema je zachowanje přirodnych žiwjenskich zakładow w biosferowym rezerwaće UNESCO Hornjołužiska hola a hatna krajina. Přizjewić móža so zajimcy hižo hodźinu do zahajenja zarjadowanja pod abo

Třoch podhladnych zwěsćili

Běła Woda. Woheń w něhdyšim Běło­wodźanskim ludowym domje je hobersku škodu načinił. Něhdźe 200 wohnjowych wobornikow bě wot 25. apryla hač do přichodneho zažneho ranja płomjenja hašało. Kriminalna słužba je hižo za čas hašenja zjawnje za swědkami pytała. Po wuhódnoćenju wjacorych pokiwow je policija nětko třoch podhladnych zwěsćiła. Wumjetuja jim, zo su njedźelu, 25. apryla, na ležownosći kulturneho domu woheń zamiškrili. Kaž kriminalisća mjeztym zdźělichu, běchu skućićeljo stólcy a plany zapalili, štož bě přičina wudyrjeneho wohenja. Kak běchu so do domskeho dóstali, ma so z wuhódnoćenjom slědow zwěsćić. Zamiškrjenja wohenja podhladni su dwaj młodostnaj a jedyn dorosćacy němskeho pochada.

Wuknjacy 10. lětnika Serbskeje wyšeje šule Ralbicy Syman-Jan Klemenc, Damian Matik a Victoria Langec (wotlěwa) su digitalnu wuměnu z jědnatkarjemi Delnjoserbskeho gymnazija w Choćebuzu zahajili. Za to produkowachu šulerki a šulerjo ­wobeju kubłanišćow serbskorěčne wideja a zwukowe nahrawanja. W nich swojej ­kubłanišći hornjo- a delnjoserbsce předstajeja a wuměnjeja sej wuknjenske nazhonjenja ­za čas pandemije, rěča pak tež wo prašenjach identity a wo tradicijach. ­Předsydstwo ­Serbskeho šulskeho towarstwa projekt podpěruje. Foto: Jan Rjeda

Worklecy (JK/SN). Digitalizacija Worklečanskeje zakładneje a wyšeje šule móhła hišće do zahajenja noweho šulskeho lěta zakónčena być. Jako prěnja w zarjadniskim zwjazku Při Klóšterskej wodźe je Worklečanska gmejnska rada na swojim wčerawšim posedźenju přepodała nadawk, kupić digitalne tafle za wobě šuli. Zarjadniski zwjazk bě centralnje za wšitke swoje gmejny nadawk za digitalne tafle wupisał. 22 zajimcow je drje sej nadawk wobhladało, wobšěrny poskitk pak su jenož tři firmy zapodali. Na rozdawanskim městnje zwjazka su je dokładnje pruwowali. Nětko móža gmejny same rozsudźić a nadawki přepodać. Worklečenjo pře­podachu nadawk za dwanaće ­taflow Drježdźanskej firmje Schröder ­Systeme, kotraž je za 72 300 eurow tež w šulomaj připrawi. Njeje hišće cyle jasne, hač to do spočatka noweho šulskeho lěta zmištruje, dokelž so korona tež w industriji informatiki wuskutkuje a dodawanje spomala. Wjesnjanosta Franc Brusk (CDU) pak wostanje optimistiski. Z cyłkowneho budgeta za digitalizaciju šulow zwostanje gmejnje po nakupje taflow jenož hišće 5 000 eurow.