„Hoberski projekt“ lubi „kolosalne nazhonjenje“
Serbski ludowy ansambl je hrajnu dobu 2022/2023 zahajił. We wobłuku nowinarskeje konferency informowachu wčera w Budyskej Röhrscheidtowej bašće wo planowanych wjerškach a wodźachu zastupjerjow medijow po saněrowanych resp. nowonatwarjenych rumnosćach institucije.
Budyšin (SN/bn). „Po wšo druhe hač jednorej hrajnej dobje hotujemy so na nowu sezonu. W 70. lěće wobstaća SLA móžemy skónčnje zaso po zwučenym wašnju probować“, intendant domu Tomas Kreibich-Nawka rozmołwu zahaji a připowědźi „prěnju wulku prapremjeru“, inscenaciju „Z nadźije do přichoda“, kotruž chcedźa 16. septembra na hłownym jewišću Němsko-Serbskeho ludoweho dźiwadła w Budyšinje prěni raz pokazać. Režiju a choreografiju zamołwjacy Měrko Mahr mjenowaše produkciju „hoberski projekt“, wopřijimacy wšitke sparty SLA kaž tež hóstnych solistow a dźěći. Dotal su tři předstajenja kruće zaplanowane, aktualnje dźěłaja na trochu redukowanej turnejowej wersiji.
Awantgarda w Moskwje byli
W Moskwje je Patricija Róblowa w minjenych 19 lětach bydliła a dźěłała, nětko je so ze Serbskich Pazlic pochadźaca ze swójbu do Łužicy nawróćiła a přewozmje nawod marketingoweho teama w LND.
Zhladuja na wuspěšnu sezonu
Towaršnostne prašenja wuměłsce wotbłyšćowane
Miłoćicy (SN/bn). Dohromady dźesać wuměłcow z Němskeje, Pólskeje, Chiny, Armeniskeje, Čěskeje, Šwicarskeje a Simbabwe je we wobłuku 16. mjezynarodneje rězbarskeje dźěłarnički towarstwa Kamjenjak w běhu dweju tydźenjow při Miłočanskej skale skulptury mjez druhim ze zornowca, z drjewa a wocla wutworiło. Minjenu njedźelu su woni z finisažu swoje zdokonjane wudźěłki zjawnosći prezentowali.
Mjeńšinje w třoch rěčach
We wobłuku projekta „Cyfeillgarwch cymraeg a sorbian – Serbsko-Waliziske přećelstwo – Serbsko-Waliziske pśiaśelstwo“ je cyłkownje 14 wuměłcow-jednotliwcow resp. cyłkow wobeju mjeńšinow zhromadny hudźbny album produkowało. Wot jutřišeho chcedźa jón z małej turneju po Łužicy předstajić.
Choćebuz (SN/bn). Zazběh koncertneje jězby budźe „solidarna akcija“ z hibanjom „Fridays for future“ jutře, srjedu, w 15 hodź. na lěsnym arealu w Slepom, kotryž je Zelena liga spřećiwjejo so rozšěrjenju Wochožanskeje jamy kupiła. Wječor slěduje wustup w tamnišej farskej bróžni. Dźeń pozdźišo prezentuje so projekt na Dworje čo. 8 w Kumšicach a pjatk w Nukničan barace. Sobotu wustupuja dwójce w Choćebuzu, a to najprjedy we wobłuku 38. schadowanki a wot 22 hodź. w klubje „Bebel“. Turneja wuklinči z matineju a koncertom w kulturnym centrumje KvU (Kirche von Unten) w Berlinje. Zastup je wšudźe fleksibelny, organizatorojo mjenuja sumu pjeć do dźesać eurow.
Klasiske wjerše a eksperimentelne formy
Zły Komorow (kap/SN/bn). „Zahrodowe město“, zetkawanišćo a galerija Marga w Złokomorowskim měšćanskim dźělu Brězk (Brieske) běchu wospjet z atmosferisce hodźacym so hosćićelom mjeztym hižo 10. łužiskeho festiwala lyriki. Składnostnje jubileja bě sej zarjadowar, towarstwo Dorostowy literarny centrum „Pisam“, dohromady něhdźe 40 poetow a poetkow, spěwytwórcow, hudźbnikow a tworjacych wuměłcow z cyłeje Němskeje přeprosył, zo bychu wot minjeneho štwórtka hač do předwčerawšeho narodniny swjedźensce wuhotowali. Serbski podźěl bě tež lětsa po zwučenym wašnju dosć prezentny.
Štwórtk zahaji „zažrany čitar“ Raz festiwal z klankodźiwadłowym předstajenjom „Lyrika njeje ničo ke chłóšćenju“. Pjatk slědowachu čitanja čłonkow a čłonow Złokomorowskeho kružka awtorow „Kostrjanc“. Sobotu čakachu wjacore dźěłarnički, kaž na přikład „Knihićišć po wašnju Gutenberga“ a „Poezija a kaligrafija“ na zajimcow; na cyłkownje štyrjoch jewišćach prezentowachu so najwšelakoriši awtorojo ze swojimi basnjemi, kotrež sahachu wot přewšo „klasiskich“ wjeršow hač k najeksperimentelnišim formam.
Filmiski dohlad na łužiske fasety
„Zhromadnje we wuskim zwisku“ rěka nowy rjad Budyskeho towarstwa Kamjentny dom, we kotrehož wobłuku pokazaja měsačnje wubrane filmy, wobswětlace „regionalne, towaršnostnje relewantne a/abo biografiske wosebitosće a temy“. Zahajili su jón minjeny pjatk z „Łužiskimi dohladami“.
Budyšin (SN/bn). Premjera bě kooperatiwne zarjadowanje Kamjentneho domu, Nysoweho filmoweho festiwala, Serbskeho ludoweho ansambla, Domowiny, Załožby za serbski lud, Serbsko-Němskeje syće Łužycafilm a Choćebuskeho filmoweho festiwala (CFF). Něhdźe 20 zajimcow je sej dohromady šěsć paskow wobhladało, kotrež buchu zdźěla hižo we wobłuku rjadu CFF „Heimat – Domownja – Domizna“ předstajene.
Přichadźeja z cyłeho swěta
Znowa wotewrjena synagoga w Zhorjelcu zhladuje na lětnu bilancu
Zhorjelc (AK/SN). Zhorjelska synagoga słuša k najbóle wopytowanym zajimawostkam města. Lěto po znowawotewrjenju je rezimej jara pozitiwny. Tole podšmórny předsyda Spěchowanskeho kruha Zhorjelska synagoga Markus Bauer w aktualnym newsletteru. Naličichmy „wjace hač 15 000 wopytowarjow. Koncipowany multimedia-guide a wučbnej filmaj stej so w praksy wupruwowałoj.“ Wjace hač 140 wodźenjow je towarstwo organizowało, mjez nimi mnohe poskitki za młodostnych a šulske rjadownje. Spěchowanski kruh a kulturny serwis města, kotryž synagogu w nadawku komuny wudźeržuje, dowěrliwje hromadźe dźěłatej. Najebać wobmjezowanja koronapandemije dla so wot znowawotewrjenja něhdźe 30 zarjadowanjow w synagoze wotmě. K tomu słušeja koncerty, přednoški a čitanja.
Sta na jewišću a za nim
Premjera za wosebity klawěr
Łaz (AK/SN). Składnostnje 25. posmjertnin komponista Jana Pawoła Nagela (1934–1997) je Spěchowanske towarstwo Zetkawanišćo Dom Zejlerja a Smolerja Łaz wčera z komornym koncertom wosebity Nagelowy klawěr přepodało. „Klawěr je něhdźe 100 lět stary. Jan Pawoł Nagel hraješe jako dźěćo pola swojeje susodki knjeni Soratoweje na nim. Wona jemu instrument testamentarisce zdźědźi“, předsyda towarstwa Reinhardt Schneider koncert zahaji. Klawěr słušeše pozdźišo synej komponista dr. Matej Nagelej, kiž da jón naročnje restawrować a jón naposledk spěchowanskemu towarstwu dari.
Koncert tónle skutk hódnoćeše a klawěr swjatočnje poswjeći. Zdobom bě to spominanje na komponista a dźak dołholětnym spěchowarjam, darićelam a sponsoram towarstwa.
