Budyšin (SN/pdź). Něhdźe 500 milion ludźi je wšědnje w socialnej syći Instagram po puću. Tež mnoho, přewažnje młodych, Serbow so prawidłownje tam informuje a rozhladuje. Tuž njezadźiwa, zo ma nimale kóžda serbska skupina abo institucija tež Instagramowy account. Najwažniši kriterij za wuspěch tajkich stronow je ličba tych, kiž wobsahej stronow sćěhuja – tak mjenowani „followers“. Tute wšak poměrnje dokładnje wuprajeja, kelko ludźi z powěsćemi, kotrež na Instagramje šěriš, docpěwaš. Najwjetše tajke strony maja w Serbach wjace hač 1 000 followerow.

Tak na přikład Instagramowy account kampanje Sorbisch na klar. Něhdźe jónu wob tydźeń tu artikl wo zajimawym Serbje abo wo zajimawej skupinje, akciji abo podawiznje ze serbskim kontekstom wozjewja. Přewažnje pak w němskej rěči, wšako měri so kampanja na rozšěrjenje wědy wo Serbach w němskej ludnosći. Tak tež njezadźiwa, zo je wona strona z 1 918 followerami najwjetša mjez „serbskimi“ a ma samo módru hóčku. Z tutej Instagram signalizuje, zo jedna so wo za zjawnosć relewantnu instancu.

Strawałd (SN/bn). „Skoki po času“ je hesło lětušeho festiwala šesćiměstow „Přińć a woteńć“. Lětsa chce jón Strawałdske (Strahwalde) spěchowanske towarstwo Přińć a woteńć pjaty króć z dohromady dwanaće zarjadowanjemi po zwučenym wašnju na cyłkownje dźesać hornjołužiskich jewišćach wuhotować. Zazběh twori „Muzikaliski festiwalny ćah“, kotryž pojědźe pjatk, 12. awgusta, w 15 hodź. ze Žitawskeho dwórnišća do Ojbina. We wagonach hudźa mjez druhim dujerski ansambl Capella de la Torre, čěski chór Cum Decore a awdiowizuelny performer Playpad Circus.

Dalše wjerški programa budu „Hrodowe koncerty“ w Hrodźišću, Krobnitzu a Kralowskim haju (Königshain) z klarinetistom Joãom Orecchiawom a celistom Tsepom Pooewom, „Pieśni o podróżach“ samsneju wuměłcow w Zgorzelecu a třidimensionalna zwukowa instalacija „Kaleidoskop rumow“ Fabiana Russa a Carla Grippy w Žitawje. Byrnjež so zarjadowarjo wo serbske přinoški prócowali, so jim lětsa njezešlachći wotpowědnych kooperaciskich partnerow nańć.

Ludwigsburg (AB/SN). W nakładnistwje Pop w Ludwigsburgu je druha serbsko-němska zběrka poezije wušła. Pod titlom „Posledni sněh/Der letzte Schnee“ je 51 basnjow rumunskeho a dźensa w Ludwigburgu bydlaceho spisowaćela a nakładnika Traiana Popa wozjewjenych. Wo serbske přebasnjenja staj so Dorotheja Šołćina a Benedikt Dyrlich postarałoj. Dyrlich je zdobom wudawaćel zběrki, za kotruž je dwurěčne dosłowo spisał. Dotal njewozjewjene grafiki Boženy Nawka-Kunysz (1946–2000) wob­rubja zběrku.

Nimale kóždy serbski młodostny so prawidłownje w socialnej syći Instagram rozhladuje. Tam dźě zhoniš, štó runje što čini abo hdźe što běži. Ja informuju so na Instagramje tež wšědnje, što so w Serbach wotměwa. To je za mnje wosobje zajimawe, hdyž wotydźenja zwonka Łužicy přebywam. Profil Serbskeho rozhłosa mi prawidłownje z tekstami, wobrazami a widejemi serbske nowosće zbliži. To mam za jara wažne, wšako surfuju runja mojim towaršam husćišo na Instagramje, hač zo rozhłós słucham. Najwažniše informacije pak přiwšěm zhonju. Za jara zajimawy mam tež profil Załožby za serbski lud. Tam prawidłownje z rjanymi pisanymi wobrazami wo serbskich projektach a aktiwitach Załožby informuja. Přeju sej, zo bychu to wjace ludźi widźeli. Accountej Załožby wšak sćěhuje wokomiknje jenož 295 ludźi na Instagramje, štož je přiru­nujo z druhimi stronami poměrnje mało. Přez někotre małe triki pak da so ličba followerow tež powjetšić. Pětr Dźisławk