Ruska zaruča syriskim Kurdam wěstotu
Moskwa (dpa/SN). Ruska je měrliwym syriskim Kurdam zaručiła, zo smědźa w 30 kilometrow šěrokim wěstotnym pasmje na sewjeru kraja podłu mjezy k Turkowskej wostać. Njeje trjeba, zo dyrbja měrliwi wobydlerjo swoje bydlenja wopušćić. To je ruski zakitowanski minister Sergej Šojgu po informacijach nowinarjow we wčerawšej widejowej konferency ze syriskimi demokratiskimi mocami (SDF) rjekł, kotrež kurdisku milicu YPG dominuja. Garant za wěstotu su ruska wojerska policija a syriscy pomjezni wojacy, praji Šojgu w rozmołwje z komanderom SDF Maslumom Abdijom.
Sergej Šojgu zdobom připowědźi, zo chcyli ruscy wojacy swoje patrulje rozšěrić a ličbu syriskich jednotkow na syrisko-turkowskej mjezy powjetšić. General Maslum dźakowaše so po informacijach medijow Ruskej a jeje prezidentej Wladimirej Putinej za garantiju wěstoty kurdiskeho ludu a za kročele, kotrež su přiměr w potrjechenej kónčinje zmóžnili. Komander w tym zwisku wobkrući, zo „su Rusojo a Syričenjo mjeztym zepěranišća wobsadźili. Podpěrujemy jich po swojich móžnosćach.“
Zakładna renta dale njejasna
Wulka koalicija wažne předewzaće koaliciskeho zrěčenja rozjimała
Berlin (dpa/SN). Tež po tydźenje trajacych jednanjach njeje so koalicija w Berlinje na rozrisanje w prašenju zakładneje renty dojednać móhła. Wurjadna dźěłowa skupina CDU/CSU a SPD je wuradźowanja wo tym wčera znowa přestorčiła, kaž powěsćernja dpa z kruha wobdźělnikow zhoni. Z jednanjemi chcedźa prawdźepodobnje přichodny tydźeń pokročować. Tak njeje so knježerstwowemu zwjazkej poradźiło, so hišće do wólbow Durinskeho krajneho sejma w mjenowanym prašenju dojednać.
Zastupnicy wulkeje koalicije běchu so wčera zešli, zo bychu w koaliciskim zrěčenju zakótwjenu zakładnu rentu rozjimali. Ludźo, kotřiž su znajmjeńša 35 lět dźěłali, měli znajmjeńša wo dźesać procentow wyšu rentu dóstać hač Hartz IV, tež hdyž su swój čas mało zasłužili a tuž mjenje do rentoweje kasy płaćili.
To a tamne (24.10.19)
Kruwa w rěce je w Porynsko-Pfalcy wulkozasadźenje wohnjoweje wobory zawinowała. „Z ćežkim ćělnym dźěłom“ so wohnjowym wobornikam po wjacorych hodźinach poradźi, skoćo z pomocu powjazow z wody wućahnyć. Do toho bě wone z pastwy twochnyło a před pomocnikami ćěkało, kotřiž chcychu je popadnyć. Při tym padny do rěki Nahe a njedósta so wjace z pruda.
Wustajeńca „Plastowy měšk, adej“ we Waldenburgu pola Stuttgarta pokazuje z něhdźe 50 000 plastowymi měškami kulturne stawizny tity, kotraž je ludźi minjene 50 lět přewodźała – w kupnicach, drastowych wobchodach abo politiskich stronach. Zdobom zamołwići na to skedźbnjeja, zo je čas plastowych titow bórze nimo, dokelž za zwjazkowej runinje jich zakaz přihotuja. Nic naposledk dokumentuja „błudnosć konsumoweho swěta“.
Tusk: Brexit znowa přestorčić
Brüssel/London (dpa/SN). Prezident Rady EU Donald Tusk chce čłonskim statam EU poručić, dalšemu podlěšenju termina wustupa Wulkeje Britaniskeje z Europskeje unije přihłosować. Wčera bě britiski parlament wot premierministra Borisa Johnsona z Brüsselom wujednanemu zrěčenju zasadnje přihłosował, přewšo wuski časowy plan hač do 31. oktobra pak wotpokazał. Tak dyrbi Johnson přećiwo swojej woli EU znowa wo přestorčenje brexita prosyć.
Wolijowe tepjenja zakazać
Berlin (dpa/SN) Zwjazkowe knježerstwo je dźensa zakoń schwaliło, po kotrymž je wot lěta 2026 zakazane nowe wolijowe tepjenja zatwarić. Je to dźěl klimoweho paketa, na kotryž bě so knježerstwo njedawno dojednało. W nim je rjadowane, zo smědźa so po lěće 1991 zatwarjene wolijowe a płunowe tepjenja 30 lět wužiwać. Nowe wolijowe tepjenja su wot lěta 2026 z někotrymi wuwzaćemi zakazane. Do lěta 1991 zatwarjene tepjenja njesmědźa so potom hižo wužiwać.
Ćišć na Trumpa přiběra
Prokurdiscy aktiwisća su dźensa rano wrota brónjenskeho ...
Z traktorami přećiwo ratarskej politice
Berlin (dpa/SN). Ze stami traktorow su burja w Lipsku, Kamjenicy a Zhorjelcu wčera za wjace sobupostajowanje w ratarskej politice protestowali. Woni wobdźělichu so na hwězdnych jězbach we wobłuku cyłoněmskeho protesta „Krajiny zwjazuja“, kaž Paul Kompe, organizator demonstracije w Lipsku, rozłoži.
Centrum protesta bě Bonn. Tam je so po informacijach policije něhdźe 6 000 wobdźělnikow z 2 000 traktorami zhromadźiło. Nadróžny wobchad w měsće a wokolinje bě zlemjeny. Do Berlina bě něhdźe 200 traktorow z Braniborskeje dojěło. Na jězbje po Lipsku wobdźěli so wjace hač 150 ratarskich zawodow z regiona. W Zhorjelcu bě něhdźe 100 traktorow na pućach.
Putin a Erdoğan so dojednałoj
Berlin (dpa/SN). Němski wonkowny politikar Zelenych Omid Nouripour widźi po dojednanju mjez Turkowskej a Ruskej na zhromadne kontrole kónčin na sewjeru Syriskeje jenož jara snadne šansy za namjet zakitowanskeje ministerski Annegret Kramp-Karrenbauer (CDU). „Runje po dojednanju w Sočiju njeje jasne, dokal měli wojakow EU słać“, rjekny Nouripour dźensa w rańšim magacinje ZDF. „Tohodla wočakujemy, zo njebudźi ministerka jenož nadźije, ale zo nam tež rozkładźe, kak ma to hić.“
Kramp-Karrenbauer bě so předwčerawšim za mjezynarodnu stabilizowacu wojersku misiju na sewjeru Syriskeje wuprajiła. Wčera staj so ruski prezident Wladimir Putin a turkowski prezident Recep Tayyip Erdoğan na zhromadne kontrole w kónčinje dojednałoj. Nimo toho je přiměr wo dalše šěsć dnjow podlěšeny, zo móhli kurdiske jednotki pomjeznu kónčinu k Turkowskej wopušćić.
SPD zakitowansku ministerku Kramp-Karrenbauer přiběrajcy kritizuje, dokelž njeje swój namjet ze stronu dorěčała.
Pućnik za informacije
To a tamne (23.10.19)
Byrnjež policija blisko była, je 26lětny ilegalnje čisłowu tafličku awta wuměnił. Wón wotšrubowa nižozemskej tafličce a naruna je z čěskimaj. Při kontroli muža na awtodróhowym parkowanišću při A 17 pola sakskeho Breitenauwa zastojnicy zwěsćichu, zo bě tón bjez jězbneje dowolnosće po puću. Nižozemske čisła drje běchu originalne, awto pak dawno wotzjewjene. Čěskej tafličce běštej pokradnjenej. Policisća muža zajachu.
Zelenkojty psyčk je so w sewjerorynsko-westfalskim Wermelskirchenje narodźił. Wón słuša k cyłkownje dźewjeć hewak běłym šćenjatam rasy Golden-Retriever, kotrež su tydźenja na swět přišli. Fachowcy su sej wěsći, zo bě so při porodźe placenta psycy puknyła, w kotrejž je maćizna biliverdin. To je zelenu barbu zawiniło. Ta pak so bórze pominje, a potom budźe mały pos „Mojito“ běły.
Tusk: Žadyn no-deal-brexit
Strasbourg/London (dpa/SN). Europska unija chce wšitko činić, zo by njerjadowanemu wustupej Wulkeje Britaniskeje z Europskeje unije zadźěwała. To je prezident Rady EU Donald Tusk připowědźił. „No-deal-brexit njebudźe nihdy naš rozsud“, rjekny Tusk w Europskim parlamnenće w Strasbourgu. Wuprajenja Tuska hódnoća jako pokazku na to, zo móhł wón podlěšenje termina brexita poručić, dyrbjało-li zrěčenje wo wustupje z EU w britiskim parlamenće znowa zwrěšćić.
Netanjahu zwrěšćił
Tel Aviv (dpa/SN). Israelski prawicarsko-konserwatiwny ministerski prezident Benjamin Netanjahu je po wólbach parlamenta w septembru z wutworjenjom noweho knježerstwa zwrěšćił. Wotpowědny mandat wróći wón prezidentej Reuvenej Rivlinej. Tón je připowědźił, nadawk k wutworjenju knježerstwa bywšemu šefej wójska Bennyjej Gantzej přepodać. Gantz ma nětko štyri tydźenje chwile za chětro wobćežnu misiju.
Čitanju politikarja zadźěwali
