Wuradźujawo Syriskej
Ankara (dpa/SN). Najebać rozdźělne pozicije w Syriskej su so turkowski prezident Recep Tayyip Erdoğan, ruski prezident Wladimir Putin a iranski prezident Hassan Ruhani dźensa w Ankarje zetkali, zo bychu wo móžnych naprawach na dobro ciwilneje ludnosće w Syriskej wuradźowali. Při tym dźe mjez druhim wo tak mjenowane deeskalaciske cony. Ruska a Iran podpěrujetej syriskeho mócnarja Bashara al-Assada, Turkowska porno tomu wojowarjow opozicije.
Hladajo na zetkanje w Ankarje žada sej statny minister we wonkownym ministerstwje Niels Annen (SPD) sylniše zasadźenje Němskeje za kónc wójny.
Bjez lěkarjow z wukraja hižo njeńdźe
Podstupim (dpa/SN). Nimale žana chorownja hižo bjez lěkarjow z wukraja njewuńdźe. W Braniborskej je mjeztym kóždy sedmy z wukraja, w Choćebuskim Carla Thiemowym klinikumje je to nimale třećina 370 lěkarjow. „Wot wysoko motiwowanych, jara derje wukubłanych medicinarjow naš dom a pacienća enormnje profituja“, zdźěli jednaćel klinikuma Götz Brodermann.
Po informacijach braniborskeje lěkarskeje komory je ličba wukrajnych lěkarjow znowa rozrostła, a to wo něhdźe 150 na nětko cyłkownje 1 364. Najwjac z nich pochadźa z Pólskeje, slěduje Syriska. Mjez nimi su tohorunja bywši ćěkancy. Dale přichadźeja medicinarjo z Ruskeje, Rumunskeje a Grjekskeje.
„Bjez lěkarjow z wukraja njeby wjele chorownjow runje na wsy we wjele wobłukach dźěłać móhło“, je Brodermann přeswědčeny. Zo bychu tež přichodnje dosć fachowcow měli, su w Carla Thiemowym klinikumje integraciski program zahajili, hdźež tuchwilu 16 medicinarjow swój praktikum wukonja.
Hódnoćić a dokumentować
Z knihu zhladuje Zhorjelski wokrjes na dźesaćlětne wobstaće
Zhorjelc (AK/SN). Wokrjes Zhorjelc wobsteji mjeztym dźesać lět. K tej składnosći wěnuje so hwězdna kolesowarska jězba k wšelakorym městnosćam. Cil ma 5. meje Rózbork nad Nysu być. Jubilej je tež tema wobydlerskeho swjedźenja 25. awgusta na dworje Zhorjelskeho krajnoradneho zarjada. Tón měsac ma tohorunja jubilejna kniha wuńć. „Dźěłowy titul je ,10 lět wokrjes Zhorjelc – Epizody mjez Mužakowom a Žitawu.‘ 150 stron wopřijaca wjazana kniha ma w nakładźe 2 000 eksemplarow wuńć“, zdźěli historikar Lars-Arne Dannenberg minjeny štwórtk, jako je prěnje wobsahi bliže předstajił. „Chcemy cyłkownu wjelorakosć Zhorjelskeho wokrjesa pokazać“, wón wuzběhny. Wobłuki sahaja wot dźěła přez sport, wólny čas hač ke kubłanju a wukubłanju. Zdobom poćahuja so awtorojo na hospodarstwo wokrjesa, hdźež njepokazaja jenož wulke zawody kaž Siemens a Bombardier. W regionje maja tež wjele mjeńšich předewzaćow.
To a tamne (04.04.18)
Ze swojimi myslemi hižo w dowolu při Gardaskim jězoru bě po wšěm zdaću muž ze sewjerohessenskeho Baunatala. Na awtodróhowym zastanišću w bayerskim Holzkirchenje je wón swojej dźowce w starobje dźesać a 14 lět prawdźepodobnje zhubił. Holcy chcyštej jenož na nuznik, štož pak nanej njeprajištej. Tón je tankował, so do awta sydnył a dale jěł. Policija spyta jeho 48 razow telefonisce dosćahnyć, zo by swojej dźowce na wotpočnišću wotewzał. Hakle na Brenneru jemu switaše, zo jej scyła wjace w awće nima.
Apetit na čerstwu zeleninu měještej jutry póndźelu kamelej. W Bremenje stej so skradźu z ležownosće cirkusa wotsaliłoj a sta metrow hač k restawrantej dundałoj. Lóšt na mjaso wšak wegetarianaj njeměještej. Trawa na łuce před hosćencom jimaj dosahaše. Po połhodźinskim wulěće pak jej policija popadny a do cirkusa wróćo dowjedźe.
Z islamom so zeznajomić
Schkeuditz (B/SN). Pod hesłom „Zetkanje z islamom“ steji mała a stajnje wotewrjena wustajeńca na lětanišću Lipsk/Halle. Zestajał je ju farar Paul Christian wot ekumeniskeho dušepastyrstwa lětanišća. Zestajer prosy sej ju wobhladać a so ze swětowymi nabožinami kaž tež jeje přisłušnikami zeznajomić.
Tež politisce skutkować
Berlin (B/SN). Arcybiskop Berlina Heiner Koch je katolske swójbne kubłanišća a zwjazki namołwjał, přewzać tež politisku a towaršnostnu zamołwitosć. Je wažne nutřkownocyrkwinsce skutkować, angažement pak ma tež dale hić. Cyrkej, jeje towarstwa a kubłanišća měli tež měć hódnoty křesćanstwa, swójby a mandźelstwa dale dawać.
ProChrist live
Melle (B/SN) Milion wěriwych je ewangelizaciju „Pro Christ“ wot 11. do 17. měrca sćěhował, kaž zarjadowar zdźěli. Zarjadowanja pod motom „Je to móžno?“ wusyłachu na 500 městnach w Němskej a Europje kaž tež přez Bibel TV a ERF-medije. Po informacijach nošerja su sobudźěłaćerjo na městnach zarjadowanjow a při telefonje mnohe dušepastyrske rozmołwy wjedli.
Z prawej měru měrić
Znapřećiwjenje zapodał
Madrid (dpa/SN). W Němskej zajaty bywši šef katalanskeho regionalneho knježerstwa Carles Puigdemont je na Španiskim wyšim sudnistwje znapřećiwnjenje přećiwo wumjetowanej rebeliji zapodał. Nimo toho skorži wón přećiwo wumjetowanju, zo je zjawne srědki znjewužiwał. To su španiske medije wčera wozjewili. Dale ze znapřećiwnjenja wuchadźa, zo njeje na dnju referenduma wo njewotwisnosć loni 1. oktobra k žanej namocy dóšło. Schleswigsko-holsteinske generalne statne sudnistwo chce tón tydźeń rozsudźić, hač jeho španiskej justicy přepoda.
Putin pola Erdoğana
Istanbul (dpa/SN). Ruski prezident Wladimir Putin chcyše so dźeń do syriskeho wjerškoweho zetkanja z turkowskim statnym šefom Recepom Tayyipom Erdoğanom w Ankarje zetkać. Tema zeńdźenja je na přikład zhromadne postupowanje w boju přećiwo terorej. Na syriskim wjeršku jutře w Ankarje wobdźěli so tež iranski prezident Hassan Ruhani. Zhromadnje chcedźa třo statni šefojo wo boju přećiwo terorej a wo zakónčenju wobydlerskeje wójny w Syriskej wuradźować.
Netanjahu dojednanje cofnył
Pod hesłom „Wotbrónić město brónić“ su wčera třeći raz ...
Z rezoluciju přećiwo koncertej
Zhorjelc (AK/SN). Z rezoluciju reaguja demokratiske strony Zhorjelskeho wokrjesneho sejmika na planowane zarjadowanje neonacijow wot 20. do 22. apryla pod hesłom „Tarč a mječ“ z koncertom a bojowniskim treningom. Wobzamknyli su ju wokrjesni radźićeljo minjenu srjedu z jasnej wjetšinu 56 zapósłancow. Wosom zastupjerjow, předewšěm z frakcije AfD, je so hłosa wzdało. Skupina NPD njebě so na wothłosowanju wobdźěliła. „My čłonojo wokrjesneho sejmika Zhorjelc, podpěrujemy měrowy swjedźeń we Wostrowcu, kotryž samsny čas přewjedu. Namołwjamy wobydlerjow, institucije, towarstwa a přemysłownikow wokrjesa, so tutej formje ciwilneje kuraže přizamknyć“, rěka w rezoluciji. Wokrjesni radźićeljo chcedźa na měrowym swjedźenju aktiwnje sobu skutkować. Wostrowc a cyły wokrjes njeměłoj so ze zarjadowanišćom prawicarskich ekstremistow stać.
„Kóždy ma prawo na swój kraj“
Washington (dpa/SN). Sawdi-arabski princ Mohammed bin Salman je zwuraznił, zo ma Israel prawo na swójski kraj. „Wěrju do toho, zo maja ludźo wšudźe prawo, měrliwje w swojim staće žiwi być“, podšmórny 32lětny w wčera wozjewjenym interviewje magacina USA The Atlantic. Po jeho słowach maja Palestinjenjo kaž Israelčenjo prawo na swój kraj. Zo móhli wšitkim stabilitu zmóžnić a normalne poćahi wudźeržować, je měrowe zrěčenje trěbne.
Islamske konserwatiwne kralestwo nima k Israelej žane diplomatiske poćahi, je pak po měnjenju fachowcow zakładnje zwólniwe poměr normalizować. W samsnym času Sawdi-Arabska Palestinu podpěruje.
Kaž bin Salman rjekny, ma jeho kraj nabožne starosće dóńta swjateje mošeje w Jerusalemje a prawow Palestinjanow dla. „Nimamy žane předsudki napřećo druhim ludźom“, wón doda. Hospodarstwo w Israelu dale a bóle rozrostuje, na čimž ma wězo tež Sawdi-Arabska wulki zajim. By-li měr knježił, bychu kraje kaž Egyptowska abo Jordanska wjele wjac zhromadnych zajimow z Israelom měli.
To a tamne (03.04.18)
Zadwělowany muž je so nětko na policiju wobroćił a wo pomoc prosył. 34lětny njewědźeše sej žaneje rady, kak móhł poćah k žiwjenskej partnerce zakónčić, dokelž so z njej hižo njerozumi. Zastojnica jemu tuž wšelake alternatiwy rozkładźe. Hač je sej wón pokiwy k wutrobje wzał, policiji znate njeje.
Město toho zo by twochnył, je rubježnik na policiju čakał a smě nětko na 15 měsacow do jastwa. Z nabiwanskim kablom handyja wón zak kapy formowaše, zo wupadaše to kaž pistola, a tak hrožeše wobsedźerjej wobchoda. Jako pak so tón z chětro prawdźiwje skutkowacym rewolwrom wobaraše, so nadpadnik cyle spěšnje poda. Wobchodnik jemu namjetowaše: Pak nablaku ćeknje pak z nim hromadźe na policiju čaka. Wudrěwar rozsudźi so za to čakać.
