Putin: Trjebamy čłowjeski rozum
Moskwa/Ankara (dpa/SN). Ruski prezident Wladimir Putin nochce w mjezynarodnej zwadźe nastupajo nadpad z jědom na něhdyšeho ruskeho agenta Sergeja Skripala na zamołwjenje Londona čakać. „Nječakamy na ničo“, rjekny Putin wčera w Ankarje. „Chcemy, zo so na kóncu čłowjeski rozum přesadźi a zo so mjezynarodne poćahi njewobškodźa.“ Wulka Britaniska Ruskej wumjetuje, zo je za nadpad zamołwita. Moskwa pak winu raznje wotpokazuje.
Wčera bě sej rěčnik Putina Dmitrij Pjeskow oficialne zamołwjenje Wulkeje Britanskeje žadał, po tym zo bě fachowy labor w Londonje zdźělił, zo njeje wobdźělenje Ruskeje na atentaće dopokazane.
Skandal Facebooka dla wjetši hač mysleny
Kozel: Serbske symbole škitać
Małe naprašowanje zapósłanca Lěwicy w Sakskim krajnym sejmje
Budyšin/Drježdźany (SN/MkWj). Serbski zapósłanc Lěwicy w Sakskim krajnym sejmje Hajko Kozel je so z tak mjenowanym małym naprašowanjom na krajne knježerstwo wobroćił. Při tym dźe wo prašenje, w kotrej měrje su serbske oficialne symbole, kaž módro-čerwjeno-běła chorhoj, škitane.
Pozadk naprašowanja su wobkedźbowanja Kozela, po kotrychž serbske barby na demonstracijach w Drježdźanach stajnje zaso znjewužiwaja, kaž wón w nowinskej zdźělence informuje. Tak bě zapósłanc na demonstracijach serbske chorhoje w rukach demonstrantow widźał, kotrež běchu z najskerje pruskim worjołom a napisom „Mein Herz für Deutschland“ wudospołnjene. Hajko Kozel, zamołwity frakcije za narodne mjeńšiny, je sej wěsty, zo jednaše so wo akcije přećiwo wukrajnikam.
Chwalobna iniciatiwa
To a tamne (05.04.18)
Pozdatne žałosćenje dźěsća we wotpadkowym kontejneru je w Nürnbergu zasadźenje policije a wohnjoweje wobory zawinowało. Železnicarjo běchu na ranžěrowanskim dwórnišću podhladne zwuki w kontejneru słyšeli, z kotrymž wotpadki transportuja. Na to jón wohnjowi wobornicy z ćežkej techniku wurumowachu a namakachu hrajku, kotraž bě spodźiwne zwuki wot so dawała.
Pjenjezy z parkowanskich awtomatow překřiwił je sobudźěłaćer delnjosakskeho města Bückeburga, a činješe to prawdźepodobnje wjele lět. Doskónčnu škodu měšćanske zarjadnistwo scyła hišće njeznaje. Tuchwilu tam trochuja, zo je jich dohromady něhdźe 30 000 eurow. Muž bě wot lěta 2014 za wuprózdnjenje parkowanskich awtomatow zamołwity. Nosył pak je zwjetša jenož dźěl pjenjez na banku. Kak běchu jeho lepili, nochcyše město zdźělić.
Trump Němsku kritizuje
Washington (dpa/SN). Prezident USA Donald Trump je Němsku raznje kritizował, dokelž projekt wolijowoda w Baltiskim morju Nord Stream 2 dale podpěruje. „Němska klumpa miliardy eurow do Ruskeje, na druhim boku pak swoju zamołwitosć we wobłuku NATO zanjecha“, rjekny Trump na zetkanju ze statnymi šefami třoch baltiskich krajow we Washingtonje. Minjeny tydźeń bě němske knježerstwo twar 31 kilometrow dołheho wotrězka dowoliło. Twarić ma trasu wotnožka ruskeho statneho wolijoweho a płunoweho koncerna Gazprom.
Puigdemonta přepodać?
Schleswig (dpa/SN). W padźe nawody katalanskich separatistow Carlesa Puigdemonta je nětko wyše krajne sudnistwo w Schleswigu wužadane. Wone ma wo próstwje generalneho statneho rěčnistwa Schleswigsko-Holsteinskeje rozsudźić, Puigdemonta oficialnje zajeć a jeho Španiskej přepodać. Hač dźensa wo tym rozsudźa, njebě dopołdnja hišće jasne. Generalne statne rěčnistwo bě próstwu wčera zapodało. Španiska wumjetuje Puigdemontej zběžkarstwo a překřiwjenje zjawnych srědkow.
Železnicarjo stawkowali
Takrjec wot jednoho dnja na druhi je tež w Sakskej nalěćo ...
Ruska žada sej zamołwjenje
Moskwa (dpa/SN). Ruska sej wot Wulkeje Britaniskeje žada, zo so za ćežke wumjetowanja w padźe zajědojćeneho něhdyšeho agenta Sergeja Skripala zamołwi. To zdźěli rěčnik Krjemla Dmitrij Pjeskow powěsćerni Interfax.
Wulka Britaniska ma Rusku za hłowneho zamołwiteho za atentat, při kotrymž bu něhdyši dwójny agent ze sowjetskim jědom Nowičok zajědojćeny. Britiski labor je jědojtu maćiznu přepytował. Kaž wčera wottam rěkaše, njeje pak dokładnych pokiwow na to, zo jěd woprawdźe z Ruskeje pochadźa. Britiska bě wjacorych ruskich diplomatow z kraja wupokazała. Pokazujo swoju solidaritu z Londonom běchu mnohe europske kraje, mjez nimi tež Němska, to samsne činili. Ruska reagowaše nawopak runje tak.
Wuradźujawo Syriskej
Ankara (dpa/SN). Najebać rozdźělne pozicije w Syriskej su so turkowski prezident Recep Tayyip Erdoğan, ruski prezident Wladimir Putin a iranski prezident Hassan Ruhani dźensa w Ankarje zetkali, zo bychu wo móžnych naprawach na dobro ciwilneje ludnosće w Syriskej wuradźowali. Při tym dźe mjez druhim wo tak mjenowane deeskalaciske cony. Ruska a Iran podpěrujetej syriskeho mócnarja Bashara al-Assada, Turkowska porno tomu wojowarjow opozicije.
Hladajo na zetkanje w Ankarje žada sej statny minister we wonkownym ministerstwje Niels Annen (SPD) sylniše zasadźenje Němskeje za kónc wójny.
Bjez lěkarjow z wukraja hižo njeńdźe
Podstupim (dpa/SN). Nimale žana chorownja hižo bjez lěkarjow z wukraja njewuńdźe. W Braniborskej je mjeztym kóždy sedmy z wukraja, w Choćebuskim Carla Thiemowym klinikumje je to nimale třećina 370 lěkarjow. „Wot wysoko motiwowanych, jara derje wukubłanych medicinarjow naš dom a pacienća enormnje profituja“, zdźěli jednaćel klinikuma Götz Brodermann.
Po informacijach braniborskeje lěkarskeje komory je ličba wukrajnych lěkarjow znowa rozrostła, a to wo něhdźe 150 na nětko cyłkownje 1 364. Najwjac z nich pochadźa z Pólskeje, slěduje Syriska. Mjez nimi su tohorunja bywši ćěkancy. Dale přichadźeja medicinarjo z Ruskeje, Rumunskeje a Grjekskeje.
„Bjez lěkarjow z wukraja njeby wjele chorownjow runje na wsy we wjele wobłukach dźěłać móhło“, je Brodermann přeswědčeny. Zo bychu tež přichodnje dosć fachowcow měli, su w Carla Thiemowym klinikumje integraciski program zahajili, hdźež tuchwilu 16 medicinarjow swój praktikum wukonja.
