Zahoritosć dołho njetraješe! Bórze po připowědźenju Elona Muska, šefa koncerna Tesla, južnje Berlina gigantisku twornju elektroawtow twarić chcyć, bě jasne, zo njeje twornja jenož wulki prestižny objekt za Braniborsku, ale zo změje předewzaće swoju płaćiznu, za přirodu, wobswětoškit, dnownu wodu a nic naposledk za wobydlerjow potrjecheneje kónčiny. Jara spěšnje so wukopa, zo předewzaće z USA němske předpisy njestaraja a zo čini na płoninje noweje twornje, štož chce. Protesty ludźi mějachu němske zarjady na blidźe. Tesla nima trjeba, na naprašowanja medijow reagować, čehodla tež? Nětko tak wupada, jako bychu so zamołwići skónčnje raz přesadźili. Tesla chce 80 000 betonowych kolikow do zemje a tak hač do dnowneje wody zbić, zo móhła nowa hala za baterije na pěskojtej braniborskej pódźe nastać. Tole su zarjady najprjedy raz zadźerželi. Wuraz „Tesla-tempo“ je mjeztym hižo tajke něšto kaž wudmo, nic jenož w Braniborskej. Marko Wjeńka

Swoju wowku z wnučkowym trikom zjebać chcył je 29lětny w Demminje w Mecklenburgsko-Předpomorskej – bjez wuspěcha. Muž bě swoju 85lětnu wowku zazwonił a jej napowědał, zo je w lěsnej chaće w „rukach dwělomnych muži“, kotřiž chcyli jemu křiwdu načinić, jeli njewobstara 600 eurow. Wowce bě tole „spodźiwne“. Wona zazwoni policiju. Zastojnicy móžachu 29lětneho zazwonić a jeho přeswědčić, akciju skónčić. Wón přizna, zo trjeba pjenjezy za wólnočasne wudawki. Nětko dyrbi muž z chłostanjom ličić.

Nócna posyłka muki je w Erfurće zasadźenje policije zawinowała. Wobydlerka bě zastojnikow alarmowała, dokelž bě pječa wutřěle słyšała. Policisća zwěsćichu, zo bě šofer nakładneho awta w fabrice nudlow kotoł muki z powětrom wupryskał. Při tym nastachu woprawdźe na wutřěle podobne zwuki.

Drježdźany (dpa/SN). „Cyle jasne wotmjezowanje wot AFD“ njeje po měnjenju sakskeho ministerskeho prezidenta Michaela Kretschmera na komunalnej runinje móžne. Politikar CDU zasadźuje so w rozmołwje z nowinarjemi Frankfurter Allgemeine Zeitung w dźensnišim wudaću za „pragmatiske wobchadźenje“ ze stronu. We wěcnych rozsudach njedosaha rjec: „Smy přećiwo tomu, dokelž je AfD za to“, Kreschmer rjekny. Wědomi pak měli sej wšitcy być, što AfD w Němskej planuje.

Morjenja dla zasudźeni

Brüssel (dpa/SN). W procesu islamistiskich nadpadow 2016 w Brüsselu dla je sudnistwo wjacorych wobskorženych teroristiskeho mordarstwa dla zasudźiło. Tole je rěčnica sudnistwa wčera wječor w belgiskej stolicy zdźěliła. Šěsć wobskorženym móžachu mordarstwo dopokazać, třoch su wuwinowali. Wo chłostanjach chcedźa w septembru rozsudźić. Při terorowych nadpadach 22. měrca 2016 běchu nadpadnicy cyłkownje 32 ludźi morili a 340 zranili.

Žadaja sej pjenjezy za šule

Stawkowacy šoferojo z wuchodneje Europy steja na juhohessenskim awtodróhowym wotpočowanišću Gräfenhausenje při awtodróze A 5 při swojich wotstajenych jězdźidłach. Wjace hač 60 šoferow pólskeje spedicije, kotřiž pochadźeja přewažnje z Georgiskeje, tu hižo cyły tydźeń stawkuje, zo bychu skončnje swoje pjenjezy dóstali. W Gräfenhausenje běchu hižo w apryu šoferojo samsneje spedicije tydźenje dołho stawkowali, zo bychu wupłaćenje mzdy přesadźili. Foto: dpa/Arne Dedert