Kinsporkska hola jako dźiwinowa kónčina počesćena
Drježdźany (SN). Přirodoškitna kónčina Kinsporkskeje hole je wot minjeneje srjedy dźiwinowa kónčina po kriterijach mjezynarodneje přirodoškitneje organizacije IUCN. Z tym je wona prěnja kónčina w Němskej, kotrejž su tónle predikat spožčili. Sakski minister za wobswět Wolfram Günther (CDU) je wopismo připóznaća samsny dźeń z rukow zastupnika IUCN dr. Eicka von Ruschkowskeho w Kinsporku přiwzał. Z wuznamjenjenjom IUCN wosebje hódnoći, zo wostanje w přirodoškitnym pasmje 80 procentow wšeje 7 000 hektarow wulkeje kónčiny přirodnemu wuwiću přewostajene.
Wobswětowy minister Günther rěčeše wo wažnym mězniku wjelelětneho prócowanja a wo „hoberskim wuspěchu za přirodu a ludźi regiona“. Dźiwinowa kónčina w tak wusko wobsydlenej kónčinje njeje samozrozumliwa, wón rjekny. Kinsporkska hola je jónkrótny ekologiski pokład a runje w časach woteměracych družin přewšo wažna. Tule maja njeličomne družiny zwěrjatow a rostlinow žiwjenski rum. Nimo toho móža zamołwići druhich přirodoškitnych pasmow z nazhonjenjow w Kinsporkskej holi nastupajo zachowanje družin čerpać.
To a tamne (28.08.23)
Pytanje za potworu Nessie w Šotiskej je nowe pokiwy wunjesło. Wjacori dobrowólni su njewšědne zjawy wobkedźbowali, zamołwići zdźěleja. Rozprawy chcedźa nětko přepruwować. Wčera běchu najwjetše pytanje za swětosławnym monstrom w jězoru Loch Ness zahajili. Při tym su awtomatiske kamery kaž tež wosebity mikrofon pod wodu zasadźili. Z nim su „spodźiwne zwuki“ nahrawali. Naposledk běchu Nessie 1972 pytali.
Spicy z jěduceho bydlenskeho mobila padnył je muž minjenu nóc w Porynsko-Pfalcy. 40lětny je so při tym chětro wobodrěł, policija zdźěli. Muž bě so wopity do łoža we wozu lehnył. Při tym kuli so na durje, kotrež njeběchu začinjene. Muž padny na jězdnju, hdźež jeho swědcy namakachu. Z mobilnym telefonom zazwonichu druhich w awće. Tam njeběchu ani hišće pytnyli, zo 40lětny pobrachuje.
Trump pokazuje foto z jastwa
Washington (dpa/SN). Dobre dwě a poł lěće po swojim poslednim zapisku na internetnej platformje Twitter je so bywši prezident USA Donald Trump ze swojim jónkrótnym policajskim fotom na platformu nawróćił. Tam prezentowaše wón krótko do toho w jastwje w Atlanće zhotowjeny portret z pochmurjenym a hněwnym mjezwočom. Trump bě so w jastwje přizjewił, po tym zo běchu skóržbu přećiwo njemu wozjewili.
Prigožin drje mortwy
Washington (dpa/SN). Knježerstwo USA ma za prawdźepodobne, zo je šef priwatneje armeje Wagner, Jewgenij Prigožin, při zražce lětadła w Ruskej žiwjenje přisadźił. To je wuslědk prěnjeho posudka, w zakitowanskim ministerstwje zdźělichu. USA nimaja žane pokazki na to, zo su lětadło z raketu wottřělili. Tajne słužby USA běchu wo detonaciji w lětadle rozprawjeli, štož drje bě přičina njezboža.
Ukrainscy piloća w USA
Ćežke njewjedro je minjenu nóc wobydlerjow stanowanišća w ...
Wo dawku kónc lěta rozsudźa
Krućiše prawidła EU w interneće
Kopańce ma rěkać
Choćebuske zarjadniske sudnistwo jedna 13. septembra wo skóržbje gmejny Kopańce nad Sprjewju (Neuhausen/Spree) přećiwo přirjadowanju k serbskemu sydlenskemu rumej. W krótkopowěsćach smy we wčerawšim wudaću mylnje pisali gmejna Nowe Wiki (Neupetershain). Ta pak sydlenskemu rumej hižo přisłuša.
Redakcija SN
To a tamne (25.08.23)
Na kolesu z Mnichowa do Venediga po puć był je telewizijny moderator Reinhold Beckmann w swojim lětušim dowolu. „Jědnaće dnjow, kotrež njeběchu stajnje přijomne, dokelž bě čara chětro horata“, rjekny 67lětny nowinarjam. Jězba přez Brenner bě jemu wosebite dožiwjenje a jězba z hory dele do Italskeje najrjeńša mzda – „do słónca a k lěpšej jědźi“. Z awtami njeje wjele mjerzanja měł: „Maja tež druhe puće do Venediga, na přikład dróhi starych Romjanow.“
Po inwaziji lětacych mrowjow su na francoskim atlantiskim pobrjoze wjacore kupanske brjohi zawrěli. Potrjechene běchu wotrězki Saint-Hilaire-de-Riez a Saint-Gilles-Croix. Mnozy běchu překasancow dla hižo do hotelow ćeknyli. Prawdźepodobnje běchu horcota a wichory minjenych dnjow njewšědnu koncentraciju mrowjow zawinowali.
Jutřiše wubědźowanje wo najrjeńši wohnjostroj w Drježdźanach je Zwjazk za wobswět a přirodoškit Němskeje kritizował. Zwjazk namołwja, při wšěm wjeselu pyrotechniki dla tež na zwěrjata myslić, kotrež praskotanja dla wosebje ćerpja. Ptački so stróža a zwjetša panisce ćěkaja.
Na dobro Frizow, Danow a Serbow
Dalša etapa k modernemu mjenowemu prawu w Němskej je zdokonjana: Zwjazkowy kabinet je wčera k tomu naćisk zakonja schwalił, kiž wobsahuje tež rjadowanja za Serbow, Frizow a Danow.
Berlin/Budyšin (SN/at). Naćisk za Zakoń wo změnje prawa mandźelskeho mjena a ródneho mjena je cilowu čaru docpěł. Zwjazkowe knježerstwo je dokument wčera wobzamknyło. Po słowach zwjazkoweho ministra justicy dr. Marca Buschmanna (FDP) „kročimy z reformu mjenoweho prawa prěnju kročel při dawno trěbnej modernizaciji swójbneho prawa“. Zapřijate su žadanja w kraju bydlacych narodnych mjeńšin Serbow, Frizow a Danow, štož pohonjowaše ministra k wuprajenju „a tež mjenowym tradicijam mjeńšin napřećo měło prawo z respektom wobchadźeć – město z ramjenjomaj sukać.“ Na etniske mjeńšiny a wosoby z migraciskim pozadkom wusměrjene nowe rjadowanja tworja jedyn z cyłkownje štyrjoch hłownych stołpow reformy.
Skupinu Brics rozšěrja
Johannesburg (dpa/SN). Skupinu Brics najwažnišich prohowych krajow wo šěsć čłonow rozšěrja. Sawdi-Arabsku, Zjednoćene arabiske emiraty, Argentinsku, Egyptowsku a Etiopisku wot 1. januara 2024 přiwozmu, južnoafriski prezident Cyril Ramaphosa dźensa na wjeršku aliancy w Johannesburgu zdźěli. Južna Afrika skupinu dotal nawjeduje, kotrejž přisłušeja nimo toho Brazilska, Ruska, Indiska a China. Skupina chce nadmóc USA a zapada na swěće wottwarić.
Putin bitwu wopominał
Kursk (dpa/SN). Ruski prezident Wladimir Putin je wčera kónčinu wokoło Kurska na mjezy Ukrainy wopytał a tam wulku bitwu tankow w Druhej swětowej wójnje wopominał. Na swjatočnosći je wón wojakow wuznamjenił, kotřiž w jeho nadawku přećiwo Ukrainje wojuja. Woni zasłužeja sej samsnu sławu „kaž rjekojo, kotřiž su 1943 přećiwo nacijam wojowali“. Na bitwje w awgusće 1943 je so 3,5 milionow wojakow a 10 000 tankow wobdźěliło. Materielne straty bitwy njeje Němska nihdy wjace narunać móhła.
Legionele w Pólskej wudyrili
