Washington (dpa/SN). Nadpada na Kapitol USA w januaru 2021 dla dyrbi bywši nawoda prawicarsko-radikalneje skupiny „Proud Boys“, Henry Tarrio, 22 lět do jastwa. Tole su wčera wukazali, justicne ministerstwo zdźěla. Sudnistwo spřisahanych w stolicy Washingtonje bě mužej w meji „rokoćenja a zapřisahanja“ dla w zwisku z ataku 6. januara 2021 winu dało. Měru chłostanja su nětko postajili. Tarrio chce so wusudej wobarać. Přiwisnicy wotwoleneho prezidenta Donalda Trumpa běchu tehdy Kapitol namócnje wobsadźili. Tam bě so Kongres zešoł, zo by wólbne dobyće demokrata Joewa ­Bidena doskónčnje wobkrućił.

Kijew (dpa/SN). Po zahajenju ruskeje inwazije před wjace hač 18 měsacami je ukrainski namjezny škit po swójskich informacijach wjace hač 20 000 wobornowinowatych muži při pospytanym ćěkanju z kraja lepił. „Cyłkownje su zastojnicy při mjezy wot 24. februara minjeneho ­lěta něhdźe 14 600 muži zajeli, kotřiž chcychu Ukrainu ilegalnje wopušćić“, zdźěli rěčnik namjezneho škita Andrij Demčenko wčera medijam. Nimo toho su něhdźe 6 200 muži z falšowanymi dowolnosćemi za wopušćenje kraja lepili.

Tójšto Ukrainjanow spyta, so wójnskej słužbje wuwinyć. Ćěkancow zajeli su předewšěm podłu „zeleneje mjezy“ k Rumunskej a republice Moldawskej, Demčenko rjekny. Při tym jedna so wo muži w starobje mjez 18 do 60 lět. Jeničce w pomjeznej rěce Tisy, kotraž dźěli Ukrainu a Rumunsku, je so 19 muži zatepiło. Někotři su při ćěkanju po Karpatach zmjerznyli. Po trochowanju Europskeje unije je wot zahajenja wójny 650 000 ukrainskich muži do wukraja ćeknyło. Za wizum płaća woni hač do 10 000 eurow.

Generalna debata zwjazkoweho sejma wo politice knježerstwa

Berlin (dpa/SN). Zwjazkowy kancler Olaf Scholz (SPD) je krajam, komunam a demokratiskej opoziciji „pakt za Němsku“ k modernizowanju kraja namjetował. Tón měł Němsku spěšnišu, modernišu a wěsćišu sčinić, rjekny politikar SPD dźensa na generalnej debaće zwjazkoweho sejma. „Tempo město stagnacije, jednać město čakanja, kooperacija město zwady. To je žadanje časa!“ Scholz kritizowaše, zo je so minjene lěta přewjele wotstorkowało. „Wobydlerjo maja toho dosć, ja tež.“ Kraj trjeba po słowach Scholza zhromadne napinanje a zjednoćenje mocow. Jenož tak hodźała so mučnota běrokratije, stracha před rizikami a zadwělowanosće přewinyć, kotraž je so minjene lěta kaž mła na kraj połožiła, Scholz rjekny. Ludźo chcedźa, zo Němska zaso porjadnje funguje. Poskitk měri so po słowach Scholza na ministerskich prezidentow 16 zwjazkowych krajow, krajnych radow, měšćanostow a wjesnjanostow. Zwjazk a kraje měli zhromadnje paket naprawow zdźěłać a hišće lětsa zwoprawdźić započeć.

Namakane ćelatko pola policije wotedał je muž w sewjerorynsko-westfalskim Geilenkirchenje. Zastojnicy njemóžachu so dodźiwać, jako muž z ćelkom na zadnjej ławce wosoboweho awta na stražu přijědźe. Muž bě zwěrjo we wodowej hrjebi wuhladał a wuchował. Po tym zo běchu so zastojnicy sami wo zwěrjećej namakance přeswědčili, móžachu ju mjeztym zwěsćenemu wobsedźerjej wróćić.

Wopačneho za rubježnistwo wupytał je sej paduch w Pariskej Metro. Muž chcyše sobujěducemu złoćany rjećazk ze šije torhnyć, njewědźo, zo ma policista w ciwilnej drasće před sobu. Hnydom so wjacori zastojnicy na paducha walichu a jeho zajachu. Policisća běchu so wotpohladnje mjez sobujěducych měšeli, zo bychu přećiwo kriminaliće w podzemskej železnicy a na dwórnišćach francoskeje stolicy postupowali.