Wosrjedź jězby městna w awće měnjeć chcyłoj staj mužej w Freisingu pola Mnichowa – a zrazyštaj ze swojim transporterom do płotu. Do toho běchu policisća awto zadźeržeć chcyli. Na to chcyše 28lětny městno z 20lětnym změnić. Při tym zhubištaj kontrolu nad jězdźidłom. Wukopa so, zo njeměješe 28lětny šofer jězbnu dowolnosć. Nichtó njebu zrajeny.

Na wšěch 941 króć w běhu 24 hodźin z mosta skočił je 41lětny Mike Heard w Nowoseelandskej. Muž je po tutym puću dotalny swětowy rekord w bungee-skakanju, kotryž běchu loni ze 765 skokami w Šotiskej nastajili, jasnje překročił. Haerd bě sej předewzał, znajmjeńša 800 skokow docpěć. Zo je na kóncu 941 skokow zdokonjał, njeje sej do toho myslił. Zamołwići Guinnessoweje knihi rekordow dyrbja nowy wukon hišće wobkrućić. Nowoseelandska je domizna bungee-skakanja.

Berlin (dpa/SN). Wjetšina wobydlerjow Němskeje přeje sej po najnowšim woprašowanju dočasne nowowólby zwjazkoweho sejma. Po přepytanju nowiny Bild wupraja so 57 procentow woprašanych za nowowólby. 31 procentow je měnjenja, zo dyrbjała amplowa koalicija hač k planowanemu kóncej legislaturneje doby 2025 dale knježić. Wosebje wulki je hněw ludźi na aktualnu migracisku politiku. 59 procentow žada sej změnu.

Bidena so aktow dla prašeli

Washington (dpa/SN). Po aferje składowanja tajnych dokumentow w priwatnych rumnosćach dla je so wurjadny slědźer Robert Hur prezidenta USA Joewa Bidena woprašał. „Dobrowólne woprašowanje su minjenu njedźelu a wčera, póndźelu, w Běłym Domje přewjedli a wčera wotzamknyli“, Běły Dom zdźěla. Prezident chcyše runje tak kaž Běły dom wot wšeho spočatka kooperować. Při tym su, dalokož trěbne, „relewantne informacije zjawnosći spřistupnili“.

AfD woli nawod frakcije