Něhdźe 2,5 tonow kukuricowych potačow su njeznaći w Šwikawskim wokrjesu w minjenymaj tydźenjomaj pokradnyli. Wobsedźer je předwčerawšim, póndźelu, na swojim polu w Crinitzbergu awto z připowěšakom wuhladał. Jako so awtu bližeše, njeznaty z wozom ćekny. Prawdźepodobnje bě wón tam hižo časćišo pobył. Hódnota kradnjenych potačow wučinja něhdźe 600 eurow.

Rubježnika přemóhł je wobsedźer wobchoda za debjenki w Freibergu. 19lětny paduch bě 64lětneho z na pistolu podobnym předmjetom wobhrozył a sej žadał, zo wobsedźer nachribjetnik paducha z debjenkami napjelni. Złotnikar ćisny rubježnikej nachribjetnik do mjezwoča a jeho přewiny. Přiwołana policija paducha zaja. Hač jednaše so woprawdźe wo pistolu abo jenož wo atrapu, njeje znate.

New York (dpa/SN). Prěni króć po zahajenju ruskeho nadpada na Ukrainu wočakowachu dźensa ukrainskeho prezidenta Wolodymyra Zelenskeho wosobinsce na hłownu zhromadźiznu UNO. K zahajenju generalneje debaty rěčeć chcychu tež prezident USA Joe Biden, turkowski prezident Recep Tayyip Erdoğan, brazilski prezident Luiz Inácio Lula da Silva ­a zwjazkowy kancler Olaf Scholz (SPD). Wonkowna ministerka Annalena Baerbock žada sej jasne znamjo přećiwo ruskemu prezidentej Wladimirej Putinej.

Dalša podpěra za Kijew

Ramstein (dpa/SN). Do mjezynarodneho zetkanja wo dalšej podpěrje na dobro Ukrainy je zakitowanski minister Boris Pistorius dalše němske brónje za Kijew připowědźił. „Paket wopřija cyłkownje 400 milionow eurow“, rjekny politikar SPD nowinarjam. Na lětarskim wojerskim zepěranišću Ramstein wuradźowachu dźensa zastupnicy wójska wjacorych krajow wo pomocy za Ukrainu w boju přećiwo ruskemu nadpadej.

Weber za wodźenje migracije