To a tamne (22.08.22)
Kriminelni w Italskej su fiktiwny stat załožili a z pozdatnje zwjazanymi lěpšinami, kaž na přikład z niskej dawkowej sadźbu, ludźi wo statysacy eurow zjebali. Hižo w aprylu 2021 su zastojnicy domjacnosć w južnoitalskim Catanzaru přepytowali, hdźež bě prawdźepodobnje diplomatiske sydło „suwereneho antarktiskeho stata swj. Jurja“, policija minjeny tydźeń zdźěli. Wjace hač 700 wobydlerjow Italskeje su z 200 do 1 000 eurami wo staćanstwo w njeeksistowacym kraju prosyli.
Dweju policistow je 31lětna žona při zasadźenju w Strausbergu z piłu nadpadnyła. Zastojnicy so njezranichu, zdźěli policajska direkcija wuchod w Frankfurće nad Wódru njedawno powěsćerni dpa. Žonu dowjezechu po zwrěšćenym nadpadźe do chorownje.
Scholz před wuběrkom
Hamburg (dpa/SN). Hladajo na wotewrjene prašenja wočakuje „Cum-ex“ wuběrk Hamburgskeho wobydlerstwa dźensa druhi raz zwjazkoweho kanclera Olafa Scholza (SPD). Wón ma jako swědk pomhać prašenja wujasnić. Rozrisane hišće njeje, hač běchu wón abo druzy wodźacy politikarjo SPD wliw na dawkowe wobjednanje w „Cum-Ex“ skandalu wobdźěleneje Warburg Bank wukonjeli. Mjeztym předleža nowe protokole, ke kotrymž ma so Scholz wuprajić.
Njewjedra zachadźeli
Paris/Wien (dpa/SN). Při sylnych njewjedrach w srjedźomórskim rumje a Awstriskej je znajmjeńša 13 ludźi zemrěło. Jeničce na francoskej srjedźomórskej kupje Korsika běchu to wčera šěsć wosobow. W dźělach Francoskeje a Italskeje zawinowachu njewjedra tohorunja škody a powodźenja. W Awstriskej je pjeć ludźi zemrěło, předewšěm spowróćenych štomow dla. Na wjele blakach bě wobchad hišće dźensa haćeny.
Přepruwuja rjećazy
Wo dźěłowych wobstejnosćach w Budyskim zawodźe DHL je so dźensa ...
Kubicki za wotewrjenje
Berlin (dpa/SN). Městopředsyda FDP Wolfgang Kubicki je so za wotewrjenje pipeline Nord Stream 2 wuprajił, zo by so zastaranje ze zemskim płunom polěpšiło. „Měli Nord Stream 2 nětko hnydom wotewrjeć, zo bychmy swoje płunowe składy za zymu napjelnili“, rjekny politikar Redakciskej syći Němska. Njeje „žaneje rozumneje přičiny“ tole nječinić.
Hdyž prezident Ruskeje Wladimir Putin potom přiwšěm wjace płuna njedodawa, njeje Němska ničo zhubiła. Najwyša winowatosć zwjazkoweho knježerstwa po słowach Kubicki je, zo ludźo zymu mrěć njetrjebaja a industrija ćežku škodu njepoćerpi. „Su-li składy pjelnjene, móžemy Nord Stream 2 dźě zaso začinić, hdyž smy njewotwisni. To pak hišće njejsmy.“
Chcedźa dawk na płun znižić
Zwjazkowe knježerstwo planuje přetrjebarjow wolóžić
Berlin (dpa/SN). Zwjazkowe knježerstwo chce sej za wobmjezowanu dobu niši nadhódnotowy dawk na zemski płun žadać. Dawk měli wot dotal 19 na sydom procentow znižić, připowědźi wčera zwjazkowy kancler Olaf Scholz (SPD). Z tutej kročelu planuja kupcow płuna jasnje sylnišo wolóžić hač přez statny wotedawk płuna poćežować. Politikar SPD wot předewzaćow wočakuje, zo zniženje dawka přetrjebarjam stoprocentnje dale dadźa. „To je dalši krok k wolóženju.“
Pozadk je wotedawk płuna, z kotrymž móža importerojo wot oktobra ukrainskeje wójny dla zwyšene kóšty za wobstaranje płuna přetrjebarjam dale dać. Płaćić dyrbja potom wšitcy, kotřiž płun wužiwaja, hač priwatnicy abo předewzaća – a to najprjedy něhdźe 2,4 centy na kilowattowu hodźinu přidatnje. Na přinošk dyrbi so zdobom nadhódnotowy dawk płaćić.
Inflacija wysoka
Luxemburg (dpa/SN). Inflacija w europasmje je w juliju na wysokim niwowje a rekordnu hódnotu docpěła. Porno lońšemu měsacej zwyšichu so płaćizny za přetrjebarjow wo 8,9 procentow, kaž statistiski zarjad Eurostat wčera w Luxemburgu po druhim trochowanju zdźěli. Prěnje trochowanje bu z tym, kaž wot ludowych hospodarjow wočakowane, wobkrućene. Tole je dotal najwyša hódnota po zawjedźenju eura w lěće 1999. W předchadźacym měsacu běchu płaćizny za přetrjebarjow wo 8,6 procentow stupali.
Přičina wysokich płaćiznow su předewšěm stupace energijowe płaćizny, kotrež so k lońšemu měsacej wo 39,6 procenty zwyšichu. Tohorunja stupali su płaćizny žiwidłow, tworow a posłužbow.
To a tamne (19.08.22)
Winowatosć dale płaći
Karlsruhe (dpa/SN). Před něhdźe dwěmaj a poł lětom zwoprawdźena winowatosć šćěpjenja přećiwo wosypicam mjez druhim za pěstowarske dźěći dale wobsteji. Zwjazkowe wustawowe sudnistwo je wjacore skóržby potrjechenych swójbow wotpokazało, sudnicy w Karlsruhe dźensa zdźělichu. Winowatosć šćěpjenja ma k tomu přinošować, wosypicy jednoho dnja dospołnje wutupić.
Dalši wotedawk předwidźany
Ratingen/Berlin (dpa/SN). Z wotedawkom płuna chce zwjazkowe knježerstwo dodawarjam płuna pomhać, surowiznu dale k dispoziciji stajeć móc. Nimo wobstaranskeho wotedawka pak chcedźa tohorunja nazymu hišće tak mjenowany płunowy wotedawk za składźišća zwoprawdźić, kotraž dyrbi firmje Trading Hub Europe kóšty narunać, kotrež k zawěsćenju zastaranskeje wěstoty nastawaja. Zwjazkowe hospodarske ministerstwo wuchadźeše naposledk z toho, zo dawk „relewantnje wysoki“ njebudźe. Dźensa chcedźa wysokosć wotedawka wozjewić.
Mjenje twarskich dowolnosćow
Tež po Rynje ćeče jenož hišće mało wody. Suchoty a mało ...
Digitalne puće wužiwać
Eppendorf/Großrückerswalde (dpa/SN). Sakski hospodarski minister Martin Dulig (SPD) je bohatosć idejow wuměłstwowych rjemjeslnikow w Rudnych horinach chwalił a jich pohonjał, swoje digitalne rozšěrjenske puće wutwarić. „Tole móže narodne a mjezynarodne zeznawanje za rudnohórske wuměłstwowe rjemjesło dale powyšić“, wuzběhny wón wčera na wjacorych wopytach rjemjeslnikow w mjenowanej kónčinje. Rjemjesło zwjazuje inowatiwne ideje z načasnym designom. Na tele wašnje je so poradźiło, sej wjace hač 300 lět stare kulturne herbstwo stajnje zaso znowa wotkryć a zahoritosć po cyłym swěće zbudźić. Po informacijach sakskeho hospodarskeho ministerstwa je tuchwilu 424 wuměłstwowych rjemjeslnikow w Sakskej, přede wšěm wokoło Kamjenicy.
Hižo nětko w lěću w mnohich zawodach za lětušu hodownu sezonu produkuja. Jeničce branša w Rudnych horinach nadźěła ze swojimi pyramidami, swěčkatymi wobłukami, kurječkami, jandźelemi, žłobikami a swěčkami lětny wobrot wjace hač 50 milionow eurow. Něhdźe 20 procentow wudźěłkow eksportuja.
