Přepytuja nakładnu łódź
Istanbul (dpa/SN). Prěnja z ukrainskim žitom nakładowana łódź po spočatku ruskeho nadpada je na inspekciju do Turkowskeje dojěła. Wjezwowa łódź „Razoni“ ze 26 000 tonami kukuricy je z Ukrainy přijěwši do Istanbula dojěła a na připokazanym městnje zastała. Zastupnicy Ukrainy, Ruskeje, Turkowskeje a UNO chcychu łódź w běhu dnja přepytować a tak zaručić, zo njetransportuje „Razoni“ žane brónje. Po skónčenju inspekcije ma łódź přez Bosporus do Libanona jěć.
Wumjetuje Němskej blokadu
Kijew (dpa/SN). Wójny dla krótko před statnej plajtu stejaca Ukraina je Němskej wumjetowała, zo wupłaćenje financnych srědkow EU blokuje. „Wočakujemy wosom miliardow eurow. Bohužel wjacore kraje EU, mjez nimi Němska, pruwowanje tutoho prašenja znjemóžnja“, rjekny rěčnik prezidentskeho běrowa Ihor Šowka medijam. Prezident Wolodymyr Zelenskyj wjedźe tohodla „aktiwne rozmołwy“. Němska na to pokazuje, zo je Ukrainje hižo miliardu eurow wupłaćiła.
Wočakuja pomocnikow
W francoskej stolicy Parisu su wčera za prawa homoseksualnych ...
Warnuja před eskalaciju
Tokio (dpa/SN). Chinske wojerske manewry za čas wopyta předsydki Domu reprezentantow USA Nancy Pelosi w Taiwanje zbudźeja w Japanskej strach před dalšej eskalaciju. Kónčina blisko Taiwana, w kotrejž China wot štwórtka manewer planuje, kryje so z Japanskim ekskluziwnym hospodarskim pasmom, rjekny rěčnik Japanskeho knježerstwa Hirokazu Matsuno srjedu powěsćerni Kyodo. Japanska je wažny zwjazkar USA.
Samsny dźeń zetka so Pelosi w Taipehu z taiwanskej prezidentku Tsai Ing-wen. Je to najwyši wopyt z USA minjeneho štwórć lětstotka. China je přećiwo wopytej Pelosi raznje protestowała a jako reakciju daloko sahace manewry w šěsć mórskich kónčinach wokoło Taiwana zahajiła. Peking wobhladuje Taiwan jako wotpadnjeny dźěl ludoweje republiki a oficialne kontakty druhich krajow k Taipehej zasadnje wotpokazuje.
Schröder za Nord Stream II
Berlin (dpa/SN). Bywši zwjazkowy kancler Gerhard Schröder poruča hladajo na płunowu krizu zasadźenje pipeliny Nord Stream 2. „Wona je hotowa. Budźe-li woprawdźe wusko, njeby z woběmaj płunowodomaj žadyn zastaranski problem za němsku industriju a němske domjacnosće był“, rjekny čłon SPD nowinarjam. Schröder mjenowaše aktiwizowanje Nord Stream 2 hladajo na móžne płunowe njedostatki „najjednoriše rozrisanje“.
Zwjazkowe knježerstwo bě po zahajenju ruskeje wójny w Ukrainje do słužby stajenje Nord Stream 2 wuzamknyło.
Inwestuja wjace do wohnjoškita
Bad Schandau (dpa/SN). K wotwobaranju lěsnych wohenjow su po słowach sakskeho ministerskeho prezidenta Michaela Kretschmera dalše inwesticije do wohnjoškita trěbne. „Chcemy – a smy to hižo wupisali – tři helikoptery kupić, kotrež móža tež wodu transportować“, rjekny politikar CDU wčera Bayerskemu rozhłosej. Při alarmje lěsneho wohenja dla dyrbja „w běhu mjeńšin reagować“ móc. Tale diskusija měła so zhromadnje ze zwjazkowym knježerstwom wjesć, ale tež ze zamołwitymi za mjezami kraja.
Mjeztym njeje so połoženje při lěsnym wohenju w Sakskej Šwicy tež w druhim tydźenju hišće wotputało. Woheń přeco zaso wudyri, zdźěli wčera rěčnik krajnoradneho zarjada wokrjesa Sakska Šwica-Wuchodne Rudne horiny Thomas Kunz. Při stupacych temperaturach a suchoće nastawaja nowe płomjenja. „Za wotputanje połoženja trjebamy dešć.“ Wčera rano bě 300 wohnjowych wobornikow zasadźenych. W sewjernym dźělu rěki Kirnitzsch zasadźeja nimo toho wodomjetaki sakskeje a bayerskeje policije.
Debatuja dale wo renće ze 70
Dźěłarnistwa kritizuja namjety industrije jako njesocialny
Berlin (dpa/SN). W debaće wo zwyšenje rentoweje staroby na 70 lět je prezident zwjazka předewzaćow metaloweje branše Stefan Wolf podpěru hospodarskich fachowcow dóstał. „Namjet je prawy a wažny: Přetož wón pomha přećiwo chudobje w starobje a wolóži zdobom rentowu kasu, kotraž steji před kolapsom“, rjekny ekonom Bernd Raffelhüschen z Freiburgskeje uniwersity nowinarjam. Tež hospodarska fachowča Monika Schnitzer je wyšej starobje zastupa do renty napřećo wotewrjena.
Wolf bě so w rozmołwje z nowinarjemi za dlěši žiwjenski dźěłowy čas wuprajił, a to mjez druhim z dźeń a staršej towaršnosću wopodstatnił. Hladajo na demografiske wuwiće a na poćeženja socialnych a rentowych kasow su rezerwy přetrjebane. „Po schodźenkach budźemy dyrbjeć rentnarsku starobu na 70 lět zwyšić, dokelž žiwjenska staroba přiběra“, wujasni Wolf. Hewak njebudźe system srjedźodobnje hižo financujomny.
To a tamne (03.08.22)
Mylnje po schodźe wosoboweho tunla dele jěł je 86lětny šofer wosoboweho awta w jednym z Mnichowskich dwórnišćow. Poprawom chcyše muž do parkowanskeho domu. Na zbožo njebě za čas njezboža nichtó na schodźe. Wohnjowi wobornicy awto muža wućahnychu. Starc chcyše na to dale jěć, štož jemu policija zakaza, dokelž njeběchu škody na awće spočatnje znate. Nětko dyrbi muž na test, hač je hišće kmany awto wodźić.
Na hłowje zrosćeneju siameziskeju dwójnikow su w jednej z brazilskich chorownjow wuspěšnje dźělili. Po nimale štyrjoch lětach a dźewjeć operacijach je so lěkarjam naročna kročel skónčnje poradźiła. „Smy jara spokojom z wuslědkom, dokelž njeje nichtó wjace do wuspěcha operacije wěrił“, rjekny rěčnik mozoweho centruma w Rio de Janeiru. „Smy stajnje do toho wěrili, zo mamy hišće šansu
Dojednaja so wo kóštach
Zakitowanska ministerka Christine Lambrecht w Sakskej Šwicy była
Bad Schandau (dpa/SN). W boju přećiwo lěsnym wohenjam w Sakskej Šwicy chce Zwjazk kraj dale podpěrać. Tam tež wjacore helikoptery Zwjazkoweje wobory při hašenju sobu pomhaja. „W tajkej situaciji njebuchu kóšty hišće ženje wotličene. A njewidźu tež žanu přičinu, to hinak činić“, rjekny zwjazkowa zakitowanska ministerka Christine Lambrecht (SPD) póndźelu na wopyće w Schmilka. Njedaloko němsko-čěskeho hraničneho městna howrja kaž w Sakskej tak tež w Čěskej Šwicy lěsne wohenje. Tydźeń po wudyrjenju hašenske dźěła dale traja.
„Połoženje je stabilne, ale přeco zaso woheńčki wudyrja“, rjekny rěčnik krajnoradneho zarjada Sakska Šwica-Wuchodne Rudne horiny Thomas Kunz póndźelu na naprašowanje. Hłowny nadawk je nětko bój přećiwo žehliwym městnam w pódźe z wotpowědnymi barjerami.
Napjatosće do wopyta Pelosi
Taipeh (dpa/SN). Do dźensa z wulkej napjatosću wočakowaneho wopyta předsydki doma reprezentantow USA Nancy Pelosi w Taiwanje je taiwanske wójsko bojowu hotowosć zwyšiło. Wukaz je reakcija na hroženja Chiny, w padźe wopyta Pelosi wojersce reagować. China bě USA wospjet před wopytom Taiwana warnowała a swoju wojersku prezencu na morju zwyšiła. Peking ma Taiwan dale za wotpadnjenu prowincu.
Brónje do Ukrainy dóšli
Kijew (dpa/SN). Wot Němskeje přilubjene rakety mjetace systemy Mars II su po informacijach z Kijewa do Ukrainy dóšli. Tole je zakitowanski minister Oleksij Resnikow wobkrućił. System je kmany, najwšelakoriše rakety startować, mjez druhim wusměrjene z nawigaciskim systemom abo rakety, kiž rozdźěluja miny. Rakety móža hač do sto kilometrow lećeć. Němska bě Ukrainje hižo lětadła wotwobarace tanki typa Gepard a modernu tankowu hawbicu 2000 přewostajiła.
Nawoda Al-Kaidy morjeny
Ruska wita start eksporta žita z Ukrainy
Moskwa (dpa/SN). Ruska je start prěnjeje wjezwoweje łódźe z ukrainskim žitom z Čornomórskeho přistawa Odessa witała. „To je chětro pozitiwne“, rjekny rěčnik Krjemla Dmitrij Pjeskow wčera ruskej powěsćerni Interfax. „To je dobra móžnosć, efektiwitu dźěła mechanizmow wupruwować, kotrež buchu při jednanjach w Istanbulu dojednane.“ W Istanbulu běchu 22. julija pod posrědkowanjom UNO a Turkowskeje wujednane zrěčenje wo eksporće žita podpisali.
„Chcemy so nadźijeć, zo dojednanja ze wšěch stron spjelnja, a zo mechanizmy skutkownje dźěłaja“, rjekny Pjeskow. Wčera rano bě pod chorhoju Sierra Leone jěduca wjezwowa łódź „Razoni“ ze 26 000 tonami kukuricy do směra na Libanon wotjěła. Ukraina bě znowazahajenje transporta tež jako kročel w boju přećiwo hłodej na swěće witała.
