To a tamne (22.07.22)
21 lět dołho zhubjene noticne knižki britiskeho přirodospytnika Charlesa Darwina su namakane. Uniwersitna knihownja w Cambridgu bě knižki w lěće 2000 wupožčiła. Dwě lěće pozdźišo zdźělichu, zo su pokradnjene. Nětko su sobudźěłaćerjo wjacore miliony eurow hódne dokumenty w zjawnje přistupnym dźělu knihownje w darnej tiće wotpołožene namakali.
Třělbowu granatu namakało je dźěćo při hrajkanju při jězoru w braniborskim Petershagenje a je ju sobu domoj wzało. Staršimaj bě na zbožo hnydom jasne, zo jedna so wo strašnu namakanku a zawołachu policiju. Fachowcy granatu wotewzachu a w lěsu rozbuchnychu. Kak bě granata k jězorej přišła, njeje znate.
Dawkowe dochody rozrostli
Berlin (dpa/SN). Dawkowe dochody Zwjazka a krajow su prěnje połlěto mócnje rozrostli. Přirunuje ze samsnym časom lońšeho lěta běchu dochody wo 17,5 procentow wjetše, z měsačneje zdźělenki zwjazkowe financneho ministerstwa wuchadźa. Wuskutki koronapandemije a naprawy k přewinjenju sćěhow su dochody loni znižili. Hłowny dźěl lětušich dochodow wučinja wobrotowy dawk, nic naposledk wulkeje inflacije dla.
Draghi zaso pola prezidenta
Rom (dpa/SN). Italski ministerski prezident Mario Draghi je so dźensa k statnemu prezidentej Sergijej Mattarellej podał. Medije wočakuja, zo 74lětny Draghi jemu kaž hižo před tydźenjom swój wotstup jako ministerski prezident poskići. Draghi bě wčerawše wothłosowanje wo dowěrje drje dobył, tři wjetše strony Draghijoweho knježerstwa pak njeběchu so na wothłosowanju wobdźělili. W padźe nowowólbow hrozy prawicarske knježerstwo.
Wo dalše brónje prosyła
Francoski statny prezident Emmanuel Macron je wčera wot lěsnych ...
Nadźijeja so sylneho dešća
Podstupim (dpa/SN). Strach lěsnych wohenjow w Braniborskej je wčera w běhu dnja dale přiběrał. Po wšěm kraju su po informacijach wobswětoweho ministerstwa při temperaturach 35 do 39 stopnjow a pobrachowaceho dešća dla najwyši warnowanski schodźenk pjeć wukazali. Społnomócnjeny kraja za škit lěsow před wohenjemi Raimund Engel rozprawješe wo mnohich mjeńšich wohenjach, mjez druhim we wokrjesach Łobjo-Halštrow, Teltow Fläming a Hornja Habola.
Při wysokich temperaturach dyrbja wohnjowi wobornicy stajnje zaso žehliwe městna hašeć a su tak chětro wućeženi. „Wobkedźbować mamy tohorunja, zo přisłuša 98 procentow pomocnikow dobrowólnej wohnjowej woborje“, Engel rjekny. Wón nadźija so na wot Němskeje wjedrarnje připowědźenu frontu njewjedra ze sylnym dešćom dźensa wječor. Engel wostanje pak pesimistiski: „Ja so boju, zo njedóstanjemy scyła ničo.“
EU chce kraje nuzować lutować
Ruski zemski płun zaso ćeče
Lubmin (dpa/SN). Po porjedźenjach při płunowodźe Nord Stream I. ruski zemski płun přez rusko-němski płunowód wot dźensnišeho zaso ćeče. Tole je rěčnik towaršnosće Nord Stream I powěsćerni dpa wobkrućił. Doniž je połna wukonitosć dodawanja docpěta, drje hišće chwilu traje. Rěčnik zdźěli, zo sćelu wšědnje něhdźe 67 milionow kubiknych metrow płuna. To wotpowěduje 40procentowskemu wućeženju maksimalneje kapacity płunowoda. Hišće wčera běchu politikarjo swoje wobmyslenja zwuraznili, zo Ruska po nachwilnym přetorhnjenju porjedźenskich dźěłow dla płunowy honač scyła wjace njewotwjertnje, štož by energijowu krizu dale přiwótřiło. Po ruskim nadpadźe na Ukrainu bě zapad sankcije přećiwo Ruskej wobzamknył. Ruska bě na to mnóstwo dodawaneho płuna do europskich krajow znižiła abo eksport scyła přetorhnyła.
Mnóstwo płuna so přichodne měsacy masiwnje na hospodarstwo Němskeje, ale tež na priwatnych kupcow wuskutkuje, dokelž płaćizny płuna bjezdwěla dale přiběraja. Wažne je, zo su składy płuna do zymskeho počasa napjelnjene.
Wagenknechtza Kretschmera
To a tamne (21.07.22)
Wjele zboža měł je sobudźěłaćer wěstotneje firmy při rumowanju zawostankow rockoweho festiwala Hurricane. 23lětny bě so po kóncu nócneje słužby w delnjosakskim Scheeßelu k spanju do stana lehnył, kiž běchu hosćo festiwala stejo wostajili. Bager stan hrabny a ćisny jón do wotpadkoweho kontejnera. Muž je akciju njezranjeny přetrał. Najebać to dyrbi wodźer bagra z chłostanjom ličić, dokelž njebě pohladał, hač je stan prózdny.
Dokelž njeměješe prěni oficěr wukubłanje na pilota hišće wotzamknjene, je so pasažěrske lětadło po puću z Londona do New Yorka zawróćić dyrbjało. Airbus A330 bě hižo 40 mjeńšin w powětře, jako w cockpiće zwěsćichu, zo njeje prěni oficěr hišće wšě předpisane treningowe lěty zmištrował. Na to lećachu wróćo. Předewzaće Virgin Altantic rěčeše wo słužbnym planowanskim zmylku.
Baerbock: So spěšnje přestajić
Berlin (dpa/SN). W boju přećiwo změnje klimy je wonkowna ministerka Annalena Baerbock wšitke kraje swěta namołwjała, so spěšnje na wobnowjomne energije nastajić. „Stary fosilny swět so pominje, nowy swět je swět wobnowjomnych energijow“ rjekny politikarka Zelenych k zakónčenju Petersbergskeho klimoweho dialoga wčera w Berlinje. „Klimowu krizu njemóžemy wotstorčić. Tuž njemóžemy tež bój přećiwo njej wotstorčić.“
W cyrkwjach so wochłódźić
Aurich (dpa/SN). Rekordneje horcoty dla fararka Antje Wachmann ludźom radźi, so w cyrkwjach wochłódźić. Stare cyrkwje ze swojimi tołstymi murjemi trjebaja cyły čas, doniž njejsu wutepjene. W nich je chłódne, rjekny referentka cyrkwje za turizm Ewangelsko-lutherskeje Hannoverskeje krajneje cyrkwje w Aurichu. „Wokomik wodychnyć a sej ćišinu lubić dać, to tyje ćěłu a duši“. W Delnjeje Sakskej je 400 cyrkwjow, kiž su wšědnje znajmjeńša štyri hodźiny přistupne.
Płomjenja dale zachadźeja
