Brüssel wobskorži Madźarsku
Berlin (dpa/SN). Komisija EU je Madźarsku pozdatneho ranjenja prawa EU hnydom dwójce před Europskim sudnistwom wobskoržiła. Při tym dźe na jednym boku wo wobmjezowanje informacijow wo homo- a transseksualnosći, kaž minjeny pjatk w Brüsselu zdźělichu. Tamny pad potrjechi postupowanje madźarskich institucijow přećiwo njewotwisnemu rozhłosowemu sćelakej Klubradio. Komisija EU hrozy Madźarskej z raznymi pjenježnymi pokutami, njedyrbjała-li wona wočakowane rozsudy sudnistwa zwoprawdźić. Nowy madźarski zakoń, kiž płaći wot 1. julija, zakazuje publikacije, kotrež su dźěćom přistupne a kiž zwobraznjeja njeheteroseksualne poćahi. Tež wabjenje, w kotrychž homo- a transseksualnych jako dźěl normality pokazuja, je zakazane. Po měnjenju EU tak prawa mjeńšin w kraju ranja.
To samsne płaći za naprawy přećiwo poslednjemu profesionalnemu njewotwisnemu sćelakej Klubradio. Sćelak dyrbješe w februaru 2021 zawrěć, dokelž njeběchu jemu licencu podlěšili. Mjeztym wusyła Klubradio jenož hišće internetnje w chětro wobmjezowanej formje.
To a tamne (18.07.22)
Pozdatnje znjezboženy parašutist je w sauerlandskim Altena zasadźenje specialistow wohnjoweje wobory za wuchowanje we wulkich wysokosćach zawinował. Swědcy běchu při tamnišim spjatym jězoru błyšćacy so objekt při nahłej skłoninje wuhladali. Dokelž njebě teren bjeze wšeho přistupny, wołachu fachowcow z Dortmunda. Ći zwěsćichu, zo jedna so wo chětro wulki powětrowy balon.
Dwanaće lět stary hólc z Indiskeje je swětowe mišterstwa w ličenju z hłowy dobył. Aaryan Shukla je so wčera w Paderbornje přeciwo 34 konkurentam z 18 krajow přesadźił. Slědowaštaj Japančan Ono Tetsuya a Mohammed El Mir z Libanona. Wobdźělnicy dyrbjachu wjacore nadawki spjelnić. Mjez druhim dyrbjachu dźesać dźesaćcyfrowych ličbow hromadu ličić abo dwě wosomcyfrowej ličbje we hłowje multiplikować.
Lauterbach za šćěpjenje pod 60
Berlin (dpa/SN). Zwjazkowy minister za strowotnistwo Karl Lauterbach (SPD) poruča tež ludźom pod 60 lětami po dorěčenju z lěkarjom štwórte šćěpjenje přećiwo koronawirusej. Štóž chcył sej lěćo bjez stracha schorjenja dla lubić dać, tomu by wón tole radźił. Z druhim boosterowym šćěpjenjom maja ludźo „cyle hinašu wěstotu“. Strach infekcije je něšto měsacow wo wjele niši, runje tak kaž strach schorjenja. Dotal doporučeja tajke šćěpjenje skerje ludźom nad 70 lětami.
Heil: Jenož chudym pomhać
Berlin (dpa/SN). W debaće pomocy ludźom wulkeje inflacije dla minister za dźěło Hubertus Heil dale na tym wobstawa, jenož ludźom ze snadnymi a srěnimi dochodami pomhać. Wón njewidźi žane móžnosće, tež ludźi z wysokimi dochodami podpěrować, rjekny politikar SPD nowinarjam. Wyše płaćizny su tež za nich mjerzace, njejsu pak žadyn eksistencielny problem, Heil měnješe.
Biden pola Palestinjanow
We wobłuku mjezynarodneje konferency wo Europskej syći narodnych ...
Nětko jězdźenka za 69 eurow?
Wotstup wotpokazany
Zelenskyj: Nadpad Ruskeje je teror
Kijew (dpa/SN). Ukrainski prezident Wolodymyr Zelenskyj je Rusku po raketowym nadpadźe w centrumje wulkoměsta Winnyzja na zapadźe kraja „terorowy stat“ mjenował. „Žadyn druhi stat na swěće njeje tajke teroristiske wohroženje kaž Ruska“, rjekny Zelenskyj minjenu nóc w swojim widejowym poselstwje na 141. dnju wójny. A žadyn druhi kraj sej njezwěri, kóždy dźeń ze swojimi raketami a kanonami „měrniwe města a wšědne čłowjeske žiwjenje“ zničić.
Z raketowym nadpadom su wčera we Winnyzji 23 ludźi morili, mjez nimi třoch dźěći. Zelenskyj žadaše sej w tym zwisku zwołanje tribunala přećiwo wójnskim złóstnikam.
Po ukrainskich informacijach su tři rakety do běrowoweho centruma zrazyli. Na to je woheń wudyrił. Ruska stajnje zaso twjerdźi, zo jenož wojerske objekty nadběhuje, ciwilne pak nic. Najebać to je tójšto ciwilnych woporow. Zwjetša starše sowjetske rakety swój cil misnu.
To a tamne (15.07.22)
Elektriski roler z móžnej maksimalnej spěšnosću 120 km/h je policija w Šwicarskej sćazała. Twarjene su e-scootery poprawom jenož za 20 km/h. Jězdźidło bě policistam napadnyło, dokelž njebě swěca w porjadku. Při dokładnej kontroli so wukopa, zo je w roleru motor z 4 000 wattami zatwarjeny město dowolenych 500 wattow. 23lětneho wodźerja jězdźidła su wobskoržili.
Žarowacu wowcu je policija ze železniskich kolijow w šwabskim Tapfheimje njesć dyrbjała, dokelž njeje so zwěrjo hinak z blaka hibnyło. Wowca steješe spočatk tydźenja při kolijach poboku dweju wowcow, kotrejž bě ćah přejěł a morił. Policist wza zwěrjo skónčnje na ramjo a je wotnjese. Wowcu su najprjedy raz na bliskim statoku zaměstnili. Lokomotiwnicy běchu policistow wo wowcy w susodstwje kolijow informowali.
List pólskemu parlamentej
Berlin (SN/at). Parlamentowe koło „Mjeńšiny“ w zwjazkowym sejmje je so jako nadfrakciske zjednoćenje z listom na pólski sejm wobroćiło. W spisu tamnych politiskich zastupjerjow proša, rozmyslować wo wukazu nastupajo wobmjezowanje rěčneje wučby za přisłušnikow němskeje mjeńšiny. Rozsud pólskeho knježerstwa, dotalnu hodźinsku ličbu za tule wučbu wot třoch na jednu přikrótšić, „njewotpowěduje europskim hódnotam wo škiće a připóznaću narodnych mjeńšin“, zdźěli wčera Stefan Seidler, zapósłanc SSW w zwjazkowym sejmje.
Seidlerej je jako iniciatorej a předsydźe parlamentoweho kruha wažne, „so z Waršawu wo tym dorozumić a zhromadne rozrisanje namakać. Rěč nawuknyć je centralny fundament kulturneje identity a wuwića, ju měli tohodla runje mjez mjeńšinami spěchować – tak kaž to europske zrěčenja předwidźa.“
Parlamentowe koło „Mjeńšiny“ bu 22. junija wutworjene. Gremij chce ze zastupjerjemi štyrjoch awtochtonych mjeńšin w Němskej rěčeć, nic wo nich, a tak jich widźomnosć w zjawnej a wosebje parlamentariskej debaće zwyšić.
Wo eksporće žita wuradźowali
Istanbul (dpa/SN). Zastupnicy Ukrainy, Ruskeje, Turkowskeje a UNO su wčera w Istanbulu wo rozrisanju zwady eksporta ukrainskeho žita dla wuradźowali. Po informacijach wobdźělnikow su so na někotre zasadne naprawy dojednali. Konkretne wuslědki njewozjewichu. Mjezynarodne statowe zjednoćenstwo sej wot Ruskeje žada, w ukrainskich přistawach ležacym łódźam zmóžnić, žito přez morjo do druhich krajow transportować. UNO warnuje w tym zwisku před hłodowej katastrofu po wšěm swěće.
Płun bórze hišće dróši
Berlin (dpa/SN). Měsačne popłatki za wužiwarjow zemskeho płuna móhli po posudku zwjazkoweje syćoweje agentury klětu znajmjeńša trójce tak drohe być kaž nětko. Za mnohich su so popłatki mjeztym hižo podwojili, rjekny prezident zarjada Klaus Müller nowinarjam. „Wot lěta 2023 dyrbja so wužiwarjo płuna na trójce tak wysoke popłatki nastajić, znajmjeńša“, Müller rjekny. Na bursach je płun hižo sydom króć tak drohi kaž do wójny Ruskeje přećiwo Ukrainje.
Schrödera z SPD wuzamknyć?
