Situacija napjata
Nowa energijowa politika trěbna
Grimma/Drježdźany (dpa/SN). Sakski ministerski prezident Michael Kretschmer (CDU) zasadźa so za nowu klimoškitnu politiku. „Trjebamy nowe postupowanje hladajo na energijowu změnu – tak kaž je planowane njeńdźe“, wón minjeny kónc tydźenja wuzběhny. „Je absolutnje wopačny puć nětko atomowe milinarnje wotpinyć a brunicowe milinarnje zaso zašaltować. Diskusiju dyrbjeli ze zwjazkowym knježerstwom nastorčić, tak zo je dalše postupowanje jasne. „Młodźi ludźo trjebaja směr, kotre powołanja su přichodnje trěbne. Tež inwestorojo trjebaja směr, hdźe móhli swoje pjenjezy inwestować.“
Kretschmer ma nowu diskusiju za wažnu, wšako dyrbja so w Němskej rozsudźić, zwotkel chcedźa přichodnje energiju brać. W lětomaj 2011 a 2018, jako je němske knježerstwo wo zakónčenju atomoweje energije a zmilinjenja brunicy rozsudźiło, bě jasne, zo budźe kraj wot energije z wukraja wotwisny. Za to wšak měli 50 płunowych milinarnjow twarić. Połoženje pak je so nětko dospołnje změniło.
Mrěće rybow dale hódančko
Pólska a Němska chcetej situaciju při Wódrje zhromadnje wujasnić
Waršawa (dpa/SN). Pólske zarjady su po informacijach infrastrukturneho ministerstwa we Waršawje hižo kónc julija na pokazki mrěća rybow we Wódrje reagowali. W dnjach wot 26. do 28. julija su prěnje wotpowědne signale byli, na to su proby wody brali a mortwe ryby wułójili, to wuchadźa z kalendra pólskeho wodoweho zarjada, kotryž je ministerstwo pjatk na socialnej syći Twitter wozjewiło. Proby pokazuja, zo je njewšědnje mało kislika we wodźe.
W Němskej a Pólskej je hladajo na wobchadźenje pólskich zarjadow z mrěćom rybow wjele kritiskich słowow słyšeć. Tak kritizowaše předsyda frakcije Zelenych w braniborskim krajnym sejmje Benjamin Raschke informaciski rjećaz z Pólskeje. Pólski nawoda opozicije Donald Tusk wot liberalnokonserwatiwneje wobydlerskeje platformy (PO) rěčeše wo „jednym z najwjetšich wobswětowych skandalow zašłych lět – nic jenož w Pólskej.“
To a tamne (15.08.22)
Zhubjeneho barika je policija w Mannheimje z awtodróhi wuchowała a swojemu wobsedźerjej wróćiła. Šofer motorskeho bě dar za połdralětnu dźowku spřećeleneje swójby při jězbje po zwjazkowej awtodróze A 6 zhubił, policija minjeny pjatk zdźěli. Zo njeby so barikej ničo stało, su zastojnicy wobchad skrótka zadźerželi a jeho z jězdneje wuchowali. Hač na někotre blaki njeje so zwěrjatku ničo stało. Jako dopomnjenku na swoje njewšědne wuchowanje ma barik nětko wopon policije na bančiku připinjeny.
Po třoch měsacach smědźa so kóčki w badensko-württembergskim Walldorfje zaso swobodnje pohibować. Dwě njedźeli zašo hač předwidźane je so dźensa jónkrótny lockdown za kóčki zakónčił. Młodźata wot wotemrěća wohroženych chocholikow (Haubenlerche) su dźakowano wjedrowemu połoženju tak daloko wuwite, zo hižo riziko njewobsteji, zo móhli je kóčki napadnyć.
Za dokumentami pytali
Washington (dpa/SN). Při přepytanju ležownosće bywšeho prezidenta USA Donalda Trumpa je zwjazkowa policija FBI tež za tajnymi dokumentami wo atomowych brónjach slědźiła. Hač su wotpowědny material namakali, njeje znate. Zastojnicy FBI běchu ležownosć Trumpa póndźelu wobsadźili a přepytali. Podawk je njesłyšany w stawiznach USA. Trump bě akciju jako „politiske přesćěhanje“ ze stron prezidenta Joewa Bidena šwikał.
Günther za změnu karanteny
Kiel (dpa/SN). Ministerski prezident Schleswigsko-Holsteinskeje Daniel Günther (CDU) žada sej widźomne wolóženja nastupajo karantenu w padźe infekcije z koronawirusom. Aktualnje dyrbja natyknjeni pjeć dnjow do izolacije. Wón namjetuje: Jenož ći, kiž maja symptomy, wostanu doma. „Njetrjebamy prawidła, kiž ludźi znjeměrnjeja, ale tajke, kotrež wohrožene skupiny škitaja“, rjekny politikar nowinje Bild. Dyrbjało-li so połoženje přiwótřić, su tuchwilne zakonje dosahace.
Kritizuje plany Lindnera
Njeličomne mortwe ryby leža w niskej wodźe na brjoze Wódry. ...
Wjeršk žołmy korony nimo
Milinarnja tema w UNO była
Kijew (dpa/SN). Ukrainski prezident Wolodymyr Zelenskyj je sej hnydomne cofnjenje ruskich wojerskich jednotkow z wobsadźeneje atomoweje milinarnje Saporiššja žadał. W swojim nócnym poselstwje wón Ruskej „nuklearne wudrěwanje“ wumjetowaše. Njezbožo w najwjetšej jadrowej milinarni by atomowy dyr był, bjez zasadźenja atomowych bróni, wón rjekny, žadajo sej mjezynarodnu kontrolu objekta.
Wokoło atomoweje milinarnje su wčera wospjet třěleli. Ruske a ukrainske jednotki dawaja sej mjez sobu winu za to. W New Yorku je wčera bjezstrašnostna rada UNO wo Saporiššiji wuradźowała. Při tym zwěsćichu, zo tuchwilu direktny strach katastrofy njewobsteji.
Schröder wobskorži sejm
Hannover/Berlin (dpa/SN). Bywši zwjazkowy kancler Gerhard Schröder (SPD) wobskorži zwjazkowy sejm, žadajo sej přizwolenje wurjadnych prawow, kotrež bě sejm 78lětnemu sćazał. K tomu słuša běrow bywšeho kanclera a wotpowědni sobudźěłaćerjo, prawiznik Schrödera Michael Nagel powěsćerni dpa zdźěli. Skóržbu su Berlinskemu zarjadniskemu sudnistwu zapodali, Nagel rjekny. Wobzamknjenje etatoweho wuběrka zwjazkoweho sejma, Schröderej srědki za wuhotowanje běrowa w zwjazkowym sejmje zapowědźić a běrow zawrěć, je zakonje ranjacy, rěka w stejišću kenclije prawiznikow. Sejm twjerdźi, zo bywši zwjazkowy kancler Schröder swoje słužbne winowatosće wjace njespjelni, Nagel rjekny. Při tym pak nichtó njerjekny, kajke winowatosće měli to być. Nagel je sej wěsty, zo je wuběrk z politiskich přičin swojowólnje přećiwo Schröderej jednał, štož njesměło so w demokratiskim staće stać.
Schrödera běchu po nadpadźe Ruskeje na Ukrainu toho dźěła za ruske energijowe koncerny dla raznje kritizowali.
Letiska Rusku zasudźiła
Riga (dpa/SN). Letiski parlament je Rusku jako teror podpěrowacy stat zastopnjował a namóc přećiwo ciwilistam w Ukrainje a druhich krajach jako terorizm hódnoćił. Wotpowědne wobzamknjenje přiwzachu wčera w Rize. W nim wuzběhuje ludowe zastupnistwo baltiskeho kraja EU a NATO, zo měri so Ruska wotpohladnje přećiwo ukrainskim ciwilistam. Moskwa zasadźuje horjo a zatrašenje jako srědk při pospytach, ukrainski lud a jeho wójsko demoralizować. Tak chce dźěłakmanosć stata zlemić, zo by Ukrainu wobsadźiła, rěkaše dale.
