Steinmeier tři dny w Čěskej
Bórze kónc lětow
To a tamne (25.08.21)
Ze syčenjom a pozdatnymi nadpadami je so zabłudźeny wuž (Ringelnatter) policistam spjećował, kotřiž chcychu jeho popadnyć. Za ludźi njestrašny had bě so na hóstny nuznik jednoswójbneho domu w delnjosakskim Bodenfelde zadobył. Jako pomoc při wlečenju słužeštej jemu kij při sćěnje domu a wotewrjene wokno. Skónčnje so policistej poradźi, hada z hóčku popadnyć a jeho do kisty tyknyć. W lěsu wusadźeny so tón spěšnje w kerčinje zminy.
Ze šotrowymi kamjenjemi na kolijach su dźěći na Rujanach jedyn z ćahow zadźerželi, kotrež za čas stawka lokomotiwnikow scyła hišće jězdźachu. Potrjecheny bě regionalny ćah mjez Stralsundom a Bergenom. Lokomotiwnik móžeše runje hišće borzdźić a zastać. Policija přepoda třoch hólcow w starobje wosom, dźewjeć a dźesać lět wustróžanym staršim.
Žona na čole New Yorka
New York (dpa/SN). Prěni króć w swojich stawiznach ma stat New York guwernerku. Po tym zo bě dotalny guwerner Andrew Cuomo po wumjetowanjach splažneho wobćežowanja dla wotstupił, steji nětko Kathy Hochul na čole zwjazkoweho stata USA. 62lětna přewza dźensa jako prěnja žona politiski nawod kónčiny na wuchodnym pobrjoze z nimale 20 milionami wobydlerjow, ke kotrejž tež město New York słuša. Dotal bě Hochul, kaž Cuomo čłonka demokratow, jeho zastupjerka.
Katastrofy nětko časćišo
Offenbach (dpa/SN). Změna klimy powjetša móžnosć ekstremnych zliwkow a z nimi zwjazanych katastrofow zapławjenja, kaž njedawno w Porynsko-Pfalcy a Sewjerorynsko-Westfalskej. To je wuslědk přepytowanja mjezynarodneho cyłka wědomostnikow, mjez druhim Němskeje wjedroweje słužby. Pod tuchwilnymi wobstejnosćemi wočakuja, zo regiony zapadneje Europy kóžde 400 lět tajku katastrofu dožiwja. Čim bóle so zemja woćopla, ćim časćišo so tajke ekstremne wjedro jewi.
Wojerske parady přewjedli
Wosrjedź Londona, hdźež běchu wobswětowi aktiwisća organizacije ...
Nimale 3 700 ludźi wuchowali
Wulki deficit
Wo Afghanistanje wuradźowali
London (dpa/SN). Statni a knježerstwowi šefojo sydom wodźacych zapadnych industrijnych krajow kaž tež zastupnicy EU su dźensa na wurjadnym wjeršku wo połoženju w Afghanistanje wuradźowali. Wobdźělenaj běštaj tež generalnaj sekretaraj NATO a UNO. Na wirtuelnym zarjadowanju rěčachu wo tuchwilnej akciji ewakuacije a wo dołhodobnym wuwiću kraja, kaž britiske knježerstwo zdźěli. Nimo toho dźěše wo prašenje, kak móhli wudobyća minjenych 20 lět zachować, hladajo na prawa žonow a mjeńšin.
Wusahowace na wurjadnym schadźowanju bě prašenje, ewakuaciju tež po 31. awgusće dale wjesć. Britiski premierminister Boris Johnson, kiž posedźenje nawjedowaše, bě so wospjet za podlěšenje misije wuprajił, zo móhli telko ludźi kaž móžno wuchować. Militantno-islamistiscy talibanojo wšak su přećiwo tomu, podlěšić. Při tym jedna so wo „čerwjenu smuhu“, praji jich rěčnik britiskemu powěsćowemu sćelakej Sky. „Smuhu překročić by woznamjenjało, zo so wojerske wobsadźenje podlěši.“
Nowe sebjewědomje wuchoda
Zwjazkowy prezident Frank-Walter Steinmeier Saksku wopytał
Drježdźany (dpa/SN). Wuchodna Němska móže po měnjenju zwjazkoweho prezidenta Franka-Waltera Steinmeiera horda na wuwiće minjenych lět być. „Je načasu za nowe sebjewědomje we wuchodnej Němskej“, rjekny wón wčera na wopyće w nowej tworni za połwodźakowe elementy firmy Bosch w Drježdźanach. Wuchodna Němska je dźensa w mnohich technologijach we wodźacej poziciji w Němskej. Wuspěšny puć digitalizacije, elektronizacije a awtomatizacije njeje bjez wuchodoněmskich zawodow dźensa wjace móžna, Steinmeier wuzběhny. Fachowcy drje to dawno wědźa, zjawnosći pak to dosć znate njeje. Tohodla je wón we wuchodoněmskich zawodach po puću, zo by pokazał, zo su tam swětłownje moderneje industrije nastali.
