Z popjerjowym sprayjom do sobuwobydlerki dała je so rentnarka w starowni w bayerskim Oberstdorfje. Do toho bě so staruška ze 86lětnej zwadźiła. Na to hrabny młódša z njeju za tyzu ze sprayjom. Při atace su so nimo 86lětneje hišće třo dalši wobydlerjo domu zranili, lěkarske zastaranje pak na zbožo trěbne njebě. Přećiwo 79lětnej policija nětko zranjenja ćěła dla přepytuje.

Pjany do policajskeho wozydła zrazył je muž ze swojim awtom w braniborskim Seelowje. Policisća běchu njedźelu rano w zahrodkownišću zasadźeni a běchu swój wóz před zachodom wotstajili. 28lětny do njeho zrazy, jako chcyše kompleks wopušćić, a jón wobškodźi. Poli­ci­sća naměrichu pola muža 1,97 pro­milow alkohola. Jězbnu dowolnosć wón žanu njeměješe. Tak sej zastojnicy tež klučiki awta hnydom zdźeržachu.

Prěnje wulke telewizijne rozestajenje kandidatow unije, SPD a Zelenych

Berlin (dpa/SN). Při prěnim wulkim dowólbnym telewizijnym rozestajenju su třo kanclerscy kandidaća CDU/CSU, SPD a Zelenych mjezsobne rozdźěle potwjerdźeli. Při tak mjenowanym trielu sćelakow RTL a ntv pokazaštaj so kandidataj unije Armin Laschet a kandidatka Ze­lenych Annalena Baerbock bojowniskaj. Kandidat SPD Olaf Scholz je na wumjetowanja porno tomu měrnje reagował. Spěšne naprašowanje instituta Forsa bjezposrědnje po skónčenju wusyłanja pokaza, zo bě wón z tym wuspěšny. Na wšě 36 procentow wšěch 2 500 woprašanych bě měnjenja, zo je Scholz triel dobył. 30 procentow měješe Baerbock za dobyćerku a jenož 25 procentow Lascheta. Tež na prašenje, štó je najbóle sympatisce skutkował, wotmołwi 38 procentow na dobro Scholza, slědowaštaj Baerbock (37 procentow) a Laschet (25 procentow).

Vatikan (B/SN). We wosebitej widejowej powěsći je bamž namołwjał so šćěpić dać, dokelž je to „akt lubosće za sebje, za swójb­nych a přećelow kaž tež za wšě ludy“. Pontifeks měni, zo je to jednore wašnje, so na dobro wšěch zasadźić, wosebje najčućiwišim napřećo. Widejowa powěsć je dźěl swět wopřijaceje šćě­pjenskeje kampanje powšitkownowužitneje ameriskeje organizacije Ad Council „It’s up to you“ (Zaleži na tebi).

Wjace kanonikow biskopa woli

Drježdźany (B/SN). Drježdźansko-Mišnjanski biskop Heinrich Timmerevers je spočatk awgusta nowe statuty tachantskeho kapitla swjateho Pětra Drježdźany wobkrućił. Hłowna nowosć je, zo prop­staj z Lipska a Kamjenicy kaž tež farar z města Gera jako čestni tachantscy kapitu­larojo přez swoje zastojnstwo nimo­ regularnych kapitularow biskopa wola. Po statuće staj tachantskaj fararjej w Drježdźanach a Budyšinje na kóždy pad wobdźělenaj, nimo toho ma znajmjeńša jedyn Serb jako kanonik krute městno w tachantskim kapitlu. Nowy tachant­ski kapitl chcedźa 14. nowembra 2021 we wobłuku nyšpora w Budyskej tachantskej cyrkwi spřisahać a zapokazać.

Choćebuz (SN). Wosebity wuběrk Kraj­neho sejma Braniborskeje za strukturne wuwiće we Łužicy chce so na swojim wura­dźowanju zajutřišim w briketowni Louise w Domsdorfje (wokrjes Łobjo-Halštrow) mjez druhim z wobdźělenjom ciwilneje towaršnosće na tymle procesu zaběrać. Runje na to měri so kritika łužiskich towarstwow: „Spěchowanje, kotrež sej swoje mjeno tež zasłuža, přeco hišće pobrachuje, byrnjež to do koaliciskeho zrěčenja zapisali. Runje tak ma so wot­powědne wobzamknjenje krajneho sejma hišće schwalić“, kritizuje dr. Martin Küh­ne, předstejićel Choćebuskeje wobswětoweje skupiny. Zo bychu swoje ža­danje nastupajo spěchowanski program a přiradu potwjerdźili, wobroćichu so to­war­­stwa nětko na wuběrk krajneho sejma. Hižo před wjace hač lětom běchu łu­ži­ske zastupjerki a zastupjerjo z cyrkwje, kultury, kaž tež wobswětowe skupiny a dalše towarstwa konkretny koncept wo spěchowanju ciwilneje towaršnosće w změnje strukturow braniborskemu krajnemu knježerstwu posrědkowali, informuje Choćebuska skupina Zeleneje ligi.