San Francisco (dpa/SN). W metropoli San Francisco na zapadnym pobrjohu USA chcedźa w hosćencach, kofejownjach, barach, fitnesowych studijach a na wěstych zarjadowanjach přichodnje widźeć, zo su ludźo pře koronawirus šćěpjeni. To je měšćanostka London Breed wčera připowědźiła. Noworjadowanje płaći wot 20. awgusta. Potom dyrbja ludźo dopokazać, zo su dospołnje šćěpjeni. Negatiwny test hižo njedosaha.

Scholz dale před Laschetom

Berlin (dpa/SN). Financny minister Olaf Scholz (SPD) ma w direktnym duelu kanclerskich kandidatow dale nós prědku. Na wšě 59 procentow ludźi jemu ­zastojnstwo zwjazkoweho kanclera při­cpěwa, pjeć procentow wjace hač před ­tydźenjomaj. To je wuslědk dźensa wozjewjeneho naprašowanja sćelaka ZDF. Kanclerskeho kandidata CDU/CSU Armina Lascheta ma jenož hišće 28 proc. za kmaneho kanclera. Kandidatku Zelenych Annalenu Baerbock by sej 23 proc. za kanclerku přało.

Woheń so sydlišćam bližił

Z wjacorymi zarjadowanjemi su dźensa w Berlinje 60. róčnicu natwara tamnišeje murje wopominali. Moritz van Dülmen, Axel Klausmeier und Klaus Lederer (wotlěwa) jako zastupnicy Załožby Berlinskeje murje su na Hermannowym naměsće hoberske foto na fasadźe domu připrawili. Dnja 13. awgusta 1961 běchu zamołwići tehdyšeje NDR započeli wuchodny dźěl města wot zapadnych dźělow z murju dźělić. Wjace hač 130 ludźi bě tam we 28 lětach jeje wobstaća žiwjenje přisadźiło. Foto: dpa/ Thomas Bartilla

Washington (dpa/SN). USA chcedźa 3 000 přidatnych wojakow nachwilnje do Afghanistana přepołožić, kiž maja wěstotu Kabulskeho lětanišća zaručić. Hłownje dźe wo to, ewakuaciju wulkopósłanstwa USA podpěrać, rěčnik zakitowanskeho ministerstwa John Kirby we Washingtonje zdźěli. To móhło tež kolony jězdźi­dłow na a wot lětanišća wopřijeć. Ewakuować chcedźa tež něhdyšich afghaniskich sobudźěłaćerjow wójska USA, kotřiž so nětko wjećby talibanow boja. Nachwilne přepołoženje ameriskich wojakow je sćěh přiwótřeneho wěstotneho połoženja w Afghanistanje, Kirby rjekny. Liča z tym, zo talibanojo hižo jara bórze do stolicy Kabula zaćahnu. Wěstotne mocy, kiž běchu USA wukubłali a wobrónili, so zwjetša wróćo sćahnu a talibanam swoje brónje a jězdźidła přewostajeja. Na wobrazach su widźeć talibanojo z ameriskimi třělbami w ruce a patrulje talibanow z ameriskimi jeepami.

Talibanojo su wčera strategisce wažne město Lashkargah na juhu kraja zdobyli. Woni bliža so tak swojemu zaměrej, kraj wojersce dospołnje wobknježić.

Lipsk (dpa/SN). Po tym zo su stawk pola Němskeje železnicy skónčili, so želez­niski wobchad tež w Sakskej, Saksko­Anhaltskej a Durinskej zaso normalizuje. Kaž rěčnik železnicy zdźěli, ćahi zaso po planje jězdźa. Ludźo su přiwšěm namołwjeni so do wotjězda wo aktualnym połoženju ćahow wobhonić.

Dźensa wočakowachu wosebje wulke wućeženje předewšěm na dalokich čarach. Železnica bě pasažěrow prosyła sej jězdźenku rezerwować dać, abo, je-li móžno, jězbu na přichodne dny přestorčić.

Stawk Dźěłarnistwa lokomotiwnikow Němskeje su dźensa rano w dwěmaj po planje skónčili. Čłonojo dźěłarnistwa běchu stawk w nocy na srjedu zahajili, zo bychu ćišć na dobro wyšich mzdow a lěpšich dźěłowych wuměnjenjow zesylnili. Dwaj dnjej bě jenož kóždy štwórty ćah jěł. We wuchodoněmskich krajach běchu wuskutki stawka wosebje razne.