To a tamne (20.08.21)
Hač do dźensnišeho wječora ma plahowarka Helen Macdonald chwile, k smjerći zasudźeneho alpaku „Geronimo“ sama morić. Tole je britiske sudnistwo rozsudźiło. Geronimo je pozitiwnje na chětro natykliwu chorosć testowany. Wobsedźerka bě wospjet sudnisce spytała, so wukazanemu zasparnjenju zwěrjeća wobarać. Mjeztym na statoku žony aktiwisća přećiwo morjenju alpaki protestuja.
Chětro bolostnje skónčiła je so ležaca wuměłska instalacija 41lětneje Awstričanki wosrjedź Salzburga. Kaž policija zdźěla, měješe 71lětny šofer awta na dróze ležacu žonu za klanku z wukładneho wokna a so za to rozsudźi, zadźěwk přejěć. Jako słyšeše wukřik, wosta stejo. Pěšcy žonu pod awtom wućahnychu a dowjezechu ju do chorownje. Šofer dyrbi z chłostanjom ličić. Dotal njewědźa, hač měješe žona za performance dowolnosć.
Pohóršk Zwjazkej
Wojerecy (SN/bn). Wyši měšćanosta Wojerec Torsten Ruban-Zeh (SPD) a swoji kolegojo Frank Lehmann (njestronjan) z Łutow, Roland Dantz (njestronjan) z Kamjenca a Carina Dittrich (Swobodni wolerjo) z Rychbacha su zwjazkowej ministerce za kubłanje a slědźenje Ani Karliczek (CDU) pohórškowy spis sposrědkowali. Z listom kritizuja woni „předwuběrk ekspertow za planowany slědźenski wulkocentrum we Łužicy“, kotryž „je jich zecnył“, kaž na nowinarska platforma Hoyte24 wozjewja.
Projektaj „Němski centrum za astrofyziku“ (DZA) a „Europski slědźenski institut za swětnišćowe resursy“ (Eris) nimatej „žanu bazu we Łužicy a jenož wobmjezowane nawjazowanske dypki k njej“, štož njewotpowěduje wupisanju „Wissen schafft Perspektiven für die Region!“ ministerstwa. „Prašamy so, kak ma na tym zakładźe 1 500 dźěłowych městnow nastać“, w lisće dale rěka.
Wusud přećiwo Zschäpe płaći
Karlsruhe (dpa/SN). Sudniski wusud přećiwo Beaće Zschäpe jako sobuskućićelce neonacistiskeje teroroweje skupiny NSU je płaćiwy. Tole je Zwjazkowe sudnistwo dźensa wobkrućiło a zdobom jeje rewiziju zaćisnyło. Dnja 11. julija 2018 bě Mnichowske wyše krajne sudnistwo Zschäpe jako jeničku přežiwjenu NSU-trójki k jastwu na čas žiwjenja zasudźiło. Při wšěm nimaja žanych dopokazow, zo je Zschäpe hdy na městnach njeskutkow była.
Merkel porěči k Afghanistanej
Berlin (dpa/SN). Zwjazkowa kanclerka Angela Merkel (CDU) chce přichodnu srjedu w zwjazkowym sejmje knježerstwowu deklaraciju k połoženju w Afghanistanje přednjesć. Tole je powěsćernja dpa z knježerstwowych kruhow zhoniła. Na wurjadnym posedźenju chce parlament tón dźeń mandat zwjazkoweje wobory k ewakuowanju ludźi z Afghanistana wobzamknyć. Opozicija wumjetuje knježerstwu zaprajenje a dospołnje wopačne posudźowanje połoženja.
Biden: Bjez chaosa njeje šło
Štyri tydźenje po zahubnej katastrofje zapławjenja w ...
Šulerjow šćěpić abo radšo nic?
Berlin (dpa/SN). Powołanski zwjazk dźěćacych a młodźinskich lěkarjow je plany wjacorych zwjazkowych krajow kritizował, dźěći a młodostnych w šulach přećiwo koronawirusej šćěpić dać. „Młodostni steja jara pod skupinskim ćišćom, tak zo njeje swobodny a njewotwisny rozsud w dalokej měrje móžny“, rjekny rěčnik zwjazka, dźěćacy lěkar Jakob Maske nowinarjam. Wón radźi město toho k šćěpjenju w praksach. „To ma lěpšinu, zo lěkar swójbu derje znaje a zo móže staršeju poradźować, hač ma šćěpjenje dźěći a młodostnych zmysł abo nic.“
Zwjazk wučerjow Němskeje porno tomu plany nastupajo šćěpjenje w šulach wuraznje wita. „Wšitko, štož wěstotu w šulach spěšnje zwyši, je dobre“, rjekny předsyda zwjazka Heinz-Peter Meidinger. Stajna šćěpjenska komisija bě šćěpjenje dźěći wot dwanaće lět po dołhim wahanju minjenu póndźelu doporučiła.
Njekmane nahubniki kupili
Dotal 900 ludźi wuchowali
Frankfurt n. M./Berlin (dpa/SN). Na lětanišću w Frankfurće nad Mohanom je dźensa rano dalše lětadło z něhdźe 250 ludźimi z Afghanistana přizemiło. Mašina bě hodźiny do toho w uzbekskej stolicy Taškenće wotlećała. Do toho bě lětadło zwjazkoweje wobory ludźi z Kabula do Taškenta dowjezło. Zwjazkowa wobora bě tutón tydźeń wuchowansku misiju za němskich staćanow a za Afghanow zahajiła, kotřiž chcedźa po dobyću talibanow kraj wopušćić. Dotal je Němska po tutym puću 900 ludźi wuchowała.
W prěnich rozmołwach z militantno-islamistiskimi talibanami wo ewakuowanju bywšich afghaniskich pomocnikow zwjazkoweje wobory njeje zwjazkowe knježerstwo najprjedy raz žane wuspěchi docpěło. Při tym dźe w prěnim rjedźe wo to, zo smědźa afghaniscy staćenjo lětanišćo w Kabulu docpěć. Pječa su talibanojo na dróhach k lětanišću kontrolnišća natwarili. Wukrajni staćenjo smědźa dale k lětanišću, afghaniscy pak nic. Po informacijach swědkow knježi na lětanišću dale njesměrny chaos.
Zhromadnje přećiwo mrětwje
Sakski ministerski prezident so wo aktualnym stawje informował
Běła Woda/Drježdźany (dpa/SN). Sakski ministerski prezident Michael Kretschmer (CDU) ma bój přećiwo rozšěrjenju afriskeje swinjaceje mrětwy za europski nadawk a žada sej w tym zwisku solidarisku zhromadnosć Zwjazka a zwjazkowych krajow. Při wopyće w Zhorjelskim wokrjesu njedaloko mjezy Pólskeje wón wčera rjekny: „Bój přećiwo afriskej swinjacej mrětwje ma wulki cyłoněmski wuznam. Zasadźam so za to, zo so Zwjazk a zwjazkowe kraje w solidariskej zhromadnosći tutomu nadawkej wěnuja.“ Je hladajo na tuchwilnu a na móžne přichodne mrětwy wažne, zhromadne dźěło Zwjazka a krajow w tutym sensibelnym wobłuku sylnić. Wosebje potrjechene kraje njesměli sebi samomu přewostajić.
Sakska so zhromadnje z Braniborskej za to zasadźuje, zo Zwjazk a wšitke zwjazkowe kraje w tajkim krizowym padźe zhromadnje postupuja a wšitke přidatne kóšty za trěbne wěstotne naprawy zhromadnje přewzaja.
To a tamne (19.08.21)
Spěšnje ke kóncej bě dowolowa jězba z traktoromaj a připowěšakom za dweju 16lětneju w Allgäuju. Policija planowanu 18 hodźin trajacu jězbu z Kaufbeurena do Würzburga po někotrych kilometrach přetorhny. Młodostnaj měještaj drje jězbnu dowolnosć za traktory, z njej pak smědźa jenož ratarske a lěsniske dźěła wukonjeć, jimaj zastojnicy rozłožichu. Poprawom chcyštaj młodostnaj stanować.
Swojemu wobsedźerjej žiwjenje wuchowała je kóčka w francoskim Straßbourgu. Susodźa běchu policiju wołali, dokelž bě kóčka hižo tři dny sama na werandźe. Jako zastojnicy přez wotewrjene wokno do bydlenja zalězechu, wuhladachu wučerpaneho wobsedźerja na zemi ležo. Muž bě so zwjezł a njemóžeše sej hižo pomhać. Jeho dowjezechu do chorownje, kóčku do zwěrjatownje. Bjez lěkarskeje pomocy by muž drje zemrěł.
Mandat wojakow schwaleny
Berlin (dpa/SN). Zwjazkowe knježerstwo je dźensa mandat zwjazkoweje wobory za ewakuowanje ludźi z Afghanistana wobzamknyło. Přichodny tydźeń ma zwjazkowy sejm wo tym rozsudźić. Dokelž su akciju ze šěrokim přihłosowanjom hižo zahajili, budźe rozsud drje formalna naležnosć. Najebać to ma parlament tajke nowe wukrajne zasadźenje schwalić. Při ewakuowanju zasadźuja 600 wojakow, kotřiž změja tež prawo, so z wojerskimi srědkami sami zakitować.
SPD Zelenych přesćahnyła
Köln (dpa/SN). Nahladnosć SPD mjez wolerjemi dale přiběra. Mjeztym su socialdemokraća z Olafom Scholzom na čole samo Zelenych přesćahnyli a bliža so uniji. W najnowšim woprašowanju instituta Forsa leži SPD nětko z 21 procentami jenož hišće dwaj procentaj za CDU/CSU, kotraž dóstanje dale 23 procentow. Porno tomu su Zeleni dalši dypk přisadźili a maja nětko 19 procentow hłosow. Wuslědki druhich slědźenskich institutow su podobne.
Hosćencarjo so dale bědźa
