Waršawa. Mjez Pólskej a Němskej wěje zymny politiski wětřik. Přičina toho su reparacije za škody w Druhej swětowej wójnje, kotrež běchu Němcy w susodnym kraju zawinili. Prěni raz wo tym rěčał je šef strony Prawo a sprawnosć Jarosław Kaczyński na jeje kongresu w juliju. Tam wón twjerdźeše, zo ma Pólska prawo na wotškódnjenje. Wosebita komisija sejma měła žadanja analyzować. Minjenej měsacaj su jeje čłonojo pilnje dźěłali a 40 stron zestajeli. Wuslědk analyzy je, zo ma Pólska prawo na reparacije dohromady šěsć bilionow eurow. K tomu mjenuja w dokumenće tež argumenty. Tak je dojednanje z lěta 1953 njepłaćiwe. Tam bě Pólska pod wulkim ćišćom Sowjetskeho zwjazka podpisała, zo na wotškódnjenju njewobstawa. Po słowach komisije dyrbjachu so tehdy Sowjetskemu zwjazkej kłonić. Z naprašowanja pola UNO, kotraž wšitke wažne zrěčenja zběra, pak wuchadźa, zo tam žane tajke njepředleži. Dale komisija twjerdźi, zo je Pólska jenički procent ze sumy reparacijow dóstała, kotruž bě Němska potrjechenym krajam dohromady płaćiła.
Praha (ČŽ/K/SN). Wo imunitu zapósłanca sejma je něhdyši čěski financny minister a předsyda ANO Andrej Babiš runje tak přišoł kaž jeho prěni naměstnik Jaroslav Faltýnek. Dalši wotběh k zwoprawdźenju rozsuda sejma móhł być, zo policija přećiwo Babišej postupuje. Kajka situacija faktisce za njeho bywa, słowakska nowina denník N zwěsća: „Šef ANO Andrej Babiš móhł zawěrno tež sam za zběhnjenje imunity hłosować, dokelž wědźeše, zo k tomu bjeztoho dóńdźe. Hłownje wšak je wón kalkulował, zo ma wothłosowanje nětčišeho sejma za chłostanske přepytowanje přećiwo njemu jeničce nachwilny wuznam. Do wólbow w jeho naležnosći ničo njerozsudźa, a do noweho sejma budźe wón zawěsće wuzwoleny a změje tuž znowa imunitu.“
Prezident Čěskeje Miloš Zeman je mjeztym zdźělił, zo Andreja Babiša w kóždym padźe na ministerskeho prezidenta powoła, jeli ANO z wólbow sejma jako dobyćer wuńdźe. Policija dósta tele dny wot sejma pisomne zdźělenje wo zběhnjenju imunity Babiša.
Praha (ČŽ/K/SN). Kwota bjezdźěłnosće je w Čěskej w awgusće porno julijej wo dalšu dźesaćinu procenta spadnyła a wučinja tuchwilu runje snadne štyri procenty, kaž Čěski dźěłowy zarjad wozjewja. Dźěło pyta po jeho wudawanju 296 826 ludźi, štož je porno samsnemu časej lěta 1998 najniši staw. „Samo za čas prózdnin ličba dźěłopytacych woteběra“, rjekny direktorka centralneje dźěłoweje instancy Kateřina Sadílková. To swědči po jeje hódnoćenju wo dobrym stawje čěskeho hospodarstwa, ale tež wo spomóžnym skutkowanju dźěłowych zarjadow.
Najmjenje bjezdźěłnych stej w awgusće wupokazowałoj wokrjes Rychnov nad Kněžnou a Praha-wuchod z 1,3 a 1,5 procentami. Praha ma 2,9 procentow, Plzeňski wobwod 2,6 a Juhočěski wobwod 2,8 procentow bjezdźěłnych. Najwjetša je bjezdźěłnosć dale w Ústískim a Morawsko-šleskim wobwodźe. We woběmaj kónčinomaj je to tuchwilu 6,1 procent.
Po datach statistiskeho zarjada Eurostat měješe Čěska w juliju mjez wšěmi krajemi Europskeje unije najmjenje bjezdźěłnych.
Praha (ČŽ/K/SN). Předsyda Hibanja njespokojnych wobydlerjow (ANO) Andrej Babiš a jeho prěni naměstnik Jaroslav Faltýnek dóstanjetaj policiju na šiju. Delnja komora parlamenta je zawčerawšim wobzamknyła imunitu wobeju zapósłancow zběhnyć a jeju pochłostać. Po sydom hodźin trajacej diskusiji wupraji so přemóžaca wjetšina ze 134 přitomnych zapósłancow za to. Zapósłancy frakcije ANO njeběchu so nimo Babiša a Faltýneka na wothłosowanju wobdźělili. Wobaj staj namjet, jeju wudać justicnej procedurje, podpěrałoj, rjekny nowinarjam městopředsyda sejma Radek Vondráček.
Něhdyšemu financnemu ministrej Babišej wumjetuja, zo je dopušćił jebanstwo w rozměrje 50 milionow krónow za natwar farmy „Čapí hnízdo“(Baćonjace hnězdo) za jeho firmu Agrofert. Faltýneka winuja wobdźělenja na tym. Babiš tukanja raznje wotpokazuje.
Waršawa. Rozsud Europskeho sudnistwa, zo je wobzamknjenje wjetšiny čłonskich statow Europskeje unije – 120 000 ćěkancow z Grjekskeje a Italskeje proporcionalnje rozdźělić – prawniske, Pólska njepřipóznawa. Słowakska a Madźarska běštej skóržbu přećiwo rozdźělowanju migrantow zapodałoj; ale zwrěšćiłoj. Wobzamknjenje EU ze septembra 2015 předwidźi, zo měła Pólska 6 182 ćěkancow přiwzać. Bywše knježerstwo je tomu hišće přihłosowało. Tola w oktobru 2015 nowowuzwolene knježerstwo to njeakceptuje. Hač do dźensnišeho njeje ani jeničkeho z nich w kraju witało. „Nochcemy přilubjenje bywšeho knježerstwa přewzać a wobzamknjenje wotpokazujemy“, ministerska prezidentka Beata Szydło zas a zaso potwjerdźa. Žadanja mjezsobneje solidarity nochce Pólska podpěrać. Tež minister za nutřkowne naležnosće Mariusz Błaszczak ma politiku Europskeje unije za wopačnu a skedźbnja na wohroženu wěstotu ludźi a kraja. Mjeztym je so ličba ćěkancow w Grjekskej a Italskej pomjeńšiła.
Praha (dpa/SN). Cłownikam z Čěskeje, Pólskeje a Słowakskeje je so poradźiło, mjezynarodnu agěrowacu cwólbu wikowarjow z drogu crystal zajeć. 41 pohladnych bě drogi zhotowjało a z nimi wikowało, zdźěli nawoda čěskeje policije powěsćerni ČTK. A ličba skućićelow móhła samo hišće wjetša być.
Něhdźe 650 zastojnikow z mjenowanych krajow bě na racijach wobdźělenych. Namakali su woni přeličene poł miliona eurow we wšelakorych měnach. Cwólba je kompletne ilegalne drogowe wiki w Čěskej a Słowakskej z crystalom zastarowała. Ćežišćo bě zapadna Čěska na mjezy k Němskej.
České Budějovice (ČŽ/K/SN). Piwarnja Budvar je nawariła wosebite piwo, z kotrymž napjelni 122 blešow za bamža Franciskusa. Po tym zo je specialny ležak 90 dnjow zrawił, chce delegacija z Českich Budějovic z dieceznym biskopom Vlastimilom Kročilom na čole wurjadny prezent swjatemu wótcej wosobinsce na dohodownej generalnej awdiency za čěskich putnikow přepodać. Tole wozjewja powěsćernja ČTK. „Za nas je to prestižna naležnosć“, rěčnik Budvara Petr Samec zwurazni. „Je to prěni raz, zo Vatikanej piwo dodamy. Limitěrowana edicija blešow njebudźe na předań.“ Kak hinak su wosebite piwo porno zwučenym recepturam warili, piwarnja wězo njepřeradźa.
Swětoznaty Budvar je loni 1,61 milionow hektolitrow piwa předał, najwjace za čas swojeho wobstaća. Wunjesło je jemu to rekordnu sumu 2,54 miliardow krónow (něhdźe 97 milionow eurow). Do 77 krajow swěta su 975 000 hektolitrow dodawali. Statej słušaca piwarnja nałoži lětsa 750 milionow krónow a hač do lěta 2020 dwě miliardźe krónow za wutwar a modernizowanje předewzaća.
Waršawa (dpa/SN). Wonkowny minister Pólskeje Witold Waszczykowski žada sej kaž dalši čłonojo knježerstwa wot Němskeje reparacije škodow Druheje swětoweje wójny dla. „Měli so ke chutnej rozmołwje z Němcami zeńć a zhromadnje wo tym rozmyslować, kak hodźi so problem rozrisać“, rjekny Waszczykowski wčera sćelakej RFM FM.
Nutřkowny minister Pólskeje Mariusz Błaszczak bě sej hižo minjeny kónc tydźenja wotškódnjenje biliona dolarow žadał, štož wotpowěduje něhdźe 840 miliardam eurow. „Snano je to hišće wjace, njemějachmy hižo dlěje hač 70 lět žane dokładne wobličenje“, Waszczykowski potwjerdźi.
Wo žadanju reparacijow hižo někotre měsacy w susodnym kraju diskutuja. Hač drje k tomu woprawdźe dóńdźe, pólski wonkowny minister wčera njerjekny. Wědomostna słužba pólskeho parlamenta pruwuje pak tuchwilu prawniske móžnosće.