Predikat „z wuznamjenjenjom“: Sarah Hančikec, Serbski gymnazij Budyšin; Leonard Nowak, Zakładna šula Žylow; Daniel Šołta, Johanneum Wojerecy

predikat „jara derje“: Rebecca Čórlichec, Serbska wyša šula Ralbicy; Anton Piatza, Serbski gymnazij Budyšin; Janek Bramberg, Johanneum Wojerecy; Annett Düring, Serbska wyša šula Budyšin

predikat „derje“: Kathalin Wornarjec a Janika Koberec, Serbski gymnazij Budyšin; Luisa Korchec, Serbska wyša šula Ralbicy; Emilia Döringec, Serbska wyša šula „Dr. Marja Grólmusec“ Radwor; Mara­ C. Krječmarjec, Serbski gymnazij Budyšin; Alexa Mäckelburg, Wyša šula „Dr. Marja Grólmusec“ Slepo; Jakob Böttcher, Serbski gymnazij Budyšin; Simon Schierack, Lessingowy gymnazij Wojerecy; Thalea Reuter, Wyša šula „Dr. Marja Grólmusec“ Slepo

Olympiada je wosebity rěčny rum

srjeda, 10. meje 2017 spisane wot:

Olympiada serbšćiny je składnosć sej wosebitu serbsku zhromadnosć wotkryć“, měni Beatrice Weclichec z Nuknicy, kotraž pyta „stajnje za serbskorěčnymi rumami“. Jako něhdyša praktikantka na Ralbičanskej zakładnej šuli, hdźež serbšćinu wšědnje nałožuja, je tajki dožiwiła. Trochu hinak bě to na Budyskej šuli.­ Tam je rěčny wobswět skerje němski, a tak maš so bóle prócować. Wona sej přeje, zo dóstanje po studiju wučerstwa w lěću šansu na referendariat a pozdźiše přistajenje w Ralbicach. Do studija dźěłaše we wobłuku dobrowólneho socialneho lěta w tamnišej pěstowarni, kotraž je w nošerstwje Serbskeho šulskeho towarstwa. Tam běštej so jej woči za powołanje na polu kubłanja wotewrěłoj.

Nowy kompjuterowy kabinet su wčera na Kulowskej wyšej šuli „Korla Awgust Kocor“ přepodali. Dohromady nałožichu za njón 20 000 eurow. Połojcu z toho je město zapłaćiło, tamnu połojcu nazběra spěchowanske towarstwo kubłanišća z darami mnohich sponsorow a dobroćelow. Nad nowym kabinetom wjesela so tule šulerjo rjadownje 5a ze zastupowacej šulskej nawodnicu a wučerku za informatiku Kerstin Streit. Foto: Ulrike Herzger

Dźěći Kulowskeje Krabatoweje šule běchu so na kreatiwnym wubědźowanju wobdźělili. Wčera wopytachu wone Wojerowski Domowinski dom, hdźež bě za nje dźakne zarjadowanje za jich basnje a molowanki.

Wojerecy (SiR/SN). Poprjancy ze šokolodu, brěčka, serbska dźěćaca kniha, luboznje kryta kofejowa tafla a čerwjene powětrowe balonki při durjach će witaja. Regionalna rěčnica Domowiny za teritorij župy „Handrij Zejler“ Christina Šołćina strowi šulerjow na trochu hinašu wučbu serbšćiny hač w šuli.

Njebjelčicy (JK/SN). Čłonojo dźěłoweje skupiny, kotraž je sej zaměr stajiła w Njebjelčicach załožić zakładnu šulu w swobodnym nošerstwje, zetkachu so wčera w Njebjelčanskim gmejnskim zarjedźe. Nastork, wo tajkej šuli přemyslować, stej tuchwilna situacija w sakskim šulstwje kaž tež próstwa Worklečanskeje šule, w Njebjelčicach šulski hort zarjadować.

Njeparujomna to institucija

wutora, 09. meje 2017 spisane wot:

25lětne wobstaće dźěłanišća ABC potwjerdźa jeho wulku skutkownosć

Choćebuz (SN/MiR). Dźěłanišćo za serbske kubłanske wuwiwanje (ABC) w Choćebuzu ma perspektiwu. To bě cyle jasne dopóznaće wčerawšeho jubileja k 25lětnemu wobstaću zarjadnišća, kotrež kraj Braniborska cyły čas spěchuje, w klubowni serbskeho internata w delnjołužiskej metropoli. Nawodnica dźěłanišća dr. Christiana Piniekowa witaše na wšě połsta gratulantow z Hornjeje a Delnjeje Łužicy. Wšitcy skedźbnichu na wulku skutkownosć jónkrótneje serbskeje wědomostneje institucije. Předsyda Rady za serbske naležnosće Braniborskeje Torsten Mak wuzběhny jeje kubłansku a politisku dimensiju. „Tule dźěła horstka přewšo angažowanych ludźi, zo bychu kładli fundament za posrědkowanje delnjoserbšćiny“, rjekny předsyda Domowiny Dawid Statnik. Kaž Ana Kosacojc-Kozelowa, społnomócnjena za serbske naležnosće města Choćebuza, potwjerdźi, „participuje město ze skutkowanja ABC“.

Swěčki zaswěćić

wutora, 09. meje 2017 spisane wot:
Pukačec mandźelskaj Lubina a Jaroslav zanjeseštaj wčera w Choćebuzu serbski spěwny chaos. Připosłucharjo pak spěšnje zwěsćichu, zo hornjoserbske „Jank pod hajkom woraše“ a delnjoserbske „Za našymi gumnami“ jako kwodlibet cyle derje hromadźe klinčitej. Runje tak je to we wuwiću Choćebuskeho Dźěłanišća za serbske kubłanske wužiwanje (ABC). Knježeše-li před 25 lětami hišće chaos při załoženju institucije, je so ta w běhu lět dale a bóle do kanona serbskich a němskich zarjadnišćow w Delnjej Łužicy zarjadowała. Nic jenož to, wona žněje dźeń a wjace při­póznaća. Bjez njeje njeńdźe! Štó hewak by zestajał ramikowe wučbne plany, z partnerami nowe wučbnicy a dźěłowe materialije za wučbu delnjoserbšćiny zdźěłał, wučerki a kubłarki do dźěła pohonjał?­ Zaswěćmy tuž hižo nětko dalše 25 swěčkow abo hišće wjac za přichodne jubileje. Milenka Rječcyna

Ze sobu rěčeli

pjatk, 05. meje 2017 spisane wot:

Bórkowy (SN/MiR). „Chcemy, zo so serbšćina bjez wobmjezowanja ličby šulerjow dale wuwučuje“, měni Kathleen Komolka ze staršiskeje iniciatiwy wo zachowanje serbšćiny w Delnjej Łužicy. Ministerstwo je drje minimalnu ličbu skupiny wot dwanaće na pjeć pomjeńšiło. To pak wočakowanje iniciatiwnikow njespjelnja. Dźens dopołdnja su to braniborskemu ministrej za kubłanje, młodźinu a sport Günterej Baasce (SPD) wosobinsce rjekli. Na přeprošenje iniciatiwy wopyta minister Bórkowsku zakładnu šulu, hdźež so 130 šulerjow na Witaj- abo bilingualnej wučbje wobdźěla. Tam móžeše sej cyle praktiski dohlad wo wuwučowanju delnjoserbšćiny tworić. „Serbske šulske postajenje jako referentowy naćisk předleži. Tak su změny móžne“, wón zwěsći. Budu tuž na žadanja iniciatiwy reagować.

Wučer Uwe Gutšmidt je ze šěsć šulerjemi 4. lětnika ze wšelakorymi rěčnymi znajomosćemi wučbu matematiki delnjoserbsce předstajił. Šulerjo rěčachu z ministrom Baasku, dalše koło zjednoći staršich, šulerjow, kubłarki a wučerjow. Tam stejachu w fokusu předmjety, wosebje pak lětniki přesahowaca wučba.

By krajej jara derje stało

srjeda, 03. meje 2017 spisane wot:

Skónčnje, sej prajich, jako słyšach wo žadanju Marka Šimana, serbsku rěčnu šulu w Hornjej Łužicy zarjadować. Wona pak njedyrbjała jenož wu- a dalekubłanju wučerjow a kubłarjow słužić. Ně, tajke ku­błanišćo dyrbi wšitkim přistupne być a kóždy, wšojedne z kotreje branše, dyrbi so na njej­ wobstajnje w serbskej rěči wukmanjeć­ móc. Tež sam so z toho njewuzamkuju a bych so hnydom přizjewił. Wšako je poskitk dalekubłanjow serbskim žurnalistam w maćeršćinje jara snadny, zo njetrjebał rjec, zo scyła žanoho njeje. Smy sej tajke dotal sami organizowali.

Tež, hdyž mnozy praja: To tla ničo nowe njeje, to sej hižo dawno žadamy!, je derje, zo je serbski zapósłanc naležnosć zaso do srjedźišća stajił. Nětkole mamy namjet zwo­prawdźić. Najlěpje wšak by było, by-li so mysl Ludmile Budarjoweje zwoprawdźiła, zo Sakska kubłanišćo wudźeržuje. To by krajej jara derje stało. Janek Wowčer

W interneće serbšćinu wuknyć

pjatk, 28. apryla 2017 spisane wot:

Samowuknjenski program „Serbšćinu online wuknyć“ (SOL) je wotnětka w interneće pod sprachkurs.sorbischlernen.de aktiwny. Załožba za serbski lud bě dźensa dopołdnja na předstajenje projekta přeprosyła.

nawěšk

nowostki LND