Wojerowski Johanneum integruje rěč wosrjedź wulkeje mnohotnosće

„Wšitko pruwujće, dobre dźeržće“ rěka napis­ w jědźerni Wojerowskeho Johanneuma. Pódla namolowaneje Janskeje­ cyrkwje steji tam citat na sćěnje­ w serbskej, jendźelskej, francoskej, ruskej, łaćonskej a grjekskej rěči. Tak pokazuje so bohatosć rěčow na křesćan­skim gymnaziju, kotryž swjeći tele dny swoje 25lětne wobstaće.

Andre­as­ Kirschke je so z jeho nawodu Günterom Kieferom rozmołwjał.

Kotru rólu hraje serbska rěč na wašim kubłanišću?

G. Kiefer: Serbšćina ma wysoku hódnotu. Wona je wot lěta 1992 kruće do šulskeho programa zapřijata. W přijimanskich rozmołwach za nowych šulerjow je wona kóžde lěto tema. To rěka, prašamy so šulerjow a staršich zaměrnje za jich zajimom za serbšćinu. Wabimy za rěč a pohnuwamy gymnaziastow, ju wuknyć. Wot wšeho spočatka maćer­norěčna Serbowka, wučerka Andreja Ryće­rjowa ze Šunowa, pola nas serbšćinu podawa. Chcemy tež přichodnje wučbu dołhodobnje a stabilnje z njej pla­nować.

Ze swjedźenskej Božej słužbu we Wojerowskej Janskej cyrkwi zhladowaše tamniši křesćanski gymnazij Johanneum wčera na 25 lět wobstaća.

Wojerecy (AK/SN). Křesćanski gymnazij Johanneum we Wojerecach je na přichod derje přihotowany. To podšmórny sobuzałožer šulskeho nošerskeho towarstwa Martin Schmidt wčera na swjatočnosći składnostnje 25lětneho wobstaća Johanneuma. „Motiwacija Ewangelskeje cyr­kwje šleskeje Hornjeje Łužicy, w lěće 1992 tule swobodnu šulu załožić, bě sadźić znamjo za tolerancu, swětawote­wrjenosć a wšelakorosć“, wón rozłoži. „Dźěše wo akceptancu wšelakich duchownych, politiskich a kulturnych nastajenjow.“ Załoženje gymnazija bě 1992 signal nadźije po namócnosćach přećiwo cuzym nazymu 1991 w měsće.

Zajimawa a wěcowna bě wčerawša diskusija za kulojtym blidom iniciatiwy Serbski sejm. Zajimawa, dokelž přednjesechu hišće njesłyšane myslički, kotrež drje na prěnje posłuchanje skerje utopiske klinča. Słyšiš-li pak je druhi raz, hižo nic. Mysličku prof. dr. Matthiasa Theodora Vogta na kóždej serbskej šuli zaměstnić wotnožku Sakskeho wukubłanskeho a wupruwowanskeho kanala, za tak špatnu nimam. Z toho njebychu jenož kubłanišća, ale tež dalše serbske institucije profito­wali. Ideju, z Budyskeje wotnožki kubłanskeje agentury, kotruž chce Sakska po najnowšim na referat bjez kóždehožkuli prawa roz­sudow přetworić, wutworić Serbsku kubłansku agenturu, staracu so zdobom wo němske naležnosće, mam tohorunja za dobru. Mi pobrachuje jenož wotmołwa na prašeni, kak to zwoprawdźić a zwotkel resursy brać. Wotmołwa „Stat ma płaćić“ mi njedosaha. Janek Wowčer

Budyšin (LB/SN). Přećiwo planam sakskeho statneho ministerstwa za kultus, wutworić krajny zarjad za šulu a kubłanje, přiběra protest. Tole wujewi tež wčerawša diskusija wo naležnosći, na kotruž bě Sakski zwjazk wučerjow do Bu­dyskeho hotela „Best Western“ přeprosył. Mnozy wučerjo kaž tež wjacori zapó­słancy sakskeho sejma, wjesnjanosća hornjołužiskich komunow, krajni radźićeljo, nawodźa šulow a předsydźa zwjazkow a towarstwow běchu přišli.

Po planach kultusa, kotrež předstaji předsyda Zwjazka sakskich wučerjow Jens Weichelt, chcedźa zamołwići wobstejace pjeć regionalnych wotnožkow Sakskeje kubłanskeje agentury zredukować na tři – a to w Kamjenicy, Drježdźanach a Lipsku. Z dotalneju wotnožkow w Zwickauwje a Budyšinje matej nastać referataj. Tak njezmějetej hižo žanu kompetencu­ rozsudźeć, tež w serbskich naležnosćach nic. Nowy zarjad ma 1. januara 2018 skutkować započeć.

Plany kultusoweho ministerstwa su wčera wótrje kritizowali. Třo z ně­hdźe 70 přitomnych su žurlu z protesta dočasnje wopušćili.