Wubědźowanje ma zajim budźić

wutora, 05. apryla 2016 spisane wot:

Lětuše čitanske wubědźowanje za šulerjow 3. lětnika ze serbskich zakładnych šulow resp. zakładnych šulow, kotrež po koncepciji 2plus dźěłaja, budźe přichodnu sobotu w Budyskej Smolerjec kniharni.

Budyšin (SN/MiR). Nawodnica Smolerjec kniharnje Annett Šołćic ma kóždolětne čitanske wubědźowanje za dobru składnosć, za swoje zarjadnišćo wabić. „Zwěsćamy, zo přińdu šulerjo zwjetša jenož hišće we wobłuku šulskeho wopyta abo ze staršimi k nam, tež ći z Budyšina. Tuž móžemy wobdźělnikam čitanskeho wubědźowanja swój poskitk předstajić“, wona rjekny. Dźěći, kotrež chodźa do Budyskeje Serbskeje pěstowarnje „Jan Radyserb-Wjela“ w nošerstwje Křesćansko-socialneho kubłanskeho skutka, kniharnju porno tomu derje znaja, dokelž ju kóžde lěto wopytuja.

Wuměłcow a dźěći do cyłka wjesć

póndźela, 04. apryla 2016 spisane wot:

Kulturny rum Hornja Łužica-Delnja Šleska wupisa druhi króć projekt za wuměłcow a dźěćace dnjowe přebywanišća. Wšitke pěstowarnje a horty regiona běchu namołwjene so požadać.

Zhorjelc/Budyšin (SN/MiR). Dwanaće tandemow, wuměłcy a kubłanišća, maja so za projekt „Kita sucht Künstler, Künstler sucht Kita“ we wobłuku kulturneho předewzaća wuměłskeho kubłanja wu­zwolić. Je to zarjadowanje kulturneho ruma Hornja Łužica-Delnja Šleska. Koordinator za kulturne kubłanje Ulf Großmann je sej wěsty: „Tónle projekt ma perspektiwu.“ Hižo loni, po tym zo bě prěni króć za zhromadne dźěło wuměłcow z dźěćimi wabił, je wón rjekł, zo wobsteji móžnosć, ideju dale wjesć a znowa dóstać spěchowanje ze stron sakskeho ministerstwa za wědomosć a wuměłstwo.

Zestajenje Dźěćiznaka dožiwili

pjatk, 01. apryla 2016 spisane wot:
Wobdźělnicy prěnjeho ferialneho kursa serbšćiny Rěčneho centruma WITAJ wopytachu wčera redakciju Serbskich Nowin. 13 dźěći ze wšelakich kónčin Němskeje, kotřiž doma serbsce wuknu, zajimowachu so za to, kak nastawa dźěćaca přiłoha Dźěćiznak. Sobudźěłaćerka SN Kathrin Spiesec (srjedźa) pokaza šulerjam, kak so fota scanuja a na nowinsku stronu dóstanu. Na kóncu swojeho wopyta zwjeselichu so nad małym darom, wudaćom jutrowneho Dźěćiznaka. Foto: Axel Arlt

Zwaža so na dožiwjenski projekt

srjeda, 30. měrca 2016 spisane wot:

Zakładne hódnoty kaž disciplinu, pilnosć, dorozumjenje a tolerancu sej wuwědomić a skrućić su zaměry wosebiteho projekta, kotryž přewjedu kónc apryla na Radworskej zakładnej šuli.

Radwor (SN/BŠe). We wobłuku předmjety přesahowaceje wučby změja kónc apryla na Radworskej Serbskej zakładnej šuli „Dr. Marja Grólmusec“ cirkus Rolandos z hosćom, kotryž poskići tam projekt cirkusoweje­ pedagogiki. „Wjele lět smy so hižo z ideju nosyli. Přihoty su jara wobšěrne a wudawki za šulerjow wulke“, wujasnja­ nawodnica zakładneje šule Brigita­ Grundmannowa. Přiwšěm so na dožiwjenski projekt z cirkusom zwaža. Podpěru dóstawaja wot staršich, tež nošer šule, Radworska gmejna, ideju wita.

Prěni ferialny kurs za dźěći, bydlace zwonka serbskeho sydlenskeho ruma, je so dźensa dopołdnja w Budyskim Serbskim domje zahajił. Wjace hač dźesać zajimcow so na poskitku Rěčneho centruma WITAJ wobdźěla.

Budyšin (SN/MiR). Poskitk RCW je za dźěći w starobje wosom do dźesać lět. Wot dźensnišeho hač do pjatka wone w Budyskim Serbskim domje serbšćinu wuknu, zbližeja sej serbski alfabet, zwučuja serbsce čitać a pisać. Wobdźělnicy njebydla w serbskim sydlenskim rumje, ale na přikład w Drježdźanach, Mülsenje abo Berlinje. Přiwšěm maja woni serbskorěčne znajomosće. Wšako staj wobaj staršej abo jedyn z njeju serbskeho pochada,­ abo dźěći maja dobry zwisk k serbskim přiwuznym we Łužicy. Tuž tež tam za čas kursa přenocuja.

Wobdźěleja so na wubědźowanju

štwórtk, 24. měrca 2016 spisane wot:
Hižo něšto lět wobdźěleja so šulerjo Kulowskeje Krabatoweje zakładneje šule na wubědźowanju Spěchowanskeho kruha za serbsku ludowu kulturu wo najrjeńše jutrowne jejko. Dźěći serbskich rjadownjow maja wulke wjeselo, tele małe wuměłske twórby debić. Minjene dny činjachu to Kulowscy šulerjo rjadownje 4a, při čimž stej jim tež dwě maćeri pomhałoj. Foto: Lubina Dučmanowa

Radworscy šulerjo wjes porjeńšili

štwórtk, 24. měrca 2016 spisane wot:
Nalětnje rjedźenje steješe dźensa w Radworju na planje. Šulerjo tamnišeje zakładneje a srjedźneje šule dźěchu do wsy a wokoliny, zo bychu wotpadki zběrali a tak wobraz wsy k jutram porjeńšili. Tež w přirowje mjez Radworjom a Chasowom su šulerjo hromadźe z wučerku Moniku Naglowej pilnje njerjad rumowali. Rjedźensku akciju wotměwaja Radworscy šulerjo kóžde lěto dźeń do jutrownych prózdnin, a to pod hesłom ekodźeń. Foto: Werner Müller

Šulerjo UNESCO-skupiny Ralbičanskeje Serbskeje wyšeje šule su wčera swój projekt wo wobchadźenju z přirodu šulerjam­ a wučerjam na Lipšćanskej Wyšej šuli Paula Robesona rozłožili.

Najradšo hraje twórby Chopina

srjeda, 23. měrca 2016 spisane wot:

Minjeny tydźeń je Wěteńčan Walentin Bjedrich na sakskim krajnym hudźbnym wurisanju „Młodźina hudźi“ we Wojerecach z brawuru wobstał. Z wuběrnym hraćom na klawěrje wubědźi sej telko dypkow, zo je jeho přewšo kritiska a kompetentna jury na zwjazkowe wubědźowanje delegowała kotrež budźe w meji w Kasselu. Na to je Walentin wězo jara hordy a so wjeseli, zo móže tam znowa z kontrabasistom Leopoldom Ruckerom z Drježdźan swoje zamóžnosće dopokazać. Byrbjež młodostnaj w dueće hrałoj, so kóždy jednotliwje za swójski wukon hódnoći. „Wot Kassela wočakuju, zo runje tak derje wotrěznjemoj kaž loni w Hamburgu, hdźež smój na zwjazkowym wubědźowanju 2. městno docpěłoj“, Walentin praji. „Chcu z toho wuknyć a nadźijam so, zo so z wobdźělenja na wurisanju tež koncertowe wustupy a mišterske kursy wudadźa. Loni móžachmoj na mytowanskim koncerće na hrodźe Weesenstein hrać, a dóstach słuchanske hóstne městno pola prof. Zensiere“, 17lětny šuler Drježdźanskeho Krajneho hudźbneho gymnazija za hudźbu „Carl Maria von Weber“­ hordźe powěda.

Krabat w srjedźišću stał

pjatk, 18. měrca 2016 spisane wot:
Wosebity projektowy dźeń dožiwichu wčera šulerjo Kulowskeje Krabatoweje zakładneje šule, kotřiž so na wučbje po koncepće 2plus wobdźěleja. We Wojerowskim Domowinskim domje zeznajomichu so z nowej Krabatowej kompjuterowej hru a čłon župneho předsydstwa Měrćin Hermann čitaše jim z Krabatoweje knihi. Po tym po­dachu so do Čornochołmčanskeho Krabatoweho młyna. Tam přednjesechu na česć stotych po­smjertnych narodnin Jurja Brězana zbasnjene twórby, za čož přepoda jim čłon předsydstwa Serbskeho šulskeho towarstwa Stefan Rjeda wopisma. K zakónčenju wobhladachu sej dźěći młyn a Krabatowu šćežku. Foto: Lubina Dučmanowa

nawěšk

SERBSKE NOWINY podpěruja:

Novi Sad – kulturna stolica Europy

nowostki LND