Krótkopowěsće (04.02.20)
Znowa pawšala komunam
Drježdźany. Třeće lěto za sobu přewostaja sakske financne ministerstwo kóždej wokrjesam přisłušacej komunje pawšalu 70 000 eurow za wólne wužiwanje, cyłkownje 30 milionow eurow. Pjenjezy hodźa so za běžne projekty runje tak kaž za inwesticije w šulach a pěstowarnjach wužiwać. Sakski sejm bě 2018 tak mjenowany zakoń wo pawšalach wobzamknył, z kotrymž skruća hač do lěta 2020 z podatej sumu gmejny zwonka metropolow.
BUND doskónčnje zwrěšćił
Choćebuz. Braniborski hórniski zarjad je předewzaću Łužiska energija a milinarnje LEAG dowolił, wužiwać wodźizny w zwisku z brunicowej jamu Wjelcej-juh. Přirodoškitna organizacija BUND bě přećiwo tomu skoržiła, ale po cyłkownje jědnaće lět trajacej rozkorje doskónčnje zwrěšćiła.
W februaru bjez alkohola
Krótkopowěsće (03.02.20)
Nowa wopytowarska adresa
Budyšin. W přetwarjenym a njedawno přepodatym nowym Budyskim dwórnišću su wot dźensnišeho socialny a młodźinski zarjad kaž tež zarjadaj za přizwolenje jězdźidłow a za jězbnu dowolnosć Budyskeho krajnoradneho zarjada přistupne. Wopytowarjo maja 70 krótkočasowych parkowanskich městnow k dispoziciji, z nich šěsć za zbrašenych.
Koalicija šansu zapasła
Budyšin. Zwjazkowy sejm je minjeny pjatk próstwu frakcije FDP wotpokazał, w kotrejž sej mj. dr. žadachu železnisku čaru Drježdźany-Zhorjelc elektrifikować a na prioritnu lisćinu přiwzać. Čara słuša k 13 projektam z narodnym wuznamom, a tak móhli jón ze zakonjom wo spěšnišim planowanskim jednanju zwoprawdźić. Šansu pak je koalicija zapasła.
Wobmjezuje posłužby
Krótkopowěsće (31.01.20)
Wušo hromadźe dźěłać
Hradek nad Nisou. Zwjazkowa policija chce z čěskimi kolegami w Liberecskim kraju wušo hromadźe dźěłać. Zastupjerjo wobeju stronow su wčera w pomjeznym Hradeku nad Nisou stejnišćo za přichodne zhromadne policajske słužbne zarjadnišćo wopytali. Tehdy je tam policija za cuzych swój domicil měła, kaž mjenuja zarjad za wukrajnikow w Čěskej.
BUND peticiju přepodał
Drježdźany. Swoju peticiju „Brunicu stopować – jamy pomjeńšić“ je Zwjazk za wobswět a přirodoškit Němskeje (BUND) w Sakskej prezidentej krajneho sejma Matthiasej Rößlerej (CDU) srjedu oficialnje přepodał. Peticiju z lońšeje pózdnjeje nazymy je njecyłych 1 300 ludźi podpisało, kotřiž so za kónc wudobywanja a wužiwanja wuhla a tak přećiwo klimowej změnje zasadźeja.
Jamu Turów njerozšěrić
Krótkopowěsće (30.01.20)
Bjezdźěłnosć přiběrała
Budyšin. W januaru je ličba bjezdźěłnych we wuchodnej Sakskej wo 1 687 (+10,1 procent) na 18 411 widźomnje přiběrała. Kaž Budyska agentura za dźěło dźensa informuje, běchu w prěnich tydźenjach lěta 2020 předewšěm dźěławi z wobłukow zahrodnistwa, krajinotwarstwa kaž tež twarstwa potrjecheni. Nimo toho su mnohe dźěłowe zrěčenja we wikowanju, zarjadnistwje, hotelownistwje a gastronomiji wuběželi.
Imunita Gaulanda zběhnjena
Berlin. Zwjazkowy sejm je imunitu předsydy frakcije AfD Alexandera Gaulanda zběhnył. Plenum přihłosowaše próstwje statneho rěčnistwa w Frankfurće nad Mohanom. Tam běchu loni přećiwo Gaulandej přepytowanja „priwatneho dawkoweho zmylka“ dla zahajili. W tym zwisku planuja tež bydlenja a běrowy přepytać. To pak je jenož móžno, jeli sejm tomu wuraznje přihłosuje.
LEAG dale čaka
Krótkopowěsće (29.01.20)
Kretschmer program předstajił
Drježdźany. Sakski ministerski prezident Michael Kretschmer (CDU) je dźensa w krajnym sejmje ćežišća dźěła noweje knježerstwoweje koalicije CDU, Zelenych a SPD předstajił. Na dnjowym porjedźe posedźenja sejma steješe tež wuzwolenje noweje Rady za serbske naležnosće Sakskeje.
LEAG planuje wosebity centrum
Choćebuz. Předewzaće Łužiska energija a milinarnje (LEAG) planuje sekundarny surowiznowy centrum. Wot lěta 2023 chcedźa na dźělnej płoninje Janšojskeje brunicoweje jamy přewažnje mineraliske wotpadki z twarskeho wobłuka přiwzać, předźěłać a na wěsty čas składować. Hłowny zaměr ma być, wotpadki kwalitnje recyclować a je na přikład w dróhotwarje zasadźić.
Loni wjace žita nažnjeli
Kamjenc. Žně žita w Sakskej běchu loni lěpše hač lěto do toho, zdźěla Sakski statistiski zarjad ze sydłom w Kamjencu. Přerěznje 67 decitonow na hektar su ratarjo domchowali, štož je 6,6 decitonow wjace hač 2018. Hladajo na trajacu suchotu pak su wulke straty. Přirunujo ze zašłymi šěsć lětami su burja 3,7 decitonow mjenje na hektar nažnjeli.
Krótkopowěsće (28.01.20)
Nowa prezentacija w interneće
Budyšin. Wot wčerawšeho předstaja so Budyski wokrjes z předźěłanej prezentaciju www.landkreis-bautzen.de w interneće. Nowa je rubika „Wokrjes Budyšin-nowosće“, hdźež podawaja informacije w serbskej rěči. Pokazka na nju na startowej stronje „Aktuelles in sorbischer Sprache“ pak je bohužel němska.
600 filmow so požadało
Wulke Hendrichecy. Wot 12. do 17. meje wotměje so w třikrajowym róžku 17. nysowy filmowy festiwal. Wjace hač 600 hrajnych, dokumentariskich a krótkofilmow su zarjadowarjo festiwala we Wulkohendrichečanskim Kunstbauerkino dóstali. Wone pochadźeja z Němskeje, Pólskeje a Čěskeje kaž tež z Portugala, Grjekskeje, Egyptowskeje, Irana, Indiskeje a Awstralskeje. W měrcu chcedźa paski za festiwal wuzwolić.
Do Pekinga jeno z přestupom
Krótkopowěsće (27.01.20)
W muzeju kwasowali
Drježdźany. Dźěći a starši towarstwa Stup dale z. t. w Drježdźanach swjećachu sobotu ptači kwas a pokazachu swój program něhdźe 200 ludźom w foyeru tamnišeho měšćanskeho muzeja. Při woblěkanju serbskeje katolskeje narodneje drasty je staršich towarstwa Kristin Belkotowa z Hózka podpěrała. Program nazwučowali běchu we wobłuku dźěłoweho zjednoćenstwa „Serbšćina“.
Brošurka přepodata
Worklecy. Brošurku „Moje wukubłanje“ su Marija-Tereza Krawžic, Marija Koklina, socialna dźěłaćerka za młodźinske socialne dźěło Rěčneho centruma WITAJ, a Pětr Brězan, referent za hospodarske a infrastrukturne naležnosće Domowiny, pjatk we Worklečanskej wyšej šuli přepodali. Domowina bě 124stronsku ediciju k powołanskej orientaciji loni w nakładźe 300 eksemplarow wudała.
Kobe Bryant mjez woporami
Krótkopowěsće (24.01.20)
Měšćanske dwórnišćo přepodate
Budyšin. Modernizowane Budyske dwórnišćo staj inwestoraj Jörg Drews a Gerald Lucas w přitomnosći zastupjerjow krajneho zjawneho žiwjenja dźensa swjatočnje přepodałoj. Zaměstnjene su tam nowa wotnožka krajnoradneho zarjada ze socialnym a młodźinskim zarjadom, kofejownja, předawarnja jězdźenkow, wobchadny zwjazk ZVON a chorobna kasa Barmer. Ludnosć bě popołdnju na wotewrjenje přeprošena.
Gudrun Pausewang njeboh
Bamberg. Awtorka knihi „Die Wolke“ Gudrun Pausewang je wčera 91lětna zemrěła. W romanje „Mróčel“ (1987) wopisuje wona dóńt młodostneje po atomowej katastrofje w němskej milinarni. Pausewang je wjace hač 90 knihow wozjewiła a bu w 2017 z Němskim mytom za młodźinsku literaturu za swój žiwjenski skutk wuznamjenjena.
Srědki za Lessingowy gymnazij
Krótkopowěsće (23.01.20)
Jury so skonstituowała
Drježdźany. Nowopowołana jury za Myto za serbsku rěč – Zejlerjowe myto je so wčera w Drježdźanach skonstituowała. Rada za serbske naležnosće, Zwjazk Łužiskich Serbow Domowina, Serbski institut, Budyski a Zhorjelski wokrjes, gmejny serbskeho sydlenskeho ruma a sakske ministerstwo za wědomosć, kulturu a turizm běchu za nju stajnje po jednym čłonu namjetowali.
Lessingowe akcenty zahajene
Kamjenc. Na wčerawšich narodninach Gottholda Ephraima Lessinga su w Kamjencu Lessingowe akcenty z čitanjom žurnalista Alexandera Osanga z Berlina zahajili. Tamniši Lessingowy muzej poskići hač do spočatka měrca dwanaće zarjadowanjow w tym wobłuku. Kóžde lěto wotměnjeja so wjetše Lessingowe dny a mjeńše Lessingowe akcenty.
Předadźa lěsy w Němskej?
Aš. Najzapadniše čěske město Aš wobsedźi historisce tež něhdźe 20 hektarow lěsow na němskej stronje mjezy. Dokelž je tak ćežko je wobhospodarjeć, chcyli tamniši zamołwići lěsy předać. Tale mysl złožuje so zdobom na fakt, zo su ležownostne płaćizny w Němskej wyše hač w Čěskej republice.
Krótkopowěsće (22.01.20)
Počesća Kurta Biedenkopfa
Drježdźany. Ze swjedźenskim zarjadowanjom w Drježdźanskej cyrkwi Našeje knjenje chce Konrada Adenauerowa załožba přichodnu wutoru politikarja unija Kurta Biedenkopfa počesćić, kiž tón dźeń 90. narodniny swjeći. Na zarjadowanje wočakuja tež zwjazkowu kanclerku Angelu Merkel (CDU). Křesćanski demokrat Biedenkopf bě wot lěta 1990 do 2002 ministerski prezident Sakskeje.
Dwě stejnišći poskićiło
Choćebuz. Město Choćebuz je Zwjazkowej centrali za politiske kubłanje dwě stejnišći – při nastawacym Wuchodnym jězoru abo na arealu bywšeho jastwa na Budyskej dróze – poskićiło, hdźež móhła wona nowy fachowy wobłuk wutworić, kaž wčera z radnicy rěkaše. Zwjazkowy zarjad chce nowy wobłuk za transformaciske procesy zarjadować, pak w Choćebuzu pak w Halle nad Solawu.
Na Dnju susodow so wobdźělić
