Krótkopowěsće (12.06.18)
Serbski napis bórze připrawja
Drježdźany. Twarjenje Sakskeho krajneho sejma změje bórze tež serbskorěčny napis. Kaž zarjadnistwo parlamenta wčera wozjewi, je prezident krajneho sejma dr. Matthias Rößler iniciatiwu wjacorych zapósłancow CDU sćěhował a wotpowědny nadawk dał. Zarjadnistwo jón ze społnomócnjenym architektom hišće wothłosuje. „Wjeselu so, zo budźe wuslědk za wšitkich wopytowarjow parlamenta bórze widźomny“, Matthias Rößler podšmórny.
Schwarz swój mandat złožił
Budyšin. Wokrjesny radźićel Martin Schwarz z frakcije Wobydlerske zjednoćenstwo za swobodu měnjenja a sobupostajowanje je swój mandat w Budyskim wokrjesnym sejmiku złožił. To pisa wón w lisće krajnemu radźe Michaelej Harigej (CDU). Kaž krajnoradny zarjad zdźěla, mjenowaše Schwarz jako přičinu swoje zasudźenje z 10. apryla kaž tež pobrachowacy čas powołanja dla.
Čěska je měrliwy kraj
Krótkopowěsće (11.06.18)
Kretschmer tež Delany wopyta
Konjecy. Sakski ministerski prezident Michael Kretschmer (CDU) wopyta pjatk Budyski wokrjes. Mjez druhim wočakuja jeho popołdnju tež w Konjecach. Tam chce so Kretschmer pola wowčerja Měrćina Justa wo plahowanju wowcow wobhonić a wjelči management kaž tež škitne naprawy narěčeć. Wječor je we Wojerecach dalše rozmołwne koło pod hesłom „Sakske rozmołwy“.
Naslědnistwo w firmje rjadować
Lipsk. Akciske dny sakskeho hospodarkeho ministerstwa su dźensa w Lipsku zahajili. Z nimi maja so firmy podpěrać, kotrež steja před změnu mějićela staroby dla. Institut za srjedźostawske slědźenje w Bonnje je w februaru wuslědk přepytowanja předstajił, po kotrymž je wot toho hač do lěta 2022 w Sakskej nimale 6 200 předewzaćow potrjechenych.
Partnerske styki pohłubšili
Krótkopowěsće (08.06.18)
Twórby zapodać
Choćebuz. Wotnětka přijimaja zarjadowarjo Choćebuskeho filmoweho festiwala (CFF) přinoški za lětuše wubědźowanje „FilmSchau“. Wurisanje měri so na łužiskich filmowcow a wěnuje so krótkim formam toho wuměłstwa. Załožba za serbski lud spožči w tym wobłuku wosebite, z 1 000 eurami dotěrowane myto. Z mjeztym 16. „FilmSchau“ festiwal spočatk nowembra zahaja.
Brězana česćić
Berlin/Budyšin. Iniciatiwna skupina Jurij Brězan je so dźensa ze zjawnym listom na Budyskeho wyšeho měšćanostu Alexandera Ahrensa (SPD) wobroćiła. Město měło „móžnosće rozjimać, kak najwuznamnišeho serbskeho spisowaćela přiměrjenje počesći“. Podpisali su list mjez druhim zapósłanča zwjazkoweho sejma Caren Lay (Lěwica), Lutz Hillmann, Benedikt Dyrlich a Jan Bělk.
Common Voice wjacerěčny
Krótkopowěsće (07.06.18)
„Lampenfieber“ zakónčeny
Budyšin. Wot Budyskeho Kamjentneho domu a wokrjesneje lutowarnje zarjadowane wubědźowanje talentow „Lampenfieber“ je so njedawno w Němsko-Serbskim ludowym dźiwadle zakónčiło. Mjez druhim staj šulerjej Serbskeho gymnazija Budyšin Lilly Roitsch a Clemens Bobka ze sceniskim čitanjom w segmenće „HUBA & SŁOWO“ myto dobyłoj.
Předewzaćelske myto spožčene
Zhorjelc. Lětuše 5. Zhorjelske předewzaćelske myto spožči tamniši zwjazk předewzaćelow wčera Němskej Software Engineering & Research tzwr. Zawod bu lěta 2006 w Zhorjelcu jako „idejowa fabrika“ załoženy a ma mjeztym 30 mjezynarodnje skutkowacych sobudźěłaćerjow. Zawod je so na digitalizaciju specializował a dale rosće, rěka we wopodstatnjenju.
Awtodróhi spěšnišo twarić
Krótkopowěsće (06.06.18)
Słownik Šewca w zběrce
Budyšin. Historisko-etymologiski słownik hornjo- a delnjoserbskeje rěče poskića Ludowe nakładnistwo Domowina přez lětdźesatki w 24 jednotliwych zešiwkach a jednym zwjazku registrow. Wobšěrne dźěło wědomostnika prof. Hinca Šewca słuša k zakładam serbskeho a słowjanskeho rěčespyta. Wotnětka je wone jako cyłkowna zběrka na předań.
Rozmysluja wo Europje
Stralsund. Němsko-Pólske medijowe dny 2018 zaběraja so hač do jutřišeho w Stralsundźe z temu „Je trjeba wo Europje znowa rozmyslować?“. Zawodna debata wo europskej republice abo Europje narodow je dźensa připołdnju prěnje nastorki sposrědkowała. Přizamknychu so dźěłarnički. Wječor počesća lawreatow 21. němsko-pólskeho žurnalistiskeho myta Tadeusza Mazowieckeho.
Wosebitej tramwajce po puću
Krótkopowěsće (05.06.18)
Nowy wotrjadnik w SI
Budyšin. Dr. Friedrich Pollack nawjeduje wot spočatka měsaca wotrjad za kulturne wědomosće w Budyskim Serbskim instituće (SI). Wo tym informuje slědźenišćo w nowinskej zdźělence. Rodźeneho Kamjenčana su na pjeć lět do zastojnstwa powołali. Pollack je w Lipsku stawizny srjedźo- a nowowěka, sociologiju kaž tež komunikaciske wědomosće studował, na serbsku temu promowował a dźěła hižo někotre lěta w SI.
Žiwu inkluziju sylnić
Zhorjelc. Inkluzija je čłowjeske prawo, kotrež zdobywa sej čłowjek z porodom. To je sakska statna ministerka za wědomosć a wuměłstwo dr. Eva-Maria Stange (SPD) sobotu na 4. kongresu wo inkluziji w Zhorjelcu zwurazniła. Wona potwjerdźi, zo je we wobłuku wysokich šulow jědnaće procentow studowacych, kotřiž ćerpja pod studij wobćežowacym handicapom.
Srědk přećiwo skórnikej wuwili
Krótkopowěsće (04.06.18)
Na kongresu Europasion byli
Budaörs. Skupina zastupnikow Chróšćanskeho pasionskeho towarstwa a Towarstwa Cyrila a Metoda je so wčera ze 34. mjezynarodneho kongresa Europasion w madźarskim Budaörsu nawróćiła. Tam zetkachu so cyłki europskeho zjednoćenstwa towarstwow, kotrež pasion předstajeja. Styki nawjazał bě předsyda TCM Jurij Špitank. W lěće 2025 chcedźa kongres w Chrósćicach přewjesć.
36. europske myto přepodali
Mišno. „Mysli – na čo twari Europa?“ bě tema lětušeho wubědźowanja wo 36. europske myto. Sakski krajny zwjazk Europa-unija Němska z.t. je šulerku Budyskeje wyšeje šule Maju-Fabienne Bluhm sobotu w Mišnjanskim gymnaziju Franziskaneum z jězbu do Brüssela wuznamjenił. Mjez dobyćerjemi běchu tež šulerjo Zakładneje šule při Boršći a Lessingoweho gymnazija Kamjenc.
Čěsko-němski fonds 20 lět
Krótkopowěsće (01.06.18)
Ermer wostanje na čole
Drježdźany. Njedźichowski pjekarski mišter Roland Ermer wostanje prezident Sakskeho rjemjeslniskeho zwjazka, zdźěli třěšny zwjazk sakskeho rjemjesła. 54lětneho su srjedu w Drježdźanach za dalše tři lěta wobkrućili. Sakski rjemjeslniski zwjazk je najwyše politiske zastupnistwo zajimow rjemjeslnikow w Sakskej a zastupuje wjac hač 56 000 zawodow z nimale 320 000 sobudźěłaćerjemi.
Ze zapada do wuchoda
Budyšin. Sakska chce přichodnje sylnje wo wučerjow z Badensko-Württembergskeje wabić. Wo tym staj statny sekretar sakskeho kultusoweho ministerstwa Herbert Wolff a nawoda agentury za dźěło w Sakskej Claus-Peter Hansen wčera wjesnjanostow a měšćanostow Budyskeho wokrjesa informowałoj. W awgusće maja zajimcy do Łužicy přińć.
Strach lěsnych wohenjow
Krótkopowěsće (31.05.18)
Wo Serbach w Texasu
Walburg. „Malschwitz/Malešecy – A Wendish Village in Lusatia“ (Malešecy – serbska wjes we Łužicy) rěka jendźelskorěčna kniha, kotraž je w Texasu wušła. Wo tym informuje Trudla Malinkowa, kotraž je publikaciju z nawodu serbskeho slědźenišća Wendish Research Exchange w Texasu Weldonom Mersiovskym wudała. Nimo dopomnjenkow fararja Awgusta Sykory zbliža edicija čitarjam tež dźensniše serbske slědy w Malešecach.
Namjetej přihłosować
Choćebuz. Prezidij Domowiny je wčera z předsydstwom župy Delnja Łužica kubłanske temy rozjimał. Předsyda Domowiny Dawid Statnik ma to za wažny krok k lěpšemu zapřijimanju zajimow Delnich Serbow do prócowanjow třěšneho zwjazka. Wuhódnoćili su tež njedawne słyšenje w Braniborskim krajnym sejmje wo změnje Serbskeho zakonja. Statnik namołwja politikarjow namjetej přihłosować.
Zaso jednanja „Króny“ dla
Krótkopowěsće (30.05.18)
Trjebaja dźěłowe mocy
Budyšin. We wuchodnej Sakskej bě w meji 19 300 bjezdźěłnych, to je 784 ludźi (-3,9 procentow) mjenje hač w měsacu do toho. Wosebje firmy z twarstwa a wobchadnistwa su minjene tydźenje mnohe wosoby přistajili. Naprašowanje za dźěłowymi mocami je w meji přiběrało, zdźěli dźensa Thomas Berndt, předsyda jednaćelstwa Budyskeje agentury za dźěło. Aktualna bjezdźěłnostna kwota w regionje wučinja 6,8 procentow.
Zběhanku swjećili
Drježdźany. Nimale po jednym lěće twarskeho časa swjećachu wčera zběhanku noweho kubłanskeho centruma Drježdźanskeje rjemjeslniskeje komory. Na 7 300 kwadratnych metrach nastanu w sakskej stolicy moderne dźěłarnje za wukubłanske wobłuki twarskeje/skowanskeje techniki a metalotwara. 40 milionow eurow ma nowotwar płaćić.
Prawidłowne zwiski zachować
