Krótkopowěsće (12.06.20)
Rěčne lěhwo lětsa wupadnje
Budyšin. Lětuše rěčne prózdninske lěhwo, kotrež měješe so wot 7. do 16. awgusta we Wodowych Hendrichecach wotměć, koronapandemije dla wupadnje. Za nje bě so 61 serbskich dźěći w starobje dźewjeć do 14 lět přizjewiło, kaž Serbske šulske towarstwo zdźěli. Nětko planuja přichodne tajke lěhwo klětu w samsnym času zarjadować.
Žadyn dźeń wotewrjenych duri
Budyšin. Předsydstwo župy „Jan Arnošt Smoler“ Budyšin je za 11. julij planowany dźeń wotewrjenych duri w Domje Měrćina Nowaka w Njechornju z ćežkej wutrobu wotprajić dyrbjało. Na posedźenju srjedu w Budyšinje běchu zwěsćili, zo njehodźi so wot tudyšeho strowotniskeho zarjada schwaleny hygienowy koncept zeskutkownić, dokelž by mocy župy prosće přežadał.
Z krizy za přichod myslić
Krótkopowěsće (11.06.20)
SPTWS-akcija zakónčena
Budyšin. Akcija Serbskeho poskitka tydźenja w syći (SPTWS), kotruž bě Załožba za serbski lud za čas koronakrizy iniciěrowała, je zakónčena, zdźěli jury w dźensa wozjewjenym wideju na kanalu Youtube. Sydom internetnych poskitkow su w minjenych tydźenjach mytowali, žanych nowych pak njeje k tomu přišło. Jury sej přiwšěm přeje, digitalne serbskorěčne poskitki dale šěrić.
Trilex-ćahi zaso do Čěskeje
Drježdźany. Ćahi Trilex maja wot přichodneje póndźele zaso z Drježdźan přez Žitawu do Libereca jězdźić. Wobmjezowany jězbny plan pak hišće dale płaći, kaž předewzaće Länderbahn zdźěli. Wot 4. julija poskića tež zaso woblubowany kónctydźenski zwisk do Doks. Ćahi do směra na Pólsku pak so hišće dale w Zhorjelcu kónča.
Přećiwo zwičnjenju nacizma
Krótkopowěsće (10.06.20)
Zakoń w juniju wobzamknyć!
Choćebuz. W zjawnym lisće předsydomaj knježerstwoweju frakcijow CDU/CSU a SPD kaž tež łužiskim zapósłancam w zwjazkowym sejmje sej zastupjerjo łužiskich gremijow žadaja, zakoń wo strukturnej změnje hišće w juniju wobzamknyć. „Nimale połdra lěta čakamy we Łužiskim rewěrje na zakonski zakład strukturneje změny. To je předołho!“, tam rěka. Wobzamknjenje na nazymu přesunyć, to podpisarjo wotpokazuja.
Warnowanje podlěša
Berlin. Pućowanske warnowanje koronapandemije dla za wjace hač 160 krajow zwonka Europskeje unije chcedźa hač do kónca awgusta podlěšić. Zwjazkowe knježerstwo chcyše to po informacijach powěsćernje dpa dźensa wobzamknyć. Wuwzaća za jednotliwe kraje, kotrež wěste kriterije spjelnjeja, maja móžne być. Pućowanski zwjazk DRV bě sej tajke měritka zdobom za cile w Europje žadał.
Elektrokolesa jara požadane
Krótkopowěsće (09.06.20)
Dalšej nowoinfekciji
Budyšin. Ličba z koronawirusom natyknjenych wučinješe wčera w Budyskim wokrjesu z dwěmaj nowymaj padomaj 499. Dwaj inficěrowanaj staj so mjeztym zaso wustrowiłoj, štož je nětko dohromady 451. W karantenje je tuchwilu 57 wosobow, dźesać mjenje hač dźeń do toho. Cyłkownje 2 801 karantenu su hižo zakónčić móhli.
Trjebaja wjace darowaneje kreje
Drježdźany. W Sakskej potrjeba darowaneje kreje zaso přiběra. Wotsrjedź meje je naprašowanje z chorownjow za krejnymi produktami w běhu mało dnjow wo hač do 30 procentow postupiło. To rjekny Kerstin Schweiger z krejdarowanskeje słužby sewjer-wuchod Němskeho čerwjeneho křiža powěsćerni dpa. Rezerwy za nuzowe pady tuchwilu hišće někak dosahaja.
Marijiny stołp postajili
Krótkopowěsće (08.06.20)
Dalši korona-pad zwěsćili
Budyšin/Zhorjelc. Z jednej nowoinfekciju wučinja ličba dotal z koronawirusom natyknjenych w Budyskim wokrjesu 497. Nětko je 29 wosobow schorjenych, šěsć z nich lěkuja w chorowni. Dwaj pacientaj staj ćežko schorjenaj. W Zhorjelskim wokrjesu njejsu hižo wot 28. meje žane dalše infekcije zwěsćili. Mjez dohromady 269 natyknjenymi je tu hišće jedna wosoba schorjena.
Wo wuhnaću po wójnje
Kinspork. Pod hesłom „,Do hoan uns die Polen nausgetriebm‘ – Vertreibung, Ankunft und Neuanfang im Kreis Zittau 1945–1950“ wěnujetaj so historikarjej dr. Lars-Arne Dannenberg a dr. Matthias Donath dołho zamjelčanemu kapitlej němsko-pólskich stawiznow. Kniha je w Kinsporskim nakładnistwje Via Regia wušła a ma 268 stron.
Hač potuńšenje pomha?
Praha. Płaćizny w hosćencach a kofejownjach w centrumje čěskeje stolicy su w zwisku z koronapandemiju wokomiknje wo 30 do 50 procentow niše hač do toho. Mjenowane předewzaća, wusměrjene hewak na wukrajnych turistow, spytaja na te wašnje čěskich ludźi přiwabić. Přiwšěm so mnozy mějićeljo boja, zo dyrbja swoje domy cyle zawrěć.
Krótkopowěsće (05.06.20)
Čěska mjezu wočiniła
Praha. Čěska je dźensa po nimale třoch měsacach swoju mjezu k Němskej, Awstriskej a Madźarskej wotewrěła. To je kabinet rano w Praze wobzamknył. Pućowacy njetrjebaja hižo negatiwny test na koronawirus předpołožić. Ministerski prezident Andrej Babiš rjekny: „Je derje, hdyž turisća z mjenowanych krajow swoje pjenjezy zaso w Čěskej wudawaja.
Dalši so wustrowili
Budyšin/Zhorjelc. Staw z koronawirusom natyknjenych je w Hornjej Łužicy stabilny. W Budyskim wokrjesu je jich 496. Ze šěsć dalšimi je so mjeztym 449 ludźi wustrowiło. Ličba postajenych karantenow wučinja aktualnje 69, 2 785 su hižo zběhnyli. W Zhorjelskim wokrjesu je ličba 269 padow hižo tydźeń jenaka, 245 wosobow je tu zaso strowych.
Skónčnje zaso pućować
Krótkopowěsće (04.06.20)
Žane nowe infekcije
Budyšin/Zhorjelc. We woběmaj hornjołužiskomaj wokrjesomaj njejsu žane nowe infekcije z koronawirusom zwěsćili. Mjez dotal dohromady 496 natyknjenymi w Budyskim wokrjesu je aktualnje 34 schorjenych, šesćoch lěkuja w klinice. 443 ludźi je so wustrowiło, 19 zemrěło. W Zhorjelskim wokrjesu je z dotal 269 inficěrowanych 245 zaso strowych, jedna wosoba je tuchwilu chora. 23 wosobow je tam w zwisku z pandemiju zemrěło.
Myto tydźenja Janej Breindlej
Budyšin. Wučer čěšćiny Jan Breindl je Serbske myto tydźenja w syći (SPTWS) dobył, kotrež je jury wokoło direktora Załožby za serbski lud Jana Budarja dźensa sedmy raz spožčiła. We wjacorych lóštnych widejach Čerwjenawki-Karkulki Breindl šulerjam rěč na kreatiwne wašnje spřistupnja. Link k widejam jeo na internetnej stronje SPTWS 2020 podaty.
Digitalne poskitki muzeja
Krótkopowěsće (03.06.20)
Hakle dźensa znowa testuja
Budyšin/Zhorjelc. W Budyskim wokrjesu je dale 496 z koronawirusom natyknjenych. Hakle dźensa chcedźa kontaktne wosoby inficěrowanych znowa testować. Mjeztym je so 440 ludźi wustrowiło, postajenych je 82 karantenow. Tež w Zhorjelskim wokrjesu wosta dotal při 269 natyknjenych.
Zjawny list ministrej
Njebjelčicy. W zjawnym lisće kultusowemu ministrej Christianej Piwarzej (CDU) skedźbnja předsydka kubłanskeho wuběrka Serbskeho sejma Aneta Zahrodnikowa na brachi zwonka katolskich kónčin. Tak „njepřipóznawaja serbšćinu we Wojerecach jako druhu cuzu rěč, tuž njemóža sej šulerjo a šulerki jeje wuwučowanje na zakładźe wobmjezowanja šulskich hodźin jako prawo wužadać. W Hodźiju njeje so staršim dotal radźiło, přesadźić so ze žadanjom za wotpowědnej serbskorěčnej wučbu“, w lisće rěka.
Bjezdźěłnosć znowa přiběrała
Krótkopowěsće (02.06.20)
Doma riziko najwjetše
Budyšin/Zhorjelc. Ličba z koronawirusom natyknjenych je w Budyskim wokrjesu wo tři na 496 přiběrała, swjatki pak njejsu hišće wobkedźbowane. 49 ludźi je schorjenych, pjećoch lěkuja w chorowni. Strowotniski zarjad na to skedźbnja, zo so najwjace ludźi doma natyknje, wosebje na narodninach a při grilowanju. W Zhorjelskim wokrjesu njejsu žane nowe ličby wozjewili, tam wosta při cyłkownje 269 inficěrowanych.
Propst Hrjehor rozžohnowany
Kamjenica/Budyšin. Propst Clemens Hrjehor bu wčera w Kamjenicy oficialnje rozžohnowany. Wón wukonja přichodnje z Budyšina dušepastyrske nadawki, zdźěli Drježdźansko-Mišnjanske biskopstwo. Zdobom je wčera biskop Heinrich Timmerevers na kemšach fararja Benna Schäffela jako propsta a naslědnika Clemensa Hrjehorja w Kamjenicy do zastojnstwa zapokazał.
Dr. Helmut Jenč njeboh
Krótkopowěsće (29.05.20)
Nowe pady w Kamjencu
Budyšin. Ličba wobkrućenych padow korony w Budyskim wokrjesu je wčera wo sydom na 493 rozrostła, z nich je 65 wosobow schorjenych. Nowoinfekcije zwěsćili su we wudospołnjacym tesće mjez sobudźěłaćerjemi jedneje stacije Kamjenskeje chorownje. Dalši pad je w kuchni Ralbičanskeje šule, tohodla buchu tam wjacore sobudźěłaćerki do karanteny pósłane. W Zhorjelskim wokrjesu mějachu wčera jedyn nowy pad, cyłkownje 269.
Startuja nowy poskitk
Zhorjelc. Dypkownje k dnjej wotewrjenych tykowanych chěžow zajutřišim, startuje webapp pod adresu www.umgebinde.haus. Akciski dźeń wšak lětsa kaž zwučene njebudźe. Z nowym wirtuelnym poskitkom pak chcedźa jón přewjesć a jako tradiciju dale wjesć.
Město swójbam přichilene
Budyšin. Budyšin słuša k tym městam, kotrež su swójbam jara přichilene. Najwjetši europski magacin za komunalnu politiku Komunal je přećelskosć swójbam napřećo w 585 němskich komunach mjez 20 000 a 75 000 wobydlerjemi přepytować dał. W rankingu docpě Budyšin kedźbyhódne 23. městno, kaž měšćanske zarjadnistwo zdźěli.
