Bjez serbskeho zastupjerja
Kamjenica. Antje Feiks je nowa krajna předsydka sakskeje Lěwicy. Wona je so ze 104 hłosami přećiwo kontrahentej Andréjej Schollbachej (75 hłosow) na krajnym zjězdźe kónc tydźena w Kamjenicy přesadźiła. Serbski kandidat za krajne předsydstwo Hajko Kozel njedósta trěbnu wjetšinu hłosow. Dale zwrěšći namjet serbskeje Lěwicy, serbskopolitiskeho rěčnika krajneho předsydstwa we wosebitej jednotliwej wólbje wuzwolić. 64 procentow delegatow jón wotpokaza.
Z twarožkom w stolicy
Berlin/Koćina. Koćinski Krabatowy mlokowy swět je so wčera na twarožkowych wikach „Cheese Berlin 2017“ w němskej stolicy prezentował. Mjez druhim móžachu wopytowarjo we wikowanskej hali 9 twarožk z kirbsowymi zornjatkami woptać, kotryž je jednaćel Tobias Kockert poskićał. „Móžachmy so z druhimi twarožkarnjemi wuměnjeć a spóznachmy, zo móžemy pódla nich wobstać“, wón rjekny.
Dale wulkoměsto
Znowa mjenje bjezdźěłnych
Budyšin. W oktobrje bě we wuchodnej Sakskej 19 371 ludźi bjez dźěła, 37 mjenje hač měsac do toho. Wuwiće překwapja, dokelž je ličba bjezdźěłnych minjene lěta sezony dla wot oktobra přiběrała. Powołanska kwalifikacija bjezdźěłnych a dalši přirost swobodnych městnow stej přičinje tohole wuwića, zwěsći šef Budyskeje agentury za dźěło Thomas Berndt.
W Błótach wjace kórkow žnjeli
Lubin. Po woteběracych ličbach su lětsa zaso wjace kórkow na błótowskich polach žnjeli. Jich bě wjace hač 30 000 tonow, kaž Błótowske towarstwo jako zastupjer plahowarjow wčera w Lubinje zdźěli. Loni nažnjachu 29 000 tonow kórkow. Wunošk móžachu stopnjować, byrnjež so plahowanska přestrjeń tele lěto tróšku pomjeńšiła.
Nowej hrjedźe na wěži
Z dwurěčnym napisom
Wojerecy. K 500. róčnicy reformacije su wutoru před Wojerowskej Janskej cyrkwju Lutherowy dub sadźili. Dźěła přewjedźechu čłon wosadneje rady Rüdiger Mrosk, darićelka štoma Regine Jorga, farar Heinrich Koch a jeho katolski kolega Peter Paul Gregor. Pódla duba połožichu kamjeń, do kotrehož su mjeno štoma a jubilejne daty zadypane, a to dwurěčnje serbsce a němsce.
Riziko chudoby dale a wjetše
Lipsk. Riziko, dóstać rentu pod hranicu chudoby, budźe wosebje we wuchodnej Němskej přichodne lěta dale a wjetše. To wuchadźa z rozprawy magacina MDR „Exakt“. Hdyž stupa riziko chudoby na zapadźe wot tuchwilu 15 na 17 procentow, rozrosće wone na wuchodźe wot tuchwilu 21 na 36 proc., zwěsća prognoza instituta DIW hač do lěta 2036.
WiL wita přewzaće motodroma
Dalše pjenjezy za slědźenje
Drježdźany. Sakske statne ministerstwo za wědomosć a wuměłstwo postupuje při spěchowanju w Drježdźanach zasydleneho slědźenskeho zarjadnišća UNU-FLORES. Wot 2018 ma institut na tři lěta dóstać lětnje 743 000 eurow ze stron Sakskeje a lětnje něhdźe milion eurow ze stron Zwjazka. K tomu přińdu wěcne srědki techniskeje uniwersity we wobjimje 308 000 eurow.
Protest přećiwo dalšim jamam
Prožym. Mjeztym šesty raz su wot nowych wuhlowych jamow potrjecheni wčera na wjesnym swjedźenju za domiznu a přichod w Prožymju za to demonstrowali wsy zachować. Hromadźe z nadregionalnymi zwjazkami woznamjenichu woni na mjezy přizwoleneje brunicoweje jamy Wjelcej-juh symbolisku čerwjenu liniju.
Gerhard Schröder počesćeny
Šołćic pjekarnja zawrjena
Drježdźany. Jednaćelka bywšeje znateje Šołćic pjekarnje w Drježdźanach je hižo w juliju insolwencu hrožaceje njekmanosće płaćenja dla přizjewiła. Kaž prawiznik Helgi Heumann wobkrući, „bu insolwencne jednanje 1. septembra 2017 zahajene a podpisar k insolwencnemu zarjadnikej skazany“. Dalewjedźenje pjekarnje běchu tehdy hižo wuzamknyli.
Nowy partner myto spožči
Choćebuz. Předewzaće LEAG spožči jako nowy partner za lětuši Choćebuski filmowy festiwal myto za najlěpši młodźinski film we wubědźowanju U 18. Tam budźe dźewjeć přinoškow z Pólskeje, Čěskeje a Němskeje widźeć. Wo myće rozsudźi jury, wobstejaca ze šulerjow 5. liceja Zielona Góra, gymnazija Teplice a prěni raz Choćebuskeho Humboldtoweho gymnazija.
Wjelka smědźa zatřělić
Drježdźany. Po nadpadźe wjelka na wowče stadło pola Łazka je sakske ministerstwo za wobswět a přirodoškit minjeny pjatk dowoliło, jednoho wjelka z Róžeńčanskeje črjódy zatřělić, kotryž škitane wowcy mori. Wobswětowe ministerstwo wotpowěduje tak próstwje Budyskeho krajnoradneho zarjada.
Nowostka změje premjeru
Budyšin. Ludowe nakładnistwo Domowina předstaji nowu knihu „Lěto za započatkarjow“ serbiskeje awtorki Jasminki Petrović, kotraž je tele dny wušła, 2. nowembra w Ralbičanskej Serbskej wyšej šuli. Napjatu stawiznu za čitarjow wot jědnaće lět je lawreatka Spěchowanskeho myta k Mytu Ćišinskeho Lubina Hajduk-Veljkovićowa do serbšćiny přełožiła.
Sudnistwo skóržbu wotpokazało
Drježdźany. W zwisku z wotpłunowym skandalom koncerna VW njewidźi Drježdźanske krajne sudnistwo prawo rukowanja. Mějićeljo awtow móža poskitk VW přiwzać a software jězdźidła aktualizować dać. Skoržił bě muž z Zwickauwa, kiž žadaše sej za pjeć lět stary Škoda Octavia nowe awto aktualneho modela. Za stare měł koncern rukować, žadanja aktualizowanja pak je wotpokazał.
Fats Domino njebohi
Prezidij sćěhuje poziciju župy
Wojerecy. Z wuslědkom słyšenja k wokrjesnej reformje w Braniborskej je so prezidij Domowiny na swojim wčerawšim posedźenju we Wojerecach zaběrał. Při tym sćěhuje prezidij poziciju župy Delnja Łužica, zo maja so w reformowym procesu serbske struktury zachować a europske předpisy mjeńšinoweho škita wobkedźbować.
Wólbnu poražku rozjimali
Drježdźany. Mandatni nošerjo sakskeje CDU su wčera w Drježdźanach swoju poražku při wólbach zwjazkoweho sejma 24. septembra rozjimali, hdźež stachu so křesćanscy demokraća po AfD jeno z druhej najsylnišej stronu. Amtěrowacy ministerski prezident Stanisław Tilich (CDU) apelowaše na stronjanow, po chutnym wólbnym wuslědku nutřkostronske debaty wo směrje CDU wutrać.
Wuspěšna wustajeńca
Piraća najtuńši byli
Praha. Čěska powěsćowa agentura čtk je nakłady kampanjow jednotliwych politiskich stron w njedawnych parlamentnych wólbach wozjewiła. Přeličene na jednoho zdobyteho wolerja wopokazachu so jako „najtuńši“ Piraća (58 centow za jedyn wolerski hłós). Dobyćer wólbow, hibanje ANO, wuda w tym zwisku 2,3 eura na wolerja a „najdróša“ strona TOP 09 samo 9,2 euraj.
George Young njebohi
Sydney. Wjelelětny manager skupiny AC/DC George Young je njedźelu w starobje 70 lět zemrěł. Starši bratr tohorunja w najwuspěšnišej hardrock-band hrajaceju Angusa a Malcolma bě mjez druhim zamołwity za organizaciju turnejow a nahrawanjow. Nimo toho skutkowaše jako producent a spěwytwórc.
Lipsk na „biblioteku lěta“
Lipsk. Sakske statne ministerstwo za wědomosć a wuměłstwo je zhromadnje z Němskim zwjazkom knihownjow wčera Wysoku šulu za hudźbu a dźiwadło „Felix Mendelssohn Bartholdy“ Lipsk jako „biblioteku lěta“ wuznamjenił. Mjez druhim mytowachu jeje sylnu inowaciju wosebje na polu digitalizacije. Myto je z 10 000 eurami dotěrowane.
Kehelerjo Sokoła podleželi
Dalše spěchowanje
Drježdźany. Sakske statne ministerstwo za wědomosć a wuměłstwo (SMWK) chce wysoke šule a slědźerske zarjadnišća při próstwach wo spěchowanske programy Europskeje unije z přidatnym milionom eurow podpěrać. Za to je SMWK spěchowansku směrnicu EuProNet zdźěłało.
Realistiske rozestajenje trěbne
Choćebuz. Łužiska hospodarska iniciatiwa (WiL) kritizuje minjeny štwórtk wot organizacije AGORA energijowy přewrót wozjewjenu studiju „Přichod za Łužicu“ (SN rozprawjachu). Tam žadana lětna spěchowanska suma 100 milionow eurow njeje wjace hač kapka na horcy kamjeń. LEAG wšědnje 2,5 milionow eurow za nadawki a mzdy we Łužicy wudawa. Je trjeba so realistisce z tymle procesom rozestajeć, rěka ze stron WiL.
Za nowy młodźinski orchester
Wobzamknjenja ryzy serbsce
Chrósćicy. Wšitke předłohi za wobzamknjenja Chróšćanskeje gmejnskeje rady wotnětka ryzy serbsce přednjesu. Na posedźenju rady minjeny štwórtk nastupaše to wobzamknjenje wo kulturnym a gmejnskim centrumje kaž tež wustawki wo čisłowanju domow. Tole je přinošk gmejny we wobłuku wubědźowanja „Rěčam přichilena komuna“, rozłoži wjesnjanosta Marko Kliman (CDU).
Wo Jurju Brězanu zhonili
Bórkowy. Mnozy zajimcy zhonichu pjatk w Bórkowach wo žiwjenju a skutkowanju Jurja Brězana. Dietrich Šołta předstaji w kniharni Lesezeichen we wobłuku lětušeje čitanskeje turneje LND swoju knihu „Jurij Brězan – Leben und Werk“. Zdobom słyšachu přitomni wujimki z Brězanoweho romana „Krabat oder Die Verwandlung der Welt“.
Zlínski region lětsa partner