Krótkopowěsće (28.03.19)
Z rozsudom njepřezjedni
Choćebuz. Ćahańca wo wobdźělenju Serbskeje wubranki na europeadźe 2020 pola Słowjencow w Awstriskej njepřestawa. Towarstwo Serbske koparje njeje přezjedne z rozsudom Zwjazkoweho předsydstwa Domowiny, měšane mustwo z Hornjeje a Delnjeje Łužicy na turněr słać. Předsydstwo župy Delnja Łužica wočakuje tuž na sobotnej hłownej zhromadźiznje třěšneho zwjazka stejišćo w naležnosći, wčera w Choćebuzu wobzamknychu.
Nowy dwurěčny zapis mjenow
Podstupim. Wot wčerawšeho předleži nowy dwurěčny zapis mjenow komunow a wjesnych dźělow braniborskeho serbskeho sydlenskeho ruma. Kaž zdźěli referent braniborskeje knježerstwoweje społnomócnjeneje za naležnosće Serbow Měto Nowak, su Serbski institut, braniborske ministerstwo za wědomosć, slědźenje a kulturu a dalši pjeć lět na nim dźěłali. Publikaciju je Kraj Braniborska financował.
Dóstanje Čěska lěpši přistaw?
Krótkopowěsće (27.03.19)
W Praze přednošowała
Praha. Trudla Malinkowa je wčera čłonam Towarstwa přećelow Serbow (SPL) w Serbskim seminarje w Praze wo serbskich wupućowarjach do Awstralskeje přednošowała. Přitomni su z wulkim zajimom faktografiskej liniji wuwjedźenjow sćěhowali, ale tež bohatej wobrazowej dokumentaciji. Wjetšinu tych je awtorka na swojim pućowanju na slědach serbskich eksulantow zhotowiła.
Zaběraja so ze Serbami
Budyšin. Šulerjo wyšich schodźenkow Friedricha Schilleroweho gymnazija w Pirnje rozestajeja so tuchwilu intensiwnje ze Serbami w změnje časow. Wčera běchu w Budyšinje, hdźež wopytachu Serbski muzej a Rěčny centrum Witaj. Mjez druhim informowachu so wo serbskorěčnym kubłanju. Dale su sej serbske wokable wobhladali, serbsce čitali a spěwali.
Zběraja daty fawny a biotopow
Krótkopowěsće (26.03.19)
Rozsudna železniska wóska
Choćebuz. Po słowach jednaćela towaršnosće Łužiski hospodarski region Torstena Borka je „čara Budyšin–Wojerecy za strukturnu změnu rozsudna wóska, kotraž móže a dyrbi tež Hornju Łužicu spěšnje Berlinej zbližić“. Kombinowane ze železniskej čaru Choćebuz–Schönefeld docpěja Łužičenjo nowu dimensiju spěšnosće a dynamiki, rjekny Bork wčera na wopyće w Schönefeldźe.
Šulski zarjad přestrukturowany
Budyšin. Georg Richter šulski zarjad w Budyskim krajnoradnym zarjedźe po komisariskej fazy nětko oficialnje nawjeduje. Wo tym je prěni přirjadnik krajneho rady Udo Wićaz (CDU) wčera wokrjesny sejmik informował. Přestrukturowany šulski zarjad ma wěcnej wobłukaj šulske zarjadnistwo kaž tež šulske wuwiće a kubłanje, do kotrehož słušatej planowanje šulskeje syće a digitalizacija na šulach.
Nowy nakład „Mištra Krabata“
Krótkopowěsće (25.03.19)
Nowak kandiduje za FUEN
Budyšin. Měto Nowak kandiduje za zastojnstwo wiceprezidenta Federalistiskeje unije europskich narodnych mjeńšin (FUEN) za wólbnu dobu 2019 do 2022. Wólby budu na kongresu FUEN wot 12. do 16. junija w Bratislavje. Prezidij Zwjazkoweho předsydstwa Domowiny je Nowaka minjenu srjedu nominował, kaž bu dźensa znate. Kandidat je referent braniborskeje knježerstwoweje społnomócnjeneje za naležnosće Serbow.
Nětko tež w serbskej rěči
Budyšin. Namołwa za wubědźowanje Sakskeho fondsa Čiń sobu nětko dospołnje w serbski rěči předleži. Wona je w interneće wozjewjena pod www.mitmachfonds-sachsen.de/wettbewerb/lausitz-sorbisch. Domowina skedźbnja župy a čłonske towarstwa na to, so tam wobdźělić a swoje ideje za strukturne wuwiće Łužicy hač do 15. apryla zapodać.
Za wjace sadu, zeleniny, mloka
Krótkopowěsće (22.03.19)
Znowa mjez nominowanymi
Waršawa/Drježdźany. 27 přinoškow je za lětuše Němsko-pólske žurnalistiske myto Tadeusza Mazowieckeho nominowanych. Serbski telewizijny žurnalist Roman Nuk słuša w kategoriji „Žurnalizm w pomjeznym regionje“ znowa k namjetowanym. Z Holgerom Lühmannom je wón přinošk „Europske město Zhorjelc/Zgorzelec, dwaj krajej – jedna městnosć“ za sćelak MDR produkował.
Njewužiwaja žane pesticidy
Choćebuz. Chemisko-syntetiske rostlinoškitne srědki za dźěła na komunalnych płoninach města Choćebuza wužiwać je zakazane. Swójski zawod zelenišća a parki pesticidy hižo njezasadźa, kaž měšćanske zarjadnistwo zdźěla. Tak zwoprawdźa wobzamknjenje měšćanskeho parlamenta z lěta 2018 „Choćebuz stanje so z komunu bjez pesticidow“.
Atrakcija w nowym šaće
Krótkopowěsće (21.03.19)
Myto za europske dorozumjenje
Lipsk. Na wotewrjenju Lipšćanskich knižnych wikow spožčichu ameriskoruskej žurnalistce Mashi Gessen za publikaciju „Přichod su stawizny – Kak je sej Ruska swobodu zdobyła a zaso zhubiła“ Knižne myto za europske dorozumjenje. Myto je z 20 000 eurami dotěrowane. We wobkrućenju mjez druhim rěka, zo přisłuša awtorka „najwažnišim hłosam, zasadźacym so za čłowjeske prawa a přećiwo homofobiji“.
Serbowki wobkrućene
Budyšin. Serbske čłonki w předsydstwje wokrjesneho zwjazka Budyšin Žónskeje unije CDU su na wčerawšej wólbnej zhromadźiznje w Budyšinje w zastojnstwach wobkrućili. Marja Michałkowa z Lichanja je dale předsydka, Halena Jancyna z Ralbic městopředsydka a Borbora Hančikowa z Měrkowa pokładnica. Wone wobdźěla so tež na krajnej delegatnej konferency žónskeje unije.
Najwjetša zběrka selawkow
Krótkopowěsće (20.03.19)
Trilex dale jězdźi
Budyšin. Předewzaće Länderbahn z ćahami Trilex ma wot decembra dale železniski wobchad na pjeć wuchodosakskich čarach zaručić. Mjez nimi stej Drježdźany–Zhorjelc a Drježdźany–Žitawa, kaž Wobchadny zwisk Hornja Łužica-Delnja Šleska zdźěli. Tón bě wčera wospjetnemu rozdaću nadawka přihłosował. K tomu słuša, zo ma Länderbahn za połdra lěta swoje ćahi modernizować.
Z delegaciju do Porynskeje
Choćebuz. Delegacija łužiskich wobydlerskich iniciatiwow wobdźěli so sobotu, 23. měrca, na hwězdnym pochodźe wsow w kónčinje brunicoweje jamy Garzweiler (Sewjerorynska-Westfalska). Hwězdny pochod bě w Delnjej Łužicy dlěje hač dźesać lět zetkanišćo spjećowanja přećiwo nowym brunicowym jamam. Na prěnim tajkim w Porynskej njesmě łužiska delegacija pobrachować, zdźěla Renej Šuster ze Zeleneje ligi.
Z nowym kantorom
Krótkopowěsće (19.03.19)
Šěrja europsku mysl
Drježdźany. Sakska zjednori spěchowanje iniciatiwow a projektow, kotrež słuža mjezy přesahowacemu a interregionalnemu zhromadnemu dźěłu kaž tež šěrjenju europskeje mysle. Zdobom spěchowanje polěpša. Kaž sakska statna kenclija w Drježdźanach informuje, su wotpowědne nowe spěchowanske směrnicy „mjezynarodne zhromadne dźěło“ hižo 1. měrca płaćiwosće nabyli.
Dwurěčne kemše swjećili
Grodk. Prěnje kemše w serbskej rěči po nimale 150 lětach su w Grodku swjećili. 90 kemšerjow wobdźěli so njedźelu na dwurěčnej Božej słužbje w bywšej Serbskej cyrkwi, kaž Bramborske serbske radijo rozprawja. Farar na wuměnku Helmut Hupac je prědował, chór Łužyca spěwał. Skupina Serbska namša dźakowaše so Grodkowskej wosadnej radźe z taflu ze serbskim Wótčenašom.
Rěčne pruwowanja krućiše
Krótkopowěsće (18.03.19)
Wulki zajim za olympiadu
Budyšin. 94 šulerjow je so za lětušu centralnu olympiadu serbšćiny přizjewiło, 24 wjace hač loni. W Delnjej Łužicy su ličbu zajimcow porno lońšemu na 38 podwojili. Wjetšina hornjoserbskich šulerjow – w cyłku 37 – su maćernorěčni, kaž Serbske šulske towarstwo jako zarjadowar olympiady zdźěla. SŠT so nad přiběracym zajimom šulerjow za centralne wurisanje wot 8. do 10. apryla jara wjeseli.
Maywald nowy nawoda
Ralbicy. Michał Maywald ze Šunowa je nowy nawoda dobrowólnych wohnjowych woborow gmejny Ralbicy-Róžant. 27lětneho, kotryž dźěła jako wobornik w Hamorskej milinarni, su gmejnscy wobornicy sobotu na wólbnej zhromadźiznje w Ralbicach jako jeničkeho kandidata jednohłósnje wuzwolili. Jeho zastupuje Achim Měrćink z Ralbic, kiž bě wot lěta 2007 šef delanskich wohnjowych woborow.
Šiman mjez potrjechenymi
Krótkopowěsće (15.03.19)
Předsydku wobkrućili
Radwor. Čłonojo Radworskeho chóra Meja wuzwolichu na wčerawšej hłownej a wólbnej zhromadźiznje Angeliku Häneltowu znowa za předsydku. Městopředsydka wostanje Diana Wowčerjowa, wo financy stara so Mónika Wenclowa. Ćěleso hotuje so tuchwilu na předstajenje oratorija „Israelowa zrudoba a tróšt“ a přewjedźe w oktobrje prěni króć nazymski koncert we Wojerecach.
Poradźene womłodźenje
Pančicy-Kukow. Z jědnaće kandidatami nastupi Serbske wolerske zjednoćenstwo (SWZ) Pančicy-Kukow ke komunalnym wólbam 26. meje. To je porno wólbam w lětomaj 2009 a 2014 najwjetša ličba. Zwjeselace je, zo kandiduje z Grit Hawšowej zaso žónska na lisćinje SWZ. Nowi a młodźi kandidaća su Beno Šołta, Stefan Cyž, Clemens Škoda a Krystof Rjeda. Jim poboku su Jens Pakoßnick, Joachim Kokla, Konrad Lipič, Tobias Cyž, Pětr Šołta a Stefan Rjeda.
AfD kandidatow nominowała
