Krótkopowěsće (03.04.19)
Myto Astrid Lindgren spožčene
Stockholm. Belgisko-flamski spisowaćel Bart Moeyaert je lawreat lětušeho Myta Astrid Lindgren za dźěćacu a młodźinsku literaturu. To zdźěla Šwedska rada wuměłstwa. Najwuznamniše myto toho razu je ze 490 000 eurami dotěrowane. Mjez dohromady 246 kandidatami běštaj tež čěski ilustrator Petr Nikl a němski awtor Janosch (Horst Eckert).
Wšitke městna wobsadźene
Budyšin. Za kubłansku wuprawu wuměnkarjow Serbskeho šulskeho towarstwa wot 5. do 9. meje do Wendlanda bě za krótki čas wšitkich 44 městnow wobsadźene. Kurator Choćebuskeho Serbskeho muzeja Werner Měškank je zestajał program „Na slědach słowjanskich stawiznow we Wendlandźe“. Tamniše towarstwa a měšćanosta Łuchowa (Lüchow) Manfred Liebhaber wočakuja hosći z wosebitym programom.
Šiman: Spěšnje jednać
Krótkopowěsće (02.04.19)
Štyrceći přidatnych městnow
Drježdźany. Wulkeho naprašowanja dla rozšěri sakske ministerstwo za kultus ličbu městnow za „dobrowólne socialne lěto pedagogika“ na šulach wo 40. Tak móže 200 dobrowólnikow w šulskim lěće 2019/2020 přepruwować, hač je wučerstwo jim hodźaca so powołanska perspektiwa. 1 000 sakskich šulow je na dobrowólnikach zajimowanych. Požadać so je hišće hač do 30. apryla móžno.
Wuslědki w syći přistupne
Budyšin. Dokumentacija wuslědkow lońšeho naprašowanja Domowiny je digitalnje přistupna. Zajimcy namakaja ju na internetnej stronje Domowiny w mediatece pod https://www.domowina.de/ fileadmin/Assets/Domowina/Mediathek /Nasa_Domowina/NasaDomowina_2019_01.pdf. Wobdźělnicy 19. hłowneje zhromadźizny Domowiny dóstachu wuslědki w ćišćanej formje.
Wojerowscy šulerjo mytowani
Krótkopowěsće (01.04.19)
Kolba so na wuměnk podał
Zły Komorow. Prokurist Łužiskeje a srjedźoněmskeje towaršnosće hórnistwoweho zarjadnistwa (LMBV), kotraž zamołwja tež saněrowanje we Łužicy, Manfred Kolba je so kónc měrca na wuměnk podał. Na jeho městnje skutkuje wot dźensnišeho Gerd Richter, kiž je sam mnohe lěta w brunicowych jamach dźěłał. Naposledk nawjedowaše pola LMBV wobłuk projektneho managementa wuchodneje Sakskeje.
Požadaja so wo titul UNESCO
Podstupim. Podstupim chce so wo titul „Filmowe město UNESCO“ požadać, kaž wyši měšćanosta Mike Schubert (SPD) připowědźi. Podstupim by tak prěnje „UNESCO-kreatiwne město filma“ było. Wšako ma na tym polu dobru infrastrukturu, kwalifikowany personal a wulki spektrum móžnosćow. Filmowe studijo w Babelsbergu wobsteji wot lěta 1912.
Łobjo połne mikroplasty
Krótkopowěsće (29.03.19)
Wo ewaluaciji jutře njerěča
Budyšin. Wuslědki ewaluacije serbskeje wučby w Delnjej Łužicy njebudu předmjet přednoška na jutřišej hłownej zhromadźiznje Domowiny w Chrósćicach. Namjetowany dnjowy porjad z časowych přičin dźesać- do pjatnaćemjeńšinske wuwjedźenja wo mjenowanej temje njedowola, kaž bě wot referentki a ze stron Domowiny zhonić.
Srědki serbskimaj šulomaj
Drježdźany. Šula Ćišinskeho w Pančicach-Kukowje a wyša šula Ralbicy profitujetej z fondsa k zawěsćenju přichoda, za kotryž je etatowy a financny wuběrk Sakskeho krajneho sejma cyłkownje 26 milionow eurow přizwolił. Kaž serbski zapósłanc Alojs Mikławšk (CDU) zdźěli, dóstanje Pančičanske kubłanišćo 569 000 eurow za wohnjo- a wěstotnotechniske naprawy, Ralbičanske 77 000 eurow za zatwar lifta jako bjezbarjerny přistup.
Towarstwo wuznamjenjene
Krótkopowěsće (28.03.19)
Z rozsudom njepřezjedni
Choćebuz. Ćahańca wo wobdźělenju Serbskeje wubranki na europeadźe 2020 pola Słowjencow w Awstriskej njepřestawa. Towarstwo Serbske koparje njeje přezjedne z rozsudom Zwjazkoweho předsydstwa Domowiny, měšane mustwo z Hornjeje a Delnjeje Łužicy na turněr słać. Předsydstwo župy Delnja Łužica wočakuje tuž na sobotnej hłownej zhromadźiznje třěšneho zwjazka stejišćo w naležnosći, wčera w Choćebuzu wobzamknychu.
Nowy dwurěčny zapis mjenow
Podstupim. Wot wčerawšeho předleži nowy dwurěčny zapis mjenow komunow a wjesnych dźělow braniborskeho serbskeho sydlenskeho ruma. Kaž zdźěli referent braniborskeje knježerstwoweje społnomócnjeneje za naležnosće Serbow Měto Nowak, su Serbski institut, braniborske ministerstwo za wědomosć, slědźenje a kulturu a dalši pjeć lět na nim dźěłali. Publikaciju je Kraj Braniborska financował.
Dóstanje Čěska lěpši přistaw?
Krótkopowěsće (27.03.19)
W Praze přednošowała
Praha. Trudla Malinkowa je wčera čłonam Towarstwa přećelow Serbow (SPL) w Serbskim seminarje w Praze wo serbskich wupućowarjach do Awstralskeje přednošowała. Přitomni su z wulkim zajimom faktografiskej liniji wuwjedźenjow sćěhowali, ale tež bohatej wobrazowej dokumentaciji. Wjetšinu tych je awtorka na swojim pućowanju na slědach serbskich eksulantow zhotowiła.
Zaběraja so ze Serbami
Budyšin. Šulerjo wyšich schodźenkow Friedricha Schilleroweho gymnazija w Pirnje rozestajeja so tuchwilu intensiwnje ze Serbami w změnje časow. Wčera běchu w Budyšinje, hdźež wopytachu Serbski muzej a Rěčny centrum Witaj. Mjez druhim informowachu so wo serbskorěčnym kubłanju. Dale su sej serbske wokable wobhladali, serbsce čitali a spěwali.
Zběraja daty fawny a biotopow
Krótkopowěsće (26.03.19)
Rozsudna železniska wóska
Choćebuz. Po słowach jednaćela towaršnosće Łužiski hospodarski region Torstena Borka je „čara Budyšin–Wojerecy za strukturnu změnu rozsudna wóska, kotraž móže a dyrbi tež Hornju Łužicu spěšnje Berlinej zbližić“. Kombinowane ze železniskej čaru Choćebuz–Schönefeld docpěja Łužičenjo nowu dimensiju spěšnosće a dynamiki, rjekny Bork wčera na wopyće w Schönefeldźe.
Šulski zarjad přestrukturowany
Budyšin. Georg Richter šulski zarjad w Budyskim krajnoradnym zarjedźe po komisariskej fazy nětko oficialnje nawjeduje. Wo tym je prěni přirjadnik krajneho rady Udo Wićaz (CDU) wčera wokrjesny sejmik informował. Přestrukturowany šulski zarjad ma wěcnej wobłukaj šulske zarjadnistwo kaž tež šulske wuwiće a kubłanje, do kotrehož słušatej planowanje šulskeje syće a digitalizacija na šulach.
Nowy nakład „Mištra Krabata“
Krótkopowěsće (25.03.19)
Nowak kandiduje za FUEN
Budyšin. Měto Nowak kandiduje za zastojnstwo wiceprezidenta Federalistiskeje unije europskich narodnych mjeńšin (FUEN) za wólbnu dobu 2019 do 2022. Wólby budu na kongresu FUEN wot 12. do 16. junija w Bratislavje. Prezidij Zwjazkoweho předsydstwa Domowiny je Nowaka minjenu srjedu nominował, kaž bu dźensa znate. Kandidat je referent braniborskeje knježerstwoweje społnomócnjeneje za naležnosće Serbow.
Nětko tež w serbskej rěči
Budyšin. Namołwa za wubědźowanje Sakskeho fondsa Čiń sobu nětko dospołnje w serbski rěči předleži. Wona je w interneće wozjewjena pod www.mitmachfonds-sachsen.de/wettbewerb/lausitz-sorbisch. Domowina skedźbnja župy a čłonske towarstwa na to, so tam wobdźělić a swoje ideje za strukturne wuwiće Łužicy hač do 15. apryla zapodać.
Za wjace sadu, zeleniny, mloka
Krótkopowěsće (22.03.19)
Znowa mjez nominowanymi
Waršawa/Drježdźany. 27 přinoškow je za lětuše Němsko-pólske žurnalistiske myto Tadeusza Mazowieckeho nominowanych. Serbski telewizijny žurnalist Roman Nuk słuša w kategoriji „Žurnalizm w pomjeznym regionje“ znowa k namjetowanym. Z Holgerom Lühmannom je wón přinošk „Europske město Zhorjelc/Zgorzelec, dwaj krajej – jedna městnosć“ za sćelak MDR produkował.
Njewužiwaja žane pesticidy
Choćebuz. Chemisko-syntetiske rostlinoškitne srědki za dźěła na komunalnych płoninach města Choćebuza wužiwać je zakazane. Swójski zawod zelenišća a parki pesticidy hižo njezasadźa, kaž měšćanske zarjadnistwo zdźěla. Tak zwoprawdźa wobzamknjenje měšćanskeho parlamenta z lěta 2018 „Choćebuz stanje so z komunu bjez pesticidow“.
Atrakcija w nowym šaće
Krótkopowěsće (21.03.19)
Myto za europske dorozumjenje
Lipsk. Na wotewrjenju Lipšćanskich knižnych wikow spožčichu ameriskoruskej žurnalistce Mashi Gessen za publikaciju „Přichod su stawizny – Kak je sej Ruska swobodu zdobyła a zaso zhubiła“ Knižne myto za europske dorozumjenje. Myto je z 20 000 eurami dotěrowane. We wobkrućenju mjez druhim rěka, zo přisłuša awtorka „najwažnišim hłosam, zasadźacym so za čłowjeske prawa a přećiwo homofobiji“.
Serbowki wobkrućene
Budyšin. Serbske čłonki w předsydstwje wokrjesneho zwjazka Budyšin Žónskeje unije CDU su na wčerawšej wólbnej zhromadźiznje w Budyšinje w zastojnstwach wobkrućili. Marja Michałkowa z Lichanja je dale předsydka, Halena Jancyna z Ralbic městopředsydka a Borbora Hančikowa z Měrkowa pokładnica. Wone wobdźěla so tež na krajnej delegatnej konferency žónskeje unije.
Najwjetša zběrka selawkow
