Krótkopowěsće (07.09.18)
Ludwig Kola njeboh
Choćebuz. Wjelelětny serbski rozhłosownik Ludwig Kola je wčera w starobje 86 lět w Choćebuzu zemrěł. Wot lěta 1963 hač do přewróta bě wón Serbski rozhłós w Budyšinje nawjedował. Pozdźišo wutwori delnjoserbsku redakciju rozhłosa, kotraž dźensa we wobłuku sćelaka RBB wusyła. Nimale 40 lět je rodźeny Radworčan za serbski rozhłós dźěłał.
Na wuprawje w Słowjenskej
Wudwor. Wudworski folklorny ansambl zastupuje Serbow na tuchwilu wotměwacym so 13. mjezynarodnym folklornym festiwalu „Od Celja do Žalca“ w Słowjenskej. 29 čłonow poda so wčera na wukrajnu turneju. Prěnja stacija je město Celje. Dalšej programaj stej w bliskim měsće Žalec a we wsy Petrovče planowanej. Sobotu předstaja so Wudworčenjo w słowjenskej stolicy Ljubljanje.
Wutwar dróhi pruwować
Krótkopowěsće (06.09.18)
Rozšěrjena rěčna app
Budyšin. Androidna app za smartphone „Sorbisch leicht – Serbsce lochko“ bu wobšěrnje rozšěrjena, kaž Rěčny centrum WITAJ zdźěla. W aplikaciji su nětko wšitke hornjoserbske wobroty z wobeju CDjow „Serbsce lochko 1“ a „Serbsce lochko 2“ zapřijate. Přistupnych je dohromady 30 krótkolekcijow, kóžda z wobrotami na konkretnu temu. App je w interneće darmotnje k dispoziciji.
Podpěruja wšitke požadanja
Drježdźany. Sakske knježerstwo podpěruje po słowach statneje ministerki za wědomosć a wuměłstwo dr. Evy-Marije Stange (SPD) požadanja Žitawy, Drježdźan a Kamjenicy wo titul „europska kulturna stolica 2025“ w samsnej měrje. Dr. Stange spřećiwja so tak prezidentej sakskeho sejma dr. Matthiasej Rößlerej (CDU), kiž bě so za Kamjenicu wuprajił.
Grabičanski jězor přepodali
Krótkopowěsće (05.09.18)
Počesća Hansena
Bozen. Bywšemu prezidentej Federalistiskeje unije europskich narodnych mjeńšin (FUEN) Hansej Heinrichej Hansenej spožča dźensa Wulki zasłužbowy rjad kraja Južny Tirol za jeho rozsudny přinošk k wuspěchej iniciatiwy Minority Safepack. Jako prezident FUEN njeje wón iniciatiwu jenož nastorčił, ale je zdobom předsyda jeje wobydlerskeho komiteja.
Hotel z nowym direktorom
Budyšin. Best Western hotel w Budyšinje ma noweho direktora. Sandro Reichel jón wot spočatka septembra nawjeduje, slědujo Holgera Thiema. Sandro Reichel ma wjelelětne nazhonjenja we wobłuku wobhospodarjenja hotelow a hosćencow. Naposledk dźěłaše rodźeny Běłowodźan na čole hotela w Mužakowje.
Prapremjera Oscar-kandidata
Krótkopowěsće (04.09.18)
Towaršnosć ma nětko jednaćela
Choćebuz. Nawodnistwo předewzaća Hospodarski region Łužica tzwr je nětko dospołne. Předewzaćel Torsten Bork přewza 1. septembra zastojnstwo jednaćela města, wokrjesy a kraje přesahowaceje planowanskeje a wuwićoweje towaršnosće za strukturne a regionalne wuwiće. Torsten Bork dźěłaše dotal jako předewzaćelski a politiski poradźowar.
Minister wokrjes wopytał
Großharthau. Sakski minister za wobswět a ratarstwo Thomas Schmidt (CDU) wopyta wčera Leaderowej kónčinje zapadna Łužica a Budyski Horni kraj. Tam je so wobhonił, kak spěchowanski program zwoprawdźeja. Wón je přeswědčeny, zo twarske a turistiske projekty region wobohaćeja a wjesne kónčiny zesylnjeja, kaž w Großharthauwje zwurazni.
Sćěhi kónca brunicy lědma znate
Krótkopowěsće (03.09.18)
Prěni raz ze stejnišćom mjeńšin
Berlin. Frizojo, Danojo, němscy Sintojo a Romojo kaž tež Serbja prezentuja so prěni raz ze zhromadnym stejnišćom na wobydlerskim swjedźenju zwjazkoweho prezidenta Franka-Waltera Steinmeiera 8. septembra w parku hroda Bellevue, kaž mjeńšinowa rada informuje. Zdobom so nadźija tam mnohich přisłušnikow mjenowanych mjeńšin witać móc.
Pjenjezy za kulturu na wsach
Berlin/Drježdźany. Kulturu na wsach wuchoda měli dlěšodobnišo financować, měni jednaćel Kulturneje rady Němskeje Olaf Zimmermann. „Kultura je trajna zaručka dočasneho zastaranja, kaž stej to zastaranje z wodu a milinu abo nadróžny wobchad“, rjekny Zimmermann powěsćerni dpa. Runje před pozadkom prawicarskich tendencow dźe wo to, kulturnu infrastrukturu a kubłanje w regionach zachować.
Rewizija na bloku Q
Krótkopowěsće (31.08.18)
Přihotuja nowy knižny rjad
Slepo. Towarstwo Kólesko přihotuje nowy rjad knihow. Wěnować chcedźa so w nich narodnym drastam Slepjanskeho regiona. Prěni dźěl ma kónc lěta wuńć, zdźěli předsyda Hartmut Hančo. Na 220 stronach rozłožuja mjez druhim zajimawosće wosom dźěćetkow Slepjanskeje wosady. Hłowna awtorka Elvira Rathner wopisuje w knize zdobom šiće drasty a kak so ju prawje zhotować.
Serbskosć sylnišo pokazować
Zły Komowrow. Serbskosć a dwurěčnosć města a měšćanskich dźělow Złeho Komorowa matej so sylnišo w zjawnosći jewić. Za to chce město zakładne wustawki změnić a zamołwiteho za serbske naležnosće powołać, zdźěla delnjoserbski rozhłós. Tučasnje wo tym we wuběrkach rěča, hač do 12. septembra chcedźa rozsudźić. Zły Komorow přisłuša wot lońšeho serbskemu sydlenskemu rumej.
Steinbach budźe nowy minister
Krótkopowěsće (30.08.18)
Spomóžne wuwiće
Budyšin. We wuchodnej Sakskej je kónc awgusta 18 705 bjezdźěłnych, 285 mjenje hač w předměsacu. Po lětnich prózdninach je bjezdźěłnosć w regionje zaso woteběrała. 782 ludźi je nowy job nastupiło, 529 wukubłanje zahajiło. Naprašowanje za personalom je kaž loni dale na wobstajnje wysokim niwowje, zdźěli dźensa Thomas Berndt, předsyda jednaćelstwa Budyskeje agentury za dźěło.
Pokazka na namócnu smjerć
Zhorjelc. 90lětna žona je so po wšěm zdaću w Zhorjelcu z woporom złóstnistwa stała. Běchu ju 15. awgusta mortwu w jeje bydlenju našli, a lěkar wuchadźeše najprjedy z přirodneje smjerće. Mjeztym ma policija pokiwy na to, zo bu rentnarka snano morjena. Policija a statne rěčnistwo stej dźensa pytansku namołwu za dotal njeidentifikowanym mužom wozjewiłoj.
Nowy serwis kolesowarjam
Krótkopowěsće (29.08.18)
Miliardy eurow na girokontach
Berlin. Najebać nisku dań mějachu wuchodni Němcy jeničce w 45 lutowarnjach Sakskeje, Braniborskeje, Saksko-Anhaltskeje a Mecklenburgsko-Předpomorskeje kónc junija 55 miliardow eurow na girowych a dnjowopjenježnych kontach. To je nimale dźewjeć procentow wjace hač loni, kaž Zwjazk wuchodoněmskich lutowarnjow dźensa w Berlinje wozjewi.
Dźesaćlětne partnerstwo
Drježdźany. Swjedźenske zarjadowanje přihotuje maršalski zarjad wojewódstwa Lubuski kraj składnostnje dźesaćlětneho regionalneho partnerstwa ze Swobodnym statom Sakskej za 3. september we Łęknicy a w geoparku Mužakowski zahork. 9. nowembra 2008 běštaj tehdyši sakski premier Stanisław Tilich (CDU) a bywši maršal wojewódstwa Marcin Jabłoński wotpowědne zrěčenje podpisałoj.
Twory premiera bojkotować
Krótkopowěsće (28.08.18)
Kurs wo medijach
Wodowe Hendrichecy. Kurs wo nowych medijach přewjeduje nawoda Budyskeje wotnožki Sakskeho wukubłanskeho a wupruwowanskeho kanala Michał Cyž tuchwilu we Wodowych Hendrichecach. W tamnišim wočerstwjenišću wuknje 23 šulerjow 5. lětnika spěchowanskeho centruma Horni kraj z Habrachćic/Nowych Jěžerc dźěło z fotografiju, ličakami a internetnej rešeršu.
Serbskaj awtoraj zastupjenaj
Drježdźany. Wo perspektiwach Sakskeje je frakcija Lěwicy w krajnym sejmje knihu wudała. Kaž Marcel Brauman na swojim blogu informuje, wobsahuje wona přinoški 21 awtorow. Mjez nimi staj Njebjelčanski wjesnjanosta Tomaš Čornak (CDU) a předsyda Domowiny Dawid Statnik. Čornak wěnuje so přewzaću zamołwitosće, Statnik mnohotnosći. Knihu nazymu zjawnosći předstaja.
Ministerka Golze wotstupiła
Krótkopowěsće (27.08.18)
Film Karla Vouka na festiwalu
Choćebuz. Krótkofilm PŚIRODA awstriskeho wuměłca Karla Vouka wo změnje łužiskeje krajiny je nominowany za lětuši 28. festiwal wuchodoeuropskeho filma wot 6. do 11. nowembra w Choćebuzu. Termin předstajenja dwanaćeminutowskeho paska budźe hakle z wozjewjenjom programa w septembru jasny. Twórba je nominowana tež za 21. festiwal słowjenskeho filma w Portorožu.
Předstaji tři rukopisne słowniki
Halle. Pod hesłom „Začuća a normy“ wotměwa so tele dny mjezynarodny kongres za slědźenja wo pietizmje w Halle. Serbow zastupuje wědomostna sobudźěłaćerka Drježdźanskeje Techniskeje uniwersity dr. Lubina Malinkowa. Wona předstaji tam tři rukopisne serbsko-němske słowniki, na kotrež bě při slědźenjach w archiwje bratrowskeje wosady storčiła. Zetkanje traje hač do srjedy.
Za politiske hudźbne dźiwadło
