Krótkopowěsće (11.06.15)

štwórtk, 11. junija 2015 spisane wot:

„Pingufant za Pawla“ wušoł

Budyšin. Znaty ilustrator Thomas Binde­r je za dźěći znowa fantastisku powědku spisał a k tomu lóštne barbne ilustra­cije stworił. Jeho kniha „Pingufant za Pawla“, za dźěći wot 6 lět, je nětko w Ludowym nakładnistwje Domowina wušła. Lektor LND Michał Nuk bě sta­wiznu přełožił. Thomas Binder ma tež mjez Serbami dobre mjeno.

Sakska chce kruće zakročić

Drježdźany. Po wospjetnych randalach w Lipsku chce Sakska přećiwo ekscesam namocy pozdatnych lěwicarskich ekstremistow w měsće kruće zakročić. To je nutřkowny minister Markus Ulbig (CDU) dźensa w krajnym sejmje připowědźił. Jako posledni rěčnik emocionalneje debaty warnowaše wón před zrelatiwizowanjom njeskutkow runje tak kaž před přechwatanymi reakcijemi na nje.

Tuńšo parkować a kofej pić

Krótkopowěsće (10.06.15)

srjeda, 10. junija 2015 spisane wot:

Nowa cityjowa managerka

Budyšin. Wot 1. julija budźe so Gunhild Mimuß jako cityjowa managerka wo dóńt Budyskeho srjedźišća starać. 40lětna je so přećiwo mnohim kwali­fi­kowanym požadarjam přesadźiła. Jeje dźěło ma k tomu přino­šować, zo so wikowanska kultura nutřkowneho města Bu­dyšina polěpši. Wčera je so Mimuß oficialnje předstajiła.

Aktiwity lěpje koordinować

Budyšin. Wozjewjenje wšitkich serbskich terminow w internetnej protyce Domowiny bě ćežišćo wčerawšeho koła serbskich institucijow. Na nje bě třěšny zwjazk tež serbskich zastupjerjow rady Załožby za serbski lud přeprosył. Kwartalne zetkanja słuža předewšěm tomu, so informować a aktiwity koordinować kaž tež poměr institucijow k załožbowej radźe polěpšić.

Z busom do Berlina

Krótkopowěsće (09.06.15)

wutora, 09. junija 2015 spisane wot:

Mjenowy atlas wušoł

Budyšin. Lipšćanski mjenowědnik Wal­ter Wenzel je nětko w LND ryzy atlas swójbnych mjenow za Delnju Łužicu před­połožił. Wšitke 70 kartow je wobšěrnje komentowane, a zapisane mjena su w separatnym registrje naličene. Kniha skići čitarjej nowe informacije k rozšěrjenju jednotliwych swójbnych mjenow a k sy­dlenskim stawiznam historiskeho ruma.

Husitskej chorhoji wupójsnjenej

Praha. Na Praskim hrodźe zmawujetej husitskej chorhoji ze symbolom kelucha. W zwisku z bližacej so 600. róčnicu martrarskeje smjerće Jana Husa na šćěpowcu je jej čěski prezident Miloš Zeman wupójsnyć dał. Wón nawjaza tak na samsnu gestu prezidenta Masaryka z lěta 1925. Někotři kritizuja, zo chcył Zeman jenož na so skedźbnić.

Kampeter woteńdźe

Krótkopowěsće (08.06.15)

póndźela, 08. junija 2015 spisane wot:

Serbskich duchownych přesadźa

Drježdźany. Změny w serbskich katolskich wosadach: 1. oktobra nastupi Ra­dworski wosadny farar, kanonik Šćěpan Delan, jako farar w Ralbicach. Michał Naw­ka, farar w Ralbicach, stanje so z fararjom w Njebjelčicach. Tamniši farar Beno­ Jakubaš póńdźe do Radworja. Tole wuchadźa ze zdźělenki Drježdźansko-Mišnjanskeho biskopstwa.

Wolodymyr Motornyj zemrěł

Lwiw. Znaty slawist a literarny stawi­znar prof. dr. Wolodymyr A. Motornyj je mi­njeny pjatk w starobje 86 lět zemrěł. To zdźěli dźensa Budyski Serbski institut. Wjelelětny nawoda katedry za slawistiku Narodneje uniwersity „Iwan Franko“ we Lwowje organizowaše sorabistiske kon­ferency a běše sobuwudawaćel wosom zběrnikow „Pytannja sorabistyky“. Motornyj bě tež nošer Myta Domowiny.

Pósłanc Hornjeje Łužicy

Krótkopowěsće (05.06.15)

pjatk, 05. junija 2015 spisane wot:

Předewzaćelske myto 2015

Budyšin. Dwacety raz chcedźa lětsa hornjołužiske předewzaćelske myto spož­čić. Wot lěta 1996 wuznamjenjeja z nim wuspěšne a angažowane přede­wzaćelki a předewzaćelow. Za lětuše myto je dwanaće zawodow namjetowane. Dobyćerjow počesća składnostnje srjedźostawskeho dnja 30. junija w Budyskim Němsko-Serbskim ludowym dźiwadle.

Kurth za jednotnu maturu

Drježdźany. Sakska kultusowa ministerka Brunhild Kurth (CDU) ma jednotnu maturu po wšej Němskej dołhodobnje za trěbnu. Móžnosć přirunanja polěkuje samsnym šansam a sprawnosći, rjekny ministerka Kurth po­wěsćerni dpa. Maturitne wuslědki a přerězki znamkow su wažne kriterije při rozdawanju studijnych městnow.

Sawdi-Arabska hněwna

Krótkopowěsće (04.06.15)

štwórtk, 04. junija 2015 spisane wot:

Třěcha kina so sypnyła

Kamjenc. Třěcha bywšeho Kamjenskeho kina je so dźens w nocy sypnyła. Wobydlerjo słyšachu wulki wrjeskot a widźachu mróčel kura. Zranił so na zbožo nichtó njeje. Wohnjowa wobora a tech­niski pomocny skutk běštej na městnje. Fachowcy pruwowachu, hač wokolnym twarjenjam strach hrozy. Dom njebu hižo wjacore lěta wužiwany.

Zasudźa nadpad

Drježdźany/Wojerecy. Migraciskopolitiska rěčnica frakcije Zelenych w krajnym sejmje Petra Zais nadpad na dom požadarjow azyla we Wojerecach raznje zasudźa. „Je zrudne, ale wěrno, zo njemóža so ćěkancy w Sakskej hižo wěsći čuć“, rěka w jeje zdźělence. Njeznaći běchu w nocy na srjedu spytali dom zapalić, štož pak so jim njeporadźi.

Stawk přetorhnjeny

Berlin. Stawk pěstowarkow w komunalnych dźěćacych přebywanišćach je přetorhnjeny. Dźěłarnistwo ver.di a komunalni dźěłodawarjo běchu dźensa rano po zwrěšćenju jednanjow zwólniwi, posrědkowanske jednanje zahajić. W tym času njeje dowolene stawkować. Posrědkować ma něhdyši Hannoverski wyši měšćanosta Herbert Schmalstieg.

Krótkopowěsće (03.06.15)

srjeda, 03. junija 2015 spisane wot:

Nowe towarstwo załožili

Budyšin. „Willkommen in Bautzen“ rěka towarstwo, kotrež su wčera w Budyskim Kamjentnym domje załožili. Iniciatorojo su čłonojo zwjazkarstwa „Budyšin wostanje pisany“. Za předsydu wuzwo­lichu Svena Scheidemantela. W Fisch­bachu bydlacy je sobustaw Budyskeho wokrjesneho sejmika za frakciju Lěwica.

Biskop Koch woteńdźe

Berlin/Drježdźany. Katolski biskop Drježdźansko-Mišnjanskeje diecezy dr. Heiner Koch ma so po informacijach powě­sćernje dpa z nowym Berlinskim arcybiskopom stać. 59lětny nastupi naslědnistwo Rainera Marije Woelkeho, kiž bě loni w septembru do Kölna wotešoł. Heiner Koch je wot lěta 2013 biskop w Drjež­dźanach a je sej tam mjeztym wjele připóznaća zdobył.

Čěska česći Jana Husa

Praha/Husinec. W zwisku z bližacej so 600. róčnicu spalenja nabožinskeho reformatora Jana Husa wotměwaja so w Čěskej republice wjacore zarjadowanja na jeho česć. Čěska telewizija wusyłaše minjene dny nowy třidźělny hrajny film wo idealach a tehdyšej dobje Husa. W jeho ródnym měsće Husinecu su wopomnišćo ponowili.

Krótkopowěsće (02.06.15)

wutora, 02. junija 2015 spisane wot:

Tilich biskopej gratulował

Drježdźany. Sakski ministerski prezident Stanisław Tilich (CDU) je nowemu biskopej Ewangelsko-lutherskeje krajneje cyrkwje Sakskeje Carstenej Rentzingej k wuzwolenju gratulował. Pokazujo na to, zo su ewangelscy wěriwi w Sakskej sobu­ najwjetše zjednoćenstwo wěriwych, přeje Tilich jemu wjele mocy, tež nastupajo přihot 500. jubileja reformacije 2017.

Nowa dźěćaca knižka wušła

Budyšin. Za młodych serbskich staršich a jich najmłódšich pjerachow je nětko w LND wušła nowa knižka z twjer­de­ho papjerca pod titulom „Moje naj­lubše powědančka wo zwěrjatach“. Dwanaće krótkich powědančkow, spisane wot Christy Kempter, je wjelelětna Witaj­pěstowarka Jadwiga Wejšina do hornjoserbšćiny přenjesła.

Rybowe tydźenje kiwaja

Krótkopowěsće (01.06.15)

póndźela, 01. junija 2015 spisane wot:

Serbska hudźba w interneće

Budyšin. Nowe rozhłosowe wusyłanje „Wočiń woči“ budźe wot jutřišeho kóždu wutoru wot 17 do 19 hodź. w inter­netnym sćelaku LaBa (Lauter Bautzner) słyšeć. Je to reakcija na přewšo wuspěšne zarjadowanje ze samsnym mjenom w Budyskim Kamjentnym domje, kaž zamołwići sćelaka zdźěleja (http://laut.fm/lauterbautzner).

Proša wo wjace žiwidłow

Berlin. Hladajo na přiběrace ličby ćěkancow prosy Zwjazk taflow Němskeje wo wjace darjenych žiwidłow a žada sej wjace statneje podpěry. „Darjene žiwidła hižo w tej měrje njepřiběraja kaž ličby potrěbnych“, zwurazni předsyda zwjaz­ka Jochen Brühl dźensa w Berlinje. Stat njesměł so jenož na čestnohamtskich pomocnikow při taflach spušćeć.

Čěske honjaki do Islandskeje

Praha. Wjednistwo NATO prosy Čěsku republiku, zo by w juliju a awgusće powětrowy rum Islandskeje škitała. Podobnu lětadłowu misiju su Češa tam z pjeć honjakami JAS-39 Gripen hižo loni nazymu zwoprawdźili. Nětko maja w Islandskej dotal stražowace kanadiske lětadła narunać. Plan dyrbi čěske knježerstwo hišće schwalić.

Krótkopowěsće (29.05.15)

pjatk, 29. meje 2015 spisane wot:

Wědomostnicy w Błótach

Choćebuz. Wědomostnicy z dźesać krajow swěta přebywaja dźensa w Błótach. Wulět k Łužiskim Serbam w Braniborskej je dźěl witanskeho programa slědźerjow. Mjez nimi staj stipendiataj programa BRAIN, sociologa a slědźer wo mjeńšinach Giovanni Picker z Italskeje a specialist za słowjanske rěče Boban Arsenijević ze Serbiskeje.

Zaso 40 000 wobydlerjow

Budyšin. Ličba wobydlerjow Budyšina je lětsa w prěnim kwartalu zaso hranicu 40 000 překročiła. Dnja 31. měrca běchu dokładnje 40 004 z hłownym bydlenjom w měsće přizjewjeni, kaž Budyski statistiski wotrjad piše. Hłowna přičina je přiběraca ličba požadarjow wo azyl. Pozitiwny trend zwěsćeja tež nastupajo porody.

Katamaran so dliji

Zły Komorow. Wot 1. junija běchu jězby z katamaranom wot Złokomorowskeho na Lejnjanski jězor předwidźane. Nowa wosebita łódź pak dotal hišće hač do Złeho Komorowa dojěła njeje. Kaž jednaćelka łódźnistwa Marianne Löwa praji, přewjedu tam jězby z wosebitej łódźu najskerje hakle wot 15. junija. Łódź ma 5. abo 6. junija z wosebitym transportom dojěć.

Hry znowa napjate byli

nawěšk

nowostki LND