Krótkopowěsće (28.05.18)
Dalše pjenjezy k dispoziciji
Drježdźany. Za mjezy přesahowace projekty su dalše 7,4 miliony eurow z programa Interreg Pólska-Sakska 2014–2020 k dispoziciji, zdźěli wčera sakske wobswětowe ministerstwo w Drježdźanach. Spěchować maja so zhromadne přirodne a kulturne herbstwo, regionalna mobilita, mjezy přesahowace wu- a dalekubłanja kaž tež partnerske zhromadne dźěło.
Slědźa w nadawku UNESCO
Choćebuz. UNESCO je prof. dr. Annu Amelinu jako mějićelku specifiskeje katedry w fachowym wobłuku mjezykulturalita Braniborskeje techniskeje uniwersity (BTU) Choćebuz-Zły Komorow wobkrućiła, kaž BTU dźensa wozjewi. Delnjołužiske wysokošulske kubłanišćo přisłuša wubranej syći dwanaće katedrow po cyłej Němskej za přeslědźenje kulturneho namrěwstwa UNESCO.
Hudźbny festiwal zahajeny
Krótkopowěsće (25.05.18)
Chce so z kulturnej stolicu stać
Žitawa. Město Žitawa chce so ze swojej němsko-pólsko-čěskej wokolinu wo titul europskeje kulturneje stolicy 2025 požadać. Po słowach wyšeho měšćanosty Thomasa Zenkerta (Žitawa móže wjace) zdźěłaja přichodne měsacy koncept. Hornjołužiske města, wokrjes Zhorjelc a susodźa w Čěskej a Pólskej požadanje podpěruja. Nimo toho maja kooperaciske zřěčenje ze słowjenskej Novej Goricu, kotraž so tohorunja wo titul prócuje.
Nowe čisło digitalnje wušło
Budyšin. Dalše čisło informaciskeho łopjena „Naša Domowina digitalnje“ je dźensa wušło, kaž Domowinski zarjad zdźěla. Temy mjez druhim su zwołanje 19. hłowneje zhromadźizny Domowiny kaž tež přeprošeni na dźeń wotewrjenych duri w Muzeju Měrćina Nowaka-Njechorńskeho a na VIII. mjezynarodny festiwal dudakow w Slepom.
Měnjernje skónčnje fairniše?
Krótkopowěsće (24.05.18)
Annalena Schmidt počesćena
Budyšin. Aktiwistka zwjazkarstwa Budyšin wostanje pisany a bloggerka Annalena Schmidt bu składnostnje Dnja Zakładneho zakonja wčera w Berlinje jako „posołka za demokratiju a tolerancu“ wuznamjenjena. Zapósłanča zwjazkoweho sejma Caren Lay (Lěwica) widźi w tym „nadźijomnje posylnjenje druhim Budyšankam a Budyšanam, so za demokratiju a tolerancu“ w měsće zasadźeć.
Slědźerjo nadźijeja so podpěry
Drježdźany. „Štó su Łužiscy Serbja dźensa?“, to zajimuje team młodych slědźerjow we wobłuku projekta „Serbska wěda“ na Serbskim instituće a na Drježdźanskej Techniskej uniwersiće. Slědźerjo su naprašowanje wo socialnej identiće našeho ludu wuwili. Nětko nadźijeja so bohateho wobdźělenja w interneće pod https://bildungsportal.sachsen.de/survey/limesurvey/index.php/154854/lang-de.
Dalši nakład časopisa
Krótkopowěsće (23.05.18)
Wotewrjeni za měšćansku stražu
Podstupim. Delnjołužiska metropola Choćebuz móhła jako reakciju na namócne rozestajenja mjez domoródnymi a ćěkancami nowu měšćansku stražu dóstać. Frakcije w Krajnym sejmje Braniborskeje maja to za móžne. Pruwować nětko chcedźa, hač hodźi so prezenca policije a porjadniskeho zarjada w nutřkownym měsće we „wěstotnym centrumje“ zesylnić. Wo tym z městom rěča.
Nowa iniciatiwa
Brüssel. Europska komisija je wutoru wjacore iniciatiwy za mobilitu wuknjenja, za sylniše wobdźělenje młodych ludźi, zažnodźěsćowske kubłanje, nawuknjenje cuzych rěčow a kulturu předstajiła. Tak chce wona móžnosće kubłanja w Europskej uniji polěpšić a młodych ludźi wšěch worštow towaršnosće sylnić, zo bychu aktiwnišo do demokratiskeho žiwjenja zapřimnyli.
Modelowy program rozšěrić
Krótkopowěsće (22.05.18)
Dalekubłanje za kubłarki
Budyšin. Pod hesłom „20 lět Witaj – dale tak!?“ chce Rěčny centrum WITAJ w juniju swjedźenske dalekubłanje přewjesć. Narěčeć chcedźa kubłarki a kubłarjow, kiž we Witaj-kubłanišćach a skupinach skutkuja. Zdobom wobroći so RCW na něhdyšich w tajkich zarjadnišćach skutkowacych. Jedne ćežišćo budźetej přednošk a diskusija, kak kwalitu serbskorěčneho kubłanja dźěći stopnjować.
Hotelej Star award spožčili
Bórkowy. Bórkowski hotel „Blejcha“ je přijał myto SPA Star award 2018 a doby tak w kategoriji Green SPA. Wuznamjenjenje přepoda njedawno pućowanski magacin SPA inside w breisgauskim Freiburgu. Wuzwolena jury ekspertow počesći łužiski hotel za jeho koncept kaž tež trajny angažement za wuwiće wot UNESCO škitaneho přirodneho regiona bio- sferowy rezerwat Błóta.
Pola Škody derje zasłužeja
Krótkopowěsće (18.05.18)
Bartels nowy direktor instituta
Drježdźany/Podstupim. Dr. Hauke Bartels je nowy nawoda Serbskeho instituta. Dotal komisarisce w zastojnstwje skutkowaceho rěčespytnika bě kuratorij instituta na přichodne pjeć lět powołał. Sakska statna ministerka za wědomosć a wuměłstwo (SMWK) dr. Eva-Maria Stange (SPD) a statna sekretarka Braniborskeje dr. Ulrike Gutheil rozsud witaštej, kaž w zdźělence z SMWK rěka.
Na 48hodźinskej akciji wuspěšni
Budyšin. We wobłuku 48hodźinskeje akcije je 9. lětnik Worklečanskeje wyšeje šule wosebite myto Budyskeje wokrjesneje lutowarnje dobył. Šulerjo zapodachu w kategoriji „kubłanske zarjadnišća“ projekt „MŁODŹI za STARYCH – darujemy chwile“. W Budyskim wokrjesu je so lětsa 94 młodźinskich skupin na 48hodźinskej akciji wobdźěliło. Mjez nošerjemi akcije bě Rěčny centrum WITAJ.
Doskónčny rozsud nazymu
Krótkopowěsće (17.05.18)
Bogumiła Šwjelu wopominali
Choćebuz. Při wobnowjenym rownišću Bogumiła Šwjele na Choćebuskim sewjernym pohrjebnišću su dźensa zastupjerjo serbskich towarstwow a institucijow kaž tež města Choćebuza 70. posmjertniny wótčinca a sobuzałožerja Domowiny wopominali. Na to wotmě so w měšćanskim domje kolokwij. Šwjela bě 20. meje 1948 na jězbje z Durinskeje do Łužicy w ćahu zemrěł.
Wo Serbach w krajnym sejmje
Drježdźany. Wuběrk za wědomosć, kulturu a medije Sakskeho krajneho sejma chce so wo aktualnym połoženju serbskeho ludu wobhonić. Kaž zarjad Domowiny wobkrući, dósta Rada za serbske naležnosće Sakskeje přeprošenje na zjawne wuradźowanje wuběrka 11. junija. Rozjimać chcedźa tam rozprawu sakskeho knježerstwa wo połoženju serbskeho ludu a rozprawu serbskeje rady.
Nalětni swjedźeń wotměli
Krótkopowěsće (16.05.18)
Wo wjelku wuradźowali
Drježdźany. Zapósłancy Sakskeho krajneho sejma su wčera wo wjelčej problematice wuradźowali. Na słyšenju wuběrka za přirodu a ratarstwo dźěše wo wotpowědnu próstwu frakcije CDU zhromadnje z SPD a frakcije Zelenych. Stejišći wšak stej po słyšenju dale rozdźělnej. Mjeztym zo njewidźa Zeleni potrjebu, wobstatk wjelkow wobmjezować, je CDU hinašeho měnjenja.
Přichodnje powšitkowny tarif
Zhorjelc. Po pjatnaće lětach chce Gerharta Hauptmannowe dźiwadło Žitawa-Zhorjelc swój ansambl zaso po powšitkownym tarifje płaćić. Kritiskeho financneho połoženja domu dla bu w lěće 2003 nišu mzdu wopřijacy domjacy tarif z wuměłcami wujednany. Na iniciatiwu sakskeho ministerskeho prezidenta Michaela Kretschmera (CDU), kiž bě so za „přistojne zasłužby“ wuprajił, chce jewišćo tomu wot klětušeho wotpowědować.
Filmowy festiwal zahajeny
Krótkopowěsće (15.05.18)
Nowy mjezu přesahowacy zwisk
Gubin. Měsće Gubin na juhu Braniborskeje a w Pólskej změjetej bórze prěnju mjezy přesahowacu busowu čaru. Zakład tworja wobstejace busowe zwiski, kotrež přez mjezu podlěšeja, připowědźichu wčera zamołwići namjezneju městow. Wot 11. junija měli tam busy prawidłownje přez mjezu jězdźić.
Dulig do Čěskeje
Drježdźany/Praha. Sakski hospodarski minister Martin Dulig (SPD) poda so jutře na dwudnjowsku wizitu do čěskeje stolicy. Susodny kraj je po Chinje druhi najwažniši wikowanski partner Sakskeje. Z dowožowanjemi w hódnoće 4,7 miliardow eurow steji Čěska jasnje na prěnim městnje importowych partnerow. Eksport sakskich tworow do susodneho kraja je wot lěta 1993 wo 16 króć na dwě miliardźe eurow rozrostł.
Duka dale arcybiskop
Krótkopowěsće (14.05.18)
Wustajeńca podlěšena
Budyšin. Wustajeńca „Heimat – Domizna. Katolscy Sebja w Hornjej Łužicy 1992 – 2017“ w Budyskim Serbskim domje budźe dlěje přistupna hač planowane. Město kónca junija zawru ju kónc awgusta. Zajimawa přehladka pokazuje impresije a portrety z Łužicy. Andreas Varnhorn z Frankfurta nad Mohanom bě wobrazy we wotstawku štwórć lětstotka fotografisce zdźěłał.
Sudnicy so schadźuja
Budyšin/Wrócław. Zastupjerjo zarjadniskich a financnych sudnistwow z Pólskeje, Francoskeje a Němskeje chcedźa so na mjezynarodnej kubłanskej konferency schadźować, kotruž wuhotuje Wrócławske zarjadniske sudnistwo wot 16. do 18. meje. Sakske wyše zarjadniske sudnistwo Budyšin budźe tam přednošować na temu „Zakaz dieseloweho jězdźenja – zarjadniskosudnistwowy prawniski škit wobswěta – wocuzbnjenje prawa?“.
Hižo přewjele rěpika?
