Krótkopowěsće (16.11.17)
Pomnik za pólske wopory NS
Berlin. Iniciatiwa wokoło bywšeju prezidentow zwjazkoweho sejma Rity Süssmuth (CDU) a Wolfganga Thiersy (SPD) žada sej pomnik za pólske wopory namócneho knjejstwa nacionalsocializma (NS). Pomnik měł wosrjedź Berlina nastać a na dohromady šěsć milionow Polakow dopominać, kotřiž stachu z woporom němskeho wobsadnistwa w lětach 1939 do 1945.
Rumunska na knižnych wikach
Lipsk. W srjedźišću Lipšćanskich knižnych wikow 2018 steji Rumunska. Wuchodoeuropski kraj chce tam wjace hač třiceći nowych přełožkow do němčiny a kulturny program předstajić. Za Myto Lipšćanskich knižnych wikow je 132 nakładnistwow dohromady 403 twórby zapodało. Literarne wuznamjenjenja w hódnoće dohromady 60 000 eurow spožča klětu w kategorijach beletristika, wěcowna literatura a přełožki.
Kwasnu kuču pokradnyli
Krótkopowěsće (15.11.17)
Wo šulach a jastwach rěčeli
Drježdźany. Sakski krajny sejm je so dźensa w aktualnej hodźinje z cyłodnjowskimi poskitkami na šulach a z personalnym połoženjom w jastwach zaběrał. Šulska tema złožuje so na namjet koalicije CDU/SPD. Debatu „Za lěsycami? Hrožacy kolaps w jastwach wotwobarać“ pak bě frakcija Lěwicy iniciěrowała. Jeje kritika zepěra so na přepjelnjene jastwo w Kamjenicy.
Spěchuja serbske projekty
Lubin. Wokrjes Dubja-Błóta chce tež klětu kulturne a serbske projekty přidatnje spěchować. Hač do kónca požadanskeje doby kónc oktobra su tež próstwy za štyri serbske projekty dóšli. Detaile njeje wokrjes žane mjenował. Za klětuše kulturne projekty přewostaji wokrjes Dubja-Błóta wjac hač 50 000 eurow, za serbske 10 000 eurow. Kónc lěta chcedźa rozsudźić, kak spěchowanske pjenjezy rozdźěla.
Planuja w Brnje metro twarić
Krótkopowěsće (14.11.17)
Myto do Wojerec
Wojerecy/Drježdźany. Sakska ministerka za wědomosć a wuměłstwo dr. Eva-Maria Stange je wčera w Drježdźanach Wojerowski kompjuterowy muzej Konrada Zuseho ZCOM ze Sakskim muzejowym mytom wuznamjeniła. ZCOM dokumentuje techniske wuwiće ličenja a předźěłanja datow a ma najwobšěrnišu zběrku k temje. Myto je z 20 000 eurami dotěrowane.
Pytaja wuwučowacych
Baršć. Wokrjesna ludowa uniwersita Sprjewja-Nysa pyta za zaručenje nalětnjeho semestra 2018 wjacorych docentow. Swobodnje abo přidatnje k powołanju wuwučowacych trjebaja wosebje w regionalnych wukubłanišćach w Baršću, Gubinje a Grodku. Wobłuki, kotrež zajimcam poskićeja, su towaršnosć, kultura, strowota, powołanje a rěče, mjez nimi pólšćina.
W Błótach pisać
Bórkowy. Błótowska kulturna załožba a Bórkowski hotel Bleiche stej wupisałoj mjeztym 11. błótowski literarny stipendij. Požadać móža so hač do 15. januara 2018 awtorojo, kotřiž w němskej rěči pisaja a publikuja. W běhu rezidencneho stipendija, přebywacy wjacore tydźenje w Bórkowach, wěnuja so dobyćerjo tworjenju noweje literatury.
Krótkopowěsće (13.11.17)
Žurnalistiske myto spožčene
Nürnberg. Němsko-čěski fonds přichoda, Němski zwjazk žurnalistow a Čěski zwjazk žurnalistow su pjatk w Nürnbergu němsko-čěske žurnalistiske myto spožčili. Dobyćerjo su w kategoriji tekst Tomáš Lindner a Kilian Kirchgeßner, w kategoriji zwuk Pavel Polák a Peter Lange a w kategoriji multimedia Veronika Kupková a Olga Komarevtseva kaž kaž tež Thomas Purschke a Hans-Jürgen Büsch. Myto je z 2 000 eurami dotěrowane.
Amazon tež čěsce rěči
Praha. Čěske e-shopy maja konkurencu. Internetna němska wersija ameriskeje firmy Amazon skići wot najnowšeho wšitke twory tež w čěšćinje. W tejle rěči móža kupcy tež ze serwisom abo z klientskej podpěru komunikować. Čěšćina je hakle pjata rěč, do kotrejež su poskitk Amazona přełožili. Kupcy móža wolić, hač chcedźa wupytane twory w eurach abo čěskich krónach zapłaćić.
Na wustajeńcach zastupjena
Krótkopowěsće (10.11.17)
Bój dale traje
Choćebuz. Braniborska ministerka za kubłanje, młodźinu a sport Britta Ernst (SPD) je so dźensa wo serbskim šulstwje w Delnjej Łužicy informowała. Přeprosyła bě ju staršiska iniciatiwa. Ta so boji, zo njezměje přichodnje hižo 77 procentow šulerjow, kotřiž chcedźa serbšćinu wuknyć, noweho šulskeho postajenja dla k tomu wotpowědny poskitk.
Znowa přestorčene
Kulow. Saněrowanje mosta nad Čornym Halštrowom w Hózku je Kulowska měšćanska rada znowa přestorčiła. Přičina su wažniše a nuznje trěbne porjedźenske dźěła w komunje, hdźež su wobjězdki trěbne, rěkaše z Kulowskeje radnicy. Nowy termin zwottorhanja a nowotawra mosta je februar 2019. Dźěła chcedźa w nowembru zakónčić.
Dźěła zakónčene
Krótkopowěsće (09.11.17)
Wo Serbach so wobhonili
Budyšin. Wobdźělnicy tydźenskeho seminara Berlinskeho Goethoweho instituta su so wčera w Budyšinje wo aktualnym połoženju Serbow wobhonili. Zastupjerjo jědnaće němskorěčnych mjeńšin wuchodneje Europy a Azije wopytachu Domowinu, Serbski institut a Serbski muzej. Seminar słuži tomu, zo bychu němskorěčne mjeńšiny mjezsobne styki nawjazali a wušo hromadźe dźěłali.
Z Blunjom a Chrjebju-Nowej Wsu
Drježdźany. Tři hornjołužiske wsy – Bluń a Wjernarjecy w Budyskim kaž tež Chrjebja-Nowa Wjes w Zhorjelskim wokrjesu – wobdźěla so na přichodnym kole 10. sakskeho krajneho wurisanja „Naša wjes ma přichod“. Dohromady 13 sakskich wsow wojuje nětko wo městnje za zwjazkowe wubědźowanje, kaž krajny zarjad za wobswět informuje.
Třinabožinska pěstowarnja
Krótkopowěsće (08.11.17)
Jednohłósnje přećiwo reformje
Podstupim. Braniborske knježerstwo je wčera jednohłósnje wobzamknyło wokrjesnu reformu njepřewjesć. „Běše to najćeši rozsud mojeje politiskeje karjery“, rjekny braniborski ministerski prezident Dietmar Woidke (SPD) po posedźenju knježerstwa. Za rozsud bě trjeba, wotwažować mjez ambicionowanej reformu a wolu, kraj dale hromadźe dźeržeć.
Amazon pyta sobudźěłaćerjow
Waršawa/Poznań. Internetny wikowar tworow Amazon pyta w Pólskej wjace hač 10 000 sobudźěłaćerjow za hodowne wobchodnistwo. Wobmjezowane dźěłowe mocy maja na stejnišćach we Wrócławju, Poznanju, Sosnowiecu a Kołbaskowje dźěłać. Dźěl z nich ma so po hodźoch kaž hižo 9 000 w předewzaću dźěłacych kruće přistajić.
Brunicy so wzdać
Krótkopowěsće (07.11.17)
Złoto gmejnje Rěčicy
Drježdźany. Sakski minister za wobswět Thomas Schmidt (CDU) je wčera w Drježdźanach Rěčicy z mytom European Energy Award w złoće wuznamjenił. Dwurěčna komuna Zhorjelskeho wokrjesa je jedna z dźesać, kotrež počesćichu za skutkowny škit klimy. Wot lěta 2012 su w Rěčičanskej gmejnje z lokalnym spěchowanskim programom mjez druhim 41 domow energetisce saněrowali a tak jich eficiencu zwyšili.
Zwyša zastaranski pjenjez
Budyšin. W dźěćacych dnjowych přebywanišćach, kotrež su w nošerstwje města Budyšina, ma so staršiski pjenjez zwyšić. Přičina toho su přiběrace zawodne kóšty a zastaranski kluč. Tuchwilne přiměrjenje móže městu a staršim dać planowansku wěstotu w moderatnym ramiku za dwě lěće. Maja-li starši tři dźěći w zastaranju, njetrjebaja za třeće dźěćo ničo płaćić.
Znowa wustajeńca w Stróži
Krótkopowěsće (06.11.17)
Bjez serbskeho zastupjerja
Kamjenica. Antje Feiks je nowa krajna předsydka sakskeje Lěwicy. Wona je so ze 104 hłosami přećiwo kontrahentej Andréjej Schollbachej (75 hłosow) na krajnym zjězdźe kónc tydźena w Kamjenicy přesadźiła. Serbski kandidat za krajne předsydstwo Hajko Kozel njedósta trěbnu wjetšinu hłosow. Dale zwrěšći namjet serbskeje Lěwicy, serbskopolitiskeho rěčnika krajneho předsydstwa we wosebitej jednotliwej wólbje wuzwolić. 64 procentow delegatow jón wotpokaza.
Z twarožkom w stolicy
Berlin/Koćina. Koćinski Krabatowy mlokowy swět je so wčera na twarožkowych wikach „Cheese Berlin 2017“ w němskej stolicy prezentował. Mjez druhim móžachu wopytowarjo we wikowanskej hali 9 twarožk z kirbsowymi zornjatkami woptać, kotryž je jednaćel Tobias Kockert poskićał. „Móžachmy so z druhimi twarožkarnjemi wuměnjeć a spóznachmy, zo móžemy pódla nich wobstać“, wón rjekny.
Dale wulkoměsto
Krótkopowěsće (03.11.17)
Znowa mjenje bjezdźěłnych
Budyšin. W oktobrje bě we wuchodnej Sakskej 19 371 ludźi bjez dźěła, 37 mjenje hač měsac do toho. Wuwiće překwapja, dokelž je ličba bjezdźěłnych minjene lěta sezony dla wot oktobra přiběrała. Powołanska kwalifikacija bjezdźěłnych a dalši přirost swobodnych městnow stej přičinje tohole wuwića, zwěsći šef Budyskeje agentury za dźěło Thomas Berndt.
W Błótach wjace kórkow žnjeli
Lubin. Po woteběracych ličbach su lětsa zaso wjace kórkow na błótowskich polach žnjeli. Jich bě wjace hač 30 000 tonow, kaž Błótowske towarstwo jako zastupjer plahowarjow wčera w Lubinje zdźěli. Loni nažnjachu 29 000 tonow kórkow. Wunošk móžachu stopnjować, byrnjež so plahowanska přestrjeń tele lěto tróšku pomjeńšiła.
Nowej hrjedźe na wěži
