Krótkopowěsće (24.11.17)
Muzej nimale hotowy
Choćebuz. Saněrowanje Choćebuskeho Serbskeho muzeja je nimale dokónčene. Nawoda měšćanskeho kulturneho zarjada Bernd Warchold je Choćebuskich radźićelow informował, poslednje dźěła hišće do hód zakónča. Tak móža klětu planowane nowe wustajenišćo zarjadować. Kaž z měšćanskeho zarjadnistwa dale rěkaše, liča z nowowotewrjenjom muzeja spočatk lěta 2019.
Trawna žaba dwojožiwc lěta
Mannheim. Eksperća pomjenowachu trawnu žabu za „dwojožiwca lěta 2018“. Zwěrjatko z brunej do žołtej kožu je w Němskej hišće daloko rozšěrjene, z městnami samo jara, zdźěli Němska towaršnosć za herpetologiju a terarijowědu w Mannheimje. Runje pola tejele družiny pak su fachowcy wulki spad wobstatka zwěsćili. Intensiwne ratarstwo kaž tež twar sydlišćow a dróhow žiwjenske rumy trawneje žaby jara wohrožatej.
Wapnowcowa łódź ma přestawku
Krótkopowěsće (23.11.17)
Studenća dyrbja wjac płaćić
Lipsk. Mnohe uniwersity w Sakskej dyrbja płaćiznu jědźe, podruže kaž tež semesterske popłatki zwyšić. Přičina su stupace personalne kóšty a woteběraca ličba studentow, zdźěla powěsćernja dpa. Drježdźanski studentski skutk informuje, zo dyrbja tam studowacy wot noweho lěta w mensach a kafeterijach 1,5 procentow wjac płaćić a wot apryla wo 5,40 eurow wyši semesterski popłatk.
Njezbožo přepytować přestali
Hof. Přepytowanja busoweho njezboža w juliju w Hornjej Frankskej su zastajene. Posudki fachowcow dotalne dopóznaća wobkrućeja, statne rěčnistwo Hof zdźěli. 3. julija bě šofer busa pućowanskeho předewzaća z Lubija na A 9 pola Münchberga kónc kopjenja wobchada přepozdźe widźał a do nakładneho awta zrazył. Bus so na to wupali, 18 ludźi přisadźi žiwjenje, třicećo so zranichu.
Přećiwo smogej w stolicy
Krótkopowěsće (21.11.17)
Synoda etat wobzamknyła
Drježdźany. Synoda ewangelsko-lutherskeje krajneje cyrkwje Sakskeje je na kóncu wuradźowanjow w Drježdźanach klětuši budget wobzamknyła. Tón předwidźi dochody a wudawki 218 milionow eurow, štož je nimale 7,2 milionaj eurow mjenje hač w lětušim etaće. Přičina je wočakowany spad dochodow z cyrkwinskeho dawka a z financneho zarunanja Ewangelskeje cyrkwje w Němskej.
Swjedźenske hry dale póńdu
Čorny Chołmc. Pokročowanje Krabatowych swjedźenskich hrow je zawěsćene. Kaž towarstwo Krabatowy młyn zdźěli, staj producentka swjedźenskich hrow Doris Siebecke a předsyda towarstwa Tobias Čižik njedźelu wotpowědne zrěčenje wo dalewjedźenje hač do 2023 podlěšiłoj. Klětu planuja 15 předstajenjow stawizny z Krabatom. Předpředań zastupnych lisćikow zahaja 15. januara.
Ze stawiznami so zaběrali
Krótkopowěsće (20.11.17)
Do předsydstwa přiwzaty
Drježdźany. Předsydstwo sakskeje SPD je minjeny pjatk w Drježdźanach dźěłowy kruh „Serbja“ jako poradźowacy gremij do krajneho předsydstwa přiwzało. Wo tym informuje 1. rěčnik wuběrka Benedikt Dyrlich. Dźěłowy kruh smě so přichodnje mjez druhim na wšěch zetkanjach krajneho předsydstwa wobdźělić a aktiwnje a bjezposrědnje na runinje sakskeje SPD wliw wukonjeć.
Zběrku powědkow předstajili
Radwor. Nazymske čitanje z noweje antologije „Mlóče“ su zajimcy minjeny pjatk w Radworskim „Słodeńku“ dožiwili. W Ludowym nakładnistwje Domowina wušłu publikaciju předstajichu nimo wudawaćelki Ingrid Juršikoweje awtorojo Měrana Cušcyna, Andreja Chěžcyna a Křesćan Krawc. Woni tež ze swojich powědkow čitachu. Mnozy dachu sej knihu signować.
Wo wuspěchach a ćežach zhonili
Krótkopowěsće (17.11.17)
Rozjimuja strukturnu reformu
Drježdźany. Ewangelska krajna cyrkej Sakskeje wotměwa wot dźensnišeho swoju nazymsku synodu. Hač do póndźele chcedźa w Drježdźanskej cyrkwi Třoch kralow kóždolětny etat rozjimać. Rozestajeć dyrbja so zdobom ze strukturnej reformu. Dale a mjenje čłonow dla je nuznje trjeba ličbu wosadow kaž tež dźěłowych městnow pomjeńšić. Namjety pod hesłom „Cyrkej z nadźiju“ drje předleža, su pak dwělomne.
Mjeńšinowe rěče w srjedźišću
Berlin. Zastupjerjo Zwjazka, zwjazkowych krajow a narodnych mjeńšin w Němskej su wčera w Berlinje na konferency mjez druhim wužiwanje mjeńšinowych rěčow rozjimali. Mjez wobdźělnikami běchu tež zastupnicy Domowiny. Konkretnje rěčeli su tež wo nałožowanju mjeńšinowych rěčow w zarjadach a kak dźiwaja na rěče we wupisanjach dźěłowych městnow.
Unikatna postawa
Krótkopowěsće (16.11.17)
Pomnik za pólske wopory NS
Berlin. Iniciatiwa wokoło bywšeju prezidentow zwjazkoweho sejma Rity Süssmuth (CDU) a Wolfganga Thiersy (SPD) žada sej pomnik za pólske wopory namócneho knjejstwa nacionalsocializma (NS). Pomnik měł wosrjedź Berlina nastać a na dohromady šěsć milionow Polakow dopominać, kotřiž stachu z woporom němskeho wobsadnistwa w lětach 1939 do 1945.
Rumunska na knižnych wikach
Lipsk. W srjedźišću Lipšćanskich knižnych wikow 2018 steji Rumunska. Wuchodoeuropski kraj chce tam wjace hač třiceći nowych přełožkow do němčiny a kulturny program předstajić. Za Myto Lipšćanskich knižnych wikow je 132 nakładnistwow dohromady 403 twórby zapodało. Literarne wuznamjenjenja w hódnoće dohromady 60 000 eurow spožča klětu w kategorijach beletristika, wěcowna literatura a přełožki.
Kwasnu kuču pokradnyli
Krótkopowěsće (15.11.17)
Wo šulach a jastwach rěčeli
Drježdźany. Sakski krajny sejm je so dźensa w aktualnej hodźinje z cyłodnjowskimi poskitkami na šulach a z personalnym połoženjom w jastwach zaběrał. Šulska tema złožuje so na namjet koalicije CDU/SPD. Debatu „Za lěsycami? Hrožacy kolaps w jastwach wotwobarać“ pak bě frakcija Lěwicy iniciěrowała. Jeje kritika zepěra so na přepjelnjene jastwo w Kamjenicy.
Spěchuja serbske projekty
Lubin. Wokrjes Dubja-Błóta chce tež klětu kulturne a serbske projekty přidatnje spěchować. Hač do kónca požadanskeje doby kónc oktobra su tež próstwy za štyri serbske projekty dóšli. Detaile njeje wokrjes žane mjenował. Za klětuše kulturne projekty přewostaji wokrjes Dubja-Błóta wjac hač 50 000 eurow, za serbske 10 000 eurow. Kónc lěta chcedźa rozsudźić, kak spěchowanske pjenjezy rozdźěla.
Planuja w Brnje metro twarić
Krótkopowěsće (14.11.17)
Myto do Wojerec
Wojerecy/Drježdźany. Sakska ministerka za wědomosć a wuměłstwo dr. Eva-Maria Stange je wčera w Drježdźanach Wojerowski kompjuterowy muzej Konrada Zuseho ZCOM ze Sakskim muzejowym mytom wuznamjeniła. ZCOM dokumentuje techniske wuwiće ličenja a předźěłanja datow a ma najwobšěrnišu zběrku k temje. Myto je z 20 000 eurami dotěrowane.
Pytaja wuwučowacych
Baršć. Wokrjesna ludowa uniwersita Sprjewja-Nysa pyta za zaručenje nalětnjeho semestra 2018 wjacorych docentow. Swobodnje abo přidatnje k powołanju wuwučowacych trjebaja wosebje w regionalnych wukubłanišćach w Baršću, Gubinje a Grodku. Wobłuki, kotrež zajimcam poskićeja, su towaršnosć, kultura, strowota, powołanje a rěče, mjez nimi pólšćina.
W Błótach pisać
Bórkowy. Błótowska kulturna załožba a Bórkowski hotel Bleiche stej wupisałoj mjeztym 11. błótowski literarny stipendij. Požadać móža so hač do 15. januara 2018 awtorojo, kotřiž w němskej rěči pisaja a publikuja. W běhu rezidencneho stipendija, přebywacy wjacore tydźenje w Bórkowach, wěnuja so dobyćerjo tworjenju noweje literatury.
Krótkopowěsće (13.11.17)
Žurnalistiske myto spožčene
Nürnberg. Němsko-čěski fonds přichoda, Němski zwjazk žurnalistow a Čěski zwjazk žurnalistow su pjatk w Nürnbergu němsko-čěske žurnalistiske myto spožčili. Dobyćerjo su w kategoriji tekst Tomáš Lindner a Kilian Kirchgeßner, w kategoriji zwuk Pavel Polák a Peter Lange a w kategoriji multimedia Veronika Kupková a Olga Komarevtseva kaž kaž tež Thomas Purschke a Hans-Jürgen Büsch. Myto je z 2 000 eurami dotěrowane.
Amazon tež čěsce rěči
Praha. Čěske e-shopy maja konkurencu. Internetna němska wersija ameriskeje firmy Amazon skići wot najnowšeho wšitke twory tež w čěšćinje. W tejle rěči móža kupcy tež ze serwisom abo z klientskej podpěru komunikować. Čěšćina je hakle pjata rěč, do kotrejež su poskitk Amazona přełožili. Kupcy móža wolić, hač chcedźa wupytane twory w eurach abo čěskich krónach zapłaćić.
Na wustajeńcach zastupjena
Krótkopowěsće (10.11.17)
Bój dale traje
Choćebuz. Braniborska ministerka za kubłanje, młodźinu a sport Britta Ernst (SPD) je so dźensa wo serbskim šulstwje w Delnjej Łužicy informowała. Přeprosyła bě ju staršiska iniciatiwa. Ta so boji, zo njezměje přichodnje hižo 77 procentow šulerjow, kotřiž chcedźa serbšćinu wuknyć, noweho šulskeho postajenja dla k tomu wotpowědny poskitk.
Znowa přestorčene
Kulow. Saněrowanje mosta nad Čornym Halštrowom w Hózku je Kulowska měšćanska rada znowa přestorčiła. Přičina su wažniše a nuznje trěbne porjedźenske dźěła w komunje, hdźež su wobjězdki trěbne, rěkaše z Kulowskeje radnicy. Nowy termin zwottorhanja a nowotawra mosta je februar 2019. Dźěła chcedźa w nowembru zakónčić.
Dźěła zakónčene
