Krótkopowěsće (11.09.17)
Dale z titlom UNESCO
Stróža. Biosferowy rezerwat Hornjołužiska hola a haty je na dalše dźesać lět „biosferowy rezerwat UNESCO“. Po wuspěšnej ewaluaciji přepoda Margret Brahms, čłonka narodneho komiteja Man-and-Biosphere, na sobotnych přirodowych wikach w Stróži wotpowědne wopismo sakskemu ministrej za wobswět Thomasej Schmidtej (CDU).
Wjelk do wowčernje so zadobył
Budyšin. Krajny rada wokrjesa Budyšina Michael Harig (CDU) bě hakle minjeny pjatk sakskemu wobswětowemu ministerstwu próstwu zapodał, na wjelki Róžeńčanskeje črjódy třěleć směć. Jeničce dźeń pozdźišo, w nocy na njedźelu, zadoby so wjelk do wowčernje na Šunowskim klóšterskim kuble. Jednu wowcu na łuce je rubježne zwěrjo nimale dospołnje zežrało. Paniki we wowčerni dla je jehnjo zahinyło.
Nowe pišćele zaklinčeli
Krótkopowěsće (08.09.17)
Přeprošeja na swjedźeń
Raduš. Błótowska wjes Raduš, dźěl města Wětošowa, wuhotuje jutře a njedźelu 14. braniborski wjesny a žnjowodźakny swjedźeń. Sobotu wustupi Serbski ludowy ansambl, Sarah Gwiszcz prezentuje swoju modu labela Wurlawy. Serbski program ze sćelakom RBB chce hosći njedźelu runje tak zawjeselić kaž spěwytwórc Bernd Pittkunings.
Ćežke zemjerženje
Podstupim. Zemjerženje sylnosće 8,4 je dźensa rano mexiski přibrjóh Pacifika trjechiło. Střasenje zemje bě samo w 700 kilometrow zdalenej stolicy Mexiku-city čuć. Konkretne informacije wo škodach abo woporach dotal hišće žane njepředleža. Nětko warnuja tam zarjady před tsunamijom.
Zawěranske pasmo zarjadowali
Krótkopowěsće (07.09.17)
Stawk pola MDR zakónčeny
Drježdźany. Po třoch dnjach stawka w sćelaku MDR wšitko zaso normalnje běži. Kaž wottam wčera zdźělichu, su so MDR a dźěłarnistwa we hłownych dypkach dojednali. Dalše detaile znate njejsu. Minjene dny je sćelak stawka přistajenych dla časćišo swoje wusyłanja přetohrnyć dyrbjał. Nastupajo wjace mzdy za sobudźěłaćerjow su dźěłarnistwa a MDR kompromis našli.
Arno Rink njeboh
Lipsk. Sakska žaruje wo molerja a rysowarja Arna Rinka. Załožer Noweje Lipšćanskeje šule zemrě po informaciji swojeje galerije zawčerawšim w klinice na raka, tři njedźele do 77. narodnin. Z nim zhubi kraj „wliwapołnu wosobinu“ wuměłskeje sceny, kotraž je daloko přez swoje tworjenje skutkowała, rjekny ministerski prezident Stanisław Tilich (CDU).
Čěski Lidl protestuje
Krótkopowěsće (06.09.17)
Wurjadne posedźenje sejmika
Budyšin. Na wurjadnym posedźenju Budyskeho wokrjesneho sejmika póndźelu, 18. septembra, zaběraja so wokrjesni radźićeljo z namjetami frakcijow nastupajo dwělomnu komunikaciju zastupowaceho krajneho rady Uda Wićaza (CDU) z bywšim wokrjesnym předsydu NPD. SPD/Zeleni a Lěwica žadaja sej wotstup Wićaza, FDP a Swobodni wolerjo dospołne wujasnjenje toho, štož je so stało.
Žurnalistiska wuměna
Drježdźany/Budyšin. We wobłuku žurnalistiskeje wuměny Zwjazka žurnalistow Němskeje (DJV) w Sakskej a čěskim Syndikatom nowinarjow přebywaše redaktorka Čěskeho rozhłosa Martyna Radłowska-Obrusník z Ostravy tři dny w Budyšinje. Wona wopyta Serbski muzej, redakciju Serbskeho rozhłosa a redakciju Serbskich Nowin. Jeje hłowny dźěłowy předmjet je žiwjenje Polakow w Čěskej.
Z awtonomnym busom po puću
Krótkopowěsće (05.09.17)
Jednanje zahajene
Kamjenica. Sakska krajna direkcija je disciplinarne jednanje přećiwo zwadnemu Budyskemu zastupowacemu krajnemu radźe Udej Wićazej (CDU) zahajiła. Wo tym rozprawješe wčera sćelak MDR. Po raznej kritice na jeho dwělomnej komunikaciji z bywšim Budyskim wokrjesnym předsydu NPD bě Wićaz sam disciplinarne jednanje nastorčił.
Pola MDR stawkowali
Lipsk. Stawk w centrali sćelaka MDR w Lipsku je wčera změny aktualneho programa zawinił. Něhdźe 250 přistajenych je připołdnju dźěło přetorhnyło, zdźěli jednaćel Zwjazka žurnalistow Němskeje w Durinskej (DJV) Ralf Leifer. Nimo DJV běštej tež posłužbowe dźěłarnistwo ver.di a Němske orchestrowe zjednoćenstwo k stawkej namołwjałoj. Mjez druhim žadaja sej 5,5 procentow wjace mzdy.
Woprašuja so w busach a ćahach
Krótkopowěsće (04.09.17)
Prezentuja serbskorěčne logo
Slepo. Składnostnje 20. němsko-serbskich wikow přirody 9. septembra w Stróži prezentuja logo w hornjoserbskej rěči na Domje tysac hatow. Wo tym informuje towarstwo Serbski kulturny turizm. Cyłk podpěruje stejišćo Domowiny a pokazuje zdobom na zwoprawdźenje dwurěčnosće nastupajo wobłukowy koncept biosferoweho rezerwata.
Najčasćišo gripy dla chori
Budyšin. Šnupa, gripa a bronchitis běchu loni w Sakskej najčasćiše přičiny choroby dźěławych. To zdźěla Budyska Překupska chorobna kasa. 31 procentow ludźi bě tohodla přerěznje 8,1 dźeń chorych. Na 2. městnje statistiki w Sakskej steja z podźělom wjac hač 14 procentow schorjenja muskloweho a kosćoweho systema kaž tež problemy z chribjetom.
Ponowja čěske wulkopósłanstwo
Krótkopowěsće (01.09.17)
Wučerjo pobrachuja
Brandenburg. Něšto dnjow do noweho šulskeho lěta pobrachuje w Braniborskej hišće něhdźe 200 wučerjow. Zdobom dyrbja w kraju z tym ličić, zo přichodne dny hišće někotři absolwenća wotskoča, dokelž su w druhich zwjazkowych krajach wučerske městno našli, zdźěli krajny předsyda braniborskeho dźěłarnistwa za kubłanje a wědomosć Günther Fuchs.
Naměstnik wotwołany
Bórkowy. Gmejna Bórkowy je bjez zastupowaceho wjesnjanosty. Kaž wottam rěka, je gmejnska rada na zašłym posedźenju tón tydźeń dotalneho prěnjeho naměstnika Siegberta Budischina hnydomnje wotwołała. Zdobom bu wón jako zastupjer gmejny w zarjadniskim wuběrku Bórkowskeho zarjada wotwołany. Čehodla Budischina wotwołachu, njeje znate.
Nowy mineral namakali
Krótkopowěsće (31.08.17)
Otto wostanje předsyda DGB
Budyšin. Bywši wokrjesny předsyda Zwjazka němskich dźěłarnistwow (DGB) Jan Otto zastojnstwo dale wukonja. Wón zastupuje w DGB dźěłarnistwo IG metal. Jeho naměstnik budźe přichodnje Maik Springer z dźěłarnistwa policije.
Na dobro pacientow parkinsona
Zły Komorow. Na Braniborskej techniskej uniwersiće Choćebuz-Zły Komorow slědźa wo parkinsonowej chorosći. Kaž uniwersita zdźěla, naćisnu, twarja a programěruja studenća a docenća medicinskeje informatiki w Złym Komorowje software, kotraž pohiby pacientow registruje a składuje. Na zakładźe datow slědźerjo zwěsćeja, kotra terapija potrjechenym najlěpje pomha.
Lěpši škit policistam
Praha. Po zdźělenju direktora Praskeje měšćanskeje policije Eduarda Šustera je planowane kupić za nju njepřetřělomne lacy. Balistiski škit pod košlu ma so ze wšědnym wuhotowanjom wšitkich wjace hač 2 000 Praskich policistow stać. Tučasnje wuběraja probowe modele lacow, kotrež chcedźa w praktiskim wužiwanju pruwować.
Hrajer Liškow wabi za lodohokej
Krótkopowěsće (30.08.17)
Chór Lipa z nowej předsydku
Pančicy-Kukow. Julia Jankowscyna je nowa předsydka Lipy. Čłonojo chóra wuzwolichu ju wčera do zastojnstwa. Nowowólby běchu trěbne, dokelž njebě Drježdźanske zarjadniske sudnistwo zašłe wólby připóznało a dokelž bě bywša předsydka Lipy Franciska Zopic funkciju złožiła. Městopředsydka wostanje Melanie Bulankowa, pokładnik Uwe Pjetaš.
Ludowe požadanje zahajene
Podstupim. W Braniborskej su zawčerawšim ludowe požadanje přećiwo dwělomnej wokrjesnej reformje zahajili. W běhu šěsć měsacow trjebaja nětko 80 000 podpismow, zo by k ludowemu rozsudej dóńć móhło. Krajne knježerstwo ma wotpohlad, ličbu wokrjesow w Braniborskej pomjeńšić a z nich wulkowokrjesy wutworić.
Móža strowe, ale tež strašne być
Krótkopowěsće (29.08.17)
Wobruči awta wobškodźili
Budyšin. Njeznaći su awto wólbneju pomocnikow Lěwicy w Budyšinje wobškodźili. Kaž strona wčera zdźěli, běštaj pomocnikaj njedźelu wječor plakaty připrawiłoj. Při tym bě jimaj něchtó dwě wobruči awta rozkałał. Kaž Lěwica dale piše, wobkedźbuja lětsa wosebje wjele wěcnych wobškodźenjow. Tak su plakaty pomórane, roz- abo samo zwottorhane.
Manufaktura wuznamjenjena
Wjazońca. Wosebite wuznamjenjenje sakskich rjemjeslniskich komorow dósta wčera manufaktura Saxonia Feinsteinzeug ze sydłom we Wjazońcy. We wobłuku swjedźenskeho zarjadowanja spožčenja Sakskeho statneho myta za inowaciju přepodachu předewzaću myto inkluziwnje 5 000 eurow.
Spřećiwjeja so planam ČEZ
Nový Bor. Sewjeročěske město Nový Bor kaž tež wokolne gmejny wojuja přećiwo planam energijoweje firmy ČEZ čary wysokich elektriskich sćežorow 110 kilovoltow dla. Namjetowany 30 kilometrow dołhi wusyk měł cyłe čěske Łužiske hory přeprěčić. Potrjecheni so boja, zo 40 metrow wysoke sćežory panoramu horin wobškodźa a tak zdobom turistiskemu zwičnjenju škodźa.
