Krótkopowěsće (25.04.17)
Najrjeńše jejka wuzwolili
Budyšin. Mjez 35 kolekcijemi jednotliwcow w starobje štyrjoch do 25 lět a 92 kolekcijemi 2. do 4. lětnika Kulowskeje Krabatoweje šule je jury Spěchowanskeho kruha za serbsku ludowu kulturu wčera najrjeńše serbske jutrowne jejka dorosta wuzwoliła. Spěchowanske myto dóstanje 16lětna Sophie Hejduškec z Noweho Łusča. Dobyćerske kolekcije wustaja nětko w Budyskej SKI.
Mytuja twarske projekty
Drježdźany. Sakska pyta za najrjeńšim domom we wjesnych kónčinach. Hač do 15. meje móža priwatnicy, předewzaćeljo a komunalni twarcy kaž tež architekća a inženjerojo swoje projekty za krajne wubědźowanje „Twarić we wjesnych kónčinach“ zapodać. Wuznamjenić chcedźa přikładnje ponowjene twarjenja runje tak kaž dospołnje nowe.
Wjace potrěbnych doma hladaja
Kamjenc. Lěta 2015 su w Sakskej 117 677 hladanja potrěbnych doma zastarowali. To bě 14 725 wjace hač 2014. Wo wjace hač połojcu potrěbnych starachu so swójbni abo přećeljo, za čož dóstachu hladanski pjenjez. Něhdźe 50 000 ludźi trjebaše ambulantnu słužbu, zdźěla statistiski krajny zarjad w Kamjencu.
Krótkopowěsće (24.04.17)
W rozmołwje z wobydlerjemi
Plauen. Sakski ministerski prezident Stanisław Tilich (CDU) zahaji dźensa wječor w Plauenje swoju rozmołwnu turu. K zahajenju chce so wón pod hesłom „Zhromadnje w Sakskej – za sylny přichod“ z Plauenskimi wobydlerjemi zetkać. Sto ludźi je so za to přizjewiło. Tilich planuje pjeć zarjadowanjow. Přichodne budźe 2. meje w Biskopicach.
Nadpady na stronske běrowy
Lipsk. Politikarjo a běrowy zapósłancow su dale cil nadpadow, byrnjež ličba atakow woteběrała. Lěwica je w prěnim kwartalu pjeć nadpadow zličiła. Prěnje tři měsacy 2016 bě jich hišće 22. AfD rozprawja wo nadpadomaj na běrow w Budyšinje a Zhorjelcu. Tež SPD a CDU stej tajke nadpady registrowałoj.
Tójšto wobdźělnikow
Bórkowy. Wjace hač 12 200 sportowcow je so na kónctydźenskim 15. błótowskim marathonje w Bórkowach, Lubnjowje, Lubinje a Tšupcu wobdźěliło. To je 300 wjace hač loni, kaž zarjadowarjo zdźěleja. Z wjace hač 1 300 wobdźělnikami bě 200 kilometrow dołha kolesowarska čara najbóle prašana.
Boll němske finale dobył
Krótkopowěsće (21.04.17)
Disertaciju wuspěšnje zakitował
Lipsk. Historikar a sobudźěłaćer Serbskeho instituta Friedrich Pollack je wčera na Lipšćanskej uniwersiće swoju disertaciju wuspěšnje zakitował. Něhdźe 25 hosći sćěhowaše čiłej diskusiji k serbskim prědarjam ewangelskeho duchownstwa w zažnej nowowěkowskej Hornjej Łužicy. Fakulta za stawizny, wuměłstwowe a orientowe wědomosće spožči jemu najlěpši posudk „summa cum laude“.
Nowe jednanje za Wochozy?
Zhorjelc. Po cofnjenju dotalneho plana dalšeho wudobywanja brunicy we Wochožanskej wuhlowej jamje přez energijowy koncern LEAG njeje hišće znate, hač dyrbi so planowanska procedura znowa přewjesć abo hač je wobstejacy plan dale płaćiwy. Tole je předsyda hornjołužisko-delnjošleskeho regionalneho planowanskeho zwjazka, Zhorjelski krajny rada Bernd Lange (CDU), nowinarjam zdźělił.
Inwestuja w Leppersdorfje
Krótkopowěsće (20.04.17)
Wubědźowanje w serbskej rěči
Wodowe Hendrichecy. Za lětušu 51. olympiadu serbšćiny je so 70 šulerjow 6. lětnikow z wosom šulow a štyrjoch gymnazijow Hornjeje a Delnjeje Łužicy přizjewiło. Wot 24. do 26. apryla 2017 maja wone wšelake pisomne a ertne nadawki spjelnić. Nimo 15 wučerkow a wučerjow stara so wo olympionikow dźewjeć studentow wučerstwa. Nošer olympiady je Serbske šulske towarstwo.
Masowa zražka w sněze
Poprad. W Słowakskej je so při masowej karambolaži w sněhowym wichoru na awtodróze 25 ludźi zraniło. Po informacijach wohnjoweje wobory bě njedaloko Poprada dźensa rano nimale 40 awtow do so zrazyło. Najwažniši nadróžny zwisk mjez wuchodom a zapadom kraja dyrbjachu na to do wobeju směrow zawrěć. Tež na sewjeru kraja dóńdźe k zražkam. Nakładne awta blokuja dróhi.
Knižny dar dźěćom
Drježdźany. Něhdźe 58 000 šulerjam štwórtych a pjatych lětnikow a integraciskich rjadownjow w Sakskej chcedźa k lětušemu Dnjej knihi knižny dobropis přepodać. To je telko kaž hišće nihdy, dźensa w Drježdźanach připowědźichu. Za čitansku akciju bě so 2 600 rjadownjow swobodneho stata přizjewiło.
Krótkopowěsće (19.04.17)
Minister Baaske přijědźe
Podstupim/Bórkowy. Braniborski minister za kubłanje, młodźinu a sport Günter Baaske (SPD) chce so na městnje wo połoženju wučby serbšćiny wobhonić. Kaž rozprawja delnjoserbski rozhłós, je minister za 5. meju wopyt w Bórkowskej šuli „Mina Witkojc“ připowědźił. Wopyt je reakcija na protesty přećiwo planam wučbu serbšćiny wobmjezować.
Komplikowany termin
Flensburg. 4. europeada w lěće 2020 móhła so w juniju abo spočatk julija přewjesć. To namjetujetej móžnej wuhotowarjej, Korutanscy Słowjency a zwjazk mjeńšin namjezneho regiona w sewjernej Němskej. Na łužiskej koparskej wokrjesnej runinje su w tym času hišće winowatostne hry a na regionalnej běža hižo přihoty na nowu sezonu. Zamołwići wuradźuja tuž hižo wo móžnych změnach.
Mjenje njezbožow z dźiwinu
Krótkopowěsće (18.04.17)
Eksplozija w Zhorjelcu
Zhorjelc. Před wjaceswójbnym domom w Zhorjelcu dóńdźe w nocy na dźensa k eksploziji. Po informacijach policije su so durje a awto wobškodźili. Wosoby so žane zranili njejsu. Wěstoty dla su jeno skrótka 18 wobydlerjow doma ewakuěrowali. Přičina eksplozije dotal jasna njeje. Pad pak fachowcy nětko dokładnje přepytuja.
Žane awta a motorske na móst
Drježdźany. Znaty Drježdźanski Awgustusowy móst je za indiwidulany wobchad zawrjeny. Tole zdźěli dźensa rěčnica Drježdźanskeje radnicy. Po wobzamknjenju měšćanskeje rady smědźa po ponowjenju jenož pěškojo, taksije, tramwajki, chorobne awta, wohnjowa wobora abo busy z měšćanskimi wodźenjemi móst wužiwać.
Wobchadne haćenja sněha dla
Lipsk. Zyma a sněh stej so w mnohich kónčinach Sakskeje za mylenja wobchada postarałoj. W Rudnych horach je sněh samo ležo wostał. We Łužicy maja šoferojo niskich temperaturow dla z hładkimi dróhami ličić. Tu a tam móže so tež sněžić. Wot štwórtka maja temperatury zaso stupać.
Čara za běh ze smólnicu jasna
Krótkopowěsće (13.04.17)
Chcedźa dale wojować
Drježdźany. Towarstwo „Dlěje zhromadnje wuknyć“ chce tež po schwalenju noweho sakskeho šulskeho zakonja wo swoje zaměry wojować. Nowy zakoń jeho čłonow při tym „motiwuje“, kaž woni praja. Towarstwo dźělenje rjadownjow po 4. lětniku wotpokazuje. Krajny sejm bě wutoru z hłosami CDU a SPD wobzamknył, zo so wobstejacy system njezměni.
Dźěćo do jězora padnyło
Wownjow. Při tak mjenowanej předzawěrje Budyskeho spjateho jězora pola Wownjowa (Oehna) je dźensa dopołdnja pěstowarske dźěćo do wody padnyło. Alarmowani wohnjowi wobornicy třilětnu holcu z wody wućahnychu a reaniměrowachu. Z helikopterom dowjezechu holčku do chorownje. Kak bě k njezbožu dóšło, policija přepytuje.
Bamž: Měr na swěće zachować
Krótkopowěsće (12.04.17)
Gmejnje hrožacy list pisał
Radwor. Wjesnjanosta Wincenc Baberška (CDU) je na wčerawšim posedźenju Radworskeje gmejnskeje rady z jeje čłonami wo lisće wuradźował, kotryž bě wobsedźer Kaponicy pola Łupoje napisał. W nim wón připowědźi, sej wšitke wudawki za wudźeržowanje puća wot gmejny wróćo žadać. Zjawny puć wjedźe hižo dawno přez horu, leži pak nětko zdźěla na priwatnej ležownosći wobsedźerja.
Rozdźělny wid na kriminalitu
Drježdźany. W Sakskim krajnym sejmje zastupjene politiske strony su dźensa dosć emocionalnje a kontrowersnje wo přiběracej kriminaliće diskutowali. Lěwica sej žadaše za přičinami pytać. CDU zakitowaše naprawy kaž wobkedźbowanje a wotsunjenje kriminelnych wukrajnikow. Zeleni warnowachu před paniku.
Mjenje negatiwnych powěsćow
Krótkopowěsće (11.04.17)
Šulski zakoń schwaleny
Drježdźany. Sakski krajny sejm měješe dźensa wo nowym šulskim zakonju kraja, centralnym předewzaću knježerstwa CDU a SPD, wothłosować. Zakoń zmóžnja lětnik přesahowacu wučbu a ma zawrjenju šulow we wjesnych kónčinach zadźěwać. Kritikarjo na to skedźbnjeja, zo zakoń žadanje za dlěšim zhromadnym wuknjenjom dźěći njespjelnja. CDU na dotalnym rjadowanju wobstawa.
Mjenje gmejnow w Sakskej
Kamjenc. Ličba gmejnow w Sakskej je loni dale woteběrała. Tole wuchadźa z noweho zapisa gmejnow, kaž Kamjenski krajny statistiski zarjad informuje. Tak bě 1. januara 2017 cyłkownje 423 gmejnow w swobodnym staće, tři mjenje hač loni w samsnym času. Statistikarjo zličichu 170 městow, mjez nimi tři bjezwokrjesne Drježdźany, Lipsk a Kamjenica.
Wólbomat trojorěčny
Flensburg. Wobydlerjo Schleswigsko-Holsteinskeje maja 7. meje nowy krajny sejm wuzwolić. Lětsa budźe wólbomat – z nim móže kóždy woler do wólbow zwěsćić, kotrej stronje je najpřichileniši – prěni króć tež frizisce a dansce k dispoziciji, kaž mjeńšinowy sekretariat w Flensburgu zdźěla.
Krótkopowěsće (10.04.17)
Protestny pochod wotprajeny
Rowno. Zwjazk „Strukturnu změnu nětko – žanu jamu Wochozy II“ je swój za 23. apryl planowany protestny pochod přećiwo dalšemu wudobywanju brunicy wotprajił. Hłowna přičina je najnowši rozsud energijoweho zastaraćela LEAG, Rowno a Mułkecy njewotbagrować. „Respektujemy, zo dyrbja wobydlerjo Rownoho połoženje najprjedy raz předźěłać.“
Komisarej EU so wuskoržili
Storkow. Braniborscy rybarjo su zamołwitemu komisarej Europskeje unije swoje starosće z čaplemi, bobrami a wudrami přednjesli. Komisar Karmenu Vella jim na wopyće w Storkowje přilubi, zo chcył naležnosć pruwować dać. Po měnjenju rybarjow su krute škitne naprawy za mjenowane zwěrjata wina na masiwnych problemach w rybarstwje.
Ptaki lětanišćo wobstražuja
