Krótkopowěsće (16.04.18)
Dešno a Drjowk dobyćerjej
Lubin. Wjesny dźěl Dešno gmejny Dešno-Strjažow a město Drjowk stej dobyćerjej třećeho wubědźowanja „Rěči přichilena komuna – serbska rěč je žiwa“ w Braniborskej. Wiceprezident Krajneho sejma Braniborskeje Dieter Dombrowski (CDU) je jimaj myće na wuznamjenjenskim zarjadowanju pjatk w Lubinje přepodał. 17 městow a gmejnow a jedyn zarjad běštej so požadałoj.
„Zmij“ wospjet mytowany
Lipsk. Wojerowska filmowča Angela Schuster a kamerownik Martin Rattke buštaj wčera na wubědźowanju krótkofilma „Kurzsuechtig“ w Lipsku we wobłuku fikcija z dorostowym mytom wuznamjenaj. Wonaj běstaj so ze swojej twórbu „Zmij“ na wurisanju wobdźěliłoj. Film předstajeja mjez druhim přichodny štwórtk w Budyšinje.
Bretonojo su znowa hosćo
Krótkopowěsće (13.04.18)
Institut na datowych wikach
Lipsk. Budyski Serbski institut wobdźěli so na tak mjenowanym kulturnym hackathonje Coding da Vinci. Na jutřišim zarjadowanju zetkaja so wuwiwarjo software a hardware w Lipšćanskej uniwersitnej bibliotece. Zaměr je, na zakładźe swobodnje přistupnych digitalizatow nowe kompjuterowe programy tworić. Institut přewostaji za to daty „statistiki Serbow“ a historiske fota.
Deklaracija Łužiskeje aliancy
Landshut. Za lětuši kongres Europskeje swobodneje aliancy (EFA) je Łužiska alianca deklaraciju zapodała. W njej namołwja Němsku, Saksku a Braniborsku, zo bychu wutworjenje demokratisce legitimowaneho ludoweho zastupnistwa Serbow aktiwnje podpěrali. Nimo toho je EFA prošena, pósłać mjezynarodnych wólbnych wobkedźbowarjow na zjawne wuličenje hłosow. Kongres EFA je dźensa a jutře w bayerskim Landshuće.
Wowčerjo peticiju přepodali
Krótkopowěsće (12.04.18)
Wustajeńca wo Minje Witkojc
Bórkowy. W Domizniskej stwě Bórkowy su wčera wosebitu wustajeńcu, mjez druhim priwatnych fotow a listow, wuznamneje basnjerki Miny Witkojc k jeje 125. posmjertnym narodninam wotewrěli. Přehladka wobsahuje tež nahrawanja, na kotrychž je Delnjoserbowka słyšeć. Ludowe nakładnistwo Domowina přihotuje w tym zwisku słuchoknihu.
Literarne dny zahajene
Zhorjelc. Pod hesłom „Crossing borderlands (mjezy překročić)“ su wčera lětuše Literarne dny podłu Nysy zahajili. Hač do njedźele wotměwaja so na woběmaj bokomaj Nysy mjez druhim pólsko-němske čitanja, matineje a podijowe diskusije. Wjeršk budźe němskorěčna prapremjera dokumentarneho filma Łukasza Chwałka „Jacob Böhme – Žiwjenje a skutk“.
Busowe dwórnišćo ponowja
Varnsdorf. Žadanjam časa hižo njewotpowědowace busowe dwórnišćo w centrumje Varnsdorfa ma so lětsa ponowić. Jeho modernizacija w hódnoće 1,65 milionow eurow je pak hakle spočatk cyłkowneje rekonstrukcije Naměsta Edvarda Beneša, kotrež měło po planowanym dotwarje nowy a wjele dostojniši napohlad dóstać.
Krótkopowěsće (11.04.18)
Za wjace serbskosće w cyrkwi
Podstupim. Rada za serbske naležnosće Braniborskeje je so wčera w Podstupimskim krajnym sejmje schadźowała. Mjez hosćimi bě dr. Hartmut Leipner, předsyda Spěchowanskeho towarstwa za serbsku rěč w cyrkwi, kaž předsyda rady Torsten Mak SN zdźěli. Leipner sej přeješe, zo by so serbskosć w cyrkwjach sylnišo jewiła.
Skruća financnu móc komunow
Drježdźany. Wokrjesam přisłušne komuny maja za lěta 2018 do 2020 stajnje 70 eurow za prěnje tysac wobydlerjow dóstać, maksimalnje 70 000 eurow. To předwidźi naćisk zakonja wo přizwolenju pawšalnych připokazankow k skrućenju wjesneho ruma, kotryž je sakski kabinet wčera schwalił. Hač do lěta 2020 podpěruja financnu móc sakskich komunow dohromady z 90 milionami eurow.
Romojo so sami ličili
Krótkopowěsće (10.04.18)
Myto Danielej Libeskindej
Zhorjelc. Architekt Daniel Libeskind z USA je lawreat lětušeho Mjezynarodneho mostoweho myta europskeho města Zhorjelca-Zgorzeleca. Počesćeny přiwobroća so přeco zaso temam, kotrež „bjezdna swětowych stawiznow w 20. a 21. lětstotku pokazuja a zmóžnjeja wobhladowarjej dopóznaće, zo njesmě so tajke něšto ženje wjace stać“, zdźěli towaršnosć k spožčenju myta wčera w Zhorjelcu.
Namjety hišće zapodać
Rakecy. Hišće hač do pjatka, 13. apryla, je chwile, požadać so ze swojimi projektami za wuwiće wjesneho ruma wo spěchowanje we wobłuku dźewjateje projektoweje namołwy Leaderoweho regiona Hornjołužiska hola a haty. Na to skedźbnja regionalny management w Rakecach, kotryž próstwystajerjow tež fachowje poradźuje. Tónkróć je budget 2,6 milionow eurow k dispoziciji.
Społnomócnjeny SPD za wuchod
Krótkopowěsće (09.04.18)
Pjate protestne pućowanje
Rowno. We wobłuku wčerawšeho protestneho pućowanja wot Slepoho do Rownoho žadaše sej 120 wobdźělnikow, zo měli wot brunicowych jamow potrjecheni w přichodnej wuhlowej komisiji zwjazkoweho knježerstwa sobu skutkować. K akciji namołwiło je iniciatiwne zwjazkarstwo „Strukturnu změnu nětko – žane Wochozy II“. Přewjedli pak su tež přećiwnu demonstraciju.
Nowowudaće powědančka
Budyšin. Najskerje najznaćiše powědančko Marje Kubašec „Row w serbskej holi“ je w Ludowym nakładnistwje Domowina znowa wušło. Kapsna kniha wobsahuje stawiznu w serbskim originalu kaž tež přełožkaj w němčinje a pólšćinje. Nimo toho wopřijima wědomostny nastawk Trudle Malinkoweje, kotryž historiske pozadki podawizny wobswětla.
Premiju za zatřělene swinje
Krótkopowěsće (06.04.18)
Wabja za wopyt jězoriny
Zły Komorow/Praha. Turistiski zwjazk Łužiska jězorina wabi wot dźensnišeho na Praskich wikach „For Bikes“ za swoje poskitki. Turisća ze susodneho kraja su zwjazkej wažny hospodarski faktor, wšako ličba wopytowarjow wottam dale přiběra. Z předewšěm čěskorěčnym materialom wabja w Praze hač do njedźele za wopyt łužiskeje jězoriny z ćežišćom kolesowanje a skating.
Domiznowědne wubědźowanje
Drježdźany. 9 000 eurow nałoži sakske ministerstwo za kultus za domiznowědne wubědźowanje. Hač do 7. meje su domiznowědnicy namołwjeni, swoje dopóznaća jako ćišćanu knihu, nastawk abo w multimedialnej formje předpołožić. Zajimcy móža so mjez druhim zaběrać ze stawiznami kraja, industrije, ze škitom přirody, z Němcami a Serbami kaž tež z integraciju.
Najwjetša „pjeluškarnja“ swěta?
Krótkopowěsće (05.04.18)
Nowy rěčnik w sakskim sejmje
Drježdźany. Zapósłanc Sakskeho krajneho sejma Alojs Mikławšk je wotnětka nowy rěčnik frakcije CDU za serbske naležnosće. Minjene nimale 30 lět bě Marko Šiman zastojnstwo wukonjał. ,,Hladajo na dale přiběrace mnóstwo nadawkow je tak parlamentariske skutkowanje za serbske naležnosće lěpje rozdźělene“, zdźěli Šiman medijam.
Naprašowanje knježerstwu
Drježdźany. Frakcija Zelenych w sakskim sejmje je knježerstwu stajiła wulke naprašowanje nastupajo połoženje šulow w swobodnym nošerstwje. Hač do 13. junija ma kabinet chwile wotmołwić. Po noweli zakonja wo šulach w swobodnym nošerstwje z lěta 2015 a po lońšej noweli šulskeho zakonja stejitej w srjedźišću naprašowanja zakonske rjadowanje a praksa runoprawosće mjez šulemi w zjawnym a swobodnym nošerstwje.
Minister Schmidt w Pólskej
Krótkopowěsće (04.04.18)
Wubědźuja so w serbšćinje
Wodowe Hendrichecy. Wot 9. do 11. apryla 2018 wotměje so we Wodowych Hendrichecach 52. olympiada serbšćiny. 64 šulerjow 6. lětnikow, kotrež přińdu z dźesać šulow Hornjeje a Delnjeje Łužicy, je so na nju přizjewiło. Třinaće wučerkow a wučerjow a runje telko studentow wučerstwa budźe so wo olympionikow starać. Nošer wubědźowanja je Serbske šulske towarstwo.
Zazběh w Schinkelowej cyrkwi
Tšupc. Młoda filharmonija Braniborskeje wuhotuje zazběhowy koncert lětušeho rjadu „Hudźbne šule cyrkwje wotewru“ 7. apryla w Tšupčanskej Schinkelowej cyrkwi. Tak startuje wulka beneficna akcija w Braniborskej. Wopytowarjo wjace hač 70 koncertow móža tak za zachowanje braniborskich wjesnych a měšćanskich cyrkwjow jako kulturnohistoriskich twarskich pomnikow darować.
Nowa melodija so njespodoba
Krótkopowěsće (03.04.18)
Wokrjes za kolesowarsku šćežku
Zhorjelc. Zhorjelski wokrjes chce mjez Oberoderwitzom a Niedercunnersdorfom nowu kolesowarsku šćežku twarić. Něhdyši kónc železniskeje čary je 16 kilometrow dołhi. Předewzaće by po dotalnych wobličenjach płaćiło 9,5 milionow eurow. Wokrjes z toho wuchadźa, zo Swobodny stat Sakska 5,5 mio. eurow přewozmje. Dalšich 3,6 mio. eurow nadźija so wokrjes ze spěchowanskeho programa za twar dróhow a mostow.
Pěstowarske dźěći sportuja
Grodk. Olympiada za dźěćace dnjowe přebywanišća w Grodku wotměwa so we wobłuku akciskeho programa „Stajnje so pohibować z Fritzi“, kotryž zarjaduje Braniborski krajny sportowy zwjazk. Jutře přewjedu w sportowni Gózdźa (Haidemühl) mjeztym 10. olympiadu dnjowych přebywanišćow. Na njej wobdźěla so mali sportowcy ze wšitkich 17 pěstowarnjow, kotrež su w nošerstwje města.
Podpěruja slědźenje
