Krótkopowěsće (01.09.17)
Wučerjo pobrachuja
Brandenburg. Něšto dnjow do noweho šulskeho lěta pobrachuje w Braniborskej hišće něhdźe 200 wučerjow. Zdobom dyrbja w kraju z tym ličić, zo přichodne dny hišće někotři absolwenća wotskoča, dokelž su w druhich zwjazkowych krajach wučerske městno našli, zdźěli krajny předsyda braniborskeho dźěłarnistwa za kubłanje a wědomosć Günther Fuchs.
Naměstnik wotwołany
Bórkowy. Gmejna Bórkowy je bjez zastupowaceho wjesnjanosty. Kaž wottam rěka, je gmejnska rada na zašłym posedźenju tón tydźeń dotalneho prěnjeho naměstnika Siegberta Budischina hnydomnje wotwołała. Zdobom bu wón jako zastupjer gmejny w zarjadniskim wuběrku Bórkowskeho zarjada wotwołany. Čehodla Budischina wotwołachu, njeje znate.
Nowy mineral namakali
Krótkopowěsće (31.08.17)
Otto wostanje předsyda DGB
Budyšin. Bywši wokrjesny předsyda Zwjazka němskich dźěłarnistwow (DGB) Jan Otto zastojnstwo dale wukonja. Wón zastupuje w DGB dźěłarnistwo IG metal. Jeho naměstnik budźe přichodnje Maik Springer z dźěłarnistwa policije.
Na dobro pacientow parkinsona
Zły Komorow. Na Braniborskej techniskej uniwersiće Choćebuz-Zły Komorow slědźa wo parkinsonowej chorosći. Kaž uniwersita zdźěla, naćisnu, twarja a programěruja studenća a docenća medicinskeje informatiki w Złym Komorowje software, kotraž pohiby pacientow registruje a składuje. Na zakładźe datow slědźerjo zwěsćeja, kotra terapija potrjechenym najlěpje pomha.
Lěpši škit policistam
Praha. Po zdźělenju direktora Praskeje měšćanskeje policije Eduarda Šustera je planowane kupić za nju njepřetřělomne lacy. Balistiski škit pod košlu ma so ze wšědnym wuhotowanjom wšitkich wjace hač 2 000 Praskich policistow stać. Tučasnje wuběraja probowe modele lacow, kotrež chcedźa w praktiskim wužiwanju pruwować.
Hrajer Liškow wabi za lodohokej
Krótkopowěsće (30.08.17)
Chór Lipa z nowej předsydku
Pančicy-Kukow. Julia Jankowscyna je nowa předsydka Lipy. Čłonojo chóra wuzwolichu ju wčera do zastojnstwa. Nowowólby běchu trěbne, dokelž njebě Drježdźanske zarjadniske sudnistwo zašłe wólby připóznało a dokelž bě bywša předsydka Lipy Franciska Zopic funkciju złožiła. Městopředsydka wostanje Melanie Bulankowa, pokładnik Uwe Pjetaš.
Ludowe požadanje zahajene
Podstupim. W Braniborskej su zawčerawšim ludowe požadanje přećiwo dwělomnej wokrjesnej reformje zahajili. W běhu šěsć měsacow trjebaja nětko 80 000 podpismow, zo by k ludowemu rozsudej dóńć móhło. Krajne knježerstwo ma wotpohlad, ličbu wokrjesow w Braniborskej pomjeńšić a z nich wulkowokrjesy wutworić.
Móža strowe, ale tež strašne być
Krótkopowěsće (29.08.17)
Wobruči awta wobškodźili
Budyšin. Njeznaći su awto wólbneju pomocnikow Lěwicy w Budyšinje wobškodźili. Kaž strona wčera zdźěli, běštaj pomocnikaj njedźelu wječor plakaty připrawiłoj. Při tym bě jimaj něchtó dwě wobruči awta rozkałał. Kaž Lěwica dale piše, wobkedźbuja lětsa wosebje wjele wěcnych wobškodźenjow. Tak su plakaty pomórane, roz- abo samo zwottorhane.
Manufaktura wuznamjenjena
Wjazońca. Wosebite wuznamjenjenje sakskich rjemjeslniskich komorow dósta wčera manufaktura Saxonia Feinsteinzeug ze sydłom we Wjazońcy. We wobłuku swjedźenskeho zarjadowanja spožčenja Sakskeho statneho myta za inowaciju přepodachu předewzaću myto inkluziwnje 5 000 eurow.
Spřećiwjeja so planam ČEZ
Nový Bor. Sewjeročěske město Nový Bor kaž tež wokolne gmejny wojuja přećiwo planam energijoweje firmy ČEZ čary wysokich elektriskich sćežorow 110 kilovoltow dla. Namjetowany 30 kilometrow dołhi wusyk měł cyłe čěske Łužiske hory přeprěčić. Potrjecheni so boja, zo 40 metrow wysoke sćežory panoramu horin wobškodźa a tak zdobom turistiskemu zwičnjenju škodźa.
Krótkopowěsće (28.08.17)
Wjelk znowa wowcy morił
Konjecy. Znowa je wjelk w stadle Konječanskeho wowčerja Měrćina Justa zachadźał. Tři wowcy je rubježne zwěrjo w nocy na njedźelu na škitanej pastwje moriło. Tak je ličba zahinjenych wowcow Justa na 64 rozrostła. Dwě dalšej dyrbješe skótny lěkar ćežkich ranow dla zasparnić. Z wjelčeho běrowa dotal žane informacije k padej njepředleža.
Ponowja dźěle parka
Rogeńc/ Zielona Góra. W přichodnymaj lětomaj wobnowja dźěle Rogeńskeho Pückleroweho a Zielonogórskeho Piastoweho parka. Europski programa Interreg přewostaji za to městu Choćebuzej štyri miliony eurow. Podpěra je w etaće zapisana, zdźěli wyši měšćanosta Holger Kelch (CDU), kiž je zdobom předsyda rady załožby za Rogeński park a hród.
Čłonstwo rozrostuje
Krótkopowěsće (25.08.17)
Dožiwić swědkow holocausta
Drježdźany. Přežiwjency holocausta chcedźa přichodny tydźeń znowa sakske šule wopytać. Kaž kultusowe ministerstwo informuje, budu časowi swědcy šulerjam wo swojich nazhonjenjach w jastwach a koncentraciskich lěhwach powědać. Na cyłkownje pjeć kubłanskich zarjadnišćach swobodneho stata su tajke rozmołwy předwidźane.
W nowej hali dźěłaja
Rušica. Dodawaćel awtomobilow Linde&Wiemann w Rušicy pola Halštrowa dźěła wot dźensnišeho w swojej nowej hali. Cyłkownje 40 milionow eurow je zawod do noweho twarjenja inwestował, jedyn dźěl ze spěchowanskich srědkow. W tworni dźěła 220 ludźi. Wot klětušeho chcedźa tam ze serijowej produkciju awtowych dźělow započeć. Hač do toho tam na probu dźěłaja.
Twarstwo so derje wuwiwa
Lipsk. Wobchodnistwo w sakskej twarskej branši je so w prěnim połlěće 2017 pozitiwnje wuwiło. Kaž twarski industrijowy zwjazk dźensa w Lipsku zdźěli, je wobjim wo 7,4 procenty porno lońšemu rozrostł, štož wučinja nimale 2,5 miliardow eurow. Wosebje wobłuk bydlenjotwara je so nadpřerěznje wuwił.
Krótkopowěsće (24.08.17)
Poskićeja znowa dalekubłanja
Smjerdźaca. Nowy semester na Serbskim kubłanskim srjedźišću LIPA w Smjerdźacej je minjeny tydźeń zaběžał. Mjez nimale 70 strowotniskim kursami a tajkimi k wukmanjenju serbskeje rěče organizuje zarjadnišćo znowa dalekubłanja za kubłarjow kaž tež kruh za maćerje a dźěći. Planowej stej tohorunja kubłanskej wuprawje.
Trjebaja noweho šefa
Budyšin. Budyski policajski rewěr trjeba noweho nawodu. Dotalny, Uwe Kilz, bu po dobrym lěće do Drježdźan přesadźeny. Tam steji wón na čole 1. wotrjada hotowostneje policije, kaž sakske ministerstwo nutřkowneho wobkrući. Kilz bě loni kritiku wubudźił, dokelž mjenowaše wukročenja prawicarskich skupin na Žitnych wikach „eventy wuzběhowacych młodostnych“.
Přetrjeba sele přewulka
Krótkopowěsće (23.08.17)
Serbski institut zahaji blog
Budyšin. „Lausitz – Łužica – Łužyca“ rěka blog, z kotrymž kroči Serbski institut po nowych pućach, posrědkować regionalne stawizny a regionalnu kulturu. W swobodnym slědźe chcedźa tam přinoški z aktualneho krajowědno-sorabistiskeho slědźenja šěrokemu publikumej spřistupnić. Internetna adresa bloga je www.lausitz.hypotheses.org.
Serbski klasikar znowa wušoł
Budyšin. W rjedźe „Die sorbische Bibliothek“ je LND nětko 1976 wušłu knihu Jurja Brězana „Krabat oder Die Verwandlung der Welt“ znowa wudało. Roman słuša bjezdwěla k najwuznamnišim twórbam serbskeje literatury docyła. Brězan rozestaja so w nim jako jedyn z prěnich awtorow w Němskej literarnje z rizikami biologije a genetiki.
Młodostnych za wučerstwo zdobyć
Krótkopowěsće (22.08.17)
Zajim přiběra
Pančicy-Kukow/Budyšin. Zajim za nawuknjenje serbšćiny přiběra. To zwěsći Rěčny centrum WITAJ na zakładźe přizjewjenjow za nowe rěčne kursy. Tak wuknje 18 zajimcow wot wčerawšeho w Pančicach-Kukowje zakłady serbskeje rěče. Dalši zakładny kurs zahaja přichodny měsac w Budyšinje. Za njón je so jědnaće wobdźělnikow přizjewiło.
Zawrjene pasmo wukazane
Wojerecy. Budyski zarjad za dohladowanje žiwidłow a weterinarny zarjad stej wčera za dźěle města Wojerec, za Ćisk a płoniny hač k Spalam zawrjene pasmo wukazałoj. Přičina je epidemija ameriskeho hniłca (Faulbrut) w jednym pčolacym ludźe. Pčołarjo njesmědźa pčołki do a z pasma won wozyć. Za pčołki strašna mrětwa pak čłowjeka njewohroža.
Wopytowarstwo stabilne
Baršć. Ličby hosći Róžoweje zahrody Baršć su wobstajne. Hač do spočatka awgusta mějachu jenak wjele wopytowarjow kaž loni. Nowy rekord docpěchu na lětušich swjedźenskich dnjach kónc junija. Z 15 500 bě je něhdźe 5 000 wjac ludźi wopytało hač hewak. Zajimawosć je, zo pochadźa kóždy wosmy wopytowar róžoweje zahrody z Pólskeje.
Krótkopowěsće (21.08.17)
Poradźeny zazběh
Bórkowy. Wjac hač 5 200 ludźi je sej kónc tydźenja na prěnim „Festiwalu twaroh a lany wolij“ w Bórkowach błótowske wjesne žiwjenje wotkryło. To zdźěli zarjadowar pool production. Cyłkownje 51 wikowarjow, rjemjeslnikow a zahrodkarjow poskićeše tam regionalne wudźěłki. Tež wuběr kulinariskich chłóšćenkow a přisłušne recepty sej hosćo jara chwalachu.
Styki nachwilnje zastajili
Budyšin. Towarstwo Witaj do Budyšina je kóždežkuli zhromadne dźěło a wuměnu informacijow zwonka běžnych projektow z Budyskim krajnoradnym zarjadom nachwilnje zastajiło. Dołhož zastupowacy krajny rada Udo Wićaz swoje zastojnstwo dale wukonja a za zarjad dźěła, wostawa jenož tale móžnosć. „Wočakujemy a žadamy sej wotstup Uda Wićaza!“, rěka w nowinskej zdźělence towarstwa.
Lěsny woheń hašeć dyrbjeli
