Krótkopowěsće (23.08.18)
Zetkanje posołow w Jonsdorfje
Budyšin. Pod hesłom „Hornja Łužica – stejimy pod paru“ zarjaduje Marketingowa towaršnosć Hornja Łužica-Delnja Šleska (MGO) dźensa 11. zetkanje posołow a partnerow w Jonsdorfje w Žitawskich horinach. Zasłužbnych posołow Hornjeje Łužicy chcychu rozžohnować, nowych powołać, zdźěli MGO bjez podaća konkretnišich informacijow.
Přepytuja morjenja dla
Zhorjelc/Běła Woda. Podhlada morjenja dla přepytuje specialna komisija Zhorjelskeje inspekcije kriminalneje policije w nadawku tamnišeho statneho rěčnistwa wot nocy w Běłej Wodźe. We wobłuku přesłyšowanja hinašeho delikta dla nachwilnje zajateho muža tón poda, zo bě wobkedźbował, kak znaty zemrě. Na to nańdźechu zastojnicy w domskim na Zahrodowej 38lětneho, kiž bě po zdaću namócnje zemrěł.
Přewjele pólskich turistow
Krótkopowěsće (22.08.18)
Wjace wužiwarjow na wsach
Frankfurt n. M. Energijowy přewrót na wsach spěšnišo postupuje hač w městach. Cyłkownje wjace hač 90 procentow domjacnosćow w Němskej jón podpěruje, kaž z dźensa wozjewjeneho naprašowanja statneje spěchowanskeje banki KfW wuchadźa. W městach wužiwa 15 procentow domjacnosćow solarne připrawy, ćopłotne klumpy a podobnu techniku, na wsy pak 33 procentow.
Deinege znowa njekandiduje
Zhorjelc. Zhorjelski wyši měšćanosta Siegfried Deinege (njestronjan) k wólbam 25. meje 2019 wjace njenastupi. Zhorjelski zapósłanc krajneho sejma CDU Octavian Ursu chce so wo zastojnstwo požadać. Jeli wón dobudźe, móhł ministerski prezident Michael Kretschmer (CDU) jeho wólbny wokrjes jako direktny kandidat za krajny sejm přewzać.
Wjace njemandźelskich dźěći
Krótkopowěsće (21.08.18)
Jednanja wuspěšnje zakónčene
Choćebuz. Jednanja wo přesydlenskim zrěčenju za Miłoraz su minjeny tydźeń wuspěšnje zakónčili, kaž předewzaće LEAG wčera informowaše. Gmejnje Trjebin a Slepo stej w dalšim jednanskim kole z koncernom poslednje wotewrjene dypki konstruktiwnje rozrisali. Wobdźěleni maja wuslědk za měznik nastupajo přihoty na přesydlenje.
Třělc njeskutki přiznał
Biskopicy. Serija wutřělow na awta w Biskopičanskej kónčinje je wujasnjena. Njedźelu zajaty 42lětny je njeskutki „wobšěrnje přiznał“, statne rěčnistwo a policija zdźělatej. W bydlenju muža běchu płunowej pistoli a płunowu třělbu z dalokowidom a municiju našli. Wumjetuja zajatemu, zo je wjace hač 20 króć na nimo jěduce awta třělał. Prawdźepodobnje psychisce choreho su do psychiatrije zapokazali.
Wustajeńca wo zběžku
Krótkopowěsće (20.08.18)
Kupać so w jězorje zaso móžno
Łaz. Strowotniski zarjad Budyskeho wokrjesa je warnowanje kupanja w Slěbornym jězorje zaso zběhnył. Přiwšěm měli ludźo pokiwy w informaciskim kašćiku před přistupom k jězorej wobkedźbować. Tam přichodnje wo móžnych strachach informuja, zdźěli krajne zarjadnistwo rěčnych zawěrow, Drježdźanski wudźerski zwjazk Elbflorenz a Budyski krajnoradny zarjad.
Kongres slawistow zahajeny
Běłohród. Na dźensa zahajenym XVI. mjezynarodnym kongresu slawistow w serbiskim Běłohrodźe wobdźěleni su tež zastupjerjo Budyskeho Serbskeho instituta. Dr. Jana Šołćina, dr. Anja Pohončowa a dr. Thomas Menzel chcedźa na wšelakich zarjadowanjach wo serbskich temach přednošować.
Narodny muzej ponowjeny
Krótkopowěsće (17.08.18)
Wobšudnicy we wokrjesomaj
Zhorjelc. Policija warnuje wosebje seniorow we wokrjesomaj Budyšin a Zhorjelc před trikowymi wobšudnikami. Kaž Zhorjelska direkcija zdźěla, su jej w běhu toho tydźenja 15 pospytow jebanstwa w regionje přizjewili. Přeco zaso so skućićelam radźi, wudawacym so při telefonje jako policija abo wnučk, ludźom zdźěla wulke sumy pjenjez rubić.
Strach wohenjow dale wulki
Podstupim. Warnowanski schodźenk k zadźěwanju lěsnych wohenjow wostanje w pjeć braniborskich wokrjesach na najwyšim stopnju 5. Mjez druhim płaći to tež za region Hornje Błóta-Łužica. Byrnjež wšitke naprawy wučerpali, liča přiwšěm z tym, zo cyłkowne mnóstwo wohenjow lětsa ličbu 400 překroči. To rjekny zamołwity za škit před lěsnymi wohenjemi Raimund Engel powěsćerni dpa.
Aretha Franklin njeboha
Krótkopowěsće (16.08.18)
Woprašowanje so kónči
Brüssel. Europjenjo, tak tež Łužičenjo, maja dźensa hišće hač do 23 hodź. składnosć, so na internetnym woprašowanju po cyłej Europskej uniji wo změnje mjez lětnim a zymskim časom wobdźělić. W naprašniku maja wobdźělnicy mjez druhim swoje nazhonjenja ze změnu podać a so k tomu wuprajić, hač su za to, přestajenje časa wotstronić.
Třeći zapis w registru porodow
Berlin. Zwjazkowy kabinet je wčera naćisk zakonja schwalił, kotryž předwidźi w registru porodow nimo „muski“ a „žónska“ tež zapis „diwersne“. Wulka koalicija zwoprawdźa tak rozsud Zwjazkoweho wustawoweho sudnistwa z lěta 2017. Sudnicy mějachu dotal płaćiwe rjadowanje za ranjenje wosoboweho prawa a zakaza diskriminacije w Zakładnym zakonju. Hač do kónca lěta ma nowe postajenje płaćiwosće nabyć.
Wobkedźbuja zwěrjata z ISS
Krótkopowěsće (15.08.18)
Nahles w Delnjej Łužicy
Wjelcej. Předsydka SPD Andrea Nahles je dźensa popołdnju delnjołužiske městačko Wjelcej wopytała, zo by sej přehlad nastupajo strukturnu změnu we Łužicy tworiła. Wona chcyše z wobydlerjemi runje tak kaž ze zastupjerjemi hospodarstwa w brunicowym regionje rěčeć. Łužica nadźija so za kónc wudobywanja brunicy pomocy Zwjazka, zo bychu so nowe industrije zasydlili.
Bóle čitać wuknyć
Hamburg. Nimale pjećina dźesaćlětnych dźěći w Němskej njemóže prawje čitać. Prominentni, mjez druhim spisowaćeljo Kirsten Boie, Ulla Hahn, Ulrich Wickert a dalši žadaja sej wot kubłanskeje politiki, wuknjenje čitanja a čitanje zesylnić. 25 podpisarjow zahaja dźensa na platformje change.org peticiju „Kóžde dźěćo ma čitać wuknyć!“
Socialne kubłanje sylnić
Krótkopowěsće (14.08.18)
Kedźbu! Šulscy nowačcy po puću
Pirna. Sakske ministerstwo za nutřkowne naležnosće zahaji dźensa rano kampanju k škitej šulskich nowačkow. Pod hesłom „Šula je so započała“ je nimo policije tež Krajny zwjazk sakskeho wobchadneho přemysła wobdźěleny. Tak su wot dźensnišeho mjez druhim wjacore policajske jězdźidła a busy, z mjenowanym hesłom nastupajo start noweho šulskeho lěta polěpjene, po puću.
Poćežowanja na A 4
Porchow. Na awtodróze A 4 mjez Porchowom a Hornim Wujězdom su dźensa wjacore dnjowe twarnišća zarjadowali. Přičina je horcoty a poćežowanja wobchada Lkw-jow dla skóncowana jězdnja. Kaž krajny zarjad za dróhotwar a wobchad informuje, dyrbja dróhotwarcy škałbu mjez jězdnjomaj po wjacorych kilometrach A 4 zwuporjedźeć. Hač do pjatka chcedźa najwjetše škody wotstronić.
Keltiski wodowód namakali
Krótkopowěsće (13.08.18)
Žně kórkow hižo nimo
Lubin. Jara zahe kónča so tele dny žně kórkow w Błótach. Minjene lěta su tule zeleninu hač do kónca awgusta šćipali, kaž Błótowske towarstwo w Lubinje zdźěli. Trajnych wysokich temperaturow dla běchu kórki spěšnje rostli, tak zo su je hižo w juniju žnjeć započeli. Zdźěla su problemy při konserwowanju za mnóstwo zeleniny trěbne škleńcy dóstać.
Šěsć kandidatow namjetowali
Huštań (Wüstenhain). Delnjoserbske towarstwo Pónaschemu je šěsć kandidatow za wólby Serbskeho sejma namjetowało. Kaž cyłk nětko informuje, su wobdźělnicy hłowneje zhromadźizny 21. julija w Hustanju Ilonu Urban z Berlina, Siegberta Budischina z Bórkowow, Sandru Wilhelm z Huštanja, Stefanie Kositz z Wětošowa, Lauru Grönert z Dubjeho a Uda Nickuscha z Cerska wobkrućili.
Dźěła wospjet kontrolować
Krótkopowěsće (10.08.18)
Spěchowanske myto wupisane
Budyšin. Organizatorojo zarjadowanjow k jubilejej 1 000 lět Budyski měr wupisaja spěchowanske myto za wuměłstwo a socialny angažement, kaž město Budyšin informuje. Myto ma přinošować ke konstruktiwnemu, zhromadnemu diskursej wo přichodźe Europy a so wěnować palacym prašenjam našeje doby. Mjez organizatorami stej tež Domowina a Serbski institut.
Firma fit znowa inwestuje
Hirschfelde. Producent rjedźenskich srědkow fit tzwr w Hirschfeldźe nad Nysu planuje po słowach jednaćela Wolfganga Großa přichodnej dwě lěće inwesticije nimale 16 milionow eurow. Pjenjezy chce za nowotwar a nowe produkciske připrawy wužiwać. Wot lěta 1993 su na stejnišću 170 milionow eurow za mašiny a twarjenja nałožili. Aktualnje dźěła za fit tzwr 250 ludźi.
Přećiwowustawne znački w hrach
