Dźěłarnička wabiła

srjeda, 21. februara 2018 spisane wot:

Wojerecy (SN). Derje wopytana bě wčera popołdnju we Wojerowskim Zusowym kompjuterowym muzeju dźěłarnička „Kak twarju sej swójsku alarmowu připrawu“. Dźěći a młodostni w starobje 11 do 15 lět su tam pod fachowym nawodom wuknyli, kak hodźi so tajki system z jednorymi eletroniskimi twarskimi dźělemi instalować. Kóždy wobdźělnik zestaji sej za to swójske šaltowanje.

Dobry wothłós w knihowni

Budyšin (SN). Pjeć zajimcow bě so za­wčerawšim w Budyskej měšćanskej bibliotece na zawodnym kursu za digitalne wupožčowanje medijow wobdźěliło. Zajim na „łužiskej Onleihe“ přiběra. Karin Hahn, sobudźěłaćerka knihownje, kotraž něhdźe hodźinski kurs nawjeduje, praji, zo su wobdźělnicy skerje starši ludźo. „Poradźowanje je jara indiwidualne, dokelž wjetšina zajimcow nam hižo lěta swěru dźerži a naše datowe banki wužiwa“, Karin Hahn wuzběhny.

Rady na statok załožeja

„Historiske blido“ wotměli

wutora, 20. februara 2018 spisane wot:

Mnišonc (HG/SN). 20 zajimcow je njedawno w Mnišonskej Radnej pincy „Historiske blido“ Hornjohórčanskeho domizniskeho towarstwa wotměło. Mě­sačne zetkanja nawjeduje Frank Jünger z Hornjeje Hórki hižo wot lěta 1999. W srjedźišću minjeneho steješe mjez druhim ćahańca wokoło přizamknjenja Łužicy k Čěskej po Prěnjej a Druhej swětowej wójnje kaž tež załoženje Serbskeho se­minara na Małej Stronje w Praze. Přizamknychu so informacije dźěławosće Zwjazka přećelow Łužiskich Serbow w Čěskej a Słowakskej.

Hród w nowym wobsydstwje

Droždźij (SN). Po tragiskej smjerći ně­hdyšeho hrodoweho knjeza Droždźijskeho hrodu, swobodneho knjeza von Salza, w lěće 2013 stare murje poněčim zaso wožiwjeja. Nowa swójba (tři generacije) hród a park priwatnje wužiwa. Stare hró­dźe­ a pódlanske twarjenja chcedźa saněrować a potom jako ratarski zawod z konjemi wobhospodarjeć. Twarske dźěła budu znajmjeńša hač do klětušeho trać.

Młodźi slědźerjo prašani

Wotewru přehladku

pjatk, 16. februara 2018 spisane wot:

Budyšin. Fotowu přehladku „Heimat – Domizna“ Andreasa Varnhorna z Frankfurta nad Mohanom wotewru srjedu, 21. februara, we 18 hodź. w Budyskej Serbskej kulturnej informaciji. Budźe-li zajim jara wulki, zetkaja so wopytowarjo k wotewrjenju na žurli. Andreas Varnhorn je před 25 lětami Hornju Łužicu wopytał a wosebje katolskich Serbow při naj­wšelakorišich přiležnosćach, nałožkach, swjedźenjach atd. fotografował. Loni je jich znowa wopytał, wospjet na swojim aparaće zapopadnył, z nimi samo někotružkuli rozmołwu wjedł a so prašał, kak bě so jim mjeztym zešło. Wustajeńca w SKI a na chódbach Serbskeho domu skići zajimawy wid na nowše serbske stawizny. Wona je dwurěčna (němsko-serbska) a tuž tež němskim wopytowarjam jara zajimawa. Prěnjotnje za Dom při hłownej cyrkwi w Frankfurće koncipowanu su ju tam wot 1. decembra 2017 do 31. januara 2018 pokazali. Załožba za serbski lud je składnosć wužiła a přehladku do Łužicy skazała. Prezentaciju z fotami a tekstami pokazaja hač do 30. junija, a to wot póndźele do pjatka k wotewrjenskim časam Serbskeje kulturneje informacije wot 10 do 16.30 hodź.

Witaja nowonarodźene dźěći

štwórtk, 15. februara 2018 spisane wot:

Wojerecy. Wot spočatka lěta płaći we Wojerecach směrnica wo witanskim pjenjezu za nowonarodźene dźěći. Po njej wupłaća kóždemu dźěsću, kotrež je so po 1. juliju 2017 narodźiło, 250 eurow. Wuměnjenje je, zo bydli dźěćo w domjacnosći staršeju resp. zastaraćelow, kotřiž su znajmjeńša tři měsacy do poroda dźěsća we Wojerecach přizjewjeni, a zo su so přepytowanja U1 hač do U6 dospołnje a sčasom přewjedli. Trěbne formulary za to dóstanu starši we wobydlerskim běrowje na Dillingenskej abo na internetnej stronje Wojerec, rěka w zdźělence měšćanskeho zarjadnistwa.

Na słowjansku nóc

Lipsk. Słowjanska zymska nócna party wotměje so sobotu, 17. februara, wot 18.30 hodź. w Lipšćanskej kulturnej kofejowni „Knicklicht“ na Drježdźanskej dróze 79. Chór Slavia předstaji ruske, pólske a ukrainske ludowe pěsnje, kapała Kupazukow hraje serbsku rejwansku hudźbu, jej poboku je dalša pólska kapała. Wšitcy zajimcy su wutrobnje přeprošeni sobu rejwać, spěwać a so po słowjanskim wašnju zabawjeć. Organizatorojo wjesela so na bohate wobdźělenje.

Swinjorězanje a brunch

srjeda, 14. februara 2018 spisane wot:

Hórki. Štóž chce sej zaso raz słódne dobroty ze swinjorězanja popřeć, móže to sobotu, 17. februara, w Hórčanskim Młynkec hosćencu. Tam krupjane a całtowe kołbasy kaž tež połćik a wšo dalše předawaja. Nimo toho přeprošeja Młynkecy njedźelu, 18. februara, wot 12 hodź. na Walentinowy brunch.

Radźićeljo so zetkaja

Worklecy. Wohnjoškitne naprawy na wyšej šuli „Michał Hórnik“ budu jedna z temow posedźenja Worklečanskeje gmejnskeje rady jutře, štwórtk, w 19 hodź. w šuli. Dale zaběraja so z nowym hortowym twarjenjom a z naćiskom twarskeho plana za přemysłowu pře­strjeń Nowa Wjeska-zapad II. Posedźenje je zjawne, zajimcy su přeprošeni.

Sčasom na dźěłarničku přińć

Budyšin. W zwisku z dźěłarničku „Rjekojo z pjelsća“ sobotu, 17. februara, wot 10 do 18 hodź. skedźbnja Budyski Serbski muzej na to, zo je radźomne sčasom na dźěłarničku přińć, zo by chwile dosć było klanku dokónčić. Čim wjace časa za jeje wuhotowanje je, ćim lěpje.

Přidatne předstajenje

pjatk, 09. februara 2018 spisane wot:

Budyšin. Mnoho naprašowanjow dla je so Serbski ludowy ansambl rozsudźił, poskićić přidatne předstajenje swojeho wuspěšneho wječorneho ptačokwasneho programa „Po serbskich slědach“, a to njedźelu, 11. februara, w 19.30 hodź. na žurli SLA. Zastupne lisćiki dóstanu zajimcy při wječornej kasy. Předstajenja jutře w 16 a 19.30 hodź. kaž tež njedźelu w 16 hodź. su wupředate.

Kružk pisacych w hospodźe

Chrósćicy. Wosom čłonow wopřijmje Róžeńčanski kružk pisacych, kotřiž pod nawodom spisowaćela Bena Budarja ­prawidłownje swójske twórby pisaja. Lětsa kružk hižo swoje 55. narodniny swjeći a přeco hišće so z pjerow kreatiwne ideje wužórla. Hač do lěća ma samo nowa zběrka wuńć: „Zornjatka na puću“. ­Něštožkuli z tejele knihi budźe hižo ­słyšeć jutře, sobotu, w 19.45 hodź w Chróšćanskej putniskej hospodźe. Hobbyjowi poeća čitaja basnje a powědančka wo běhu lěta, zdźěla podpěrani wot ­młodeje generacije. Wo hudźbny přewod postara so čłonka kružka Marija Šołćina na gitarje.

Poskitk za prózdniny

Póstnicy w „Jednoće“

srjeda, 07. februara 2018 spisane wot:

Chrósćicy. Na póstniske zarjadowanje we wjacezaměrowej hali „Jednota“ přeprošeja Chróšćanscy młodostni a Smječkečanski Dom swjateho Jana wšitkich zbrašenych, jich přećelow a přiwuznych pjatk, 9. februara. Wot 18 hodź. chce diskotekar Frank wšěm noram z horcej hudźbu zapyrić. Organizatorojo wjesela so na bo­hate wobdźělenje.

Přednošuje wo Madźarskej

Budyšin. Do kotreho směra wuwiwa so Madźarska a kajki poměr ma kraj k Europskej uniji a k Němskej? Tajke a podobne prašenja steja w srjedźišću přednoška Daniela Hegedüsa jutře, štwórtk, we 18 hodź. w Budyskim Kamjentnym domje. Sakska krajna centrala za politiske kubłanje wječor zarjaduje. Daniel Hegedüs wuwučuje­ na Berlinskej Humboldtowej uniwersiće a so z madźarskej knježerstwowej politiku dokładnje zaběra.

Žony wulce swjeća

Njebjelčicy. Žonjace póstnicy Serbsko­pazličanskeho karnewaloweho towarstwa budu zajutřišim, 9. februara, wot 20 hodź. w Njebjelčanskej „Bjesadźe“. Program započnje­ so w 21 hodź. Wšitke žony, kotrež­ su hač do toho časa do „Bjesady“ přišli, dóstanu darmotnu škleńčku sekta.

Čitaja w awli

wutora, 06. februara 2018 spisane wot:

Pančicy-Kukow. Sylwija Šěnowa, Doro­thea Šołćina, Benedikt Dyrlich a Alfons Wićaz čitaja jutře, srjedu, w 19 hodź. w awli Šule Ćišinskeho w Pančicach-Kukowje z antologije serbskeje prozy „Mlóče“. Na zhromadne zarjadowanje Ludoweho nakładnistwa Domowina a Domowinskeje skupiny Pančicy-Kukow su zajimcy wutrobnje přeprošeni.

Poskitk za prózdniny

Horni Hajnk. Na serbskorěčne tematiske dny přeprošeja šulscy socialni dźěłaćerjo Rěčneho centruma WITAJ tež lětsa zaso w zymskich prózdninach wot 20. do 23. februara. W domje Jurja Brězana w Hornim Hajnku chcedźa so wot wutory do pjatka, stajnje wot 8 do 11.30 hodź. ze wšelakimi aspektami kedźbliwosće zaběrać a socialne kompetency dźěći z pisanym metodiskim poskitkom spěchować. Přizjewić móža so šulerki a šulerjo 3. do 6. lětnika hač do 9. februara z mjenom a starobu pod telefonowym čisłom 03591/ 550 400 abo e-mailnje pod adresu .

Wo zabytych twórbach

Zeleni přeprošeja

póndźela, 05. februara 2018 spisane wot:

Kamjenc. Přichodne stajne blido Zelenych je jutře, wutoru, w 19 hodź. w Kamjenskim hosćencu „La Piazza“ na Zwingerowej 4. Jako hosća witaja rěčnicu krajneho předsydstwa Zwjazka 90/Zelenych Christin Melcher. Wona a předsydstwo regionalneje skupiny wjeselitej so na zajimawe rozmołwy.

Porodowu staciju zeznać

Kamjenc. Zajutřišim, 7. februara, w 19 hodź. su přicho­dni starši na informa­ciski wječork do Kamjenskeje chorownje maltezow přeprošeni. Na porodowej stacij­i Margareta budu nazhonite baby a sotry na prašenja samodruhich a jich mandźelskich wotmołwjejać. Přizjewjenje za to trěbne njeje.

Zetkaja so w stolicy

Berlin. Přichodne Serbske blido w Ber­linje budźe štwórtk, 8. februara, w 16 hodź. w hosćencu EINSTEIN KAFFEE na Friedrichowej 206. Štóž ma lóšt a chwile, so na měsačnych zetkanjach wobdźěleć, zo by maćeršćinu w cuzbje hajił, je stajnje lubje witany. Za Serbskim blidom w Berlinje maja zajimcy dobru składnosć, swoje rěčne kmanosće nałožować a skrućeć. Wjelelětni wobdźělnicy su na nowych ludźi a jich ideje wćipni.

Jejka debić wuknyć

Symjo měnjeć

pjatk, 02. februara 2018 spisane wot:

Njebjelčicy. Towarstwo za zachowanje mnohotnosće wužitnych rostlin a Njebjelčanska gmejna přeprošatej njedźelu, 4. februara, na třeću měnjensku bursu za symjo. Wona wotměje so wot 14.30 do 17 hodź. na žurli gmejnskeho zarjadnistwa. Tež štóž symjo ze swójskeho plahowanja sobu přinjesć njemóže, njesměł składnosć skomdźić, njeznate a rědke družiny symjenja zeznać a je za swójsku zahrodu wužiwać. W 15 hodź. přednošuje Thomas Noack wo permakulturje. Njebjelčanske towarstwa staraja so wo ćělne derjeměće hosći z kofejom a tykancom.

Wo wosobinach města

Budyšin. Wuznamne wosobiny, po kotrychž su Budyske hasy pomjenowane, steja w srjedźišću tematiskeho wodźenja njedźelu, 4. februara, w 15 hodź. w Budyskim měšćanskim muzeju. Pod hesłom „Heino, Löhr, Tzschirner a ...“ muzeologa Hagen Schulz někotre wuznamne wosobiny předstaji.

Dźěłarnju chcedźa wožiwić

Serbska debata

nowostki LND