Na adwentne spěwanje
Wojerecy. Na zhromadne adwentne spěwanje su zajimcy póndźelu, 16. decembra, na dźěćacu a młodźinsku farmu Křesćansko-socialneho kubłanskeho skutka (CSB) we Wojerecach prošeni. Na prěnim zarjadowanju tajkeho razu scyła na farmje CSB chcedźa tradicionalne, adwentne a hodowne pěsnje spěwać. Podpěrać chcetaj jich hudźbnaj šulerjej Fabian Schulze a Philipp Seidel. Započatk adwentneho spěwanja je we 18 hodź. CSB skedźbnja na to, zo wotměje so spěwanje pod hołym njebjom, wotpowědna ćopła drasta je tuž trěbna.
Pohłubšacy kurs serbšćiny
Budyšin. Rěčny centrum WITAJ poskića wšěm tym, kotřiž maja hižo zakładne znajomosće serbšćiny a chcedźa je pohłubšić, wosebity rěčny kurs. 13. januara jón w Budyskim Serbskim šulskim a zetkawanskim centrumje na Friedricha Listowej zahaja. Kaž RCW dale zdźěla, přewjedu kurs hač do meje prawidłownje póndźelu wot 17.30 do 19 hodź. Dalše informacije namakaće pod www.witaj-sprachzentrum.de. Za kurs přizjewić móžeće so pod telefonowym čisłom 03591/550 400 abo z mejlku pod .
Spěšnje so přizjewić
Worklecy. Jězbu na swětoznate pasionske hry do Oberammergauwa (njedaloko Mnichowa) za serbskich młodostnych přihotuje tuchwilu Worklečanske dekanatne młodźinske dušepastyrstwo. Wuprawa budźe wot 8. do 10. meje 2020, z wotjězdom pjatk nawječor. Kaž z běrowa Worklečanskeho dušepastyrstwa rěka, smědźa so tež 15lětni wobdźělić. Młodostni změja tam składnosć sej generalku wobhladać. Wšitcy 15- do 26lětni dóstanu zastupny lisćik, kotryž hewak znajmjeńša 150 eurow płaći, za 24 eurow. Po předstajenju budu so samo z dźiwadźelnikami rozmołwjeć móc. Zajimcy njech so hač do jutřišeje srjedy, 11. decembra, w běrowje Worklečanskeho dekanatneho młodźinskeho dušepastyrstwa a e-mailnje pod přizjewja. Dalše informacije k jězbje su tež pod www.jugendtage-passionsspiele.de přistupne.
Wuslědki slědźenjow
Knižna premjera
Budyšin. Na premjeru knihi „Dźiwadło njewidźomnych dźěći“ přeprosy wšitkich zajimcow Ludowe nakładnistwo Domowiny do Budyskeho Serbskeho gymnazija na Friedricha Listowej. Srjedu, 11. decembra, předstaji tam přełožer Jan Měškank knihu Marcina Szczygielskeho. Započatk je w 9.40 hodź.
Dohodowny čas porjeńšić
Čorny Chołmc. Na adwentny koncert w Čornochołmčanskej Marinej cyrkwi přeprosytej tež lětsa zaso chór nałožkoweho towarstwa Krabat a Wojerowski šulski chór. Njedźelu, 15. decembra wot 16.30 hodź. chcedźa hudźbnicy a spěwarjo připosłucharjow ze swojimi poskitkami zwjeselić a jim tak dohodowny čas čakanja na přichad Chrystusa porjeńšić. Wšitcy su wutrobnje witani.
Wiki rjanych wěcow
Budyšin. Na wiki wosebiteho razu sće jutře sobotu, 7. decembra, wot 15 hodź. do Budyšina přeprošeni. W „Zelenym pysku“ a w Mikławšskej wěži poskićeja mjenujcy „rjane wěcy“. Mjez druhim poskići w Mikławšskej wěži Serbski konsum swoje wudźěłki.
Smolerjec kniharnja wotewrjena
Budyšin. Sobotu, 7. decembra, je Smolerjec kniharnja wot 10 do 17 hodź. za wšěch zajimowanych kupcow wotewrjena. Komuž hišće hodowny dar pobrachuje, njech přińdźe do kniharnje a sej z bohateho poskitka něšto wupyta.
Na adwentničku
Ralbicy. Na swoju lětušu adwentničku su wšitcy serbscy młodostni zajutřišim, njedźelu, 8. decembra, do Ralbic prošeni. Z nyšporom ju w 14 hodź. zahaja, a jón chór 1. serbskeje kulturneje brigady wobrubi. Na „Radlubinje“ přizamknje so zhromadna swačina ze zabawu.
Sobudźěłaćerjo koncertuja
Kulow. Na wosebity adwentny koncert přeprošeja sobudźěłaćerjo a sobudźěłaćerki katolskeje cyrkwje a dźěći horta Kulowskeho Jakubetzoweho skutka. Z adwentnymi pěsnjemi zawjeselić a k sobuspěwanju pohnuć chcedźa was njedźelu, 8. decembra, wot 16 hodź. w Kulowskej katolskej cyrkwi.
Sprjewine město trjeba pomoc
Budyšin. Jutře, srjedu, 4. decembra, budźe wusyłanje Sachsenspiegel telewizijneho sćelaka MDR we wobłuku lětušeje tury po adwentnych wikach z hosćom w Budyšinje. Hosćićelske města maja při tym stajnje nadawk spjelnić. Sprjewine město dósta slědowacy: „Pokazajće na jewišću ptači kwas a namakajće znajmjeńša dźesać Budyskich porikow, kiž su so loni woženili a kotrež w swojim originalnym kwasnym outfiće na adwentne wiki přińdu.“ Město Budyšin prosy tuž wšitke pory z Budyšina, kotrež su so w lěće 2018 zmandźelili, wo pomoc. „Pory, kotrež chcedźa dźěl tejele romantiskeje inscenacije być a samo hišće dobyć, njech přizjewja so hač do jutřišeho w 12 hodź. z e-mailku w zarjedźe za nowinarske dźěło a měšćanski marketing. Adresa je . Přińdźe-li potom dosć porow na wiki, wulosuja mjez nimi pjeć króć dwaj zastupnej lisćikaj za adwentny koncert Drježdźanskeho křižneho chóra w tamnišim Rudolfa Harbigowym stadionje.
Wo wobrazowych albumach
Za kurs serbšćiny so přizjewić
Budyšin. Šulerjam 2. hač do 5. lětnika, kotřiž nimaja składnosć, so na wučbje serbšćiny wobdźělić, skići Rěčny centrum WITAJ w jutrownych prózdninach wot 14. do 17. apryla ferialny kurs serbšćiny. Šulerjo zeznaja serbski alfabet a zwučuja serbsce čitać a pisać. Po wučbje dožiwja zajimawe serbskorěčne poskitki. Přizjewjenja přijimuja hač do 20. januara 2020 pod telefonowym čisłom 03591 550 414 a pod .
Spěwaja za dobry skutk
Jaseńca. Sobotu, 7. decembra, přeprosytaj Florian Rynč a muski kwartet PoŠtyrjoch na mjeztym 9. dohodowny beneficny koncert do Rynčec bróžnje w Jaseńcy. Wopytowarjo smědźa so znowa na wotměnjawy program wjeselić. Lětsa budźe Drježdźanski muski kwartet „Die Hormonischen“ z hosćom. Zaklinčeć maja adwentne kaž tež zabawne spěwy skupiny PoŠtyrjoch. Wunošk ze zběrki a z předanje napojow a přikuska darja znowa za dobry skutk. Započatk je w 19.30 hodź. Koncertej přizamknje so zabawa.
Kónclětne zarjadowanje
Budyšin. Předsydstwo župy „Jan Arnošt Smoler“ Budyšin přeproša na swoje kónclětne zarjadowanje štwórtk, 5. decembra, w 16 hodź. na žurlu Budyskeho Serbskeho domu. Trudla Malinkowa přednošuje tam wo 400lětnym wobstaću Budyskeje Michałskeje wosady. Při šalce kofeja a wosušku přizamknje so zhromadne spěwanje dohodownych pěsnjow. Čłonojo župnych skupin a towarstwow a wšitcy dalši zajimcy su wutrobnje přeprošeni. Župa prosy so hač do 3. decembra w Budyskim regionalnym běrowje pod 03591/55 02 11 přizjewić.
Kniha wo Geraće Pawliku
Nowosólc-Hródk. W Serbach znata sopranistka a hudźbna wědomostnica Romy Petrick je na zakładźe awtobiografije Gerata Pawlika (1896–1966) knihu wo žiwjenskich dopomnjenkach tohole Drježdźanskeho Serba, organista a komponista wudała. Knižna premjera budźe jutře, sobotu, w 16 hodź. na swjedźenskej žurli radnicy w Nowosólcu-Hródku.
Wočakuja 600. dźěćo
Wojerecy (SN). Porodna stacija Wojerowskeho klinikuma łužiskeje jězoriny zhladuje wćipnje na kónc lěta. Chibazo narodźi so tam hižo wokoło hód 600. dźěćo? Hižo srjedź oktobra móžachu baby a dźěćacy lěkarjo 500. porod w chorowni registrować. „Póńdźe-li tak dale, móhło tu 600. dźěćko hišće do hód na swět přińć“, wjeseli so nawjedowaca baba w klinice Sabine Waschulewski.
1 800 projektow w regionje
Budyšin (SN). Podźěl 18lětnych w Sakskej, tež w Hornjej Łužicy, kotřiž su wot chudoby wohroženi, wučinja něhdźe 15,4 procenty. Podźěl 18- do 25lětnych je samo na 31,5 procentow rozrostł. To je za wobdźělnikow akcije „genialsocial-lokalne“ z přičinu jim pomhać. Wšako su sej předewzali, nimo mjezynarodneje podpěry w Africe abo Srjedźnej Americe tež tudyšim potrěbnym pod pažu přimać. Tuž chcedźa 30 procentow z cyłkownych dochodow lětušeje akcije za něhdźe 1 800 w regionje projektow wužiwać.
Nowe ławki nastajeli
Budyšin (SN). Při zachodźe do Budyskeje tachantskeje cyrkwje stejitej nowej ławce, kotrejž so we wuhotowanju derje do historiskeho ambienta hodźitej a na kotrymajž přijomnje sedźiš. Tež na derje wopytanych Žitnych wikach je město nowej ławce stajić dało. Cyłkownje je za to zamołwita wobdźělenska a wobhospodarjenska towaršnosć lětsa dwanaće ławkow a šěsć wotpadkowych sudobjow na wšelakich městnosćach města připrawiła.
Wólnje zastup płaćić
Wojerecy (SN). Pod hesłom „móžeš płaćić, štož chcež“ móža wopytowarjo Wojerowskeho zwěrjenca w adwentnym času wot 1. do 20. decembra při zachodźe telko pjenjez dać, kaž chcedźa. Z pomocu akcije chce Wojerowska coologiska zahroda pokazać, zo hodźi so tež w zymnym počasu wjele wuslědźić. Kaž tam mjedwjedźowej bratraj Björn a Bengt w zymje rady zaskakujetej, činja to tež tiger, lamy a dalša zwěrina.
Rasowe nukle fuk
Nowe předsydstwo
Kamjenc. Na swojim njedawnym wurjadnym posedźenju je Kamjenske towarstwo „Měšćanska dźěłarnja-wobydlerska łuka“ nowe předsydstwo wuzwoliło. Předsydka je Simone Kirschke. Zaměr 25 čłonow wopřijaceho towarstwa je, „Kamjenčanow hromadu a Kamjenc doprědka wjesć.“ Lětsa bě cyłk wjace hač 90 zarjadowanjow organizował. K tomu słušeja koncerty, čitanja, politiske diskusijne zarjadowanja, paslenske popołdnja kaž tež prózdninska zaběra za dźěći.
Ćahi jako modele
Połčnica. We Wuchodosakskej wuměłstwowej hali Połčnica budu wot 29. nowembra do 1. decembra modele železnicow a wšitko, štož k tomu słuša, widźeć. Połčničanscy přećeljo modelowych železnicow předstaja 12 čarow, mjez nimi Tharandtsku rampu. Dwanaće kilometrow dołhi wotrězk mjez Tharandtskim dwórnišćom a Klingenbergom-Colmnitzom we woprawdźitosći hižo 157 lět eksistuje a je přeco hišće najnahliši postup normalneje železniskeje čary w Němskej. Přistupna je wustajeńca pjatk, 29. nowembra, wot 15 do 19 hodź., nazajtra wot 10 do 19 hodź. a njedźelu, 1. decembra, wot 10 do 18 hodź.
Kuliški škitać
