Magacin wo Łužicy
Budyšin. Pućowanski magacin telewizijneho sćelaka Sat.1 „Grenzenlos – Die Welt entdecken“, wěnuje so jutře, 18. julija, w 19 hodź. w swojim wusyłanju Łužicy jako jednej z najrjeńšich dowolowych regionow Němskeje. Moderator Florian Simbeck je wopytał hornjołužisku hatnu krajinu, tajny swět Turisede Einsiedel, měsće Budyšin a Zhorjelc kaž tež Žitawsku kónčinu, hdźež su sej w ćahu z parnej lokomotiwu njewšědnu krajinu, mjez druhim horu Oybin wotkryli. Projekt podpěrała je Marketingowa towaršnosć Hornja Łužica-Delnja Šleska.
Nowačkow přizjewić
Swjedźeń njebudźe, wiki budu
Sulšecy/Njeswačidło. Lětuši wjesny swjedźeń w Sulšecach pola Kulowa dyrbja organizatorojo korony dla wotprajić. Wo tym su zarjadowarjo informowali. Swjećić chcychu poprawom wot 17. do 19. julija. Rjemjeslniske wiki 18. a 19. julija w Njeswačidle porno tomu budu. Plakaty na mnohich sćežorach we wsy a wokolinje za nje wabja.
Prěnje online-zetkanje šoferow
Budyšin. Dotal na wotpočnišću Hornja Łužica při awtodróze A 4 wotměwace so zetkanje jězdźerjow za daloke čary nětko prěni króć online přewjedu. Hłowny policajski komisar z Wysokeje šule za saksku policiju chce aktualnje informować wo wobmjezowanjach šoferam za daloke čary korony dla. Dźensa wot 18 hodź. móža so zajimcy pod https://www.polizei.sachsen.de/de/72966.htm na poskitku wobdźělić.
Chcedźa z młodostnymi rěčeć
Gymnaziasća wustajeja
Spěwy z brunicowych kónčin
Slepo. Walburga Wałdźic předstaji z projektowym žónskim chórom sep nowowobdźěłanych spěwow z brunicowych kónčin. Pólska huslerka Izabela Kałduńska wokalne zynki na huslach přewodźa. Koncert budźe sobotu, 18. julija, w 19.30 hodź. w Budyskim Serbskim muzeju a njedźelu, 19. julija, w 17 hodź. w Złokomorowskej Serbskej cyrkwi. Projekt spěchuja z fondsa „Čiń sobu!“.
W prózdninach na farmu
Wojerecy. Na Wojerowskej dźěćacej a młodźinskej farmje přihotuja za zajimcow zabawny prózdninski program. Zarjadnišćo budźe potom wo póndźele do pjatka wot 9 do 12 hodź. a wot 14 do 17 hodź. wotewrjene. Maksimalnje 40 dźěći a młodostnych, kiž dyrbja so do toho přizjewić, móže tam přebywać. Přizjewjenje je dwaj dnjej do toho trěbne, a to telefonisce pod čisłom 03571/ 426339 abo e-mejlnje pod . Mjez druhim chcedźa tam pokład pytać, zmysły sej wotkryć, wuměłstwowe wudźěłki z přirodnych materialijow tworić a so zabawjeć. Hlej tež pod www.csb-miltitz.de.
Prózdninska zabawa za dźěći
Lückendorf. Dekanatne dušepastyrstwo za dźěći přeproša šulerki a šulerjow 5. do 8. lětnika wot póndźele, 17. awgusta, do štwórtka, 20. awgusta, na prózdninsku zabawu do Lückendorfa w Žitawskich horinach. Lětuše hesło rěka „Prózdniny, pućowanje, Boža stwórba, dyrdomdej.“ Swójski přinošk wučinja 80 eurow. Přizjewjenja su hač do pjatka, 17. julija, pod tel. čo. 035796/ 88707 a z mejlku na móžne.
Tworić w Mnišej rozwalinje
Budyšin. Serbska wuměłča Borbora Wiesnerec chce zajimcow na lětušej lětnjej akademiji Budyskeho wuměłstwoweho towarstwa z.t. ke kreatiwnemu tworjenju pohonjeć. Wot 20. do 25. junija budźe dźěłarnička w rozwalinje Budyskeje Mnišeje cyrkwje. Štóž chce pódla być, trjeba wosebje dźěłansku drastu a wotpowědne nawoči. Wšako zaběraja so wobdźěleni z rězbarjenjom. Dalši wuměłcy, kotřiž sobu skutkuja, su Gabi Kell (molowanje), Edith Böhme (molowanje freskow) a Hans Kutschke (rysowanje).
Z hribami a rostlinami barbić
Dźeń pomnikow wotprajeny
Budyšin. Město Budyšin je so dołho dlijiło, hač dźeń wotewrjeneho pomnika wotměje abo nic. Nětko pak je zarjadowanje koronapandemije dla wotprajene, dokelž njeje wěstota organizatorow runje tak kaž wšitkich wobdźělnikow zaručena. Měšćanostka za twarske naležnosće Julia Naumann rozsud wobkrući a hlada optimistisce na klětuši dźeń wotewrjeneho pomnika, kotryž chcedźa hižo nalěto planować započeć. Dźeń ma so potom po cyłej Němskej njedźelu, 12. septembra, wotměć.
Pisomnu próstwu stajić
Budyšin. Přijimarjo podpěry po socialnym zakoniku II (SGB II) dyrbja znowa pisomnje wo nju prosyć. Potrjechene su wšitke přizwolenja, kotrež so 31. awgusta abo pozdźišo kónča. Kaž Budyski krajnoradny zarjad informuje, wotpadnje wosebite rjadowanje, zo móža potrjecheni bjez próstwy podpěru dale dóstać. Nowe požadanja dyrbja woni dypkownje jobcenterej zapodać.
Kolesowanska akcija
Budyšin. Z kolesom so na puć podać je zaměr akcije, kotruž Budyski krajnoradny zarjad přewjeduje. Hač do 26. julija móža so sportowcy na akciji wobdźělić. Kilometry zapisaja online abo tež po GPS-datach do wosebiteje „Stadtradel“-app. Dalše informacije namakaće pod www.stadtradeln.de. Z kolesowanjom zběraja teamy kilometry za cyłkowne hódnoćenje wokrjesa w přirunanju z wobdźělnikami ze wšeho swěta.
Zaso sportować
Budyšin. Budyske sportowe towarstwo lochkoatletow Čerwjeno-běli 90 je tribunowy běh iniciěrowało. Přewjesć chcedźa jón pjatk, 10. julija, na Młynkec łuce.
Na gmejnsku radu
Hórki. Na swojim posedźenju štwórtk, 9. julija, w 19.30 hodź. ma so Chróšćanska gmejnska rada z wjacorymi twarskimi temami zaběrać. W Hórčanskej wohnjowobornej gratowni póńdźe mjez druhim wo torhanje bydlenskeho domu a wo přetwar pódlanskeho twarjenja we wsy. Wobzamknyć radźićeljo tež změja, komu přepodadźa nadawk za wuhotowanje rumnosće ručneho dźěła na Chróšćanskej zakładnej šuli „Jurij Chěžka“.
Zarjad zaso wotewrjeny
Budyšin. Budyski krajnoradny zarjad je zaso bjez terminoweho dorěčenja přistupny. Wuwzaće wobsteji dale za přizwolenje dowolnosće za wodźenje awta na wšitkich třoch stejnišćach w Budyšinje, Kamjencu a Wojerecach. Tam je so dojednanje terminow jako wuspěšne wopokazało.
Změrca so prašeć
Wojerecy. Změrcowska městnosć za wobydlerjow města Wojerec budźe přichodny króć zaso jutře, 7. julija, přistupna. W starej radnicy na Torhosću 1 w stwě 124 móža sej wobydlerjo wot 16 do 17.30 hodź. po radu přińć. Zajimcy móža so nimo toho pod telefonowym čisłom 03571/ 45 71 78, ale tež pisomnje na změrca wobroćić.
Na wodźenja po muzeju
Kamjenc. Muzej zapadneje Łužicy w Kamjencu přeproša w juliju a awgusće stajnje njedźelu w 11 hodź. na wodźenja. Přeprošene su swójby, kaž tež dźědojo a wowki z wnučkami. Pod wěcywustojnym nawodom móža sej zajimcy tak eksponaty we wosebitej wustajeńcy wo kamjentnym času kaž tež swět kamjenjow a zwěrjatow spřistupnić. Dalše swójbne wodźenja přewjeduja wutoru a pjatk, tohorunja w 11 hodź., wodźenja su do zastupneho pjenjeza zapřijate.
Jubilej bjez swjedźenja
Budyšin. Před 70 lětami, 5. julija 1950 běchu po wobzamknjenju Budyskeje měšćanskeje rady Sewjerna dróha na Hasu Dr. Marje Grólmusec přemjenowali. Dana Dubil, jednaćelka Němskeho dźěłarniskeho zwjazka za region, chce na přemjenowanje dopominać a wobkrućić, zo „bě prawje jednu dróhu na česć Marje Grólmusec pomjenować. Dóńt serbskeje pedagogowki a křesćansko-socialnje kaž tež politisce aktiwneje žurnalistki dyrbi wostać prezentny.“ Spjećowarka nacionalsocialistiskeho režima je 1944 w koncentraciskim lěhwje Ravensbrück zahinyła.
Posledni króć „Greta“
