Busowe dwórnišćo zawrjene

štwórtk, 04. julija 2019 spisane wot:

Budyšin. Spočatk lětnich prózdnin Bu­dyske busowe dwórnišćo na tři tydźenje dróhotwarskich dźěłow dla zawru. W tym času zarjaduja prowizoriske zastanišća na Mukowej kaž tež mjez Walskej a Bebelowym naměstom. Wot 29. julija budźe busowe dwórnišćo zaso wužiwajomne. Potom wotrězk mjez Mukowej a Liebknechtowej dospołnje zawru.

Na štomy kedźbować

Budyšin. Měšćanske zarjadnistwo Budyšin skedźbnja na to, zo móhli so při tuchwilnej suchoće wot wonkownje strowych štomow nadobo hałzy wotłamać. Přičina je, zo po lońšim suchim lěću deficit wody dawno hišće narunany njeje. Zo bychu njetrjebawšim rizikam zadźěwali, njeměli ludźo dlěši čas pod štomami w parkach abo druhdźe přebywać. Štóž potajkim chłódkojte městno pyta, měł stajnje sobu na štomy kedźbować. Za to nastajeja nětko tež wotpowědne taflički.

Kak so při diabetes zežiwić?

wutora, 02. julija 2019 spisane wot:

Pančicy-Kukow. Nowy slěd zarjadowanjow pod hesłom „Zetkanišćo strowota“ zahaja jutře, srjedu, w 19 hodź. w zežiwjenskim a zelowym centrumje klóštra Marijineje hwězdy w Pančicach-Kukowje. Z nim zwjazuja medicinski fachowy dźěl z praktiskimi zežiwjenskowědomostnymi dopóznaćemi. Jutře posrědkuje lěkarka za nutřkownu medicinu Sabine Mickel najnowše dopóznaća wo diabetes. K tomu poda Kerstin Mickan pokiwy k prawemu zežiwjenju při tejle chorosći.

Lětnja bara zaso wočini

Budyšin. Lětnja bara Sundowner na zahrodźe Serbskeho ludoweho ansambla budźe wot 4. julija hač do 1. septembra zaso přistupna, a to stajnje wot srjedy hač do njedźele wot 17 hodź.

Pokazaja film wo wójsku

póndźela, 01. julija 2019 spisane wot:
Budyšin. Na dworje Budyskeho hrodu pokročuja jutře, wutoru, z dalšim filmowym předstajenjom pod hołym njebjom. Wot 21.30 hodź. pokazaja tam produkciju „NVA“ w režiji Leandera Haußmanna a awtora Thomasa Brussiga. Pask jedna we 80tych lětach a je satira na wójsko, w kotrymž bě kóždy młody muž wot 18 lět winowaty, znajmjeńša połdra lětsa słužić.

Wulka party a wjele sporta

pjatk, 28. junija 2019 spisane wot:

Koćina. Dobru měšeńcu za młódšich a staršich wobydlerjow a hosći lubi kónctydźenski wjesny swjedźeń w Koćinje. Tam organizuje młodźinski klub tak mjenowanu asparagusowu party. Za to su sej dźensa a jutře wjacorych DJjow přeprosyli. Nimo toho chcedźa tójšto sportować. Tak hraja jutře wot 11 hodź. dźěći kopańcu, w 13 hodź. přizamknje so koparski turněr wjesnych mustwow a wot 19 hodź. budu žony kehelować. Njedźelu wot 10 hodź. su mužojo přeprošeni so w kehelowanju wubědźować.

Hudźba a literatura

Rowno. Na hudźbno-literarne popołdnjo w lěsu přeproša Rowniske glosy a tam­niša dźiwadłowa skupina zajutřišim, njedźelu, w 14.30 hodź. k bywšej hajnkowni Haseloff při Miłoraskej dróze. Tam poskića serbske spěwy a krótkopowědančka kaž tež kofej a tykanc k posylnjenju .

Młodźinski orchester přijědźe

Chrósćicy. Na zhromadny wječor z młodźinskim orchesterom z Leśnicy přeproša gmejna Chrósćicy srjedu, 3. julija, wot 19 hodź na Smolic statok w Hórkach.

Wo čělnje derjeměće je postarane.

Koncertuja na druhim městnje

srjeda, 26. junija 2019 spisane wot:

Radwor. Swój lětni koncert přewjedźe Radworski chór Meja njedźelu, 30. junija, w chłódku štomow na farskej zahrodźe při Radworskej cyrkwi, nic kaž hewak před Starej cyrkwičku. Wot 15.30 hodź. poskića swačinu. Koncert započnje so w 16 hodź. Nimo Mejanow wuhotuje program chór Svatobor z čěskeho městačka Sušice južnje Plzenja. Wón přijědźe prěni raz do Łužicy. Wječor wuklinči ze zhromadnym spěwom a bjesadu.

Twarja parkowanišćo

Wojerecy. Při tak mjenowanym zarjadniskim parku na Pforzheimskim naměsće we Wojerecach su tele dny parkowanišćo wutwarjeć započeli. Hač do kónca oktobra maja tam 104 městna za wosobowe awta, tři městna za awta zbrašenych, šěsć městnow za caravany a dwě městnje za busy nastać. Dale nastaja tam 17 sćežorow za wobswětlenje a nasadźa 30 štomow. Dohromady nałoža za parkowanišćo wjace hač 580 000 eurow.

„Mały Muk“ na jewišću

wutora, 25. junija 2019 spisane wot:

Budyšin. Serbske dźěćace dźiwadło při NSLDź předstaji jutře, srjedu, hru „Mały Muk“, a to w 10 hodź. na hłownym jewišću Němsko-Serbskeho ludoweho dźiwadła.

Na čitanje do „Wódneho muža“

Malešecy. Župa „Jan Arnošt Smoler“ a Domowinska skupina Malešecy přeprošatej štwórtk, 27. junija, w 14 hodź. na čitanje Křesćana Krawca we „Wódnym mužu“ w Malešecach. Awtor čita ze swojeje knihi „Das Ende vom Paradies“. Čitanje zarjaduje so do slěda župnych zarjadowanjow k wozrodźenju serbšćiny w Malešanskej kónčinje. Zastup je darmotny.

Z wuchowarjemi rěče rěčeć

póndźela, 24. junija 2019 spisane wot:

Budyšin. Na swoje přichodne zetkanje přeproša Budyski klub wuchowarjow rěče jutře, 25. junija, we 18 hodź. do Budyskeho hosćenca „Sprjewina pensija“. Tam njezměja tónraz referenta, ale publikum móže sam swoje starosće kołowokoło rěče­ přednjesć. Rozmołwnaj partneraj budźetaj Jörg Bönisch a Sieghard Kozel. Moderaciju změje Diethold Tietz. Wšitcy su přeprošeni. Zastup je darmotny.

Póńdźe wo poměr k Ruskej

Budyšin. Měšćanski zwjazk Lěwicy přeproša za jutře, wutoru, w 17 hodź. do Budyskeje Röhrscheidtoweje bašty na diskusijne zarjadowanje pod hesłom „Měniš,­ zo chcedźa Rusojo wójnu? – Zaprajenje němskeje wonkowneje politiki w poměrje k Ruskej“. Z hosćom budźetaj bywši wonkopolitiski rěčnik frakcije Lěwicy­ w zwjazkowym sejmje Wolfgang Gehrcke a žurnalistka Christiane Reymann. Zarjadowanje moderěruje zapósłanc Sakskeho krajneho sejma Heiko Kozel (Lěwica). Zastup je darmotny.

Termin sej zapisać

pjatk, 21. junija 2019 spisane wot:

Budyšin. Lětuši dnjowy wulět Serbskeho šulskeho towarstwa za seniorow a dalšich zajimcow budźe 28. awgusta. Wobdźělnicy pojědu do Choćebuza-Rogeńca, wopytaja dožiwjensku zahrodu pola Noweje Wsy a Bórkowy, hdźež chcedźa tež čołmikować. Zajimcy měli sej termin hižo nětko zapisać, prosy organizator Měrćin Krawc. Dalše informacije budu sčasom rozpósłane.

Pjelsćić wuknyć

Dołha Boršć. Stare rjemjesło pjelsćenja předstaja jutře, sobotu, wot 9 do 13 hodź. na přirodoškitnej staciji wuchodneje Hornjeje Łužicy w Dołhej Boršći pola Mikowa. Sobudźěłaćerka Jana Uecker zajimcam rozłoži, kak móža kreatiwnje pjelsćene wudźěłki zhotowić. Wobdźělenje je darmotne.

Do kina pod hołym njebjom

Budyšin. Za čas Budyskeho lětnjeho dźiwadła pokazaja tež lětsa na Budyskim hrodźe stajnje wutoru w 21.30 hodź. kino pod hołym njebjom. Jako prěni předstaja přichodnu wutoru, 25. junija, film „Gundermann“, kotryž rysuje žiwjenje spěwy­twórca a bagrownika Gerharda Gundermanna.

Hdźež literatura nastawa

Do domu Njechorńskeho

wutora, 18. junija 2019 spisane wot:

Njechorń. Dźeń wotewrjenych duri přewjedźe župa „Jan Arnošt Smoler“ sobotu, 22. junija, wot 14 do 17 hodź. w Domje Měrćina Nowaka-Njechorńskeho. Tam přeprošeja na pućowanje po šćežkach Měrćina Nowaka wokoło Njechornja. W domje poskićeja wodźenja w serbskej a němskej rěči, w ateljeju čita dr. Ruth Thiemannowa. Tež za dźěći budźe zaběra přihotowana. Dale pokazaja zhromadnje ze Serbskim kulturnym archiwom krótkofilmaj wo Měrćinje Nowaku z lěta 1975. Tež kofej a tykanc budźe w poskitku. Župne předsydstwo wšitkich zajimcow na přijomnu bjesadu a na zajimawe popołdnjo cyle wutrobnje wita.

Kak chcemy stari być?

Wojerecy. We Wojerowskej měšćanskej bibliotece na Bonhoefferowej wotměje so jutře, srjedu, w 15 hodź. dalše zarjadowanje w rjedźe „Etika a literatura“ hromadźe z łužiskej jězorinowej kliniku. Pod hesłom „Kak chcemy stari być – kak stari chcemy być?“ porěča wo tym, kotre žiwjenske formy su za staršich ludźi trěbne a kmane.

RCW poskići nowej kursaj

póndźela, 17. junija 2019 spisane wot:

Budyšin/Pančicy-Kukow. W nowym šulskim lěće poskići Rěčny centrum WITAJ wosebitej kursaj za staršich serbšćinu wuknjacych dźěći a dalšich zajimowanych dorosćenych. W Budyšinje wotměje so kurs wot 2. septembra 2019 hač do 13. januara 2020 stajnje póndźelu wot 17.30 do 19 hodź. w Serbskim a šulskim zetkawanskim centrumje na Friedricha Listowej 8. Kurs w Pančicach-Kukowje traje wot 2. septembra hač do 6. januara­ 2020 a budźe stajnje póndźelu wot 19 do 20.30 hodź. w Šuli Ćišinskeho. Při­zjewjenja přijimuje­ RCW e-mailnje pod abo pod tel. čo. 03591/ 550 400.

Přesadźuja namakane wěcy

Budyšin. Přichodne zjawne přesadźowanje namakanych wěcow wotměje so jutře, wutoru, w 16.30 hodź. w delnim foyeru Budyskeje radnicy. Hižo wot 15.30 hodź. móža sej zajimcy poskićene wěcy wobhladać. Přesadźować chcedźa mjez druhim žonjace a mužace kolesa, mountainbiki, handyje a časniki. Nimo toho přińdu wšelka drasta a dalše mjeńše namakanki pod hamor. Štóž chce něšto kupić, ma to na městnje zapłaćić a wupokaz předpołožić.

Serbska debata

nowostki LND