Do serbskeho archiwa
Budyšin. Na cyłoněmskim dnju archiwow wobdźělitej so jutře, sobotu, tež Serbski kulturny archiw a Serbska centralna biblioteka w Budyskim Serbskim instituće. Wot 14 hodź. su zajimcy na čitanje přeprošeni, hdźež zhonja wo priwatnych, oficialnych a kurioznych zdźělenkach z listow znatych abo zabytych serbskich wosobinow. W 14.30 hodź. započnje so crashkurs za čitanje serbskeje fraktury w historiskich dokumentach. Wot 15 hodź. wodźa wopytowarjow serbsce a němsce po archiwje a bibliotece, w 15.30 hodź. pokazaja film „Lěto 1950 w Serbach“.
Z wyšim měšćanostu porěčeć
Delnja Kina. Na wobydlerski forum přeprosy Budyski wyši měšćanosta Alexander Ahrens (SPD) wobydlerjow Delnjeje Kiny wutoru, 10. měrca, w 19 hodź. do tamnišeje gratownje wohnjoweje wobory. Dale wobdźěla so twarska měšćanostka a jeje kolega za financy, zastupjerjo policije a mobilneho młodźinskeho dźěła, kotřiž na prašenja wobydlerjow wotmołwjeja.
Lajkojo dźiwadźeleja
Archiw přistupny
Hotowarniče so zetkaja
Chrósćicy. Župa „Michał Hórnik“ přeproša na zetkanje hotowarničow katolskeje narodneje drasty, kotrež je jutře, štwórtk, w 19 hodź. w Chróšćanskim gmejnskim a kulturnym centrumje na Hórnikowej 34. Zawodny přednošk pod hesłom „Kaž we swěće moda je“ poda Andrea Pawlikowa z Budyskeho Serbskeho muzeja. Přizamknje so diskusija.
Skupinarjo přeprošeni
Pančicy-Kukow. Domowinska skupina Pančicy-Kukow přeproša swojich čłonow a dalšich zajimcow na přichodne zarjadowanje jutře, 5. měrca, w 19 hodź. w awli Šule Ćišinskeho. Tam přednošuje Pětr Rab z Kukowa ze swětłowobrazami wo swojich dožiwjenjach w srjedźnej Rumunskej. Wšitcy su wutrobnje witani.
Znowa wosebita přehladka
Jutře na premjeru
Budyšin. Nowa inscenacija Serbskeho činohrajneho studija w Němsko-Serbskim ludowym dźiwadle „Greta“ změje jutře, srjedu, w 19.30 hodź. w Budyskim Dźiwadle na hrodźe premjeru. Hraja Maria-Helena Bretschneiderec, Katja Hrjehorjec a Clemens Bobka. Wšitcy přećeljo serbskeho dźiwadła su wutrobnje přeprošeni.
Čita z manuskripta
Budyšin. Žónska unija Budyskeho wokrjesa planuje lětsa wjacore zarjadowanja pod hesłom „30 lět znowazjednoćenje“. Prěnje wotměje so jutře, srjedu, w 19 hodź. w Budyskim hotelu „Residence“ na Wjelećanskej. Tam čita bywša zapósłanča zwjazkoweho sejma Marja Michałkowa ze swojeho knižneho manuskripta. Tak dopomina so mjez druhim na wólby poslednjeje Ludoweje komory NDR před 30 lětami, kotrejž je wona tohorunja přisłušała. Po čitanju budźe składnosć k diskusiji.
Nowa wustajeńca
Hotowarniče so zetkaja
Chrósćicy. Župa „Michał Hórnik“ přeproša na zetkanje hotowarničow serbskeje katolskeje narodneje drasty, kotrež budźe štwórtk, 5. měrca, w 19 hodź w nowym Chróšćanskim gmejnskim a kulturnym centrumje na Hórnikowej 34. Zawodny přednošk pod hesłom „Kaž we swěće moda je“ poda Andrea Pawlikowa z Budyskeho Serbskeho muzeja. Přizamknje so diskusija.
Stajne blido Zelenych
Kamjenc. Přichodne stajne blido Zelenych wotměje so jutře, wutoru, wot 19 hodź. w Kamjenskim hosćencu „La Piazza“ na Zwingerowej. Z hosćom budźe zapósłanc krajneho sejma Valentin Lippmann, zastupowacy předsyda frakcije Zwjazka 90/Zelenych. Z nim chcedźa so předewsěm wo tym rozmołwjeć, kak hodźało so w Swobodnym staće Sakskej wěstotne połoženje polěpšić.
Regionalne wolije sej zbližić
Wojerecy. Rěpik, len a dalše rostlinske wolije steja w srjedźišću přichodneho zarjadowanja „Klewernje a kreatiwnje warić“ srjedu, 4. měrca, w 19 hodź. na Wojerowskej dźěćacej a młodźinskej farmje. Zežiwjenska wědomostnica Elžbjeta Hojerjowa tam rozłoži, kak wolije skutkuja a kak hodźa so w kuchni wužiwać.
Rozprawjatej wo putnikowanju
Chrósćicy. Poslednje zarjadowanje kulturneje zymy 2019/2020 w Chróšćanskej putniskej hospodźe jutře, sobotu, w 19.45 hodź. wuhotujetej putniska mać Monika Gerdesowa a Beate Gruß. Wonej stej w běhu dwanaće lět po etapach wjace hač 3 000 kilometrow wot Zhorjelca hač do Španiskeje putnikowałoj. Wo poslednjej etapje z Leóna do Santiaga de Compostela budźetej wonej jutře němsce rozprawjeć. Hižo w 16 hodź. poběži tam w serbskim dźěćacym kinje trikowy film „Šmjatańca w raju bajkow“.
Wo swójbnych mjenach
Budyšin. Přichodne zarjadowanje w rjedźe Budyskeje akademije wotměje so póndźelu, 2. měrca, we 18 hodź. w čitarni statneje studijneje akademije na Lubijskej. Referent je znaty slědźer mjenow prof. dr. Jürgen Udolph z Göttingenskeje akademije wědomosćow. Dokelž jewi so w Sakskej wulki podźěl słowjanskich a serbskich mjenow, so referent tež tutej temje wěnuje. Zastup je darmotny.
Předstaja šulski projekt
Njebjelčicy. Iniciatiwa „Kleinsteinschule“ w Njebjelčanskej gmejnje chce dwurěčnu zakładnu a pozdźišo wyšu šulu wutworić. Na zakładźe reformoweje pedagogiki a pod třěchu dwurěčnosće wopřijima projekt tři nošne stołpy, mjenujcy demokratiju, ekologiju/wnučkokmanosć a cyłotnosć. Jutře, 28. februara, so iniciatiwa „Kleinsteinschule“ w 19.30 hodź. w Njebjelčanskim gmejnskim centrumje předstaji. Wšitcy zajimcy su jutře wječor wutrobnje witani.
Bywši wojak rozprawja
Nowoslicy. Wo swojim zasadźenju jako wojak Zwjazkoweje wobory w Afghanistanje powěda Lothar Girschele jutře, pjatk, w 19.30 hodź. w Nowosličanskim kulturnym domje. Ze zajimawymi wobrazami rozprawja wón wo dźěle němskich jednotkow w dalokej cuzbje. Podać pak chce runje tak dohlad do wšědneho žiwjenja tamnišich wobydlerjow. Na zarjadowanje wjesna rada Nowoslic wšitkich zajimcow wutrobnje přeproša.
Wotewru wustajeńcu
Bywši wojak powěda
Nowoslicy. Wo swojim zasadźenju jako wojak Zwjazkoweje wobory w Afghanistanje powěda Lothar Girschele pjatk, 28. februara, w 19.30 hodź. w Nowosličanskim kulturnym domje. Ze zajimawymi wobrazami rozprawja wón wo dźěle němskich jednotkow w dalokej cuzbje, podać pak chce runje tak dohlad do wšědneho žiwjenja tamnišich wobydlerjow. Na zarjadowanje Nowosličanska wjesna rada wšitkich zajimcow wutrobnje přeproša.
Kolekcije wotedać
Budyšin. Hač do pjatka, 28. februara, maja jejkadebjerjo swoje kolekcije za wubědźowanje wo najrjeńše serbske jutrowne jejko lěta 2020 wotedać. Na to skedźbnja nowinski rěčnik Domowiny Marcel Brauman w zdźělence. Kolekcije přijimuja w Budyskej Serbskej kulturnej informaciji kaž tež w Slepjanskim, Wojerowskim a Chróšćanskim běrowje třěšneje organizacije Serbow. Dalše informacije dóstanu zajimcy wot Spěchowanskeho kruha za serbsku ludowu kulturu pod telefonowym čisłom 03591/ 550 108 abo pod mejlowej adresu .
Na knižnu premjeru
Budyšin. Štwórtk, 27. februara, sće witani na premjeru Thomasa Kläberoweho wobrazoweho zwjazka „Land.Leben – Na jsy“, a to w Budyskej Smolerjec kniharni w 19.30 hodź. 1955 w južnobraniborskim Beyernje pola Falkenberga rodźeny fotograf wěnuje so mjeztym połsta lět žiwjenju na wsy a tam bydlacym ludźom.
Wopominaja zemrětych
Kamjenc. W kapałce Kamjenskeje chorownje swj. Jana wotměje so jutře, popjelnu srjedu, w 16.30 hodź. wopomnjenska nutrnosć za wšěch, kotřiž su wot nowembra hač do kónca januara w chorowni zemrěli. Njewotwisnje wot nabožneje přisłušnosće su wšitcy přiwuzni a dalši zajimcy přeprošeni.
Serbske koło so zetka
Wojerecy. Zamołwita za serbske naležnosće města Wojerec Gabriela Linakowa přeproša na přichodne Serbske koło, kotrež zetka so zajutřišim, štwórtk, we 18 hodź. w hosćencu „Wodychnjenje“ Kulturneje fabriki na Piwarskej 1. Štóž ma zajim, lóšt a chwile, so na měsačnych zetkanjach k hajenju maćeršćiny wobdźělić, je stajnje lubje witany.
200 lět misionske towarstwa
Jutře na škot
Šunow. Přichodny škotowy turněr serbskich seniorow wotměje so jutře, wutoru, w 14 hodź. w Šunowskej Fabrikskej hospodźe. Wšitcy su na zhromadne kartyplacanje přeprošeni. Tež nowačcy su kaž stajnje wutrobnje witani.
Literarna rozmołwa
Budyšin. Z diskusiju wo knize „W času zeza časa“ z pjera Róže Domašcyneje pokročuja z rjadom wuměłskich rozmołwow Zwjazka serbskich wuměłcow pod titulom „tracTare“ srjedu, 26. februara, we 18 hodź. w Budyskim hosćencu „Tirolske stwy“ na Lessingowej čo. 1. Na zarjadowanje njejsu jenož čłonojo zwjazka wuměłcow přeprošeni, ale wšitcy dalši zajimcy! Organizatorojo so tuž na bohaty wopyt wjesela.
