Poskićeja kursaj čěšćiny
Budyšin. Štóž ma zajim na rěčnym kursu čěšćiny wot 22. julija do 19. awgusta w Praze abo wot 14. awgusta do 5. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: ). Wotpowědny formular a dokładne informacije su na internetnej stronje pod „Nowosće“ přistupne.
Po jutrach serbšćinu wuknyć
Budyšin. Rěčny centrum WITAJ přewjedźe za serbskich šulerjow 2. do 5. lětnika, kotrež zwonka Łužicy wotrostuja, prózdninski rěčny kurs. Pod nawodom studentkow wučerstwa zeznajomja so šulerjo dopołdnja ze serbskim alfabetom a zwučuja w serbskej rěči pisać a čitać. Popołdnju dožiwja wšelake serbskorěčne poskitki. Kurs wotměje so w jutrownych prózdninach wot 19. do 22. apryla wšědnje wot 9 do 15 hodź. w Budyskim Serbskim domje. Někotre městna su hišće swobodne. Přizjewjenja přijimuje hač do 31. měrca Michaela Hrjehorjowa pod telefonowym čisłom 03591/550 414 abo e-mailnje pod .
Dróhu dospołnje zawru
„Serbske kwasy“ wupadnu
Budyšin. Serbski ludowy ansambl dyrbi swoje za jutře, pjatk, w 19.30 hodź. w Budyskej „Krónje“ planowane předstajenje „Serbske kwasy“ chorosće dla wotprajić. Štóž ma hižo kartki, móže je za předstajenje 23. apryla wuměnić, na dobropis zaměnić abo pjenjezy wróćo dóstać.
Wo žiwjenskej kwaliće rěčeć
Radwor. Towarstwo za wuwiće Hornjołužiskeje hole a hatow (OHTL) přeproša jutře, pjatk, w 17 hodź. na zjawne zarjadowanje w Radworskej sportowej hali „Slavia“. We wobłuku zdźěłanja Leaderoweje wuwićoweje strategije za spěchowansku dobu 2023 do 2027 chcedźa wo prašenjach žiwjenskeje kwality zjawnje diskutować. W tym zwisku budźe rozjimane, kotre naprawy maja so přichodnje spěchować a kotre nic. Wobydlerjo kaž tež zastupjerjo komunow, předewzaćow, towarstwow a cyrkwjow su přeprošeni sobu debatować. Dalša diskusija wotměje so 1. apryla w Chróšćanskej „Jednoće“.
Informuja wo spěchowanju
Budyšin. Załožba za serbski lud přeproša wšitkich zajimowanych na prěnje informaciske zarjadowanje, na kotrymž chcedźa wšelake móžnosće spěchowanja předstajić, hladajo předewšěm na nowe směrnicy załožby k programej „Serbska rěč a kultura w strukturnej změnje“. Zarjadowanje budźe online a wotměje so jutře, štwórtk, w 17 hodź. Link wozjewja na internetnej stronje załožby. Wobdźělnicy změja móžnosć swoje prašenja wotbyć. Sobudźěłaćerjo załožby na nje rady wotmołwja.
Zběraja wěcne dary
Smochćicy. Hromadźe z Wenclec transportnym předewzaćom zběraja w Smochčanskim kubłanišću swjateho Bena wěcne dary za ludźi z Ukrainy, kotřiž su do Pólskeje a Rumunskeje ćeknyli. Dary přijimuja na parkowanišću za recepciju, a to wšědnje wot 8.30 do 17 hodź. Předewšěm proša wo sćěhowace wudźěłki: začinjene awtowe kašćiki za prěnju pomoc (tež wotběžane), zubne šćětki a pastu, spanske měchi za dźěći a dorosćenych, spódnju drastu (termo), pjelški, mydło, nuznikowu papjeru, suchu jědź za ćěšenki, měcy, šawle, rukajcy, nohajcy – wšo, štož ćopło dźerži. Čerstwe twory, wodu a druhu drastu njepřijimuja.
Zběraja pjenjezy
Zběraja dary za ćěkancow
Poskićeja kursaj čěšćiny
Budyšin. Štóž ma zajim na rěčnym kursu čěšćiny wot 22. julija do 19. awgusta w Praze abo wot 14. awgusta do 5. septembra w Českich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda. (Póstowe naměsto 2, 02625 Budyšin, e-mail: ). Wotpowědny formular a dokładne informacije su na internetnej stronje pod „Nowosće“ přistupne.
Zahrodu přirodnje wuhotować
Wojerecy. Swoju zahrodu přirodnje wuhotować a hladać je tema zarjadowanja na Wojerowskej dźěćacej a młodźinskej farmje. Wone wotměje so sobotu, 19. měrca, wot 9.30 do 11 hodź. pod nawodom zahrodniskeje mišterki Janiny Gräulich. Wona wobdźělnikam rozłoži, zo słušeja do přirodneje zahrody mjez druhim domjace kerki, po móžnosći lisćowcy a sadowcy a dosć městna za kćějace kwětki. Zajimcy njech přizjewja so z mejlku na .
Zabawne wašnje kubłanja
Budyšin. Serbska centralna biblioteka a Serbski kulturny archiw wobdźělitej so na lětušim dnju archiwow. Tón budźe njedźelu, 6. měrca, wot 14 do 17 hodź. Mjez druhim chcedźa internetne projekty, na přikład digitalizowane zawostajenstwo Bogumiła Šwjele pod hesłom „Z magacina do syće a do swěta“ předstajić. Dale poskića wodźenje „Archiw jako kulturny pomjatk“. Jako wosebitosć pokazaja film „Pjeć wobrazow (nje)wšědneho dźiwadła“ wo serbskim dźiwadle, dźiwadźelnikach a přihladowarjach z lěta 1976 pod režiju Olafa Rosenberga.
Pokazaja jejka ze wšeho swěta
Slepo. Jutrownu wosebitu wustajeńcu „Jeja swěta – Swět jejow“ wotewru jutře, pjatk, w 15 hodź. w Slepjanskim Serbskim kulturnym centrumje. Zestajił je ju bywši konserwator Lipšćanskeho Grassi-muzeja Erhard Schwerin. Přehladka dawa dohlad do swěta debjenych jejkow kołowokoło globusa. Tak pokazaja něhdźe 800 jejow z 45 krajow, kotrež su regionalnje a tematisce rjadowane. Wosebje słowjanske ludy wuchodneje, srjedźneje a juhowuchodneje Europy su jara mnohostronske wuměłske debjenje wuwili. Wustajeńca budźe hač do 1. meje přistupna.
Radźićeljo wuradźuja
Njebjelčicy. Twarski plan „Za Cyrkwinskim pućom“ w Serbskich Pazlicach budźe jedna z temow přichodneho posedźenja Njebjelčanskeje gmejnskeje rady jutře, štwórtk, w 19.30 hodź. na Njebjelčanskim gmejnskim zarjadnistwje. Nimo toho zaběraja so radźićeljo z wujasnjowacymi wustawkami za Serbske Pazlicy a wobkruća nowowuzwolene nawodnistwo Pěskečanskeje dobrowólneje wohnjoweje wobory. Wjacore priwatne twarske naležnosće steja tohorunja na dnjowym porjedźe Njebjelčanskich radźićelow.
Na wikach so wobdźělić
Kamjenc. Po dwěmaj lětomaj přestawki přihotuje Kamjenska měšćanska iniciatiwa 3. Kamjenske kołbaskowe a regionalne wiki. Wone maja so 3. apryla w času wot 12 do 18 hodź. w nutřkownym měsće Lessingoweho města wotměć. Za to přeprošeja zajimowanych wikowarjow, posłužbarjow, towarstwa a akterow, kotřiž móža so ze swojimi poskitkami a idejemi wobdźělić. W srjedźišću maja regionalne wudźěłki z Kamjenca a wokoliny stać. Přizjewjenja su móžne hač do 4. měrca z mejlku na .
Nominuja kandidata
Worklecy. Swojeho kandidata za wólby Worklečanskeho wjesnjanosty nominuje tamniši gmejnski zwjazk na zjawnym zarjadowanju štwórtk, 3. měrca w 19 hodź. we Worklečanskej sportowni. Po 48lětnym hamtskim času Franca Bruska wuzwola lětsa nowu wosobu na čoło gmejny. Do toho wola zajutřišim nowe wjednistwo gmejnskeho zwjazka CDU. Wšitcy zajimcy su wutrobnje přeprošeni.
Kak družiny škitać?
Wojerecy. Nawoda Wojerowskeho zwěrjenca Eugène Bruins porěči zajutřišim, štwórtk, w 17.30 hodź. na Wojerowskim hrodźe wo wažnosći, škitać družiny zwěrjatow a rostlin. Wosebje wěnuje so wón při tym wohroženym chinskim leopardam. Je to prěni dźěl małeho rjadu zarjadowanjow w měrcu. Zajimcy njech přizjewja so pod tel. čo. 03571/ 209 375 00.
Lisćiki za kabaret skazać
Budyšin. Drježdźanski kabaret Herkuleskeule předstaji swój program „Darmotne piwo budźe dróše“ sobotu, 12. měrca, w 20 hodź. w Budyskim Kamjentnym domje a přeproša na zabawny wječor, na kotrymž ma politika zwjeselić. Zastupne lisćiki za 18 eurow (potuńšene 14 eurow) dóstanu zajimcy w předpředani pod www.tixforgigs.com abo e-mailnje pod adresu . Při wječornej kasy płaći zastup 22 eurow (potuńšene 18 eurow). Wobkedźbować ma so prawidło 2G+.
Zastup do zwěrjenca dróši
Biskopicy. W Biskopičanskim zwěrjencu podróša wot 1. apryla zastupne lisćiki. Kaž tamniše měšćanske zarjadnistwo zdźěli, po dźewjeć lětach ze stabilnymi płaćiznami lisćik za dorosćeneho potom štyri eura płaći. To je euro wjace hač dotal. Płaćizna za lětny lisćik podróši so wo pjeć na 25 eurow.
