W jězoru so njekupać
Grodk. Kupanje w Grodkowskim spjatym jězoru je wotnětka zakazane. Wotpowědne postajenje je wokrjes Sprjewja- Nysa wudał. Kaž su při přepytowanju wody zwěsćili, su so tak mjenowane módre algi nadměru rozšěrili. Kontakt z nimi móže pola čłowjeka runje tak kaž pola domjaceho skotu, na přikład pola psa, strowotniske problemy wuskutkować.
Ze wšědneho dnja fararja
Budyšin. Dźeniki fararja Bogumiła Šwjele (1897–1945) steja w srjedźišću knižneho předstajenja z přełožerku a wudawaćelku Annett Brězanec štwórtk, 23. junija, w 19 hodź. w Budyskej Smolerjec kniharni. Šwjela słuša jako redaktor, rěčewědnik a sobuzałožer Domowiny k najwuznamnišim wosobinam serbskich stawiznow. Nimo swojeho wobšěrneho skutkowanja je zapisował nimale poł lětstotka serbsko-němski wšědny dźeń a podawki tehdyšeho časa. Při tym skići tohorunja dohlady do swojeho powołanskeho a priwatneho žiwjenja.
Předstaja wubědźowanje
Wojerecy. Sakski fonds „Čiń sobu“ podpěruje we wšelakich regionach ideje, kotrež towaršnostnu zhromadnosć zesylnja, žiwjenske wuměnjenja polěpša a regionalnemu wuwiću w Swobodnym staće Sakskej přinošuja. Zo móhli prawje wjele idejow zwoprawdźić, je nětko składnosć, wubědźowanje Simul+ we wobłuku informaciskeho zarjadowanja lěpje zeznać. Krajny kuratorij za wjesnu kónčinu přeprošuje tuž zajimcow póndźelu, 20. junija, w 17 hodź. na Wojerowsku dźěćacu a młodźinsku farmu. Nimo projektoweho nawody wubědźowanja Simul+ Christopha Biele steja wopytowarjam dalši fachowcy za prašenja k dispoziciji. Přizjewjenje trěbne njeje.
Na židowskich slědach
Smochćicy. Ze židowskimi korjenjemi a stawiznami w Hornjej Łužicy zaběra so přednošk póndźelu, 20. junija, w 19.30 hodź. w Smochčanskim kubłanišću swjateho Bena. Markus Bauer ze spěchowanskeho kruha Zhorjelskeje synagogi poda dohlad do žiwjenja a skutkowanja Židow a Židowkow na wšelakich městnach regiona. Zarjadowanje wotměje so we wobłuku rjada „Dźěłowy kruh zetkanje ze Židowstwom.“ Přizjewjenje trěbne njeje.
W kubłanišćach SŠT dźěłać
Budyšin. Serbske šulske towarstwo poskići młodostnym wot 15 lět, kotřiž maja zajim na dźěle jako kubłarka/kubłar, prózdninske dźěło w swojich kubłanišćach w Hornjej a Delnjej Łužicy. Zajimcy njech so z krótkim požadanjom pod přizjewja.
Wo wuznamnych wosobinach
Budyšin. Na wosebite wodźenje přeprošuje Muzej Budyšin sobotu, 18. junija, w 15 hodź. Muzeologa Hagen Schulz powjedźe wobdźělnikow po slědach wuznamnych wosobinow města, po kotrychž buchu hasy pomjenowane. Z wutwarom wuchodneho a zapadneho dźěla města w 19. lětstotku nastachu nowe puće, kotrež po wuznamnych wosobinach pomjenowachu, mjez druhim po wyšim měšćanosće Käubleru a mějićelom ćišćernje Weigangu. Po Druhej swětowej wójnje dachu někotre mjena politiskich přičin dla změnić. Po politiskim přewróće 1989 někotre mjena znowa změnichu. Wobdźělenje na wodźenju płaći 3,50 eurow.
Maja swobodne městna
Kokoš w srjedźišću
Stróža. Mjeztym dwě lěće so zarjadnistwo biosferoweho rezerwata Hornjołužiska hola a haty prócuje, na swojim teritoriju zaso zasydlić saksku kokoš, kotraž je wot wotemrěća wohrožena. Wo dotalnych wuspěchach projekta informuja na zjawnym zarjadowanju pjatk, 17. junija, wot 14 hodź. w Stróžanskim Domje tysac hatow. Zajimcy su wutrobnje witani.
Ideje wobydlerjow prašane
Chrósćicy. Gmejna Chrósćicy nastaji tučasnje wuwićowy koncept za cyłu gmejnu. Při wudźěłanju idejow za přichod su wobydlerjo wšitkich wsow wutrobnje přeprošeni sobu skutkować. Wobydlerjo, kotřiž so za sobudźěło zajimuja, so njech hač do 27. junija na Chróšćanskej gmejnje pod telefonowym čisłom 035796/ 96 210 abo z mejlku na přizjewja.
Poradźuje darmotnje
Budyšin. Prawiznik a wokrjesny radźićel Lěwicy Hajko Kozel poskići jutře, wutoru, wot 15 do 17 hodź. dalši raz darmotne socialne poradźowanje. Wone hodźi so tohorunja w ruskej a ukrainskej rěči přewjesć a wotměje so we wobydlerskim běrowje Lěwicy na Šulerskej w Budyšinje. Zajimcy njech přizjewja so pod telefonowym čisłom 035932/ 363727.
Radźićeljo wuradźuja
Pančicy-Kukow. Leaderowa wuwićowa strategija budźe jedna z temow přichodneho posedźenja gmejnskeje rady Pančicy-Kukow jutře, wutoru, w 19 hodź. we Wotrowskej starej šuli. Dale změja radźićeljo wjacore twarske naležnosće na blidźe. Mjez druhim póńdźe wo nowotwar pawiljona a a hrajkanišća na terenje bywšeho hosćenca w Pančicach.
Wokoło pomnika rjedźić
Pančicy-Kukow. Čłonojo Domowinskeje skupiny Pančicy-Kukow a dalši zajimcy su přeprošeni pomhać při rjedźenju wokoło pomnika Jakuba Barta-Ćišinskeho w Lipju. Dźěłowe zasadźenje wotměje so jutře, 14. junija, wot 17 hodź. Wobdźělnicy njech přinjesu sej kmany grat sobu. Kóžda pomocliwa ruka je witana.
Přeprošuja do parka
Přwjedu zaso turněr
Holešowska Dubrawka. Po dwěmaj lětomaj přestawki přeprošuje Njeswačanske jěchanske towarstwo sobotu, 11., a njedźelu, 12. junija, zaso na jěchanski a skakanski turněr do Holešowskoje Dubrawki. Lětsa nadźijeja so zaso wjele přihladowarjow, kotřiž móža sej konjacy sport hač k srjedźnej klasy wobhladać. Jako wosebity wjeršk prezentuja wokrjesne mišterstwa Budyskeho wokrjesa. Nimo sportowych zarjadowanjow budźe tež wo ćělne derjeměće postarane. Za małych hosći planuja wulku paslensku drohu, skakanišća a wšelake budki. Sobotu přewjedu tradicionalny jěchanski bal ze šlagrowej a rejwanskej hudźbu. Hižo pjatk dožiwja zajimcy w jěchanskej hali hudźbnu rejwansku nóc.
Lisćiki dobyć
W šuli swjeća
Pančicy-Kukow. Na šulski swjedźeń Serbskeje zakładneje „Šule Ćišinskeho“ su wšitcy zajimcy jutře, pjatk, najwutrobnišo do Pančic-Kukowa přeprošeni. W 15 hodź. započnje so pisany program na dworje kubłanišća. Přizamknje so zabawa za dźěći. Wo ćělne derjeměće je postarane. Nimo toho wobsteji móžnosć sej ponowjene rumnosće šule wobhladać. Šulske wjednistwo nadźija so prawje bohateho wopyta.
Narodninarjej Sławu zaspěwali
Chrósćicy. Škotowarka a 24 škotowarjow je so předwčerawšim na turněrje serbskich seniorow w Chróšćanskim Krawčikec hosćencu wobdźěliło. Spočatnje su škotowarjej, sobuzałožerjej a wjelelětnemu nawodźe turněra Janej Macce k jeho narodninam trójnu „Sławu“ zaspěwali. Z 3 046 dypkami wopokaza so Wolfgang Kühn jako najlěpši škotowar dnja před Křesćanom Weclichom (2 589) a Herbertom Krečmarjom (2 134). Cyłkownje nawjeduje dale Herbert Krečmar před Wolfgangom Kühnom a Siegfriedom Rawu. Přichodny turněr wotměje so 28. junija w Nowosličanskim kulturnym domje.
Lěpje widźeć
Wojerecy. Prawe widźenje a wotpowědne pomocne srědki za to steja w srjedźišću zarjadowanja štwórtk, 2. junija, wot 10 do 13 hodź. we Wojerowskej měšćanskej bibliotece „Brigitte Reimann“. Před biblioteku móža so zajimcy w infomobilu wobhonić, kotre móžnosće lěpšeho widźenja wobsteja. Dale móža so najwšelakoriše poskitki online wuspytać. Nimo toho informuja wo wukonach chorobnych kasow a zarjadnistwow. Akciski dźeń zarjaduje Němski centrum za čitanje bjez zadźěwkow (dzb lesen).
Powjedu po wustajeńcy
Budyšin. Kak hodźi so narodna drasta na moderne wašnje zwobraznić? Z tymle nadawkom zaběra so słowakska skupina wuměłcow a etnologow. Wuměłska wustajeńca „Party w 21. lětstotku“, kotraž pokazuje bohatosć a rjanosć słowakskeje narodneje drasty, skića tež Serbam za wožiwjenje narodneje drasty zajimawu inspiraciju. Kuratorka Andrea Pawlikowa powjedźe swjatkownu njedźelu, 5. junija, w 14 hodź. w serbskej a w 15 hodź. w němskej rěči po wustajeńcy. Zajimcy njech přizjewja so pod telefonowym čisłom 03591/ 270 870 0 abo e-mejlnje pod .
Na hinašim městnje
Chrósćicy. Přichodny škotowy turněr serbskich seniorow wotměje so jutře, 31. meje. Hinak hač dotal připowědźene pak njehraja wuměnkarjo w Radworskej „Zelenej hałžce“, ale w Chróšćanskim Krawčikec hosćencu, zdźěli organizator Měrćin Nowak. Započatk budźe po zwučenym wašnju w 14 hodź. Přichodny turněr w juniju wotměje so w Nowoslicach.
Spušća wudawki
Sprjewiny Doł. Na dobro wjacorych towarstwow w gmejnje Sprjewiny Doł bě rozsud tamnišich gmejnskich radźićelow na njedawnym posedźenju. Woni wobzamknychu, wšitkim w gmejnskich imobilijach zaměstnjenym towarstwam połojcu zawodowych wudawkow w zašłymaj pandemijowymaj lětomaj spušćić. Z toho profituja mjez druhim wjesnej klubaj w Bórkhamorje a w Bórku kaž tež sportowe towarstwo w Nowym Měsće nad Sprjewju. Pozadk je, zo mějachu towarstwa w zašłymaj lětomaj lědma dochody. Na tamnym boku su wone wažne za wjesnu zhromadnosć. Přidatne wudawki za gmejnsku kasu wučinjeja nětko 12 300 eurow.
